《台语chit条路》

 | | | 转寄

《台语chit条路》--加学、加听，做肥底 ― 洪惟仁访问(二十)

作者 杨允言 2008.09.14

台语刊物

(讲着刊物kā人改字ê问题。)

洪：黄劲连mā kā人改，我写ê序言，叫伊mai3ka7我改，结果mā拢kā我改用字。{注：黄劲连台语诗集【ak-龊ê城市】}逐家拢kiāu黄劲连kā改用字，伊tō讲：无，你来编！

进：我认为伊ê态度是着ê，你khah gâu，无，你来编。

洪：黄劲连改别人ê文章是应该，改我ê无应该lah。

卵：改师父ê。

洪：我mā一粒头chiok大ê，伊改别人ê无应该，伊改别人ê我真欢迎，因为伊若准无改，正经无法度看，伊不但kā人改字，连文章ê内容拢kā人改。其实我teh编《台语文摘》mā是按呢，有ê用词拢mā kā改，因为用m̄着a，番薯诗刊，假使无黄劲连根本to bōe看ê。

言：真chē作家拢ùi北京话转过来ê，写ê时加减iá会lām一寡北京话。(讨论着《台文通讯》连谊会ê情形、福佬ê语源、漳泉lām ê情形…)

近况

言：老师，你目前手边ê空课有啥么？方言调查、《台语文摘》，iá koh有啥？

洪：台湾语文学会，但是拢我一ê人teh舞，无闲bōe去；方言调查是尚介重ê空khòe。

我是有一ê希望lah，恁chit寡少年人，我想beh hō͘恁一寡建议，我生长ê过程，tī大学ê时chūn，pìⁿ台语干taⁿ我一ê人，hit chūn我开始teh写台语，写写leh tō teh写批a，无人认同，我虽然无gâu读册，m̄-koh mā会使算讲不离仔会读册，像咱chit款人着是台湾话khah hām-bān讲，我对台湾话ê研究是khah早觉悟，咱koh有hit ê敏感，koh去读文献。

我是希望恁，因为恁chit-má环境比阮khah好，资料真好chhōe，尚好是听khah chē leh、看khah chē leh，假使无hit ê根底，正经beh讲话ê时讲bōe出来，所以，恁beh按怎去增加恁ê语词，会使去访问老人。另外，因为日本人有留真chē好ê台语资料，所以，着bōe晓日文，无法度。

我chit- má beh申请去日本。

言：老师，he是啥么单位请你去ê？

洪：交流协会，beh去半年，我beh去写一ê题目，着是小川尚义，我beh讨论ê是伊汉语研究ê部分。中国汉语研究做尚chē ê，是瑞典一ê学者，叫做高本汉，伊用瑞典语落去写，mā有用英语，赵元任到1923 ê时chūn，chiah翻做华语，对中国声韵学ê研究，造成真大ê革命；方言学研究mā是高本汉开始ê，伊着是研究中国语文史ê时chūn去做中国各地ê方言调查，hit当chūn根本to无人teh调查方言，伊1915年开始发表，但是小川尚义1907 tō发表日台大辞典，内底有两百几页，比较ê材料比高本汉khah有代表性，但是无人bat伊。 我去日本，着是beh写小川尚义kap高本汉ê比较。我写chit篇文章，着是beh hō͘日本iá是世界ê人知影，tī台湾oan-ná有真特出ê人，我是借用小川chit-ê人来做一ê例，表示讲日本人hit chūn tī台湾，真正有真chē优秀ê人才，m̄-koh是干taⁿ伊niâ，我为啥么beh提chit-ê题目？中国语言史是全世界ê汉语学家所关心ê物件，我tō提chit-ê hō͘ in知影讲，台湾ê物件bōe使hō͘视。m̄是干taⁿ小川尚义，其他ê人mā是仝款，mā beh kā in讲，台湾人ê成就，mā有chiok好ê。

koh譬如讲日本人tú来台湾ê时chūn，hit chūn有一ê伊泽修二，伊是学务部第一任ê部长，相当chit-má教育部长，伊写ê第一本册是【中华字音鉴】，伊写chit本册，去kā日本ê首相讲，咱chit- má beh统治台湾，我编chit本册会冻了解台湾ê音按呢lah，伊chhōa差不多一百ê会晓北京语ê军官，来到台湾，chiah发现，ê，台湾人拢总bōe晓北京语，伊hit本册煞无路用，chiah开始训练日本人台湾话，tō tī芝山岩；伊主要teh研究台湾话，伊编课本，教日本人读，而且koh再教台湾人日本语，台湾人去hia上课差不多chiâⁿ十ê niâ，he台湾êアイウエオ注音符号按怎来ê你知bò͘？着是hit本【中华字音鉴】，【中华字音鉴】是标北京语，he标拢标甲chiok标准ê，chit-ê人是留美ê，去美国研究教育，伊对音韵学真有研究，来到台湾，taⁿ死a，我这北京语ê音标to无路用a，tō将chit-ê音标kā改做来写台湾话，所以对台湾话ê研究，我m̄是teh自夸，我是多方面ê、深入tī teh做研究，m̄是清清彩彩讲讲ê nā-niā，不管文献iá好、方言调查iá好，这拢chiok基本ê，无人beh做ê空khòe，我来做。