《台湾人e5先觉―黄彰辉传》

 | | | 转寄

追忆黄彰辉牧师

作者 高俊明 2009.02.01

Tī我ê人生，影响我siōng深ê一位牧师tio̍h是黄彰辉牧师。伊所留hō͘我tī教育领域各方面真好ê典范，成做我一生常存ê记忆，tû-liáu佩服koh有深深ê鼓励。

会记得，早年tio̍h是感受tio̍h黄牧师是一位真好ê教育家，特别是关心青少年ê教育。会记得第二kái世界大战了后伊tùi英国tńg来台湾，hit时我iáu是读高中ê学生，我时常愿意tī思考问题ê 时chūn马上去chhōe伊，因为伊总是hō͘人感觉真亲切、真有耐心，无计较时间真用心kap我讲话。Hō͘我少年ê心，处处lóng得tio̍h鼓励。

伊一方面用心关怀少年传道人ê服事工作，另外一方面mā关怀散布tī乡村ê教会。神学生时代ê我，受派参与乡村教会ê服事，bat tú-tio̍h黄牧师骑tio̍h脚踏车来探访，又koh对一般信徒讲道，chit种行为正是为tio̍h鼓励少年ê传道人。

续落来tī二次大战了后复校ê台南神学院，经济khah紧。当时黄牧师受命接院长ê职务，伊m̄惊艰苦，苦心经营ê结果，ta̍uh-ta̍uh-á hō͘台南神学院发展成做东南亚siōng大ê神学院，提升神学教育ê水准，伊真自然得tio̍h所有学生ê爱戴kap尊敬。

黄牧师关怀原住民ê宣教kap神学教育。Tī我毕业了后，担任玉山神学院院长ê时，学院属于草创期，为tio̍h起校舍，得tio̍h黄牧师大力协助向海外友好ê教会募款，二年内募款得tio̍h ê钱达到当时台票240万元，chit-ê帮赞hō͘玉神ê建校有第一笔基金。

黄牧师是有国际声望ê人。咱感谢tī小小ê台湾，上帝赐hō͘咱一位得tio̍h国际教会敬重ê神学家。Tī世界教会ê大舞台顶，伊bat担任设tī日内瓦ê世界神学教育基金会ê总干事，hit时kap伊共事ê部属内底，后来有成做南非教会杰出领袖ê屠图主教。

黄牧师英语ê优美tú好ē-tàng展现伊充满智慧ê判断，周旋tī各种国际会议场合中，mā得tio̍h众人ê敬重。当伊有机会tī大世界教会舞台发展ê时，伊soah用 koh-khah chē感情来怀念台湾chit片乡土kap同胞，致使伊对普世教会，特别是tī神学教育方面有杰出贡献ê同时，伊ē-tàng通过kap世界教会领袖ê互动kap对话，唤起普世教会对台湾人民ê同情kap帮赞。

Tī 20世纪后半期，为tio̍h hō͘饱受国民党政府高压统治ê台湾ē-tàng早日出头天，tī国内，本教会发起真chē发表声明，一直想beh以神学上ê反省唤起国内kap国外对台湾政治前途ê关怀，tī海外，黄牧师koh-khah是尽全力为tio̍h围护台湾ê民主kap人权koh四界奔走tī各国教会kap各国ê人权团体内底，伊mā领导海外ê台湾人教会展开台湾人民ê自决运动，hō͘海内外台湾人ê民主运动互相对应，一步一步来引导台湾整体走向民主ê正道。

黄彰辉牧师用伊一生宗教家kap教育家ê身教kap言教，已经化作台湾人出头天史记非常重要ê篇幅。谨期待ē-tàng有koh-khah chē人读chit本传记，来学习造福众人、荣耀上帝。