《生活e5台语，台语e5生活》

 | | | 转寄

白话字tī教会内v.s.教会外

作者 Chuniok 2005.11.13

台湾长老教会对保存台语有不可否认ê功劳，但he是咱前一代ê努力成果，咱chit代却成做台语白话字ê杀手。

2001年九月李勤岸博士受聘来哈佛大学教台语，伊mā受邀请来波士顿台湾基督教会ê成人主日学教阮台语。我tam-tio̍h母语ê滋味hiah-ni̍h甘甜，从án-ne投入台语文运动，感觉拯救台语是咱chit代ê责任。 2002年暑假，我跟tòe李勤岸教授转来台湾参加各种ê台语营，tú-tio̍h人to̍h展讲我是长老教会ê会友；但我得tio̍h ê回应是：「Lín长老教会上无路用，干单一个郑儿玉牧师有teh推广白话字！」当时koh发见台湾罗马字协会ê会员绝大部分lóng是非长老教会基督徒，我从án-ne lóng m̄敢koh讲我是长老教会ê会友。

我每pái转来台湾，lóng chhōe机会来推广白话字台语文，教会内ê会友反应真冷淡，甚至反面讲华语to̍h真好势用，台语会晓讲to̍h好，thài-tio̍h koh学台湾罗马字？我讲bē晓读写台语ê人mā是台语ê文盲，hiah-ê人无感觉台语文盲ê悲哀，chit种放弃家己母语ê人，干单thang 用「无药医」来形容。有一位台湾神学院博士班ê会友kā我讲，白话字是必修科，但大家lóng想办法应付应付，我听了强boeh吐血，讲咱chit代是白话字ê杀手，实在无过分lah!

2002年去马偕ê故乡游学，自认为是马偕研究ê专家ê陈长老来做导游，伊确实对马偕有彻底ê研究，但伊提供资料ê马偕纪念碑顶面ê马偕夫人ê名写做 “Tiuⁿ Chhang-miâⁿ”，hit-ê “miâ”加一个鼻音记号to̍h m̄-tio̍h,伊koh辩解讲án-ne外国人才看有，我无话thang讲。台湾长老教会历史大部分是白话字ê文献，伊讲伊无精通白话字，ē-tàng成做马偕研究ê专家，实在有伊ê撇步。

最近出版《圣诗歌―台湾第一本教会圣诗的历史溯源》ê着者，伊将德文写ê博士论文用华语改写来出版ê用心令人佩服。遗憾ê是白话字ê汉译部分，其实汉字翻写kap华译混杂，实在难得了解真正意义，甚至有漏译，失错ê所在济kah非常离谱。伊无先学会晓白话字，有法度以白话字历史文献来完成伊ê博士论文，mā是真天才。伊若学习曹永和为tio̍h深入研究台湾历史认真读荷兰语ê精神，kā白话字读hō͘伊彻底，án-ne来做教会圣诗历史ê研究可能会koh khah深入。

Taⁿ请来看教会外ê人。台语文ê大作家陈雷为tio̍h boeh用台语写作，认真kā白话字学kah真传神，人人合意读伊ê作品。李庆云教授为tio̍h boeh将伊早期ê台语歌作品kap当时ê台语歌谣用台语记录落来，伊七十岁才学白话字，结果伊有达tio̍h伊ê心愿，将宝贵ê台语资产留hō͘囝孙后代。

彰化县田中国校ê箫平治老师为tio̍h boeh用台语写作，四界chhōe台语ê书写法，当伊chhōe-tio̍h白话字了后就认真学习探讨，伊ê 「咸酸甜台文工作室 网站」，ē-sái讲是台语教学相当齐全koh是人人o-ló ê网站。伊mā是教育部国语推广委员会台语组ê委员，伊是唯一无博士学位ê委员，伊ê成就实在令人感叹！

最近真欢喜tùi总会电子报知影总会boeh开始「白话字种子教师基础班」ê招生，希望长老教会赶紧kā早期白话字ê荣誉the̍h tò-tńg来，chiah bē对不起咱信仰先辈对台语白话字ê大贡献，大家phah拚来拯救失落ê白话字。