《生活e5台语，台语e5生活》

 | | | 转寄

埃及蒙恩记（1/5）

作者 陈凤翔 2011.02.27

Tī台湾，hiah-ê人当teh快乐庆祝农历新年时，tī亚洲ê另外一端，却发生十级强ê政治地震，埃及人民争取民主，要求执政卅年ê总统穆巴拉克下台。Á阮一家四口ap好友老卢，为tio̍h信望爱圣经地理ê资料库，参加圣光神学院前院长吕荣辉博士所带领ê圣地旅习团，往埃及、以色列、约旦三地，搜集并拍摄圣地资料，1/27~2/10共十五日，无意中亲身经历埃及迈向民主转型所写落来ê历史新页。

第一pái出国，m̄知影搭乘十几点钟ê飞机是hiah-ni̍h煎熬难耐、坐立难安。因此，一到埃及机场，踏上土地，像飞出笼中ê小鸟快乐无比。随时phah开手机beh向家人报平安，奇怪ê是电话bē通，网路mā bē通。但实在是siuⁿ过兴奋，无想hiah chē，iáu互相phah趣讲埃及chit-ê所在真落伍，不如台湾科技先进。坐起lih巴士，后面iáu有警车tòe-teh行，禁bē-tiâu赞叹埃及政府对外国游客保护周全，全然m̄知是政治地震火山爆发ê前兆。

前往埃及餐厅用餐，途经尼罗河ê一条桥顶，司机kā阮放落数分钟。Kui大阵纷纷带相机冲落车，世界siōng长ê一条河，就tī目chiu前。对tī五、六年级生，尼罗河ē-sái讲是有特殊意义，伊承载《尼罗河女儿》少女漫画启蒙对爱情ê梦想。成做一个基督徒，chit条河带有koh-khah深ê意义。带领以色列人出埃及ê摩西，tú出生ê时遭遇男婴大屠杀，母亲只好无奈将伊khǹg-tī蒲草箱放入河中，hit条河就是尼罗河。Tī上帝ê保守下，摩西奇迹被法老ê cha-bó͘-kiáⁿ所救，因祸得福成做埃及王子。

Iáu无看够尼罗河，mā tio̍h向伊挥手告别，因为第二日就会往埃及中部ê路克索，到时就ē-tàng搭乘三角风帆徜徉tī尼罗河顶，美景尽收眼底，chit时tio̍h赶紧前往世界七大奇迹之一ê吉萨金字塔群（胡夫金字塔、卡夫拉金字塔kap孟卡拉金字塔） 。

一路上看tio̍h十字路口有士兵khiā岗，却无感觉有koh样，一心期待tio̍h亲眼目睹比人khah高ê花岗岩石块堆砌而成、气势宏伟ê金字塔，体会「仰之弥高」带来ê感动，并浸淫tī 千年时间长河中，以小自我。来到人面狮身像ê时，去过埃及ê同团ê人iáu讲：「奇怪今á日怎样游客hiah-ni̍h少？以前阮来chia lóng大排长龙，kheh kah ài命，上帝恩典真是大，hō͘ lín ē-tàng好好á hip相。 」其实根本是埃及已经暴动lah，游客当然稀疏。

续落来第二站是埃及博物馆，巴士一直se̍h路设法tùi吉萨前往开罗（距离相当ùi板桥到台北、凤山到高雄市）。但真chē路lóng被管制，无法度通行。只好割爱先暂时跳过博物馆，去参观蒲草纸（Papyrus） kap香水店。Gōa年期待亲眼目睹蒲草纸制作过程，终其尾也有达tio̍h愿。