《生活e5台语，台语e5生活》

 | | | 转寄

埃及蒙恩记（2/5）

作者 陈凤翔 2011.03.06

有人puh出一句台语：「这m̄是古早擦尻川ê草纸？」同行团员无chē人知影chit种平凡草纸，但其实he是价值非凡，因伊bat负责承载上帝宝贵ê话语。古早时无印刷术，差不多所有ê 新约圣经抄本，lóng是一字一字写tī蒲草纸kap皮纸顶面。Siōng早ê新约《马太福音》ê碎片就是tī埃及被发现，hit-ê年代被确定是主后66年。蒲草纸容易朽烂，oh得保存，除非是tī极其干燥ê地区，如埃及沙漠。

基督信仰是真理，所信ê lóng有根有据，圣经挡能tiâu受严格ê鉴别。其他宗教不谈真假，强调「心诚则灵」，经册自然真chē是人为杜撰虚构，经不起考古鉴定。同团中有一位m̄是基督徒，伊oh得理解为何基督徒会坚持真僞分辨，hit-ê观念是后现代主义，生活中「善、美」就够用，无需要「真」，各种人生价值观lóng真好。M̄-koh，只有「善、美」ê人生价值观，kan-ta ē-tàng供一己之用。世上有kóa tāi-chì是超越美善，需要真理来做基础，chiah ē-tàng有永恒ê宏观角度，愿意弃sak保全己身，牺牲小我。

我kap伊分享，耶稣周围原本有一大堆ê跟tòe者，但当他被掠、上十字架，hiah-ê人通通lóng tio̍h 惊走了了。直到耶稣复活并显现hō͘ in看，in因为信仰为真，tùi án-ne ē-tàng违反人性ê贪生惊死，个个lóng为tio̍h永恒价值ê福音赴汤蹈火。若人生价值观无重视真僞，án-ne就会tòe环境变动，无可能持守，mā无需要持守。这就是为何基督徒真重视所信ê是真。

按照行程，用完晚餐是搭夜铺火车，清早到路克索。无想tio̍h，当地导游讲，in ê总统tī路克索当teh演讲，火车停驶。瞬间阮chit团二十五个人，遭遇了第一个难题，无旅馆thang tòa。两个gín-á听tio̍h无所在tòa，非常担心。因为前晚tī飞机顶无法度倒teh困，in已经thiám kah beh死。Chit时禁bē-tiâu想tio̍h约瑟kap teh-beh临盆ê马利亚，in当时千辛万苦来到伯利恒，mā是chhōe无所在tòa。Chit chōa圣地之旅所遭遇ê第一ê突发事件，竟然hiah-ni̍h相像，有可能是上帝ài阮tùi其中ê经历来感受ê功课。

M̄-koh，慈爱ê上帝只hō͘阮小khóa感受一下当年约瑟kap马利亚ê困境，并无hō͘阮真正tòa-tī 马槽或露宿街头。大约暗时八、九点，终其尾tī吉萨chhōe-tio̍h一间bē-bái ê旅馆。虽然早to̍h超过晚餐时间，初到埃及ê喜乐却hō͘大家一点á mā bē iau。