《台语chit条路》

 | | | 转寄

《台语chit条路》--加学、加听，做肥底 ― 洪惟仁访问(七)

作者 杨允言 2008.06.15

洪：hit阵仔有ê着是董同和ê物件，iá koh有，吴守礼，吴守礼ê物件chiok chē ê a，伊是算战后尚介有研究ê，khah早ê老前辈li，a董同和是khah有学术性ê，像阮老师ê物件我拢mā有看，所以m̄是讲beh写chia来做研究，本来着有hit-ê底。 廖：老师，恁hit-ê时代ê环境，大部分拢是讲台语，m̄-koh阮chit-má拢是讲国语a，像我chit-má着改无啥会过来。 洪：着lah，像恁chit-má khah少年，抵着拢mā讲华语，着bò？阮hit chūn讲台湾话，kap外省人chiah有讲华语、台北华语。其实恁mā m̄是讲北京语，北京语m̄是按呢，北京语语词真丰富，平平讲北京语，台湾着输in thiám-thiám，啥么原因？咱chit-pêng讲ê话语，ó͘，chiok艰苦ê，he话拢用tèⁿ ê，tèⁿ kohboe7出来，人in凊采讲着有词，hiah自然、有土地mà，所以台湾ê华语实在是无啥么价值，无土地ê lah。语言是按怎？是hit-ê生活chiah有hit-ê语言，有hit-ê语言chiah有hit-ê文字，有hit-ê文字chiah有文学；今仔日伊m̄是，倒péng，先有文字、有文学，chiah koh学语言，按呢无自然，华语过来台湾，语词làu钩真chē，有ê词无a，beh按怎？着创新。伊chit-má来kah chia，beh适应，会吸收一寡台湾话lah，所以产生一种新方言。a有人问讲『che m̄是算做语言ne，是lingua franca，普通话。』我讲m̄是ô͘，华语tī台湾，确确实实有人以chite5语言做伊ê母语，有伊ê使用人口，所以确确实实是方言，已经tī台湾钉根a。 言：che，电视若拢用台语着好a，in hia自细汉着一直看一直看。 卵：老师，你开始是接受学院派ê，kah尾a接触日本时代ê资料iá是讲字典，he是当时ê代志？ 洪：he mā是最近十年以来ê代志，做che着爱感谢吴守礼教授，吴守礼有做过真chē书目，书目kā你讲啥么时chūn出啥么册，着一本仔一本仔去chhōe，hit阵仔趁ê钱拢the̍h去买hit寡册。 言：老师，tī toh位买有？ 洪：旧书摊。 卵：ô͘，che着贵a。 洪：收集资料a，台北ê旧册摊有着kā买起来，拢日文ê，好家在我日文看有，若无beh研究台湾话着无可能，日本人留落来ê物件太chē，你若bōe晓日文tio̍h干taⁿ中文ê，但是中文ê无啥么物件，一寡县志，hia太少，日本人khah有受着现代学术ê洗礼，in ê研究加chiok清楚ê，ma7chiok用心ê，恁若想beh做khah深ê研究，日文爱会晓。 hit当时仔，一本册六千箍、八千箍，我着爱趁一个月ne，但是我mā是kā伊买起来。但是家tī生活无问题，我m̄免烦恼厝nih ê生活，chit条路行了顺序顺序，是爱感谢阮太太，我to四界走，tī厝nih ê时间mā无chē。