《台湾人e5先觉―黄彰辉传》

 | | | 转寄

黄伯和牧师 序

作者 黄伯和（台南神学院院长） 2009.01.25

台南神学院为tio̍h表扬黄彰辉牧师对南神、对台湾教会ê宣教、对普世教会ê神学教育、对台湾前途kap台湾人民ê自由、人权ê贡献，tī 1987年ê热天，当黄彰辉牧师hō͘人放逐22年了后，头chit-pái tńg来台湾ê时，专工颁送「荣誉神学博士」学位hō͘伊。Tī颁送hit-ê学位ê学院准备ê褒奖文中，称呼黄彰辉牧师讲伊是：牧师、神学家、神学教育者、人权运动ê先锋。iū-koh表彰：「主张神学应该钉根tī本土，代先提倡实况化ê神学，成做后来普世神学教育ê方针。献身领导台湾教会关怀社会，二度hō͘人选做台湾基督长老教会总会议长，强化台湾教会ê整体性。担任普世基督教协会神学教育基金会ê总干事，是台湾担任普世教会机构ê tē-it人。虽然离开故乡chiaⁿ，犹原ūi-tio̍h台湾前途sì-kè走chông，koh根据台湾基督长老教会「国是声明」发起「台湾基督徒自决运动」。Chit段褒奖词ê描述ē-sái讲提纲契领teh说明黄彰辉牧师一生丰富ê经历kap tī教会、社会所做出ê多方面ê贡献。

Tùi黄彰辉牧师晚年传出身躯khah phái 开始，真chē黄牧师ê学生、朋友kap亲人就一直筹画ài怎样趁彰辉牧师iáu tī- ê时chūn赶紧为其立传。其间北美地区ê南神校友iáu bat托人专工到英伦从事专访ê工作，听讲留落来近百卷ê录音带。现今黄牧师已经过身二十gōa年，tùi南神决定将校园中siōng古意ê一个「互谈会馆」kā伊整修号名为「彰辉馆」，来纪念彰辉牧师ê典范后，咱总算看到头一本中文ê黄彰辉牧师ê传记出版。黄彰辉牧师一生历尽沧桑，为tio̍h南神、为tioh台湾教会ê宣教，为tioh普世教会ê合一运动kap神学教育，mā为tio̍h台湾ê前途无怨无悔ê奔走，着算伊bat称其神学为「m̄甘愿」ê神学，来表达家己一生无法度看tio̍h台湾人民通过自决来决定家己ê身分认同kap前途ê遗憾，其一世人所做出ê贡献实在有真chē值得咱效法kap学习ê所在。因此，为其立传kā伊ê信仰事迹流传落来，是我等后辈珍贵ê资产。

张瑞雄牧师是本院校友，mā是彰辉牧师ê学生，本院毕业后，长期tòa tī美国，tī美国卫理公会服务，mā积极追随彰辉牧师投身台湾出头天运动ê奋斗。为tio̍h搜集资料，伊独力风尘仆仆teh奔走tī美国、日本、英国kap台湾之间，为咱chhōe出真chē珍贵koh难得ê资料。现今总算ài出版lah，本人感觉真荣幸ē-tàng 被邀请为chit本册写序。衷心希望本册ê出版，ē-tàng带hō͘台湾ê神学人，尤其是台南神学院ê师生，作神学ê典范，也ē-tàng koh再激励台湾教会ê宣教kap到taⁿ iáu未完成ê台湾出头天运动phah一剂强心针。彰辉牧师ê一生ē-sái讲是一幅所有台湾人ê心路历程ê缩影，是台湾教会宣教历史ê张本，mā是台南神学院神学教育ê蓝图。愿伊ê出版彰显上帝ê荣耀，引chhōa后辈ê脚踪。

2004年3月31日tī台南