《生活e5台语，台语e5生活》

 | | | 转寄

台湾到底有几间台语相关系所？

作者 杨允言 2012.05.27

联合国教科文组织订逐年2月21号做世界母语日，提醒世间人重视母语ê普世价值。

台湾tī 2000年民进党执政了后，母语复振开始有一kóa希望，包括国校开始有本土语言课程，客委会kah原民会ê作为mā对客语、原住民语ê语言复振做出淡薄仔贡献，包括有专属ê电视台，koh办语言能力认证等等。这当中上kài奇怪ê代志，就是使用人口上济ê台语，颠倒无专责单位teh负责。

官方ê台语推广单位，后来是属教育部国语会，总是国语会已经比教育部、客委会、原民会koh降一级，而且国语会同时爱负担华语kah所有台湾本土语言ê工课，若kah其它本土语言相比phēng，台语会当分配着ê官方资源实在是有够少ê少！占70%以上语言人口ê台语无予官方认定做官方语言，tī世界上就已经是足hàm-kó͘ ê代志ah，tī资源分配上koh得着chiah-nī无公平ê待遇，实在予咱真怨叹。

Kah过去数十冬以来台湾官方所执行ê本土语言屠杀比起来，这几冬国语会对台语推广算是有一kóa贡献，包括办理推展本土语言杰出贡献奖（包括客语kah原住民语）、本土语言文学奖、全国语文竞赛加入台语朗读kah字音字形（以上两项包括客语）、台语认证、编台语常用词辞典，chia-ê拍拚，lóng值得咱kā伊拍pho̍k-á。M̄-koh另外一方面，对照国语会前几冬对世界母语日ê热情，soah感觉已经有khah退烧ah，态度愈来愈冷，至少今年看起来是按呢。

为着beh向学生介绍世界母语日，除了介绍联合国教科文组织对母语kah多语言支持ê立场（Language matter! 语言不止要紧，http://www.unesco.org/new/en/languages-and-multilingualism/ ），我koh chhē着国语会制作ê 221世界母语日网站（http://www.221.moe.gov.tw/），这个网站提起世界母语日ê因端，mā kā国语会过去几冬对台湾本土语言所做ê拍拚做一kóa介绍。

M̄-koh斟酌kā国语会所做ê世界母语日网站看了后，soah发现内底有一份chiâⁿ离经ê资料：tī资源分享连结，列出台湾有19个台语相关系所！

台湾有19个台语相关系所？逐家敢算会出来？Tī我个人ê认知，假使这个系所有一半以上ê台语专长专任师资，才勉强会使算是台语ê相关系所。一半已经是足卑微ê要求ah，你敢认为英语系应该有非英语专长ê老师，抑是华语系应该有非华语专长ê老师？假使我ê认知是合理ê，按呢台湾目前到底拢总有几间台语相关系所？ 两间！规欉好好，就kan-na两间！

斟酌看国语会列出ê chia-ê名单，in可能是目睭花花匏仔看做菜瓜，只要系所名称有「台湾」两字ê，就准予过ah，拢算做是台语相关系所。

Chia-ê系所，有ê已经无去ê（亲像某校ê台湾语文学系，in犹阁活tī世间ê时，in系ê学生有真济是听无啥有台语ê），有ê是反台语ê（某校台湾文学所所长讲，台湾文学若kan-na算台语文学，台湾文学史chhun无2页；koh某校台湾文学所，入学ê书面审查尽量kā台语专长ê学生刣掉，koh阻挡in系台语专业ê老师升等），koh有ê系所课程标准内底并无台语ê必修课，甚至连台语相关ê选修课都无。咱实在是想无，是按怎按呢ê系所拢beh kā算做台语相关系所？

实际上，社会上mā确实有一kóa人料做台湾文学系是大部份ê课拢用台语进行ê，只是我kā in讲实情了后，in拢感觉足奇怪，哪会是这马按呢！目今ê台湾文学系，kan-na会使讲是挂「台湾」kha̋n-páng ê中文系。

照我按呢分拆[hun-thiah]，其实论真讲，国语会tī母语日网站另外所列ê 8个客语相关系所佮4个原住民语相关系所，可能mā kan-na会当算是有讨论着客家文化kah原住民文化ê非客语、非原住民语系所，离真正ê台湾本土语言相关系所，iah-koh一丈差九尺。 台湾ê本土语言，处境实在是真bái，咱teh拍拚挽救家己母语ê时，mā希望官方会当真正了解现实ê状况，因为有真正了解状况，才袂tī拟定政策ê时阵发生siuⁿ大ê偏差。