《台语chit条路》

 | | | 转寄

《台语chit条路》--建立台语文ê文学批评―林央敏访问(八）

作者 谢瑞华 2008.12.07

台文ê文学才是台湾文学ê代表

卵：我ê意思是，咱tiāⁿ-tiāⁿ teh讲咱为啥么爱写台文，无爱写中文，理论上che是啥么情形？顶kài有听过老师有用过代表性，啥么叫做代表台湾文学ê解说，我无kài清楚，想讲透过老师ùi华文创作改做台文创作ê过程去体验chit-ê理论。

林：先讲家己一kóa体验chiah牵涉一kóa理论。tī正常ê国家，正常ê一ê民族，chit-ê民族ê定义不管是广义iah是狭义，iah是现代ê民族定义，古早ê民族是种族，现代ê民族定义是国族，国族道是现代民族ê定义，che一ê运命ê共同体。chit-ê民族、国家正常＝e来讲，伊chit-ê国家内面传统以来尚大ê语族，大多数人ê母语应该发展做普通话，因为大多数人，in所产生ê物件tī in ê世界来讲khah有代表性，譬如讲in中国汉文化khah会冻代表中国文化，中国文化照讲mā chiok chē＝e，五十外种族，以汉文化代表中国文化，美国文化，英国族ê盎格鲁萨克逊占大多数，所以讲会冻代表美国话、美国文化，任何正常ê国家拢是按呢。

tī台湾来讲，社会上到目前为止创造真实、活ê文化ê chit群人，拢iah是讲福佬话＝e khah chē，所以若beh讲代表ê时chūn当然tī刀iah koh有其他chiâⁿ chē种族lah，福佬话chit种ê文化khah会冻做代表。研究台湾，台湾文化是啥么货？台湾文化目前是以福佬话发展出来ê文化加khah普遍性，因为khah普遍性chiah有hit ê代表性，任何国家拢是按呢，普遍性变做代表性，bōe冻讲咱chia查埔＝ekhah chē【注：指在场ê人】，煞叫一ê查某＝e去代表一ê查埔＝e iah是代表全体，所以应该是khah普遍＝e来做代表che khah合人道化、民主化，tī chia绝对无排斥，无认为讲另外一部分或者是某几部分m̄是chit ê体内面ê物件。che是讲普遍hâm代表性，所以我teh讲台湾文学ê时chūn绝对bōe讲台语文学chiah是台湾文学，我干taⁿ讲台语文学chiah是台湾文学ê代表。因为文学ê定义道是爱kiâu chit块土地结合做伙，去反映chit ê社会，所以当然是chit ê社会大多数teh行动、有活力ê大部分人所用ê语言，道是社会性、社会大众活ê语言，用chit种语言创造出来ê文学才是会冻表现出chit ê社会ê文学。chit má社会大多数有teh活动ê语言是啥么？是福佬话mah！到目前为止是按呢。用福佬话写出来ê物件尚直接、尚完整，尚普遍会冻反映chit块土地，所以尚有资格称呼做台湾文学。

in南美洲、美国，虽然kap台湾仝款拢是殖民国家，但是in是正常ê殖民地独立，因为in tī尚大语族做主体ê时代以后道无koh hō͘别族来统治，台湾无仝，tī咱有出现一ê尚大语族ê时chūn iah 阁hō͘日本政府、国民党等等别款语族统治，所以一直无经过正常ê发展，所以目前chiah会出现，tī日本时代用日文创作ê文学，hông认为是台湾文学ê代表，事实是hit chūn大多数ê人mā拢讲福佬话，chit chūn读册人因为发展空间ê关系煞用中文去创作，chit má来看，tī正常ê理论来讲，台湾华文文学iah是台湾文学内面华文创作ê部分，bōe冻直接称呼做代表性ê台湾文学，我主要ê看法是按呢。其他创作kap文学表现ê问鶗当然是用大多数chit ê地区、chit ê社会ê语言才有法度直接、完整、适当表现出来。