《台语chit条路》

 | | | 转寄

《台语chit条路》--加学、加听，做肥底 ― 洪惟仁访问(十八)

作者 杨允言 2008.08.31

进：你想chit-ê差别kap伊ê文字化是m̄是有啥么关系？

洪：全中国内底，真正文字化成功ê是广东话，其实in大部分是用华语写，用广东话写是写趣味ê，我看写广东话ê比例可能比台语khah少。

言：但是尚无，in电视有chit种字幕。

洪：但是出来着是中文a，广东人唱歌kap咱台湾人无仝款，咱台湾人唱歌是chiâⁿ si̍t台湾话，in m̄是ne，in唱歌是中文ê，chiah用广东话去唱，kám那像阮老父hit沿ê，譬如看水浒传hit种白话文，mā是用台语一字一字读，it iūⁿ、it sia，我听拢无。

咱ê自尊心比inkhah强，in是趣味niâ，少数人写趣味ê，咱现时台湾人ê文字化，是一种自主ê、独立ê，hām政治有关ê，台湾人mā有心beh建立一ê自主ê文化，广东人无，广东人对中国ê意识khah重lah，咱台湾人是beh脱离中国，广东人m̄是，广东人认为中国是tī伊ê下脚，伊是楼顶ê人。

进：广东人想beh统一中国。

洪：in野心chiok大ê，所以香港人，in对语言有自尊心无自主性，tī英国ê统治之下，着是享受英国ê自由、富裕，从来无人tī英国ê体制下，要求香港人ê政治自尊，香港人对香港ê认同根本无够，香港是in thàn钱ê所在，m̄是in ê土地。

敬：in拢是外来ê移民，尚chē人着无法度钉根。

洪：你去广东，免一个月toh会晓讲广东话，你无爱讲，伊toh无爱chha̍p你，伊经济ê势力大。

敬：东南亚hit pêng kám m̄是福佬人khah chē？

洪：着，照理讲南洋应该是咱福佬人ê市场，结果phah bōe入去，原因是啥？着是台湾话去hông压制了尚厉害，若无，台湾人ê生理会冻做比chit-má koh khah好，hit pêng ê福佬人九百万，比广东人加真chē，但是广东ê文化势力khah强，是按怎？自尊a，台湾人着是去hō͘箍面桶压制了，台湾bōe兴。chit- má 潮州ê人，着算无离开潮州，oan-ná爱讲广东话ne，he广东话势力太大lah。

我有时仔teh想讲，做福佬人ná会chiah soe-siâu，一四界去hông欺负。其实，全世界ê福佬人算起来差不多六千万人，若无算潮州人kap海南岛人，尚少mā有三千外万人，chia ê人讲话拢会通ne，漳州、泉州去南洋着kap做伙a，kap潮州人，in讲潮州人，着khah bōe合a。

假使台湾独立，你会冻将南洋ê力量结合起来，经济上会使领导，文化上mā会使领导，hit ê势力比广东人koh khah强。 今仔日是咱ê节目尚àu古a，台湾话节目ê制作实在有够kē路，像香港，in是采取商业路线，咱家治ê文化自尊iá koh无，chit几年有khah好a。