《台湾人e5先觉―黄彰辉传》

 | | | 转寄

世界基督教青年大会

作者 张瑞雄 2009.04.12

Tī 1939年7月24日到8月2日，tī荷兰首都阿姆斯特丹市，召开世界基督教青年大会会议，有1500人参加。黄彰辉第一pái以代表台湾教会kap英格兰长老教会神学院ê学生ê身分参会。参会人ê名单内底代表日本ê有24人，其中有两个人以非日本名字参会，chi̍t-ê是tùi京城（今á日ê汉城）ê YMCA来ê Sousen Lee，另外一人就是黄彰辉（Shoki Ko）。Chit-pái ê会议，德国无派代表参会，仝年9月，因为德国进军占领波兰，英国kap其他盟国向希特勒ê德国宣战，爆发了世界第二pài大战。Chit-ê会议，ē-sái讲是hōe-chê世界基督教青年组织tī战前所开ê siōng有意义ê世界性会议。

Tī报名准备ê阶段ê 1939年5月24日，黄彰辉致Mr. Douglas James ê phoe内底，讲：『nā台湾ê教会允准我，我beh参加tī荷兰ê阿姆斯特丹举办ê世界性基督教青年大会。请寄phoe hō͘台南长老教中学ê万校长，伊tī台湾替我设法，tī chìn前3月台湾长老教会大会中提出chit-ê议案来核准我参加。mā请你代替我la̍p 7.00英磅报名费hō͘负责人Mr. Adiseshiah。』

1939年6月9日，黄彰辉（Shoki Ko）因为得tio̍h资金，接tio̍h邀请文件, ē-sái用正式会员资格参加tī阿姆斯特丹召开ê世界基督教青年大会。Shoki就修函hō͘ Mr. James，kā伊说多谢。

Chit-ê tī阿姆斯特丹召开ê世界基督教青年大会，ē-sái讲是组织构成普世教会协会(World Council of Churches) ê前身。伊ê目的ē-sái讲是向世界宣示基督教是『宣扬』ê宗教，tī前一百年期间，kā信息chah-kàu差不多世界每chi̍t-ê角落。像大会ê主题所宣示，in ê信奉者是『胜利者基督(Christus Victus)』，无意中，变做teh标榜『施与』ê（白种人ê）教会ê大会。Tú好，这会开tī teh-beh爆发二次大战ê chìn前，tio̍h ná-ne变成历史siong siong尾ê一pái，欧洲人居上ê普世基督教大会。黄彰辉tú好适时、适地，得tio̍h英格兰『母会』提拔代表，无，Shoki tio̍h bē代表台湾教会ia̍h-sī日本去参加。根据伊ê朋友胡德(George Hood)所讲，黄彰辉确实是受英格兰长老教会ê推荐拥护所以ē-sái参加，因为英格兰长老教会有chi̍t-ê优秀ê『宣教产物』，ē-sái当做一种标榜、刺击、贡献hō͘世界，tùi án-ne Shoki参加lah。

大约tī早一年前ê 1938年，tī印度ê Madrid召开世界宣道大会。英格兰长老教会认为hit-pái ê会是基督教历史siong ê里程碑。因为这算是第一pái得tio̍h全世界所有基督教宣道会认真ê回响。M̄-koh，chit种ê会kan-tāⁿ会齐了『传授方』，但是无『承受方』ê代表ê宣教大会，以后无机会，mā因为随后爆发ê战争，这一pái mā是变成siong尾一pái ê欧美世界大会。过十外年以后，世界ê政局改变，地图完全刷新，无koh出现『传授方』单独一面所形成ē，欧美神学占tio̍h专利地位ê宣道大会。Tùi西敏斯特学院有Dr. Farmer代表英格兰长老教会去Madrid参会，kui-ê学院ê师生lóng kap伊学习关于基督教tī全世界宣道ê神学、理念、热情、kap展望。

1939年7月24日到8月2日所召开ê阿姆斯特丹ê世界基督教青年大会，因为是以青年当做号召，意图siong ē-sái讲是无『传』ia̍h-sī『受』方ê区别kap限制。Chit-ê会议是四个世界性ê基督教组织：一、基督教青年会世界联盟；二、基督教女青年会世界联盟；三、世界学生基督徒联盟；kap四、普世教会协会联合召开ē。按照英格兰长老教会1940年ê总会记录内底，有关世界基督教青年大会青年事工委员会，做了ē-kha ê报告：『…代表咱ê教会，有三位（两男一女，名字省略）做正式代表。另外有两位青年（男女各一，名字省略）mā受大会列入成做代表。Koh加siong一位牧师kap一位女士受大会选做讨论组组长，koh由咱教会有Miss Jean Fraser当选，得tio̍h大会日程进行主席ê一ê荣誉。本青年事工委员会主席受邀请，做参会员兼做英国参会者ê领导。其它，kap咱教会有相关ê人，有Sheffield Cheng牧师，做讨论组组长；黄彰辉，chin-má tī西敏斯特学院学册，是以日本代表之一ê身分出席参加。』

因为黄彰辉tùi读台湾高等学校ê时期，就已经tī明有德牧师指导下，参加（日本）学生基督徒运动，伊一定会感觉欢喜见tio̍h旧知、同志。当时ê台湾基督长老教会，tī政治、经济、言语上，lóng无算是送chi̍t-ê有资格ê代表出席。lī-chiaⁿh tī 1939年，台湾教会ê领导，tú tùi英格兰宣教师移交hō͘『台湾人』（其实是交tī日本人）手nih，根本就无能力处理kui-ê教会ê事务ê人，kap办理外交事务ê办事处所ia̍h-sī人才。黄彰辉无可能是台湾ē、mā无可能是台湾教会ê代表。M̄-koh，tùi准备ê阶段，伊就得tio̍h英格兰长老教会海外宣道会Douglas James干事ê关心、注意，无hō͘黄彰辉错过这pài历史性有意义ê机会。

按照黄彰辉tī 1939年7月19日tùi Wallasey ê Yeo先生家写hō͘ Mr. James ê phoe内底，伊提起：经由James ê手收tio̍h ê旅行费用。信中mā提起tùi日本基督教联盟收tio̍h，欢迎伊代表日本教会参加青年大会ê批信，内底提到ài付30日票hō͘伊做费用。伊讲：『It is rather awkward to be delegate for both the Japanese and Formosan church. But I think I had better accept it as it happens.』（我想，chi̍t-ê人做日本kap台湾教会ê代表，感觉无siáⁿ爽快。m̄-koh我kan-tā ē-tàng承受伊tī我ê身躯顶发生。）tī仝一张批内，伊提起伊去荷兰ê时tī英国ê路siong，向教会讲宣教事工kap情况。最后伊讲：『我旅游真快乐，m̄-koh国际ê势面，hō͘我真操烦。』

Tī普世性ê基督教会议内，有25岁ê黄彰辉参与，tī历史上ê意义非常ê大。因为伊本身是青年、少壮神学家、精通多种语言，是tùi非基督教地区出身，是宣道地区所出ê珍贵『产品』。kàu战后，chiaⁿ chē『异教徒』、『殖民』，lóng来脱离欧美ê剥削、压迫，koh宣告独立。基督教会一定ài悔悟，朝向解放、多文化、多语言、本土化等等ê道路修改过程。Tī新ê情况之下，教会需要符合新时代ê领导。身为受殖民主义统治、帝国主义压迫，koh看见欧美『基督教国』ê独尊鸭霸、屠杀意见bōe合ê人、互相怨恨、言行矛盾，神学家黄彰辉ê乡土、实况神学，ē-sái讲是以阿姆斯特丹普世基督教会议当作开头。

Tī世界基督教青年联盟大会内底，tùi日本有一位女神学生，名叫武田清子，mā做日本青年代表参加。根据武田tī 1990年代后期hō͘笔者ê话，伊kap黄彰辉是头一pái tī会场相tú、相se̍k-sāi。但是，因为1939年ê会议了后无jōa久，欧洲就进入第二pái世界大战。因此，两人完全无机会kap环境thang交通往来。一直kàu两人lóng tī教界chiaⁿ有chhut-thoat，mā tī普世教会协会担当重要职务，chiah koh一pái叙旧、同事。武田受选做普世教协ê主席团ê一位，黄彰辉是做神学教育基金会ê主任干事。太平洋战争爆发ê时chūn（1941年12月），武田清子tī美国、纽约ê协和神学院读册，受『敌国外人』ê对待，像黄彰辉tī行动siong受tio̍h chiaⁿ大ê限制。M̄-koh，因为出生kap认同ê无仝，以后ê处境mā明显无仝。黄彰辉一直tòa tī英国kàu战争soah，武田清子坐日本kap英美交换国民ê船，1942年tńg去东京。

日本代表中iáu有一位，笔者所se̍k-sāi ê有Boston, MA去参加ê佐々木蔵之助。青年大会当时，伊tī Boston大学神学院读册。太平洋战争初期kap tī美国ê日本人同齐hō͘关tī集中营，后来kàu Denver, CO去就学，mā tī-hia ê卫理公会内ê日本人教会牧会。笔者后来tī 1967年进入卫理公会，mā tī日本人教会事奉ê时阵，kap伊做仝工。

代表日本基督教女青年会ē，光静枝小姐做会后报告ê时讲：『tùi 70国来ê 1780 ê青年ē-sái作伙，实在是chi̍t-ê奇迹，mā thang讲基督ê胜利（Christus Victus，胜利ê基督，是大会ê主题）。会方bat烦恼日本ê代表可能无hō͘允准参加，所以阮ê参加受tio̍h真chē国ê代表欢呼。M̄-koh，tī会期中，深深感觉日本人kap中国人tī面貌上是siōng sio-óa..ê，m̄-koh tī情感顶头in是cheng-chha siōng远ē 。』（注一）

根据主办单位ê统计，参与Youth Conference Amsterdam 1939年ê人，总计1,780人，来自七十gōa ê国家。参会者ê年岁是18到35岁，平均25岁。日本ê参会者，按照名录有以下24名（注二）：

教会人士： 榎本爱子 Aiko Enomoto，静冈英和学院 桥本初枝 Hatue Hashimoto，媛路，神谷町 川桐真一 Shinich Kawagiri，中野区，东京 河合花子 Hanna Kawai，世田谷区，东京 北川大辅 Daisuke Kitagawa，Kent, WA 黄彰辉 Shoki Ko，186 Inrin Road（员林路），Formosa（台湾） 久保田道子Michiko Kubota，滩区，神户 佐々木藏ê助 James Kuranosuke Sasaki，Boston, MA 薮本武次Takeji Yabumoto，大阪 结城光子Mitsuko Yuki，目乌区，东京

YMCA： 笠谷保太郎Yasutaro Kasaya，京城（汉城），YMCA 木本茂三郎Mosabro Kimoto，神田，东京YMCA Sousen Lee，Keijo京城（汉城） 中岛守信Morinobu Nakajima，西宫

YWCA： 千叶幽香子Yukako Chiba，牛込区，东京 光 静枝Shizue Hikari，东京府下 红松敏子Toshiko Kurematsu，吉祥寺，东京 松冈洋子Yoko Matsuoka，东京 中村礼子 Reiko Nakamura，Bouue – Boston School, MA 斉藤千鹤子Chizuko Saito，牛込区，东京

WSCF： 桑原由纪子 Yukiko Kuwabara，杉又koh区，东京 中岛修 Shu Nakajima，London 中岛孝子 Takako Nakajima，小平村 武田清子，神户女学院

像顶面所讲..ê，这史上第一pái召开ê世界基督教青年大会上，tah tio̍h世界大战ê乌影，ta̍k-ke己经有敌我ê分别。因为日本、义大利kap德国己经结做轴心盟国，tī欧洲已经进kàu teh-beh开战ê状态。Tī东亚，日本己经tī 1937年向中国开战，koh对英美有敌对ê表态，所以ta̍k-ke认为日本青年bē得tio̍h政府ê允准参加。

『大会ê总主题Christus Victus（胜利ê基督），催逼众青年，超越、克服万般ê障碍，koh合齐成做『主ê一体』。m̄-koh，对参加ê青年来讲，所共同ê觉悟就是：『下一pái见面ê时阵，可能就是战壕内ê相会，ia̍h-sī tī战火两pêng ê战壕相对抗。』世界青年基督徒大会就án-ne tī沈重ê气氛内底闭幕lah。（注三）

注一：tī日本YWCA ê刊物『女子青年界』1940 ê报告。 注二：tùi 1939年世界基督教青年大会名录抄记。 注三：日本YWCA ê刊物『女子青年界』1940。

毕业to̍h是失业

Tī 1941年tùi西敏斯特(Westminster)神学院毕业，hit时，英国已经kap德国宣战进入二次世界大战。英国参战是1939年9月1日，因为德国攻打波兰，看破希特勒ê野心所以宣战开始。黄彰辉ê仝年辈，m̄管是tī战线ê hit边，lóng bē-sái逃避徵召服兵役ê运命。其实，tī英国，chiaⁿ chē受高等教育ê人士，一个一个从军替陆海军报效。自细汉有因缘，仝年、仝tī彰化出生，koh是好朋友ê少年兰大弼，已经tī 1940年做医疗宣教师，去福建ê泉州服务。兰医生tī完成一切医疗实习，得tio̍h执照以前，tio̍h受英格兰长老教会海外宣道会派遣，准备chiūⁿ任。Beh走以前，参加同学同欢会，甚至tī赴任ê船顶，lóng kap受军事派令赴任地ê医疗人员同齐，内心感觉有逃避报国责任ê内疚。当看tio̍h真chē学，一个一个笔挺ê军服英姿，mā感觉欣羡。Tī泉州，虽然日本kap中国相敌对，kàu 1941年年底日本iáu bōe向英美宣战chèng前ê hit段时期，兰医生ē-sái进入日本所占领ê地区。M̄-koh，日本偷袭了珍珠港以后，伊tio̍h无koh去沿海ê厦门一带地区lah。

1937年中日已经开始战争，koh tī 1940年9月27日，德、意、日三国正式签约成立三国联盟，the̍h日本护照ê黄彰辉，m̄-nā是就职，连tòa tī英格兰lóng有问题。Chi̍t-ê台湾人，tòa tī英国，一定会切身感觉到，hit国kap日本之间敌对ê情绪一日一日增加。就án-ne有『认同siong ê悲哀』。做神学生kap bōe封牧师ê黄彰辉是笑诙、有内容，会感动人ê好演讲者。虽然kan-tāⁿ差6岁，梅佳莲tī 65年后，iáu清楚ê记伊第一pái到高女学校，替英格兰长老教会绍介海外宣道会ê工作，kap报告宣道区ê情形ê演讲。梅佳莲想起tùi家己以后献身做宣教师，由当时黄彰辉ê讲演所得tio̍h ê灵感，算是动力kap原因之一。

1940年4月18日，满雄才（Rev. W.R. Montgomery）kap黄彰辉接受英格兰长老教会海外宣道会ê邀请参与会议，会中满雄才向海宣会绍介黄彰辉，参予者kap伊做进一步se̍k-sāi ê对话。战争ê旋风，引起外地各宣教师会，一个一个结束in ê工作。Tī台湾，所有ê宣教师mā受tio̍h命命tī 1940年撤退。kàu 12月17日，海宣会接受干事报告讲，黄彰辉会tī 1941年6月tùi西敏斯特学院毕业，mā接tio̍h黄彰辉tī学校ê成绩kap表现chiaⁿ优秀ê报告，koh决议hō͘伊继续留tī英国，tī可能ê情况之下，延聘伊tī英国各教会中传讲关于宣道ê事工。该会通过一项议案，就是设立伊做该会ê世界宣道教育师。

1941年5月ê海宣会为黄彰辉作两项议决: 一、为宣道教育师设立年度预算为300英磅；二、办公、连络处所定tī西敏斯特学院内。Án-ne ê工作，允准伊逐pái出差、讲演、旅行以后，tio̍h回神学院歇困、研究、计划kap准备。

1941年6月17日，海宣会干事向该会报告，ài安排黄彰辉工作ê计划，该会bat委托干事写感谢批hō͘西敏斯特学院ê院长，感谢伊同意提供chi̍t-ê办事处hō͘黄彰辉使用。海宣会决议，tùi 8月1日开始，逐年拨hō͘黄彰辉150英磅，做伊ê事工经常费。chit笔款项委托教师人事委员会管理。（注：此金额kap chìn前ê议录有一点无仝。）

1941年6月27日，Rev. Dr. F.J. Smithen致Mr. James ê专函，宣称：『我真欢喜ê确定Shoki Ko已经完成三年神学院ê课程，koh通过结业考试，荣获毕业证册，兹此证明。』chit张phoe就等于是一张毕业证明册。当时ê西敏斯特学院是神职养成ê学府，无授与硕士学位。仝年9月16日tī Tooting召开ê South London南伦敦中会，任命黄彰辉做教师。由此开始，只要有任何ê教会聘请，伊有资格hō͘封立做牧师。

决定继续留tī英国 １日本向英美宣战后ê生活 黄彰辉tī 1941年6月，teh-beh ùi Westminster College（西敏斯特学院）毕业，照平常ê情况，伊应该准备回乡。m̄-koh，军国主义下ê日本，tī台湾tùi基督教教会ê迫害jú强烈，看..起来m̄是hō͘伊回乡ê时势。长荣中学kap长荣女中ê校长已经是日本人，教师kap学生受强迫kàu神道ê神社参拜。台湾ê教会mā受命令必须kap日本ê教会合一，宣教师ê工作jú来jú受限制，li-chhiaⁿh无受日本政府ê欢迎。kàu 1940年12月初，所有ê英格兰长老教会ê宣教师lóng tùi台湾撤退。长荣中学ê万校长（Edward Band），用电报向Douglas James报告：『1940年11月22日，有三人留驻台湾，koh来阮离开台湾。』

1941年7月30日，驻伦敦ê日本总领事馆ê代理总领事，叫做Tetsuo Bau者，致Westminster College ê总务长信函中，讲：『黄彰辉ê老父申请ài chhōe黄彰辉。阮ê记录是，伊tī 1937年来英国，tī贵校学习。』总务长向英格兰长老教会海宣会ê Mr. Douglas James陈述chit张phoe ê内容。Mr. James讲chit种ê phoe算是奇怪好笑，因为英格兰长老教会kap彰辉ê父亲黄俟命牧师有联络，绝对bē相信伊会向日本ê外务省申请chhōe in kiáⁿ ê tài-chì。

1941年8月6日，黄彰辉告知日本领事馆，伊送电报hō͘台湾ê亲人，kā in讲，伊lóng接bē tio̍h in寄hō͘伊ê批信，koh kā讲伊ê地址kap现况。日本kap英国ê紧张已经是逐家lóng知影ê事实。当然，1941年12月8日，tùi日本向英美宣战以后，日本kap英国之间ê交通kap通信lóng完全断绝。

到1941年年底，所预期ê太平洋战争终于ùi夏威夷珍珠港ê偷袭事件开始，日本向英美宣战。12月8日hit一工天bōe光，黄彰辉已经结束 Newcastle中会ê事工，tī Scotland中会工作，因为伊是持用日本国藉护照，依法hō͘看做敌国外国人，就马上失去行动ê自由。Tī Edinborough ê牧长劝伊赶紧tǹg去兰医师tī Red Hill ê厝。Kap日本宣战ê消息传遍英国逐个所在。Tī苏格兰，黄彰辉借tòa tī MacDonald (麦当老)ê厝。因为黄彰辉是敌国国民，厝主一时m̄知beh án-choaⁿh，kap黄彰辉商量，送伊tńg赤冈（Red Hill）ê客父母hia，老兰医师ang-á-bó͘ in tau。伊好意替黄彰辉买火车票，thang hō͘黄彰辉有坐位搭上。hit暗时，tī车上，车掌按照名单点名。当车掌叫tio̍h『麦当老』ê时chūn，一点lóng无像苏格兰人ê东洋人，害羞ê应答讲：『有。』

照规定，敌国外侨是beh受软禁，失去行动ê自由ê。过一工ê 1941年12月10日，黄彰辉tī Red Hill ê兰大卫医生ê公寓『Formosa』，致Mr. Douglas James ê phoe内，告知伊已成做敌国ê外国人。

1941年12月16日，英格兰长老教会海宣会tī日本向盟国宣战后第一pái开会，se̍k-sāi mā了解tùi日本成做英国ê敌国了后，黄彰辉tī英国陷入困境，英格兰长老教会海宣会决议写phoe慰问伊。

Tī 1942年1月7日，Mr. James写批hō͘英国ê内政部外国人部门，为Shoki Ko ê处境请求协助。kàu 1942年2月11日，助理内政部长回phoe讲：『我受国务院秘书长ê指示，伊关切Shoki Ko ê案情，决定伊ùi『对敌国ê外国人ê特别限制』条例中排除，m̄-koh阮要求伊必须chah警察登记证，逐pái kàu新ê所在，需要tī一礼拜内kàu当地警察局备案。』

1942年1月27日，Red Hill治安官同意hō͘伊通行证，hō͘伊ē-sái去khah远ê教会工作，同时英格兰长老教会海宣会干事Douglas James向英帝国内政部申请，解除黄彰辉ê敌国外国人ê行动限制。

1942年2月24日，英格兰长老教会海宣会干事报告，治安主管发hō͘ 黄彰辉通行许可证，hō͘伊避免受工作上ê阻碍，li-chhiaⁿh内政部mā解除伊ê敌国外国人ê行动限制。

Koh tī 1942年7月16日，Mr. James写phoe hō͘报社编辑（The Christian World, London, E.C.4）抗议in报道不实ê消息。伊讲：『你ê报道宣称Shoki Ko放弃日本国籍，接受中国国籍。这是无符合事实，伊ê祖先ùi中国大陆来，伊是台湾人，伊会有日本籍，是因为tī公元1895 hit年，台湾hō͘割让hō͘日本成做日本领土，台湾人无家己选择ê自由，成做日本国ê殖民。』

1942年5月26日，英格兰长老教会女海宣会议决，会影响tio̍h黄彰辉将来运命ê一件tāi-chì，就是选Miss Winifred Sounders（苏慰尔）做将来预备kàu中国ê宣教师。Winifred是将来ê黄彰辉夫人。当时，in两人soah lóng无se̍k-sāi，koh女海宣有规定kan-tāⁿ采用派遣单身女子做海外宣教师。大约仝chi̍t-ê时阵，英格兰长老教会海宣会有前例，黄彰辉ê实际情况是bē-sái回远东，koh因为伊tī英格兰长老教会做了chiaⁿ有意义ê工作，mā影向教会以外ê事工，成果chiaⁿ辉煌，英格兰长老教会海宣会决定以220英磅年薪继续留伊工作一年。

1942年7月21日，英格兰长老教会海宣会干事报告，该会kap London Missionary Society做暂时合作，hō͘黄彰辉mā为London Missionary Society工作。另外，黄彰辉申请beh去学习中国官话。以上二件tài-chì，英格兰长老教会海宣会决议请转教师委员会审核实行。

如1942年7月中ê申请，黄彰辉决定tī SOAS（School of Oriental and African Studies）学习中国官话ê课程，9月22日海宣会议决付伊ê学费。该会进一步研讨，nā伊tī SOAS有服务教语言ê机会，海宣会同意伊用伊教册ê收入付伊ê学费。

1943年3月16日，英格兰长老教会海宣会同意tùi 1942年8月开始付hō͘黄彰辉ê第二年ê工作津贴，是由Nielson Legacy Fund支付。

下图: 黄彰辉tī英格兰做宣教教育师当时ê英姿(西敏斯特学院提供)。

下图: 1942/2/10英国内政部通知英格兰长老教会海宣会准黄彰辉自由行动(取自英联合归正教会史料)

２日本文ê老师 1941年， tùi西敏斯特学院毕业了后，tī伊做牧师ê本行方面来讲，黄彰辉是tī失业ê状态。佳哉，海宣会因为战争ê缘故，必定ài采取『待机』ê政策。黄彰辉既然m̄是英国人，koh m̄是宣教师，根本tio̍h无路径thang使用来安插伊就业『做牧师』。Ùi『敌国』台湾承受来chiaⁿ有才情，koh有siōng高学历ê黄彰辉tī手头，kám ē-tàng善用来做宣教方面ê事工neh？in所得ê答案，就是设立黄彰辉成做『宣教教育教师』。Án-ne，黄彰辉有khang-khòe。m̄-koh宣道会ê『牧师』得若是英国人，beh受派去固定ê宣道区。In bē-sái hō͘黄彰辉牧师ê头衔、称呼。所以伊ê宣道会ê工作，就án-ne m̄是『永久』ê性质。

1943年7月20日，海宣会议决黄彰辉做海外宣教教育ê第二年工作，kàu 7月31日为止，因为伊tī亚非语言研习学院（SOAS-School of Oriental and African Studies）有chi̍t-ê全时间ê工作。黄彰辉ūi chit两年海宣会对伊ê照顾kap支持，修函致谢。

1944年4月18日，海宣会记录黄彰辉ê好朋友，mā是以后ê同事安慕理，已经完成tī西理屋学院一年ê学业，koh已经注册登记ài tī SOAS学习中国官话ê课程。Tùi 1941年黄彰辉毕业了后ê歇热开始，安慕理kap胡德，（in三人是感情siōng好ê朋友）不时kàu各地ê教会为青年领会kap讲道。Hit时kàu 1943年年底是教会kap宣教教育ê同伴。以后，in就成做SOAS ê学友。因为黄彰辉得tio̍h教师ê职位，其他二人chiah thang tī仝校学习。

亚非语言研习学院（SOAS）kap英格兰海外宣道会ê关系，因为是tī战争时局内，比khah-chah koh-khah密切。英格兰长老教会海外宣道会（mā是总会）ê事务所，就tī SOAS行路thang来往ê距离内。海外宣道会ê干事、Douglas James扮演chiaⁿ重要ê角色。伊ê办公室就tī piⁿ-á，koh伊ê属下需要ê chiaⁿ chē语言ê SOAS提供。所以伊送去读册ê学生mā占chiⁿ koân ê比率。chit-má，经过 60年后，虽然无法度得tio̍h当事者出面来证实，m̄-koh chiaⁿ可能就是因为受tio̍h Douglas James牧师ê绍介，推荐黄彰辉去SOAS就职，koh教日本话。得tio̍h职位以后，伊tio̍h完全靠家己ê实力kap教授法，去发挥做教师ê声誉。chiaⁿ悲伤ē tāi-chì，就是tī 1945年2月9日，德国无驾驶员炸弹机直飞降落tī英格兰长老教会ê办公处，炸死去Douglas James，mā kā建筑物kap所存藏ê贵重宣教历史资料，lóng总炸无去。

Tī海外宣道会ê纪录siong，有一项议决：『nā SOAS ài聘用黄彰辉，本会同意án-ne ê进展。有关本会提供薪水数额ê调整，ē照赖黄彰辉ê自发申告koh决定。』tùi议决ê时日前后来看，chiaⁿ可能伊开始教册是1942年。黄彰辉kap慰尔结婚了后，1944年9月27日，伦敦大学亚非语言研究学院（SOAS）远东研究系ê主任Dr. E. Dorothy Edwards，向教务委员会提出hō͘黄彰辉3年教学ê聘请书。he书信内底写讲：『Douglas James先生，我bat向lín咒誓讲，bē劳碌消bôa黄彰辉ê精力。m̄-koh因为伊最近结婚，只要伊留tī本校服务，阮想hō͘伊生活siong ê保障。所以我向有关ê委员会作下面记录ê建议：请hō͘黄彰辉三年ê聘书，tùi本年10月起教日本话kap华语（福建话），伊ê薪水应该按照教学年月加给，mā hō͘伊津贴，伊ê表现chiaⁿ好，nā有可能，我无踌躇hō͘伊永久性ê职位，做日文kap华文ê教师。m̄-koh伊ê志愿是beh tǹg去台湾服务，所以只要环境允准，nā无完成契约ê年数，mā应该hō͘伊达到愿望。』伊所教ê是日本文，当时mā有日本女士，kap英国公民结婚者，tī-hia教日语。M̄-koh，tī当时ê伦敦，甚至全英格兰，一定无人比黄彰辉koh-khah有日语ê能力kap资格。

1944年11月21日，海宣会决议通知黄彰辉，因为伊tī SOAS教学，已经有leh thàn-chîⁿ，就请伊家己买健康保险，由海宣会做保证人，m̄-koh师母ê保险费由本会代替付2年，一直kàu ang-á-bó͘二人tǹg去远东时chiah解保。

Dr. E. Dorothy Edwards tī黄彰辉beh结束该学院ê工作ê 1947年4月18日，ūi海外宣道会做一篇关于伊ê评估。伊讲：『黄彰辉tī 1942年10月，kàu本校学习北京话，伊来了无gōa久，因为一团军事人员必需学习日本话，koh jú来jú急迫，需要有教日本话ê教师，本校chiaⁿ愿意请伊来教。得tio̍h海外宣道会ê同意了后，阮就聘伊做日本话讲师。伊tī chit-ê工作siong chiaⁿ称职，便tòe伊学习ê人，lóng变成chiaⁿ好ê朋友mā是老师kap学生。伊ē-tàng鼓舞学员引起学习ê热情，特别是tī一kóa人内底引起个人ê向，hō͘ in ē-tàng灵活运用语言ê技巧，tī翻译kap审问方面，成做优秀ê翻译人才。』

E.D. Edwards tī评估内底，koh讲tio̍h：『1944年10月，当阮创设福建话ê课程ê时，黄彰辉就转教语言，成做chit部门ê主要ê教员，伊负责所有ê军事人员学习福建话ê课程。伊ê成就mā是真辉煌。我ê推崇iáu嫌无够，伊ê辉煌成就m̄-nā对学校、学生、kui-ê课程，mā对个人起相当ê影向力。学员m̄-nā tī语言技巧方面ē-tàng灵活运用，伊mā引起学员对中国ê兴趣。』

根据兰大弼ê描述，黄彰辉ê教学对象，大部分lóng是军事kap官职人员。伊ê教学kap做人，受tio̍h chiaⁿ koân ê评价，lī-chhiaⁿh是受感谢ē。伊是凭1947年所看tio̍h ê情形，所以定出 án-ne ê结论。原来，兰大弼ang-á-bó͘、黄彰辉ang-á-bó͘ kap细汉ê大卫，tùi伦敦坐仝班轮船去香港。途中tī新加波chiūⁿ-hōaⁿ。船一kàu新加波，就有几位海军ê军官kap英国政府ê官员来chhōe黄彰辉。In lóng是以前tī SOAS由黄彰辉教日语课ê学员。隔工，两名穿海军军服、四名私服官员来kàu船内底，接黄彰辉全家，tī新加波招待归工。暗时tǹg去船顶ê时chūn，iáu带一kóa『礼物－箪露』tǹg去船舱。chiaⁿ hō͘兰大弼kap高仁爱ang-á-bó͘ him-siān，hiah-ni̍h感叹。

Tī 1947年4月，E.D. Edwards ê评语内mā提起：『tī同事之间ê融和方面，伊得tio̍h阮对伊ê热情kap尊敬，阮听讲下年度伊无koh接受继任ê消息，lóng感觉chiaⁿ遗憾。』

下图: 是SOAS亚非语言研究院外观，黄彰辉tī该学院ùi 1943年kàu 1947年期间，前期教日语，后期教台语。(张瑞雄摄影)

Tī异乡异地结婚 Tùi英国留学了后算起来大约7年，黄彰辉tú届满30岁，tī 1944年8月12日，kap Sussex省Seaford市出身ê Winifred Sounder(苏慰尔)结婚。Tī无亲无chiâⁿ，koh tī『敌国外籍』ê情况之下，iáu ē-tàng tī众多ê朋友包围祝福内举行婚礼。物资欠缺，kui-ê国内社会采取配给方式购物，当然无新ê新娘衫、chhiaⁿ-iāⁿ ê喜酒、菜色kap筵席thang庆祝。台湾ê亲族，无chi̍t-ê人知影，连siōng亲爱ê父亲mā m̄知影，因为当时ê二次大战己经phah kah凄惨ê第五年，这万哩ê通讯往来mā己经断绝，一直kàu战争结束了后ê 1946年，父亲俟命牧师kap家族chiah听tio̍h chit-ê消息。

虽然是tī悲剧ê世界环境当中，英格兰长老教会kap福尔摩沙家庭（是指老兰大卫医生全家所代表ê台湾团契），hō͘ 黄彰辉新婚家庭真温暖ê主婚家园。家长主婚人，当然无别人，由老兰大卫医生ang-á-bó͘暂时代替。因为7年前，黄彰辉tú kàu英国ê时，就以兰家当作家己ê厝，mā chiaⁿ大扮用台语，叫兰ang-á-bó͘做『客父、客母』。婚礼中ê伴郎是交往真久ê仝班、知己朋友George Hood（胡德），伴娘由兰医生ê cha-bó͘-kiáⁿ Jean Landsborough担任。

原来黄彰辉ang-á-bó͘ ê罗曼史是án-ne发展ê。慰尔向长老教会海外宣道会申请，志愿去中国去宣教。1942年得tio̍h接纳了后，hō͘派去Selly Oak受训，1943年转派入SOAS读语言。慰尔tio̍h kap英格兰长老教会ê同志、胡德、安慕理、黄彰辉等聚集作伙。In差不多逐日lóng同齐食中昼讲话。战争ê时阵物资缺欠，所以食物khah chió，讲话khahche7。彰辉kap慰尔ê爱情就是tī胡德kap安慕理ê观望中成长..ê。nā beh探究台湾式ê『媒人』，he就是胡德。

胡德是1917年生tī英格兰..ê，kap 1914年生ê彰辉kan-ta增差三岁，m̄-koh因为彰辉成熟ê做人，丰富ê经验，chiaⁿ kāu ê知识，kap超越ê常识kap世界观，hō͘胡德认为黄彰辉比实际siong ê年岁koh-khah大，koh tī西敏斯特学院38年入学ê仝班同学内siōng受尊敬，mā siōng有成就。慰尔ê父母kám有在场，胡德、安慕理、梅佳莲lóng 无siáⁿ清楚。梅佳莲认为慰尔ê母亲tī彰辉、慰尔成婚以前已经过身，所以无参加。慰尔ê父亲，tùi当时留..落来ê文件，是赞成in两人ê婚姻，举行婚礼ê时，伊大概mā tī..lē。M̄-koh兰医生ang-á-bó͘担任彰辉ê家长，另外兰医师夫人mā兼慰尔ê母亲ê任务。兰医生ê kiáⁿ大弼二世，已经tī 1940年去泉州服务，无tī-teh赤冈，无法度参加。M̄-koh伊ê小妹Jean（tī台湾出生，后来tī汕头kap山东ê英语学校受教育）做伴娘，兰医生thang算是举家投入tī这婚礼。

根据所存留ê文件，慰尔tī 1944年4月3日修书hō͘ MacDonald女士（女海外宣道会会长），宣告伊beh kap黄彰辉结婚，做ang-á-bó͘。仝款tī隔工ê 4 月4日，黄彰辉 hō͘ Miss Galt（女宣干事）kap Mr. James（海宣干事）ê phoe内底，正式宣告：『阮（慰尔kap我）今á日做了确定ài仝齐行入契约ê将来。虽然可能遇tio̍h种种ê困难，藉靠上帝ê恩典kap摄理，阮ē-táng做伙往远东去为上帝国做见证。阮ê意志是坚定，bē倒退..ê。』当时，因为海外宣道会kap女宣道会明文规定，便nā接受采用koh使用宣道会ê经费koh受训者，soah无照契约行ê人，必需ài kā开支费用全部奉还。慰尔已经hō͘录取beh派去中国，伊所受ê训练kap语言教育费，一定ài用伊ê服务来抵hâiⁿ，伊nā嫁hō͘非宣教师ê外国人，意思to̍h是讲伊无可能受派宣教，就是背约。黄彰辉ang-á-bó͘无hiah-ni̍h大ê金额，bo̍h-kóng所朝向ê目标mā是『传教』，感觉非常无道理。根据安慕理ê回忆，当时黄彰辉khau-sé宣道会ê规定讲：『宣道会tio̍h亲像后头厝，kā sàn-chia̍h ê kiáⁿ-sài追讨无理koh高额ê『聘金』。』

彰辉kap慰尔ê phoe kap随后ê慰尔ê辞职phoe，hō͘海宣kap女宣chiaⁿ大ê冲击，尤其是女宣。因为in ê规定是，受选派kap训练以后，一定ài去宣教地区服务四年，chiah ē-tàng解约。m̄-koh女宣委员会算mā是chiaⁿ有人情kap怜悯，tī规章以内，in尽力hō͘ in有商讨ê余地。结果，tī 1944年6月1日，女宣委员会hō͘慰尔ê phoe内底，要求伊赔偿总共115镑。115镑ê款额是根据慰尔tī西理屋学院学习期间，受Alexander Miller奖学金80.15镑，Margaret Spence奖学金70镑，kap Bristle寄附金80镑，总计230.15镑。慰尔tī SOAS语文学校学18个月，chún-chò受派tī宣道区服务两年，每服务一年，扣除1/4计算，算两年。所以向慰尔求偿115镑，彰辉kap慰尔chiaⁿ愿意赔偿chit笔钱，因为彰辉tī SOAS教语言，有khiām钱，所以慰尔kā in讲，beh tī后礼拜全额付清hō͘女宣。

Tī安慕理ê记忆内底，结婚典礼hit工，siōng难忘ê就是慰尔面顶头ê表情。伊tī kui-ê婚礼内底无一丝á ê笑容，koh m̄是无欢喜，soah是因为伊ê意志坚决，为tio̍h beh克服一切ê反对kap阻挠，嫁hō͘ chit位新郎，soah表现出像ut-chut忧愁ê款。当时ê慰尔将近31岁，比伊大差不多一岁。读了育幼职业学校，有几年ê教学经验。反对chit件婚姻ê hiah-ê人，一方面是根据学识，感觉『门风』m̄对。因为慰尔m̄是归属tī『文人学子』之才，tī学术方面无甚么thang求进、提升ê可能。黄彰辉tùi日本siōng有名声ê高学府－东京帝国大学毕业，mā tùi英国剑桥大学ê神学研究院毕业，学术才干ē-sái讲是会得thang khiā立tī台湾、亚洲ê高峰，tī学问、哲学、思考、瞻望各方面，ē-sái讲是高人一等ê领导者。另外一方面是tī个性方面，慰尔是『母性型』，处处事事lóng ài关照、保护、爱惜。Tùi 1943年到1944年短短一年内，达成了嬴得siōng有为、有望ê翁婿。所以，结婚ê时chūn，有心ê众朋友感觉可惜，认为世上chiah-chē ê适婚女性内底，应有比伊少年，koh ē-tàng tī学术、思考、办事kap社交上帮赞伊做一个好内助ê对象，ē-tàng像圣经内ê路得，认同『你ê人民是我ê人民，你ê乡土是我ê乡土。』有一位亲友讲：『两个异乡人结婚，siōng好是居留tī in相识ê所在。』众朋友推想，in进入婚姻生活了后，慰尔m̄-nā bē-sái帮赞彰辉，颠倒可能阻碍伊所持有无限量、往koh-khah高深kap向世界级ê学识进展ê将来。可能一个人想ê是对ē，因为慰尔tī 1947年跟随彰辉tńg去伊ê根源所在－台湾，kàu 1959年伊chhōa四个kiáⁿ tǹg来英国，真正内助总共chiah 12年niā-tiā。伊所学ê语言，本是beh tī中国用ē，soah tī台湾用bē tio̍h，mā无法度体会台湾人所骄傲ê乡土、文化，kap历史遗产。彰辉tī神学教育界ê成就，thang讲大部分是家己奋斗进取得..ê。无论彰辉tī世界siong所代表ê台湾人意识，kap世界ê趋势ê塑造kap薰陶ê事工siong，in ê gín-á kap伊lóng错过。M̄-koh『母性型』ê慰尔chhōa四个gín-á tǹg去英，差不多家己来栽培in成人，大kiáⁿ得tio̍h科学博士，chhun-ê二男一女lóng成做有为ê医师，功劳是bē-tàng bōe记..ê，值得o-ló..ê。

2002年3月，兰大弼医师kap梅佳莲教授陪作者kàu赤冈联合归正教会，以前ê长老教会，mā就是黄彰辉ang-á-bó͘结婚ê教会做礼拜。兰医师kap梅教授lóng讲，礼拜堂内ê座椅kap讲台历年来一致无变，管风琴ê声音犹原仝款，照常庄严、悦耳。礼拜了后，梅教授充当导游，流览礼拜堂内ê逐ê所在。堂内所有ê圣画玻璃窗，犹原kap 1944年当时ê仝款。堂内正pêng有chi̍t-ê纪念铜匾，记念一位青年牧师Geraspie，就是为黄彰辉ang-á-bó͘证婚ê人，可惜，证婚后无gōa久，to̍h惨遭车祸来过身。后来，阮kàu礼拜堂后ê社交室，去体会结婚当日大约50 ê人庆贺ê场面。结婚hit工，bat准备简单ê鸡蛋糕hō͘人食，mā有饮料thang lim。梅教授会记得饮料食物lóng真简单，庆贺ê祝词soah非常隆重、热情。贺婚者内有一位叫Dorothy Edwards女士，为新郎、新娘kap在场ê人致辞，留hō͘ ta̍k-ke深刻ê印象，因为伊是SOAS内黄彰辉ê主管同事，mā是慰尔kap胡德、安慕理ê主任老师。

阮tùi社交室..出来，进入牧师ê办公室，探询姓雅各、名约翰ê现任牧师，问伊tī教会内kám有黄彰辉结婚ê记录。雅各约翰牧师就tī橱内翻chhōe。真奇怪，chhōe半工，1944年8月前后ê结婚者lóng有记录，偏偏chhōe bē tio̍h黄彰辉结婚ê记碌。为tio̍h beh有详细ê资料，作者koh-chái详细问梅佳莲教授，然后电询胡德ang-á-bó͘ kap安慕理ang-á-bó͘，in lóng chiaⁿ肯定ê讲：『是tī赤冈（Red Hill），无m̄对。』作者家己ê推想，婚事无tī教会簿册上登记，可能是因为Geraspie牧师tī bōe登记tī册顶chèng前就遇tio̍h车祸过身。Tī雅各牧师办公室内，hit时mā有两位长老在场，大家lóng讲：『教会无记录，市公所一定有，m̄免怀疑。』作者因时间有限，就无koh去追究，mā是因为黄彰辉ang-á-bó͘结婚ê事实，thang tùi亲人、朋友、众多ê同僚、同事、遍布世界各角落ê众学生kap婚后生有gín-á，thang好来证实。

作者受教过慰尔老师ê英语课，mā看过慰尔老师来到彰辉院长ê课堂，ài伊解决家庭ê小事。慰尔老师行后，我观察院长ê面色，hō͘我感觉in ang-á-bó͘ 之间，因为无仝ê文化背景，对家庭ê意见，有chiaⁿ大ê差别。chit-má读黄牧师tī 1944年4月25日，hō͘ James先生ê phoe内底，提起人种(kap文化)ê歧视，体会伊有chiaⁿ深ê人生甘苦ê预感;伊讲：『阮俩人ê结合是上帝ê赐与，同时mā是赋与阮ê责任。所以阮必须继续去争取善战，hō͘世人知影超越过人种ê分歧上有人道，lī-chhiaⁿh当人ê罪破坏hit人道ê时阵，iáu有爱ê上帝mā肯对伊ê gín-á医治，作出奇妙ê tāi-chì。』

作者bat两pái去Seaford黄牧师ê厝访问，lóng tú好是黄师母tī治疗眼疾所以无tī-teh厝ê时阵。黄牧师bē-hiáu煮食，kan-tāⁿ照师母所讲..ê，kā已经调味ê肉菜派khǹg..进去烤箱，设定kúi-tō͘ ê温度hang 30分钟chiah the̍h..出来，另外有预先煮好ê汤，tī炉á顶thn̄g hō͘烧，青菜沙拉tùi容器内tóe..进去盘á，以án-ne简单ê àm-tǹg tī厝内招待我。我m̄知tī Seaford是m̄是有日本人ia̍h-sī华人餐馆，ia̍h-sī伊chhōa过别ê访客去餐馆用餐。作者tī日本tòa过一段时间，tùi一kóa黄牧师访日时请客ê朋友内底知影，伊siōng爱日本人kap华人ê料理（好料），hiah-ê朋友mā透露讲：『tī厝内，kan-tāⁿ有英式ê餐食，tiāⁿ-tiāⁿ lóng chiaⁿ想beh食家乡ê料理。』

Tī结婚故事ê后壁，笔者koh-chái提起黄彰辉siōng好ê朋友kap伴郎胡德。In两人是仝年（1938年）进入西敏斯特学院..ê。胡德ūi-tio̍h准备去中国宣教，tī伦敦大学内ê SOAS读华语，一年koh一学期。当时黄彰辉已经tī SOAS教日本语言（1942年开始），in俩人就koh一pái互相勉励tī伦敦大学。胡德tī 1943年4月tī海外宣道会所举行封牧，随后，受派tī Marlly Hill ê Wellyn Garden教会牧会，之间照常tī SOAS上课。彰辉去过chit间教会一两pái，替伊讲道。安慕理后来mā来一两pái。1945年2月9日，德国已经空袭英国，胡德ê丈人Douglas James受炮击，tī海外宣道会干事任务中tī职场殉职。Hit年5月太平洋战争末期，胡德离开英国，取道Culcutta，飞过缅甸，kàu中国昆明去做宣教师。战后，仝年11月，伊ê夫人Elizabeth mā取道飞去昆明，后来kàu香港，此后做伙去汕头赴任，继承夫人ê阿公阿嬷kap父母lóng bat tī汕头服务做kòe宣教师。In因为思念彰辉ang-á-bó͘，就tī 1948年利用放假，专工mā是头一pái kàu台湾去探访彰辉ang-á-bó͘。

下图ê礼拜堂是黄彰辉ang-á-bó͘结婚典礼ê『Redhill Presbyterian Church』chit-má是Redhill United Reformed Church。

下图：新郎黄彰辉，新娘慰尔，伴娘Jean，伴郎胡德Kap花童(胡德提供).

下图：仝上相异角度(胡德提供).

下图：新郎kap新娘(胡德提供)

下图：黄彰辉ang-á-bó͘ kap eⁿ-á David大卫(胡德提供).

下图：SOAS主任Dorothy Edwards kap eⁿ-á David大卫(胡德提供).

下图：父kap子，彰辉kap eⁿ-á 大卫(胡德提供).