《台湾人e5先觉―黄彰辉传》

 | | | 转寄

黄彰辉kap神学教育基金

作者 图屠大主教（1984年诺贝尔和平奖得主） 2009.01.18

1972年，我奉「普世教会协会」（下文简称普世教协）ê「世界宣教kap传道委员会」指派为「神学教育基金」副主任，来到英国肯特邵布伦来市伦敦路十三号。当时普世教协因为发起「反种族歧视」运动，金援「非洲民族议会」kap「泛非民族议会」chit两个南非政府看做恐怖组织ê地下党团，koh hō͘主张种族隔离政策ê南非政府看做眼中钉；所以阮m̄知南非政府kám bē拒绝发放护照，阻挡我就任。M̄-koh我ê申请竟然得tio̍h允准lah。Tī当年，南非政府愿意发放护照hō͘一个乌人实在是从来m̄-bat看过ê特例；tùi-án-ni，我tio̍h展开了生命中一段非常重要ê历程。

阮chit-ê团队由四位副主任kap执行主任黄辉彰牧师作伙组成，每一个人负责无仝ê地区。譬如巴西籍ê阿哈隆．沙普赛鍚安（Aharon Sapsezian）负责中东kap拉丁美洲地区，伊是亚美尼亚人。来自美国ê吉姆．柏基斯特（James Berquist）（伊是唯一ê白人）负责印度地区；黄牧师kap周藤负责亚洲其他地区。所执行ê专案是普世教协「第三训令」ê一支，主要任务是推广所谓「第三世界神学」所属机构kap教会ê本土化。简单来讲，就是tī各地推广传道人才教育，hō͘神学教育tī地方扎根深化、融入地方色彩，解脱基督教久长以来hō͘人看做外来文化ê形象。

菲力普．波特（Philip Potter）因为担任世界宣教kap传道委员会总干事表现真好，进一步koh荣升普世教协ê秘书长――有色人种担任chit-ê重要ê职位，伊应该是第一人。继任ê总干事是来自玻利维亚ê艾米力欧．卡斯卓（Emilio Castro）。伊出色ê表现，mā预定伊日后跟tòe菲力普ê脚步、接任普世教协秘书长chit-ê职位。

阮五个人无论tī种族、国籍ia̍h是教派上lóng完全无牵连。黄牧师隶属长老教会，周藤是卫理公会派，吉姆是路得教派，我是tī英安利甘教派。阿哈隆大概是卫理公教派ê。组织ê官方语言是英语，m̄-koh阮kan-tāⁿ有一个人ê母语是英语。阮ê成长背景mā完全无相仝。周藤tī中国大陆出生，m̄-koh tī新加坡大汉；吉姆是美国公民，soah tī印度教一段chiok长ê时间ê册；阿哈隆ê内心充满亚美尼亚大屠杀ê阴影，iū-koh受tio̍h拉丁美洲解放神学观念chiaⁿ深ê影响。黄牧师是一个难民，tùi伊ê祖国福尔摩莎，mā就是今á日ê台湾走出来；讲到我，to̍h是来自不公不义、无自由、实行种族隔离ê南非共合国。虽然阮之间有chiaⁿ chē无仝，m̄-koh soah有一个共通点，he就是tī阮身上lóng ē-táng看tio̍h sàn-chhiah、腐败、剥削、破病政府ê影像；这to̍h是阮辖区中急ài改善、盘根错节ê麻烦问题。

Tī定期ê工作会议上，阮会提出每一个人家己ê计画，chhan-chhiūⁿ tī辖区ê大专院校设立奖学金用来培育宣教人员，ia̍h是建立图书馆等等，然后说服其他四个人ê提案chiah是头一个ài做ê。会议中tiāⁿ-tiāⁿ有冲突，充满火药味，因为大家lóng想beh争取经费，因此tī审查其他同事ê提案ê时特别严格。M̄-koh黄牧师总有办法hō͘大家 tī chit种紧张ê气氛下保持冷静，tī激烈ê争吵了后iáu ē-tàng维持友谊。阮每一个人lóng有每一个人ê脾气、每一个人lóng有每一个人ê出发点，ē-tàng将án-ne一个团队维持tiâu，我想除了伊以外bē koh有第二个人。伊承受tio̍h流亡国外、离乡背井ê痛苦，iáu ē-tàng将阮五个人团结起来，hō͘我非常敬佩。伊从来m̄-bat自叹自怜。伊ê境遇kan-tāⁿ加深了伊敏感别人ê痛苦ê胸怀。

有伊 chit种上司兼好友，我感觉tio̍h非常ê光荣。真chē kap伊接触过ê人，lóng kap我仝款因为伊所以改变了人生。伊是上帝完美koh忠实ê仆人。伊是一位伟人。我真有幸ē-tàng为伊ê传记作序。伊必然听tio̍h了伊ê上帝、伊ê主对伊ê o-ló，「好ah！我忠实ê良仆。」

2004年4月13日