《台语chit条路》

 | | | 转寄

《台语chit条路》--建立台语文ê文学批评―林央敏访问(七)

作者 谢瑞华 2008.11.30

凰：你一篇线文差不多外长、外短？

林：我的散文mā有三千字、四千字无一定。我尚短ê台语线文差不多一千字左右，尚长＝e三千外字，目前teh写ê若无切做几ā段可能爱六千字才会冻写好，写我一日游，目前已间写三千外字。

凰：你koh来chit本册beh用你家治ê音标？

林：hit时到iah无一定，无的确有一部份会教罗kap家治ê音标，我解说ê时chūn附录chit ê音ê注解无一定用toh一款，其中大部份仝款。

江：正文内底是汉字？

林：正文目前拢汉字，我本身主张希望将来台文全部拢罗马字。

凰：你道主张按呢soah无写按呢？

林：chit-má我感觉tī开创ê阶段，呣是干taⁿ咱做niâ，咱koh希望其他ê人会读也会冻看，受着影响以后chiah会来做台文ê khang-khòe、来写作。beh用toh一种来做咱语言ê符号m̄是chit-má尚介重要ê代志。chit-má尚重要ê问题是逐家拢无接触甚至koh轻视，咱着爱hō͘伊恢复信心，有咱台湾人ê民族尊严，赶紧来做，我认为che尚重要。chit-má先用汉字hō͘伊看，目前chit ê阶段过去＝a，需要辩论思考toh一种形，我是认为爱用罗马字母来做台文，拼法无一定是台湾教会hit种拼音法，爱尽量符合英语ê形式，按呢以后gín仔teh学，iah是新学ê人学着khah紧，可能kap教罗会小部分无仝。

台文ê khang-khòe道是hō͘逐家知影chit ê khang-khòe ê重要性

卵：做chit ê台语文iah是写台语文，理论上为啥么beh写，讲了较少，老师顶一kái tī金山{注：台大台语文社办hō͘高中生ê台语生活营，93年7月}讲着啥么叫做代表性，chit方面讲了介精彩，m̄ koh讲了无介完整。

卵：老师chit摆会讲koh khah完整，为啥么咱爱用台文，为啥么当初按华文创作改做台文创作ê过程，配合着chit ê理论，chit摆kám会冻讲khah清楚？

林：beh讲che以前我爱补充我tú chiah本来beh讲煞拍断去ê部分，着是我chit-má认为台文ê khang-khòe道是爱hō͘大多数ê人知影chit ê khang-khòe ê重要性，所以我teh写，评论性ê物件，teh宣扬台文iah是台湾文学理论ê时chūn，大部分拢用中文写，准做无用中文写，我oan-ná会翻做中文，chit ê目标着是beh hō͘逐家拢看有，包刮无学过台文ê人mā会冻看，看了chiah知影有chit种代志、chit种感觉。

che是一ê咱beh传播ê理念，伊chit-má无排斥台文，咱用台文直接写伊根本连看都bōe看，所以chit ê理念道无接触着，无接触着伊道bōe去思考，按呢效果道khah bái。理念性ê传播我无用台文写，目的是按呢，m̄是我无法度用台文写，也m̄是认为mài用台文写。理念性ê物件用台文写oan-ná真好，因为咱若无法度用台文写理念性ê物件，台文ê功能oan-ná无法度健全，是为着hia看无台文ê人，我chiah用中文写关系台文理论性ê物件。