《台湾人e5先觉―黄彰辉传》

 | | | 转寄

衣锦回乡时ê m̄甘愿事件

作者 黄彰辉 2009.04.05

这是我（黄彰辉）坐日本邮轮公司ê客船，tùi东京回台，tī船顶所发生ê事件。He是tī 1937年3月，我tú tùi东京帝国大学（hiah-ê人lóng叫伊红门）毕业，是日本当时siōng有名ê一间大学。我tit-tio̍h一张毕业证册，mā是我有生以来第二张毕业证册。（注解：伊读5年台南师范附属公学校，无毕业tio̍h考tiâu长老教会中学，所以无小学毕业证册。中学chiah读3年，tio̍h为tio̍h得tio̍h政府公认ê中学资格，转学kàu东京ê青山学院继续读中学课程。本来中学是5年，伊kan-tāⁿ读4年，所以无tit-tio̍h中学ê毕业证册，直接考取tiâu台湾高等学校，毕业了后，tio̍h hō͘保送东京帝国大学读哲学科系。台湾高等学校ê毕业证册，tio̍h是伊做学生以来，头一pái得到ê毕业证册。）（请看本册p.96）

我感觉真自傲，出身tī台湾ê台湾人，tī学业上真chió有chi̍t种辉煌ê荣誉kap成就。Tī我未来ê前途，有一个chiaⁿ hō͘人欢喜koh罕有ê机会teh等我，过几个月了后，我tio̍h计划留学英国剑桥大学。我应该有充份ê理由去感觉对人生ê满足kap幸福。这是tī事件发生chìn前，我tī船á顶ê心情。m̄-koh，chit项事件ê发生，hō͘我难忘，koh一世人m̄愿（m̄甘愿，心无平）。

*自注：chit项事件发生tī我ê小弟阿明（明辉）身驱顶。我tī 1987年tùi英国tńg去台湾ê时阵，问过阿明是m̄是iáu会记得chit件tāi-chì，伊讲伊记kah真清楚，ná亲像昨hng chiah发生ê tāi-chì。

船tùi日本神户出发一二天了后，我沿tio̍h船á piⁿ ê舺板顶散步ê时阵，tú好tú--tio̍h阿明，面对面ê相逢。阮兄弟分开己经有4年hiah-ni̍h久，伊tú tùi台中一中毕业，参加毕业前ê修业旅行，chiah游览soah日本内地，由带班ê军事教官（ia̍h是老师）领队，tī回台弯ê途中。hiông-hiông相逢，阮lóng chiaⁿ欢喜快乐，tio̍h真自然ê用母语（台湾话）大声开讲，m̄是用『华语』（日本ê国家语言）。liâm-pīⁿ，阮就tú--tio̍h大麻烦，tàu底阮做siaⁿh-mi̍h m̄对ê tāi-chì？是m̄-tio̍h tī使用母语，m̄是用日本话讲话。『Ko Mei-ki（是黄明辉ê日本名字ê发音），来！』教官大声叫我ê小弟，阿明ê面色大白，马上oa̍t身tòe教官走khì。后来我知影伊是hō͘教官叫khì教官ê舱房内，而且kan-tāⁿ有in两人tī内底niā-tiā。我大概有2点钟无伊ê消息，后来伊ê同学kā我讲，伊tng受tio̍h严厉训导ê惩罚。

我就tńg去我ê舱房内ê床位，tùi行李箱内the̍h出tī东京买tio̍h ê siōng好看ê新日本衫，koh真小心ê chiòng伊穿..起来，亲像beh参加正式ê宴会（日本人叫做盛装），koh tì日本大学ê四角帽，为tio̍h是boeh hō͘ hiah-ê人知影我ê地位kap头衔。我穿戴好我所ē-tàng有ê siōng kông荣誉，准备去见hit位教官，kap伊理论拚输赢，án-ne是m̄是对我会不利，我m̄管。我去叩伊ê舱房门，内底有号叫ê声音 讲：『Hai Re（入来）！』亲像顶面命令下属ê声音。我开门，双腿跪倒tī土脚，向ti7chia ê教官行日本大礼。chit-ê教官惊一tiô，伊认为叩门ê人是伊其中一ê学生，无想tio̍h soah是chi̍t-ê穿插日本盛装，koh行chit种日本大礼ê人入来。伊甚至想khiā..起来，看见小弟hō͘罚跪koh惊。一时间，我马上改变我ê想法，koh向教官讲：『请您mài khiā起来。』我就用siōng冷静koh礼貌ê话语向伊讲：『我ē-sái坐..落来？』伊chiòng伊ê手臂伸直，手掌向上，对我表态讲：『请！』我tio̍h正坐tī我ê后脚根顶，开始对伊讲：『我来向kí会失礼。』（这koh m̄是我原本ê来意！）『he是我ê teng-tâⁿ，m̄是gún小弟ê teng-tâⁿ。阮兄弟á两ê人kah-ná是4年无见面，hiông-hiong看tio̍h，hō͘我无sè-jī用方言（我避免使用『阮家己ê语言』）对伊讲话，所以gún小弟mā chiaⁿ自然ê用方言回答我ê话。这lóng是我ê m̄对，请lí chit-pái原谅伊。』我koh向伊行日本大礼，讲：『我án-ne恳求lí原谅，我án-ne恳求lí原谅。』

日本ê男性是真奇怪ê动物。伊可能做出像动物ê狂猛，mā可能瞬间变做另外一个模样做chiaⁿ有人性ê人。伊hiông-hiông改变用完全无仝ê声调 kā我讲：『良く分かりましたYoku wakari masita（我chin-má 了解lah）。』然后转向我ê小弟，『黄明辉君，もう行ってもよいKo Meiki kun, mo ittemo yoi』伊用老师向学生ê语法，koh礼貎，甚至宠爱ê讲：『你ē-sái去lah。』

Tī hit个时阵，我chiong我ê『不甘愿』（不平）压住。kàu chit-má我犹原感觉，tī hit-ê时阵，我chiaⁿ愿意为我ê小弟án-ne做。m̄-koh我一直意识tio̍h chit款深深ê侮辱。siaⁿh？kan-tā因为kap我ê亲小弟讲家己ê母语，伊tio̍h受tio̍h hiah-ni̍h严厉ê刑罚，我必须tī施罚者ê面头前跪..落来，koh头lê-lê，来谢罪！！m̄是！『m̄甘愿！』我拒绝接受chit种羞辱，一千 pài lóng『m̄』！母语tio̍h是chi̍t-ê人ê一部份，koh是chi̍t-ê人存在上所需ê装备。禁止伊，用武力kā伊除去，tio̍h是剥夺chi̍t-ê人hō͘认同ê人格。Chit种ê行为就亲像kā人当作物件，koh企图kā伊塑造成别人ê形状仝款。án-choaⁿh去解释，lóng kan-tā ē-tàng讲是漠视别人成做二等种族，甚至tī家己ê国度内mā做次等国民。

下图：非常难得留京tī大学过三年kàu毕业，koh tī回台湾ê船顶，黄彰辉全无预期ê kap胞弟明辉见面，无tiû-tî当中使用母语开讲。m̄-koh，真害，明辉因此受tio̍h中学教官chiaⁿ严重ê处罚！（插画是驻日ê韩人画家金斗铉先生特别为黄彰辉传画..ē）

往英国留学 １申请kap交涉 1937年初，22岁ê黄彰辉，是一个teh-beh大学毕业ê青年，tng-leh考虑毕业了后ê工作前景。tùi考高等学校ê时chūn，伊 tio̍h已经设定将来ê目标，就是beh读神学。因此，伊tī东京帝国大学特别选读哲学系。伊ê父亲黄俟命牧师，向台湾南部ê英国宣教师会申请伊ê kiáⁿ kàu英国留学ê机会。Hit年2月18日，宣教师会开会期间，参与chit-pài会议ê人lóng认为chit-ê申请应该考虑。Tī决议内底，同意对黄彰辉ê留英学费补助400英磅（当时ê 1,000圆日币值134英磅），koh建议伊tī仝年秋季前往英留学四年，第一年tī Selly Oak College 试读，其后三年入学Westminster College。koh为伊申请Burns Scholarship，预计约65英磅，另外35英磅由英格兰长老教会海外宣道会向各界募捐，每年以总计100英磅补助四年，m̄-koh其他费用需要自理。进一步建议伊tī前往英国chìn前，应该继续参与tī台湾ê教会事工，kap se̍k-sāi tī台湾社会chiaⁿ活跳ê教会领导人士。决议中koh委托Mr. Montgomery kap Mr. Healey作必要ê安排，tùi-án-ni开始往英国留学。

黄彰辉tī 1937年3月大学毕业了后，tī 8月前往英国留学chìn前，tī台湾访问chiaⁿ chē间教会作传道方面ê学习。koh照阿爸黄俟命牧师ê建议，kàu东港伊ê阿公khah早住ê所在拜访亲chiâⁿ。伊chhōe一位有地位，mā thàn bē少钱，叫做『群叔公』ê亲chiâⁿ，当时务农mā做管理东隆宫ê地方绅士，对伊ê宗族ê「根」作一个探讨。伊mā特别拜访黄武东牧师、林茂 生博士、赵天慈教师。日本帝大毕业ê台湾人tī故乡无siaⁿh利益thang得，kan-tāⁿ有chi̍t-ê确实ê『特别待遇』，就是无论伊行kàu toh，总有日本高等特务跟踨tī伊ê后面。In ê任务就是beh调查伊去siaⁿh-mi̍h所在，kap啥物人对话，对日本帝国有siaⁿh-mi̍h意图。

Tī满雄才牧师（Rev. Montgomery）致Mr. James ê推荐函内底，推崇黄彰辉ê阿公kap父亲lóng是siōng hō͘人尊敬koh活跳ê二位台湾牧师，in父亲黄俟命牧师tī中学牧校chiaⁿ chē年，有chiaⁿ优良ê服务记录，伊达到 Council with a proposal，koh-khah应该协助伊ê kiáⁿ kàu剑桥ê西敏斯特(Westminster)神学院进修。Council ê成员se̍k-sāi chit-ê gín-á chiaⁿ chē年，in lóng chiok关心koh赞助，送chit-ê gín-á去英国受教。koh讲tio̍h伊tī日本东京帝国大学主修哲学kap英国文学，伊ê毕业论文是Augustine ê神学观点。特别提起Mr. Healey对黄彰辉tī日本东京帝国大学内ê优良表现，hō͘伊chiaⁿ-koân ê评价。满雄才牧师讲kàu宣教师会希望Burns Scholarship Fund ē-tàng补助黄彰辉四年逐年65英磅，母会（英格兰长老教会）海外宣道会另外负责伊每年35英磅ê费用。决议内底无强迫规定伊tī学成了后，tńg来台湾教会服务履行约束，当然nǹg望伊tī神学院工作。

因为父亲黄俟命牧师tī 1935年，hō͘日本政府强迫离开tī台南长荣中学教学ê职份，koh失去了伊费心帮赞开设ê台南东门长老教会。伊tio̍h专工去东京，tī东大 YMCA寮ê来宾室tòa 1个月。Tī he期间内kap黄彰辉作伙查读圣经ê约伯记，由圣经kap kiáⁿ得tio̍h安慰kap鼓励。Tńg去台湾以后，tio̍h全家搬kàu台湾中部ê大肚教会chiūⁿ任（1935年4月1日），tī任职之间tú-tio̍h地震，牧师宿舍受tio̍h破坏，全家搬往龙井khiā起。伊兼顾龙井kap大肚两庄ê传道事工。Tú-teh chit-ê时chūn长女淑英高级女子中学毕业，考虑往日本升学，三男明辉tùi台南二中转校到台中一中，四男安辉投考因此进学台中一中。就 tī án-ne艰难ê时期，彰辉ê大学kap留英ê重担tāu-tāu-á增加。Chi̍t-ê小乡村微弱ê教会付ê薪水，根本负担bē起生活加上教育ê开支。虽然黄家本来有土地财产，为tio̍h子弟ê教育，真正行kàu bē-liáu ê凄惨地步。Tī 1937年4月到1938年4月期间，黄俟命担任「南大（南部长老教会大会）彰化基督教医院」ê牧师。就是tī chit一年期间内底，黄彰辉tùi东大毕业，黄明辉tùi台中一中毕业；黄彰辉mā离开台湾，往英国留学。Án-ne，继续3年以后，tī 1938年4月转任到员林基督长老教会做驻任牧师。kàu战争结束为止。

下图是黄俟命牧师一间大约是1940年tī员林教会hip ê。图中后排正pêng头chi̍t-ê是吴樱桃师母，中nng是黄俟命，tò-pêng是安辉，前排ùi tò-pêng kàu正pêng 是淑惠、澄辉、淑秦、经辉。(林黄淑秦提供)

下图是黄俟命牧师用来通知亲戚朋友长子黄彰辉往英国ê日子kap轮船消息ê明信片。1937年。(黄澄辉提供)

２往英国ê旅行 Tī 1930年代，beh tùi台南到东京，需要先tùi台南坐火车kàu基隆。当时ê台湾铁路是日本国营，由台湾总督府管理。nā坐普通车，台南kàu基隆ài 14点钟，快车mā-tio̍h ài 9小时。Koh来是tùi基隆港坐轮船kàu神户，航海ài 3工。Tī日本本土神户chiūⁿ-huāⁿ，koh-chài tùi神户坐火车kàu东京，ài 12点钟。加上转接、换车、thèng候ê时间， 6工thang讲是siōng紧ê旅程。M̄-koh，因为台湾是日本ê殖民地领土，m̄免the̍h护照mā无出入境手续ê麻烦。Tùi日本ê领土台湾beh kàu伦敦，he就是正港ê出国，就无简单lah。

按照『汽车时间表』（铁道省编纂，July 1937），日本邮船会社编列，由7月到8月底，tùi横滨港出帆kàu伦敦，大约kòe二礼拜有chi̍t-ê班次：7月13日、7月28日、8月11日、 kap 8月25日起航。其中kan-tāⁿ chi̍t-ê轮船班次，是8月11日起航hit班，经过基隆。Chit-ê航路是ùi鹿岛丸启航。8月1日由横滨出航，8月2日名古屋、8月3日大阪 lóng停泊一工，tī神户港停泊两工，koh tī 8月5日启程，koh tī门司港停靠两日，tī 8月7日启程，koh kàu上海，tī海上kap港内总共三工，8月11日到基隆，hit船tī同日，8月11日由基隆出发。黄彰辉坐ê chit-ê轮船 ê可能性siōng高，因为当时两个月chiah有一班次由基隆到伦敦。Tī伊ê自传，伊讲是日本轮船，koh tī 8－9月。鹿岛丸是9,908吨ê汽船，除了货物以外，koh有86个一等、34个二等、37个特三等、kap 24个普通三等舱床位。

黄彰辉讲，tùi伊tī 1937年3月底由东京tńg来台湾到8月chit段时间，伊感觉tiāⁿ-tiāⁿ有『高等特务』跟踨。特别这正是日本chhōe藉口 beh向中国起兵侵略，mā已经tī 7月7日tī芦沟桥惹起战事，演变成中日战争后chiah一个月，受tio̍h高等教育ê台湾人lóng逃bē过监视ê眼目，一sut-á批评ia̍h-sī反抗日本ê举动，lóng会招致个人kap家族ê灾祸。Hit工伊到基隆港码头时，伊特别感觉『特高』ân-ân ê跟随伊，差不多beh接近ia̍h-sī阻止伊向前。一直kàu乘客chiūⁿ船ê楼梯之前，kā穿制服ê船员提出船票证件ê时，hit位船员惊chi̍t-ê，讲：『噫！是我ê朋友老黄。我chiah teh ioh可能会是你！chit-má确定是你。』伊是铃木敏道，tī青山学院中学部时阵ê同学，mā tòa过仝一个学寮ê房间。铃木是hit工ê守卫，mā是kui-ê航海旅程内ê天使。铃木看tio̍h后面一阵人讲：『阮有chiaⁿ chē时间tī船顶谈论过去6年ê经验。船大约一点钟就beh出发。我看你ê父母人beh送你离别，m̄-koh in kan-tā会使送kàu chia niâ。』讲liáu就the̍h彰辉ê护照掀开，koh改变声调大声讲：『外务省发行，发照期日――，四年有效，好好，lóng合规定。』然后伊就kā彰辉ê『父母』讲：『请原谅我，阮是中学ê同学。』伊就指示彰辉向前进。特务只ē-tàng跟随黄彰辉kàu hit ê所在，因为无理由，mā无通缉条仔thang chiūⁿ船，就消失lah。彰辉chhoán一口气，感觉心理siōng ê解放。伊感觉，án-ne ê天助kan-tā ē-tàng解释讲是上主ê安排。其实hit一工，tùi基隆chiūⁿ船ê kan-tāⁿ有伊chi̍t-ê人。

Tī教义学ê课堂顶，黄院长bat提起伊只要出国，tio̍h会tú-tio̍h身分ê问题。日本人看姓『黄』（一看就知影m̄是日本姓）ê青年，the̍h日本护照bē顺眼。外国人看tio̍h有án-ne chi̍t-ê人冠以单音节ê『支那人』名字（支那人是指Chinese华人，二次大战结束前，台湾人kap日本人lóng普遍用chit-ê名 称），koh敢出示日本国籍身分非常ê奇怪，chiaⁿ pháiⁿ相信。台湾人ê悲哀，tio̍h是án-ne，无家己生根ê认同位置。

鹿岛丸tī 8月11日离开基隆了后，停tī香港。Tī《回忆录》内底，记载hit船tī香港，因为tùi日本人ê反感情操siuⁿ-koân，the̍h日本护照ê人m̄准chiūⁿ-hōaⁿ。Tī香港停泊，kan-tāⁿ有够时间载货kap两个船客chiūⁿ船。Tī船顶ê乘客tùi-án-nilong2总19个。其中大约12人是日本人，in是商业、企业，ia̍h-sī艺术家，全员lóng beh 去法国。黄彰辉无jōa久tio̍h发现in ê志向kap兴趣lóng kap伊cheng差chiaⁿ-hn̄g，所以tio̍h chiaⁿ-chió kap in交往消遣。当然，内底有一位好朋友，就是青山学院中学ê同学铃木。伊是hit只船顶ê副航务长，in就chiaⁿ欢喜ê开讲中学同学时ê记忆，mā谈kàu船顶kan-tāⁿ in两人是基督徒。Koh讲tio̍h伊认为中日战争无妥当，koh是日本thiâu-kang起事开战。伊chiaⁿ无认同，mā无愿意tī无jōa久ê将来hō͘召集入去海军服兵役。言语内底tiāⁿ-tiāⁿ听到伊吐大气koh问：『阮基督徒ē-tàng做siaⁿh-mi̍h？阮是chiah-ni̍h ê chió数！』

Tùi香港8月14日启航，koh-chài往新加坡，8月18日停泊，19日启航往槟榔城，21日启航往锡兰ê吉隆坡Colombo市（今á日ê首 都），8月25日启航往亚丁（南叶门ê首都），9月2日ùi亚丁起航往Suez（就是Suez运河南端ê港口苏伊士），tùi hia往Port Said，9月7日离Said，9月11日到义大利南部ê港口Naples，9月13日kàu Marseilles，14日离Marseilles，9月 16日离开Gibraltar（西班牙南端ê半岛kap海港），长久ê航海总算tī 9月21日结束，kàu目的地伦敦。Tùi基隆到伦敦航海41天！实在是遥远ê旅程，hō͘人感觉是kàu chiaⁿ hn̄g ê世界。当时ê船费，tùi横滨到伦 敦，特级ê二等票价是￡69，koh普通ê三等票价是￡42。（摘自昭和12年7月号汽车时间表，铁道省编纂，附汽船自动车时间表，发行者：日本旅行 协会。）tùi台湾到伦敦，mā kan-tāⁿ减少两三英磅（两三￡）niā-tiā。Nā是一英磅（１￡）为7.5日圆（7.5￥）计算，￡42 x ￥7.5＝￥315。当时ê公学校教师，chiah领到￥50月薪，án-ne就是chi̍t-ê公教人员6个gōa月ê工资hiah- ni̍h chē lah。

新ê学习天地―英格兰

１ tī西理屋学习 黄彰辉chē轮船kàu伦敦码头，是1937年ê 9月21日，伊tú过23岁生日（8月20日）。Tī伦敦ê码头chiūⁿ-hōaⁿ，由英格兰长老教会海外宣道会干事Dr. Douglas James欢迎接待。虽然tī东亚ê世界得tio̍h罕有ê大学教育，伊已经达到文化、见识、学历ê顶点。m̄-koh tī西欧ê英格兰，伊所带来..ê，siaⁿh-mi̍h 差不多lóng无。无亲人、无朋友、无先辈，种族、语言、风俗、惯势，全部lóng chiaⁿ生疏。佳哉宣道会ê众理事对外国有见闻，对chit位青年外 国人有周全ê关怀。学期teh-beh开始，所以受tio̍h安排，去伯明罕（Birmingham）市西旁ê西理屋（Selly Oak）大学城生活、适应，kap准备一年后ê正轨神学院ê课程。以早西理屋大学城，是基督教各教派大学ê大集成，教会ê专业人才，尤其是海外宣 教人士ê养成，siōng有名。今á日ê西理屋大学城，因为各教派经济力ê衰退kap宣道会ê垂败，lóng hō͘国家ê教育部经营，已经 kap伯明罕大学合并，成做hit-ê大学ê一部分。

Bē pháiⁿ想tú登陆ê青年台湾学者黄彰辉，归腹肚装满大学ê学问、知识kap内容，m̄-koh tī听标准ê英语，koh是以西欧ê方式表达家己 chit方面，lóng比bē起当地ê中学生。当地ê学生lóng hiah-ni̍h知情、自在、适应。宣道会干事所安排ê是西理屋大学城内ê Overdale College，是chiaⁿ细ê学苑，『英格兰基督教会』ê神学研究中心。当时ê院长，William Robinson博士，是教义kap宗教哲学家，是一位富有笑诙、容易亲近、关怀chiau-choân ê人。院长ang-á-bó͘、做导师ê Gray先生，特别关照黄彰辉，所以过无jōa久，伊ê烦恼就消失，koh渐渐适应chit-ê环境。Tī 1938年4月ê『The Christian Advocate』刊物内底，黄彰辉描述伊对西理屋ê印象，讲到：『我tī 1937年9月22日下晡5时左右，kàu西理屋ê Overdale学院，我感觉chiaⁿ生疏。这是我一生ê新出发－充满tio̍h惊惶kap希望。首先我hō͘绍介se̍k-sāi一位chiaⁿ好斗阵ê青年。伊tiāⁿ-tiāⁿ以笑容细腻ê重覆，指伊ê西装ê颜色，kā我讲he『phú色』就是伊ê姓。当我iáu继续艰涩 ê chhōe出怎样去ka叫ê时，伊接过我ê行李领路chiūⁿ楼。我ê嘴舌冻结bōe灵－hō͘我真艰苦。M̄-koh，当我发现伊就是我ê教师，我 ài siong伊所教ê课ê Mr. Gray ê时阵，我感觉chiaⁿ不安。Nā是我早知影伊是siâng，我绝对bē允准家己hō͘伊the̍h我hiah-ni̍h重ê行李！我 chit-ê东方学生kan-tā ē-tàng吐气。伊chiaⁿ亲切，koh是一位哲学家，m̄-koh ūi-siáⁿ-mi̍h伊充满tio̍h喜乐neh？』宣教人才进修ê学苑真有 chi̍t-ê由衷ê感谢kap喜乐，亲像甘泉流露。

(下图是西理屋ê Overdale学院外观。(杜英助提供)

m̄-koh异国ê情调、语言、生活方式，对黄彰辉是『文化ê冲击』。伊写..落来hit时ê感受，讲：「逐工我lóng tiām-tiām无讲话，我tiāⁿ-tiāⁿ想，众学生tī án-ne生份ê语言环境内底，ē-tàng交往kap学习，tī chia ê生活有新鲜kap自由ê气味。nā chia ê天气有khah好，m̄知jōa好！我bē惯习所有ê学生叫校长『W.R.』。我每pái听tio̍h án-ne叫，lóng受tio̍h冲激，koh当校长称呼in『兄弟』，我感觉chiaⁿ无自在。M̄-koh冲激过了以后，我tāu-tāu-á感觉有亲密ê气味。 我家己bē-sái hiah-ni̍h简单变做án-ne，因为咱东方有俗语讲：『tòe师表三』。」（*The Christian Advocate, April 1938, p. 202）

当然，伊mā开始kàu别ê学院，去kap in ê学生kap教授交往。伊真紧se̍k-sāi 所谓『中心教职』，去探究新约、旧约、教会史、教义等等。Tī-hia伊ē-sái家己选有兴趣ê讲义，学习希伯来语、希腊语，mā补习英 语。对伊来讲，Overdale College ê教授方法，是siōng合胃口..ê 。因为in无hō͘伊『考试』ê压力，伊就尽情选择家己爱听讲ê课，尽管吸收，m̄免烦恼受教授ê考核phah分数。所以，伊家己认为tī Overdale College che一年ê收成chiaⁿ-chē。

按照英格兰长老教会海外宣道会委员会1937年7月20日ê会议记录，in核准hō͘ 黄彰辉40英磅当做奖学金。in对伊要求ê条件是，伊必须顺利完成所应该接受ê课程。英格兰长老教会海外宣道会委员会tī 1938年4月26日开会ê记录上报告记载，『既然黄彰辉已经tùi台湾ê Burns Scholarship Funds得到60磅ê补助，本会mā hō͘ 伊40英磅，英格兰长老教会海宣会发hō͘黄彰辉一年lóng总100英磅，提供ê年限是四年。Tùi 1931年到1932年之间，台湾长老教会受英国长老教会总会ùi南台湾各种宣教费用资金ê申请kap补助资料知影hit时ê 3000圆日币大约是400英磅。Koh ùi 1938年3月1日，Formosan Mission Committee（台湾宣教师会）议决ê记录知影伊受补助一年40英磅，lóng总4年hō͘黄彰辉，另外ê一年60英磅有4年ê学费，由Burns Scholarship Funds提供。』

Ui31937年10月27日发phoe ê日期来看，可能是黄彰辉kàu英国以后所修ê第一封公事信。伊tùi Overdale College致Mr. James ê信函中，请求Mr. James为伊犹bōe la̍p ê学费28.10英磅设法。

1937年10月28日，Mr. James hō͘黄彰辉ê回函中，讲：『你ê父亲寄来1000kho͘日币兑换做134英磅，请kàu银行开户头，我会拨入你父亲寄来ê钱，kap半ia̍h ê海宣会奖学金hō͘你，另外半数奖学金，tī 4月1日拨hō͘你。』可见当时tī英国ê生活水准，对台湾ia̍h-sī日本来讲是chiaⁿ-koân ê。1000kho͘日币tī台湾当时是中学老师足足二年ê月kip。m̄-koh你看，hit-ê钱kan-tāⁿ够黄彰辉tī英格兰年半ê生活kap学费ê费用niā-tiā！

下图是黄彰辉kap兰大弼（少）两人hip tī『家』前门ê相片，1937年。(兰大弼提供)

大概是1937年ê圣诞假期，黄彰辉第一pái tī英格兰『回家』度假，伊ê『客』父母是老兰大卫医生ang-á-bó͘。In比黄彰辉早一年tùi台湾ê彰化基督教病院退休，tńg去 英格兰，tī伦敦南方ê Red Hill(赤色冈)买一间厝。楼顶四间房间，楼脚有灶脚、客厅、餐室、工作房等等。兰医生ang-á-bó͘称呼伊做Formosa House(台湾ê厝)。少年兰大弼会记得65年前，bat尊奉母亲ê命令，去伦敦ê火车站，接tùi Birmingham坐火车ê黄彰辉tńg去厝。tùi hit一pái以后，黄彰辉就kā兰家当作家己ê厝，自由自在ê出入。伊kap少年兰大弼mā认为是兄弟。In本来就是仝年，koh仝款tī彰化出生。作者tī 2002年，往英格兰访问兰医师ê时阵，伊pí一张tī赤色冈厝内hip..ê，in两人khiā作伙ê相片，koh讲：『我kan-ta有大汉草，m̄-koh，彰辉有好头脑。』

２进入西敏斯特学院 Tī Selly Oak 试一年ê英格兰生活以后，总算进入想chiaⁿ-kú nǹg望ê剑桥大学。西敏斯特学院是tī剑桥大学校区ê东北角，是英格兰长老教会栽培牧职人员ê学府。早tī黄彰辉入学ê一年前，1937年7月20日ê海外宣道会记录，in议决支出hō͘黄彰辉连续4年，逐年40英磅ê奖学金（注一）。kàu 1938年4月26日，in议决增加逐年60英磅。入学chìn-chêng，逐位英格兰长老教会出身ê人须要通过入学考试，chiah ē-táng入学。照西敏斯特学院考核委员会1938年10月5日记录，有6位参加考试，全员及格。校方无hō͘黄彰辉入学ê考试，m̄- koh，ài伊交一篇文章。考核委员会ê记录内讲：黄彰辉满足委员会ê审核，mā准伊入学。其他iáu有6位外国来..ê，其中2位ùi美国来，chhun-ê人是tùi加拿大、南非、法国、苏格兰lóng一位，mā lóng chiau全。Án-ne，hit年入学ê人lóng总是13名。

下图是西敏斯特学院ê注册记录。图顶头有三段分别表明是1938年、1939年kap 1940年度ê第一学年、第二学年、第三学年ê报名记录。(怀约翰提供)(无影印..出来ê部份注明黄彰辉是东京帝大文学士)

逐年秋天开学ê时chūn，学生kàu学校，学校koh无要求注册、la̍p钱。学校kan-tāⁿ准备签tò簿hō͘学生签名报tò。Tùi 1938年，tī簿á顶伊lóng用日文西式ê拼音签名Shoki Ko、父名Simei Ko(黄俟命)、年岁24、出世tī Formosa、出身大学Tokyo Imperial University（东京帝国大学）。第二年ê报到登记本内底，一切lóng kap旧年仝款，kan-tāⁿ是岁数增长了一岁，升上二年级。第三年ê报到登记本内底，mā一切仝款，mā是koh大一岁，leh读三年级。M̄-koh，kā伊三年ê报tò拿来比较，会使发现，头一年伊记入有帝国ê字，m̄-koh第二年以后就省去chit字，kan-tāⁿ写东京大学。咱ē-sái推想，身tī欧洲，看大学ê形成kap运行顶头lóng无『帝国』介入tī教育ê学府。koh kap大英帝国比..起来，日本tī历史kap 规模上lóng亲像gín-á看tio̍h大人仝款。可能，青年黄彰辉已经tī心肝内对仝款是实行『殖民主义』ê两国，tùi日本ê皇帝制度所订出一切对人民ê压制，有iah-siān ê心情kap观念。

下图：少年兰医生医学院毕业了后，tī 1939年往福建泉州赴任做宣教师chìn-chêng，kap小妹Jean kap彰辉hip tī『厝』ê门口。 (兰大弼提供)

下图为兰氏一间：由左老兰医生、Jean、彰辉、女学生（二次大战期间，tùi伦敦疏开到兰家名字叫做Marjorie Messenger）、彰辉kap老兰医生夫人。( 兰大弼提供)

Tùi西敏斯特学院校门向ê正pêng看..过去，形成三层楼ê部分，tio̍h是学生ê宿舍。kàu三十gōa年前为止，m̄ kan-tāⁿ是西敏斯特学院，kui-ê 剑桥大学是男子（指学生）ê世界。M̄-koh，西敏斯特学院对待伊ê研究院生kap牧职绅士，有高尚ê风格。逐位学员lóng分配有两ê 12平方公尺ê个人房间。一间是寝室，收藏衫裤、困眠、起居、歇困使用。另外一房间是读册、写字、写phoe，koh tiāⁿ-tiāⁿ用做接客、 座谈、讨论等等ê用途。Tùi黄彰辉以后ê生活习惯势推测，伊一定是tī chit间房间内pok薰、lim茶、lim咖啡、lim酒、想厝，省察所受ê使命，思考、祈祷、看异象、抱希望、做灵修ê作业。看..起来，khah早ê学生，大学毕业了后，来kàu神学院，就是有社会上、学术顶头ê地位，受人看待为『人群 ê师表，牧者』ê风格lah。

另外一项是，tī宿舍室外ê走道两pêng，挂逐年koh-leh学校ê学师生ê全体相片。Tùi 1910年代开始，西敏斯特学院逐年度ê学生（kap老师）全体ê相片挂tī宿舍ê走道两pêng。Chit chi̍t项，真有尊重学生kap学校ê传统kap尊严ê作风。逐ê访问西敏斯特学院chit部分ê人，会tī 1939年、1940年、kap 1941年三张相片顶头，看tio̍h黄彰辉khiā-tī众学员中nng。以后做伊ê厝piⁿ，koh做副院长ê安慕理，mā tī 1941年度hit幅相片内底。因为in两人tī 1940－1941年期间做kòe同学。

照安慕理ê回忆，tī 1940年4月中，黄彰辉读西敏斯特学院tú升三年级ê时阵，安慕理来读神学院。安慕理teh行学校学生宿舍ê楼梯ê时chūn，第一pái看tio̍h黄彰辉tī phah乒乓球。伊phah乒乓球ê神态，留hō͘安氏深刻ê印象。无jōa-kú安氏发现tī校内，黄彰辉是无人ē-tàng phah-iâⁿ ê乒乓球高 手。

1941年6月，西敏斯特学院教务委员会，考核通过一批学员毕业，黄彰辉是毕业班中ê一员。因为是非常时期，tī台湾ê亲人、朋友lóng无人观礼、庆贺。伊欢喜ê心受tio̍h孤单tah-leh，心肝内一定想tio̍h『tang时chiah ē-tàng tńg去故乡kap亲人、朋友团圆』。

　　2002年3月5日，笔者有机会往剑桥(Cambridge)大学观光、学习，主要ê目的，就是去考察是m̄是有黄彰辉牧师tī 1938年到1941年期间，tī西敏斯特学院（当时英格兰长老教会ê神学院）学习ê环境kap『证据』。

　　大约9点半kàu剑桥ê火车头，怀约翰（John Whitehorn）牧师（khah早tī台湾帮赞翻译排湾族圣经ê学者，mā做kòe玉山神学院ê院长）kap王宗尧牧师（台南神学院历史神学副教授，tú-hó tī hit间学校做客座学者）tī-hia等我。王牧师开车，就直接去西敏斯特学院。

　　Tī学生活动室，遇tio̍h一位职员tùi阮说明，tùi英国长老教会kap英会员教会联合成做联合归正教会以后，就成做联合教会神学院。Tī壁顶有众学生ê相片，分做三年ê学习kap第四年ê实习年级，逐年大概有15位，其中cha-bó͘占一半。早前m̄ kan-tāⁿ西敏斯特学院，连剑桥kui-ê大学，lóng是限制做cha-po͘ ê学习园地，chit-má ê神学院是学术性..ê，是参与tī Federation，以剑桥大学ê名义授与学位，m̄-koh联合归正教会（英格兰长老教会ê继承教会）ê学生，tio̍h-ài考取hit-ê教会 ê『教师资格』，chiah ē-tàng受教会监选kap聘请去封立做牧师。

　　会记tit tī台南神学院学习ê时阵，有两件tāi-chì是特别模仿西敏斯特学院ê方式..ê：一是，课程ê制定kap 要求，nā西敏斯特排定、要求，南神就一定án-ne做，譬如讲：ài读基本ê组织、历史、圣经神学，ài-the̍h真chē学分，chiah ē-tàng毕业，…等等。另外一个方式是，黄彰辉院长主张，mā尽量去提供hō͘逐ê学生chi̍t-ê房间ê安排。当作者读台南神学院ê时阵，除了一年级ê时阵因为房间无够koh tòa tī『统间』以外，lóng是享受个人房..ê。虽然无法度仿效西敏斯特一个人两间房间，m̄-koh看..起来，现代ê英国mā亲像台湾无法度tǹg去kàu英国ê极荣显，有国家权势kap财富ê时代。

　　想beh用chi̍t-kóa时间，koh-khah详细看逐年度众学生ê相片，譬如讲：安慕理、弥迪理、杨士养、张德香等先辈，mā lóng tī学年度ê团体相片内底。m̄-koh因为已经是lim茶ê时间，全校ê师生lóng tī仝chi̍t-ê时间10点半kàu餐室，互相phah招呼、短谈。佳哉，院长Dr. Orchard在场，阮tio̍h掠tiâu机会kā伊独占..起来，讲起二次大战时期ê西敏斯特学院，kap黄彰辉牧师tī普世教会上ê地位kap西敏斯特ê光荣等等tāi-chì。除了院长有伊ê公馆以外，mā有院长ê资料室，虽然无机会访问院长公馆，m̄-koh因为怀约翰ê父亲tī 1950年到1960年代做kòe院长，lī-chhiaⁿh懹牧师ang-á-bó͘ mā tī-leh学习中，tòa tī公馆内，伊就为我大概ê说明。Tī资料室内底，伊有真chē ê『总会ê记录』、『普世领导者』访问学校ê记录kap相片，…等等。m̄-koh关于黄彰辉校友ê资料算是chiaⁿ-chió，这mā是因为黄牧师tī世界siong四界lóng-leh活动，m̄-koh连一pái lóng无正式访问，ia̍h-sī受邀请tńg去演讲，ia̍h-sī主持大ê纪念行事，hō͘西敏斯特增加光荣。Chit点，台湾 ê教会kap神学院比英格兰长老教会kap西敏斯特khah思念校友koh做khah周全。这大概是两个国家kap人民ê惯势kap想法ê无仝所造成..ê。

我向Dr. Orchard院长请求，是m̄是可能the̍h tio̍h黄彰辉牧师ê在学记录。可惜管理史料（Archive）ê职员是礼拜三歇困，无法度chhōe tio̍h。Orchard院长无hiah-ni̍h乐观，因为英国ê牧师真chió koh-chài往外国『深造』，kā学校the̍h成绩表ia̍h-sī在籍证明。后来院长ê秘书以邮寄hō͘笔者一kóa关于黄彰辉kap学校kap海宣会会议ê记录。怀约翰mā替笔者hip koh寄西敏斯特师生ê 1938年、1939年kap 1940年ê照片。

(下图是西敏斯特学院ê礼拜堂外貌)(杜英助提供)

Tī chiūⁿ楼访问学生宿舍以前，起先懹牧师kap王宗尧牧师引chhōa 作者进入Chapel参观，作者无想tio̍h in ê Pew（会众ê座椅）是分两排相向，讲台是成做直角..ê，án-ne，司会ê人是tī tò-pêng ia̍h-sī正pêng，会众面对面，m̄是看讲道ê人，是看同学来做礼拜。作者认为hiah-ê人必需siōng-kòe礼拜学ê历史 课，chiah ē-tàng理解以前ê人是怎样受神学教育..ê。

　　hit座礼拜堂是有一对ang-á-bó͘ tī第一pài大战时失去后生，所以奉献一笔钱，建造chit-ê礼拜堂做纪念。

　　Kap Dr. Orchard院长讲soah，懹牧师kap王牧师kap作者就去本馆ê二楼，chit-má ê图书馆参观，chit-má图书馆ê内部建造是chit-má ê礼拜堂以前ê Chapel，chit-má是做西敏斯特学院ê记念馆，tī壁顶有挂历代教会重要ê人kap西敏斯特ê院长ê肖相做记念。

注一：(Foreign Mission Minutes海宣议录vol xii 1935-38)

下图是今á日ê西敏斯特学院外观(一)。(王宗尧提供)

下图是今á日ê西敏斯特学院外观(二)。(杜英助提供).

下图: 西敏斯特学院外观(三)。(杜英助提供).

下图：西敏斯特学院ê单身学生宿舍，大约3mｘ4m。黄彰辉读册ê时代，逐个人有两间房间，一间做睡房，koh一间做读册、lim咖啡、kap同学开讲的用途。 (张瑞雄摄)

下图是西敏斯特学院1938年度（黄彰辉在学第一年）师生合照。黄彰辉tī后二排tò-pêng六。(西敏斯特学院资料室提供)

下图是西敏斯特学院1939年度（黄彰辉在学第二年）师生合照。黄彰辉tī后二排tò-pêng一。(西敏斯特学院资料室提供)

下图是西敏斯特学院1940年度（黄彰辉在学第三年）师生合照。黄彰辉tī中排正pêng二。(西敏斯特学院资料室提供)