《台语chit条路》

 | | | 转寄

《台语chit条路》--加学、加听，做肥底 ― 洪惟仁访问(二十一)

作者 杨允言 2008.09.21

台语运动检讨

卵：老师，你做台语文做hiah久，你kám有看出一条路，感觉语言ê环境应该是按怎？

洪：我ê台语文运动是多方面ê，有关台语政策，我mā写chiok chē文章ê，这效果mā已经出来a，这算一ê重点：第二ê重点着是文字化。

iá koh有一ê重点，着是保存语言ê事实，我创作无chiok chē，《台语文摘》讲实在着是按呢，我是希望讲，以这做肥底，chiah进一步去创作，因为所有ê文学，无可能讲无中生有，一定是咱旧ê物件，the̍h起来koh翻新，无翻新也bōe使lah，拢无根底也bōe使。我chit-má提出台语文字化ê方式，暂时ê形式，chit-ê形式做基础，最少人若beh发展文字化，新ê文学也好、科学也好，拢下冻ùi chia来发展；koh来着是学术研究方面，学术研究对社会ê影响是khah少，但是伊是一ê té-tì。

我tiāⁿ-tiāⁿ teh想chit-ê问题，将来台湾通用语是beh按怎？用啥么腔口？是beh随在人去讲，按呢文字beh按怎配合语言？以台北来讲，台北地区ê腔口mā chē，chit- má你beh教啥么腔？这是一ê问题，你chia ê物件若无，随在你去标，南部ê人去编台北ê教材，台北ê人去编南部ê教材，台语ê腔口拢hō͘你统一了了，所以你若beh做chit所在ê教材，你mā是爱调查腔口，准做需要一ê统一ê腔口，koh khah爱调查，若无，若无将来台湾ê国语是beh用toh一款？台北讲我台北尚标准，台中讲我tī中央tú á好，高雄讲，洪惟仁讲这是优势腔，台南人讲我这是古城……我ê研究，目前是iá koh看bōe出效果，但是将来效果chiaⁿ大。

卵：老师你这是拍肥底ê工作，m̄-koh真chē创作者是半路出师ê，按政治面、按toh一面插入来ê，真正teh使用文字ê人，颠倒对这无teh关心。

洪：所以tiāⁿ-tiāⁿ teh批评，chit-má teh做台语运动ê人，写ê比读ê koh khah chē，按呢真m̄好mà，台湾话hòⁿ，一定爱互相观摩。一ê语言，台湾话kap福建闽南语，差chiaⁿ chē，台湾话tī日本时代进前，福佬话是chiok兴ê，台湾话ê词汇chiok chē ê，所以台湾人语言ê程度比福建人khah好。台湾话是teh行优势腔ê路线一直teh统一，词汇傌是仝款，这chiok丰富ê，台湾本身内底mā是koh有差别，去做方言调查着会知影，海kîⁿ ê人m̄知山顶ê话，山顶ê人m̄知海kîⁿ ê话，因为台湾话是一种生活语言，但是中文无仝款a，台湾ê华语m̄是生活语言niâ，伊ê书面语包括稿今南北，伊ê词汇也好、文法也好，是融合性ê，台湾话ê融合性干taⁿ融合漳泉niâ，但是咱家己本身ê生活用语，老ê讲老ê，少年ê讲少年ê，山顶人讲山顶人ê，海kîⁿ仔人讲海kîⁿ仔人ê，互相之间无交流，做一ê台湾人智识份子，你ê生活用bōe着e5ma7爱学，我虽然无teh用，但是海kîⁿ仔人讲「牵ko͘」，你mā爱知牵ko͘是啥。

像山ê，山仑仔，啥么叫仑仔，咱台湾话干taⁿ山ê讲法着有几lō种，若khah细ê号做墩仔，…hit款物件是bōe变化ê，咱台湾人词汇chiok丰富ê，但是mā干taⁿ chit角势ê人知影，像讲水chhiâng，chiok chē人听无，咱后摆教育是beh按怎教？beh教普瀑布iá是水chhiâng？应该教水chhiâng，a有人讲水chhiâng chhe，你tòa ê所在若无水chhiâng，你tō m̄知影水chhiâng是啥么，你做一ê台湾ê智识份子bōe使按呢，台湾各地ê词汇，应该拢爱变做台湾话ê一ê成份，chiah会丰富，新ê文化，随时来咱着随时吸收，这语言chiah有性命，咱台湾人以前着是按呢，日本来，lajio，chia ê新名词着入来a，mā无去排斥，你来看台日大辞典所收ê语词chiah chē，九万ê词，扣掉方言ê差别mā有七、八万，这拢生活语言ne，he m̄是书面语言，这无简单ne，hia ê语言，老辈差不多拢会晓讲，有ê是文化9变迁ê问题，但是古早有水chhiâng chit-má mā有水chhiâng a！物件原在有，a名叫bōe出来，这着bōe使。