《台语chit条路》

 | | | 转寄

《台语chit条路》--加学、加听，做肥底 ― 洪惟仁访问(十七)

作者 杨允言 2008.08.24

洪：着a，着变做一种需要，譬如讲新加坡hia ê人拢有够利害，伊一ê人会冻讲chiok chē种话ê―chit-má khah无a，拢hō͘华语kòng倒去―一时仔讲潮州话，一时仔讲广东话，一时仔讲客话，伊拢无问题，欧洲人mā是chiok巧ê，in一ê人会晓德语、会晓法语、会晓义大利语、英语，hò͘，伊哪hiah-nī gâu？其实m̄是，伊需要。 进：假使你讲ê chit寡物件拢是正确ê，你beh按怎kā写做一ê政策，说服别人？你讲按呢chiok简单ê mà，你ê目的着是beh hō͘ chia ê客人接受福佬话。 洪：我是讲，各族有各族in使用家治语言ê权利。

进：he是你teh看，但是客人teh看m̄是按呢，你讲e5chiok简单ê，但是假使我是一ê客人，你beh按怎说服我？

洪：所以我讲，客人是m̄是beh学福佬话，hō͘ in选择。 进：到时演讲ê时chūn beh按怎？

洪：这伊家治决定a，福佬区mā会使选修客话。

卵：我是认为讲，咱koh爱khah尊重客语族，咱福佬人加减学客语，咱若tú着客人，咱kā讲，你mài叫我讲北京话，我鼓励你讲客语，请你大声讲出来。

言：着爱像卤卵按呢lah，福佬话客话拢会晓讲。我chit kái去peh山，tī水尾［注：瑞穗］hia坐车，车头边a kám仔店ê头家娘，伊是客人，结果伊原住民话头(Amis)、客话、福佬话、北京话，正经啥么话拢会晓讲。

洪：客人khah gâu。福佬人拢想讲，你to会晓讲福佬话a，无需要学客话。

进：但是咱爱改变chit-ê时习惯，chit-má人kā咱讲，逐家拢会晓讲华语，你tō讲华语，是仝款ê想法。

洪：我若去tòa苗栗，我着爱学客话a，今仔日问题是出tī客人tòa ê所在无一ê经济中心，所以福佬人beh生活，根本m̄免去客人ê所在，但是客人beh生存，一定爱离开客语庄chiah下有发展。

进：所以咱若拟政府爱写一条，鼓励福佬人学客人ê生活语言。

洪：刘克明［注：日本时代ê台语教官］有出一本册，教人客话ne。 言：伊toh位人？

洪：大稻埕，客话mā会晓讲，厉害ne。

卵：像新加坡a，李光耀本身是客人，伊客话无发展，伊mā无爱hō͘福佬话发展。

言：he郑良伟有讲，伊提倡华语ê出发点着是beh消灭福佬话。 卵：汉人ê 70％是福佬人。

洪：七成是汉人，所以福佬人差不多占一半。广东人来讲，你若入去广东，一定爱讲广东话，若无，in to无爱chhap你a，但是若准tī福建，kap福佬人做伙，伊tō讲普通话，chit内底有两ê原因，一ê着是闽语内底无一ê占大优势ê腔口，你讲厦门是标准ê，he是tòa闽南ê ne，你厦门人走去潮州，潮州话着听无a。讲着潮州话，顶kái我去hia，我kap伊讲koh讲会通，m̄-koh，in teh讲我tō听无a，in ê音kap人无仝款，这koh小代志，用词kap咱无仝款，差介chē，「按呢」in讲「chiòⁿ seⁿ」，你讲广东话mā不离复杂，有四、五种，但是伊khah统一，in中间koh小垮khóa听有；闽语来讲，潮州koh小khóa听有，但是你到闽北、莆仙，根本听无，平平福佬话，去海南岛，海南岛mā是福佬话，一句你to听无，jia̍k nò͘ ta tì gō͘ la̍k sit poih kàu ta̍p［注：1到10］第二ê原因，闽语内底闽南语占优势，闽南语内底厦门话占优势，但是厦门ê地位kap广州bōe比ê，厦门人口三十万niâ，广州是九百万ne，人口ê势力，经济ê势力，koh一ê香港，香港koh khah厉害。