《台语chit条路》

 | | | 转寄

《台语chit条路》--加学、加听，做肥底 ― 洪惟仁访问(六)

作者 杨允言 2008.06.08

言：老师你写好hit chūn，自立着kā你出版sìm？ 洪：我去chhōe吴丰山mā透过吴逸民介绍ê，吴逸民有去坐ka过，平平内底ê人，mā是政治犯。吴丰山讲『chit本册hò͘ⁿ bōe bái！』hit当时台语ê书拢无人leh出lah，干taⁿ郑良伟有几本á，我着感觉无满意伊he mā拢是leh教人ê，是教科书hit类ê，m̄是teh讲理论，我感觉he尚过浅。 言：老师你tī夏潮写ê是che khah早iá是khah òaⁿ？ 洪：早几lō年。 言：夏潮以外koh有tī别位写过bò？ 洪：有a，夏潮刊过一、两篇了后，着出名起来，chiok chē杂志，像林正杰，伊讲『ê，你对台语有研究siò？来，我hō͘你一ê题目，你去写。』我tú出来ê时chūn我mā m̄知影现况按怎，着去chhōe资料，mā去chhōe何大安［注：中研院史语所研究员］，问伊chit-má啥人teh做研究，着去chhōe in，册着chhōe出来看，看看ê着写一篇。 言：老师你hit chūn是用福佬话写ê iá是… 洪：中文。 言：按呢tī夏潮写e5ma7是用中文？ 洪：中文。 言：按呢，第一篇用福佬话写ê是ti7toh位刊ê？ 洪：《自由台湾》，mā是tī我写hit本册【注：河佬话声调研究】以前。着是我tńg来tńg去lah，有一段时间，我是几lō ê杂志ê特约记者，去做采访，访问工人、访问啥货，林正杰mā是叫我去访问，一四界mà，以后tī《自由台湾》写，着全部拢用台语写。 言：《自由台湾》是啥人办ê？ 洪：朱高正。 凰：hit当时是用汉字？kám有注音？ 洪：用汉字，有注音。 凰：是用toh一套？ 洪：家己发明ê。hit当时仔写十二生肖， 言：阿土伯讲古， 洪：阿土伯讲古。干那刊无了ê款，《自由台湾》着倒去a。 凰：hit chūn稿费多iá少？ 洪：bōe记a ne，hit当时仔我tō干那半食半饿。一摆领稿费领两、三千箍仔着欢喜甲，我tī夏潮一个月一万箍niâ，无啥么钱，…我hit chūn党外杂志写chiok chē ê lah，逐家拢mā teh邀稿，敢写着一直冲出来，真正表现我本来ê思想，是以后ê代志。 言：老师，你开始写ê时chūn，你是用啥么款音标？ 洪：用教会罗马字去改ê，改mā改无gōa chē？he撇来撇去改撇tī边a，鼻音伊本来细ê n，我写大写ê N，大部分拢仝款，kám chit-má tholupa［注：TLPA，台湾语言音标方案］mā chiok óa ê。 言：老师，我ê意思是，hit chūn tī《自由台湾》所写ê，用字部分是已经有一ê底a，iá是那写ê时chūn那teh chhōe？