《生活e5台语，台语e5生活》

 | | | 转寄

数念金大友 (Darrell Jenks金大友追思纪念)

作者 Babuza (Ho̍k-chû Tiuⁿ) 2012.06.24


咱ê好朋友前任美国在台协会高雄分处处长金大友(Darrell Jenks)先生不幸已经伫2012年5月15过往lah！chhim听着消息， 是王淑秋老师敲电话kā我讲ê，叫是听毋着--去，阁kā问一摆，了后才确定无听毋着！我紧入去Internet揣新闻，kā伊ê名key in，随伫报纸看着 大友兄过身ê报导, 按呢才真正相信咱ê好朋友, 永过足支持台语文ê兄弟确实已经转--去lah！我一时tek感觉头壳茫茫, 咙喉管强beh滇起来, 有袂晓讲ê失落感佮非常ê毋甘！mā替in某囝艰苦！大友兄才54岁nā-tiāⁿ！原因是癌症。

金处长伫1996-1999年担任AIT(美国在台协会)高雄分处处长. 伊ê台语真láu-tâu,客话mā sió-khóa会晓, 阁无传统外交官ê sam-á-khùi(官架子), 亲像普通台湾人仝款, 不时去四界lōa-lōa-sô, 无论菜市仔, 路边担á, la-ji-o͘台, 伊拢会去佮人相借问, 开讲, 拍lā凉. 有一摆阁佮阮伫高雄市光华路建国党办公室楼脚ê路边担á做伙食鳝鱼面, 食了阁o-ló讲足好食！伊本人足爱音乐, gâu拍鼓, 有佮屏东ê朋友组一个乐团, 定定做伙表演. 因为这款在地人ê作风佮多元化ê参与, 彼阵南部人对AIT ê风评足赞！

金大友先生知影beh了解台湾人着爱先了解台湾人ê语言. 伊先伫TLI (中华语文研习所)kin王淑秋老师学初级ê台语, 1997年阁来佮KLH(高雄台语罗马字研习会)进修中高级台语, 对普通对话, 笑诙, 医学台文一直到语音, 构辞, 句法, 等语言学阮会晓--ê拢学透透, 伊ê台语文程度thang讲比95%ê台湾人拢卡gâu！甚至伫1998年阁去叶津铃女士(后来当选高雄市议员)主持ê民生之声广播电台开空中台语教室！KLH伫建国党办公室开台语课, 大友先生mā有去做义工老师, chit-má国科会「台湾医学语言资料库及本土化医学教育的语言课程教材」主持人, 高雄医学大学皮肤科郑诗宗医师ê台语罗马字就是金处长教--出-来ê！按呢阁无到khùi, 伊阁报名参加台南神学院ê台语文化教室中级班, 通过台语师资考试, 毕业论文是关系Jazz音乐ê起源, 指导教授是郑儿玉牧师, 论文是用罗马字写ê口语台语！Hit篇文可能是最近50年来唯一用台语罗马字写ê学术论文！

大友兄ê工作需要伫真济场面演讲, 致辞. 伊真爱讲笑, “好ê演讲需要真济笑诙来做味素盐斗相共”, 所以, 不管时拢叫我写笑诙文稿予伊用. 我去买几nā本英文华文ê笑诙册来参考改写, mā有上网揣英文资料, 按呢才会当应付伊ê需要. 有时我siuⁿ久无写(大概3, 5日无写), 处长一直讲仝款ê笑诙代, 听众加减会嫌, 伊就会敲电话kā我抗议, 讲”张医师, 人讲我ê笑诙臭酸a lah！” 有一摆, 我文稿犹未写好, 伊ê司机已经kā驶车来我诊所门口teh等beh提笑诙文, 我紧写好墨水犹未干, 就紧交予司机先生, 赶去赴处长演讲场thang采用, 我kā司机吩咐墨水犹未干, 若无细腻文字会kô͘去！”因为这个因端, 我hē性命改写, 这就是后来我ê台语课本”台湾字ABC”有100篇笑诙ê源头. 我bat kā抗议, 讲”处长, 你一直kā我压迫写笑诙, 害我写chiah济！” chit-má想--起-来, 实在对金处长12万分ê感谢！阁有, 我hit本”台湾字ABC” ê foreword是金处长写--ê. Hit篇foreword有予美国国务院审查通过.

完整ê语言能力包含会晓听/讲/读/写. 台湾人ê母语能力kan-ta有听佮讲nā-tiāⁿ, 有时mā讲袂清楚, 发音mā不时走精去. 大友兄ê语言能力真正有够gâu ê gâu, 伊拢总会晓10种语言, 英语/法语/台语/华语/阿拉伯语/日语/韩国语/西班牙语/葡萄牙语, 当然逐种拢会晓听/讲/读/写！伫高雄ê时, beh演讲进前, 先kā文稿写好, 传真叫我修改, 当然是用台语罗马字, 有一摆beh来阮高雄医界联盟演讲, 阿娘òe, 传来A4 ê纸beh 15张, 害我改kah喘phe̍ⁿh-phe̍ⁿh. 伊ê台语gâu kah彼时李登辉总统mā知影, 阁特别送金处长一本匡金ê圣经！

Chhim开始佮伊交陪, 伊拢袂讲着政治, kan-ta台语文. 尾仔, 可能是予阮感动--着, 加减会表示意见. 大友兄bat按呢讲, “恁做ê空课(推sak台语文), 比原子弹卡有路用！” 这加添阮对台语文ê信心, mā大大鼓励阮继续做台语文事工. 因为有大友兄参与, KLH sió-khóa有名声, 来学罗马字ê人有愈来愈济, mā有外国人, 报纸佮电台电视mā卡beh报导, 按呢, 大家对台语文佮罗马字愈来愈有信心佮兴趣, 后来阮办ê研习mā有得着高雄县市佮屏东县教育局承认, 来参加ê学员大部分拢是在职老师(国小/幼稚园), 无形中南部台语文教学兴--起-来！高雄市学校母语教学评鉴拢是全国第一名, 大友兄应该mā有功劳, 感谢你, 大友兄！

金处长离开台湾了后, 有去过巴西/中国/日本, AIT讲伊路尾阁有去伊拉克服务, 伫hia学着阿拉伯语. 旧年退休, 毋过已经有癌症teh 触缠(tak-tîⁿ), 2012年5月15不幸伫马里兰州巴尔第摩(Baltimore, Maryland)过往--去！

大友兄
你今转去伫天父ê乐园
愿你好好安歇
你若有闲
对天顶看--落-来
会记得
祝福你ê某囝
Kah咱台湾ê朋友.