《生活e5台语，台语e5生活》

 | | | 转寄

分享ê喜乐人生

作者 林俊育 Lîm Chùn-io̍k 2006.03.26

兄弟ah,当然我无实在想讲我已经达到chit-ê目标a;不过我一生唯一ê目标就是bē记得后面ê代志，极力来争取头前ê事。所以我为tio̍h boeh得tio̍h奖品，向目标一直走。Chit-ê奖品就是上主通过基督耶稣召我去顶面领受ê永生。(红皮圣经腓立比3: 13~14)

一年过了koh一年，匆匆进入「不惑之年」。家己内心不时充满喜乐kap感恩，朋友时时问讲：你喜乐人生ê秘诀mā讲kóa来听leh。我回答讲：基督ê疼就是分享，分享ê人生充满喜乐。

上帝hō͘每一人ê恩赐无仝，有五千ê,有二千ê,有一千ê,mā有无够一千ê,甚至koh-khah少。我感觉我有一千ê恩赐，kan-ta杯á ê五分之一，但是我无怨叹he空空无物ê五分之四，我却重视把握所有ê五分之一，充分kap大家分享，结果上帝ê祝福hō͘我ê杯满出来，所以ē-tàng时时充满喜乐kap感恩，生命力充足，对有意义ê tāi-chì做起来lóng bē感觉厌倦。

生命力ê源头是「kap主同工」
二十七岁结婚了后，我开始创业外销台湾制ê相机，hit时牵手引chhōa我行入教会，也热心参与教会活动，但无想boeh洗礼。Hit当时讲tio̍h相机，lóng是日本制ê天下，我khah àn怎广告推销，seng-lí lóng无起色，每工郁卒过日。有一工新加坡ê客户来phoe讲boeh总代理我ê相机，phoe头有一句「与主同工」(华语)。Chit张phoe带hō͘我事业上ê新光景，chit句话也phah开我心灵ê门窗，hō͘我开始研读圣经，追求基督ê真理。Hit时我三十三岁受洗礼，从án-ne,「kap主同工」带hō͘我新生命。

「kap主同工」是「无私ê奉差遣」
受洗了后，我带tio̍h「kap主同工」ê喜乐，tùi关怀盲人开始「奉差遣」ê事工。我tùi四福音书领悟tio̍h耶稣基督ài咱「疼你ê厝边」，「疼就是tī别人ê需要上看tio̍h家己ê责任」，hiah-ê盲朋友就是我ê「厝边」lah。我辞掉教会其他五项事工职务，全心投入盲人事工。

1990年，我决定boeh移居美国ê时，盲朋友烦恼失去我对in ê关心。我对in讲：「Tio̍h óa靠上帝，m̄-thang óa靠人。」In有kā我ê话听入耳，in也真giám硬自立自强，我mā受感动继续陪伴in行过chit段坎坷ê路。结果教会ê盲人事工无因为我出国来受影响，颠倒发展到成立「视障关怀基金会」。

「无私ê奉差遣」tio̍h「向标竿直走」
高尔夫(go-lu-hu=golf)球是我siōng kah意ê休闲运动，因为phah高尔夫球m̄但ē-tàng陶冶身心，iáu ē-tàng领会tio̍h有ná人生历程ê体验。高尔夫球果岭顶ê球洞lóng插一支旗杆来做目标ê指引，thang hō͘咱「向标杆直走」(腓立比3:14)。「过去ê种种譬如昨日死，未来ê种种譬如今日生」，真正ê人生lóng得重新开始，phah过ê一杆已成既定ê事实，mài计较是好是bái,期待新ê一杆hō͘咱重新开始ê机会，ài有「重生」ê觉悟来好好把握每一个挥杆。

我投入每一个事工，lóng kā伊当做是teh phah高尔夫球，「向标杆直走」lóng bē厌倦，充满喜乐。Hit粒小白球kah-ná咱ê生命体，第一洞球入洞了后，kah-ná完成人生ê第一个目标，tio̍h-koh设定第二个目标，就是kah-ná第二球洞ê旗杆。照án-ne落去，每一个新洞to̍h是我ê「第二春」。Phah完十八洞，kah-ná行完一生，总杆数加起来就是我boeh向上帝交差ê成果。

「向标竿直走」tio̍h注意「情绪伤害十条诫」
我读过彭德修牧师着作ê《情绪伤害》了后写一篇「情绪伤害十条诫」刊tī台湾教会公报社第646期(请参观http://taigi.fhl.net/reading13.hetl)，这是我时时刻刻警醒，来将「恶性循环」ê情绪转变做「良性循环」，只有tī良性循环ê状况下，chiah有永续ê喜乐。

「向标竿直走」tio̍h靠「运动」来充电
我三十五岁受选做执事，当时因事业等无闲kah无时间运动，连giâ奉献袋to giâ beh起来，医生讲我欠运动。Koh听一位tī体专teh做教授ê长老分享讲：「希特勒无ài运动，所以kan-ta想beh thâi人....运动到流汗，用烧水洗身躯了后所做ê决定chiah会正确。」从án-ne,我就开始phah高尔夫、网球、乒乓球、泅水、钓鱼、chhū(滑)雪等等，所以我有够额ê体力kap智慧「向标竿直走」，lóng bē厌倦，koh充满喜乐，感谢主。(台湾教会公报社第2820期3.13.06)