《台语chit条路》

 | | | 转寄

《台语chit条路》--建立台语文ê文学批评―林央敏访问(九）

作者 谢瑞华 2008.12.14

卵：老师hit时开始转台文道清楚是按呢，或者是tī hia ê过程内底体会出来？

林：开始转写ê时，代先我是感觉复兴台湾文化、挽救台湾文化、台湾语言，hit chūn我鼓吹福佬ê朋友写，伊母语若是客语＝e尚好mā爱有chit ê认识，用客语写，原住民我道少鼓吹，因为原住民真少，总共三十外万人，九族m̄若种语言，有ê一族才几千人，但是伊若beh用伊ê族语，咱mā真kā鼓励，代先是按呢。我讲台语文学才是尚有代表性ê台湾文学，che是尾＝a khah思考来ê。

凰：你有讲着宋泽莱，听讲伊mā有发明另外一套台语文ê系统，kám有影？

林：che照讲mā无算发明，初期ê时chūn逐家拢认为汉字爱用所谓ê纯正，其实字无所谓啥么叫做纯正，约定俗成，公定＝e道是叫做纯正。传统ê纯正道是讲古早人＝e叫做纯正。

凰：你头仔讲你对文学界写中文＝e，拢足气hâm in做伙？

林：m̄是讲写中文ê人，是讲投机ê人，不管伊写啥么。目前是写台文ê人khah bōe投机，iah是khah少投机ê人，比较tek思想也khah觉醒，我也无发觉着投机＝e。

凰：阮是想讲，台湾ê台语失屎kap失育是无教材、无资料，所以若有一万人来写，咱道bōe hiah惊，所以咱道kā chia ê红kah发紫ê giú-giú来，来kā影响，加减mā做一寡khang-khòe。 林：按呢伊着bōe红＝a，in并m̄是写了比人khah好，in道是无chit ê使命感、chit ê觉醒。

凰：你ê意思是in无重要是m̄？

林：m̄是讲in无重要，in若愿意阮mā足欢迎、足钦佩，不管伊过去外投机，iah是过去观念外错误拢无要紧，伊若愿意做，尤其是正式觉醒来做，我拢mā足kā肯定。

用表演、演讲ê方式传播台湾文学ê台湾语言

江：你认为台语文运动ê目标应该是按怎，咱应该按怎做？我chit ê问题其实是分两部分，一部份是民进党执政以前，因为我看国民党无啥希望，第二ê是民进党执政以后咱应该按怎做？