《台湾人e5先觉―黄彰辉传》

 | | | 转寄

战后专程tńg来国内

作者 张瑞雄 2009.04.19

二次大战tī 1945年结束，黄彰辉继续留tī英格兰两年。英国虽然phah败德国，但是伊所受ê损伤非常大，尤其是首都伦敦，受tio̍h德国kui-nā-nî不断ê空袭kap无驾驶人ê飞机轰炸，差不多lóng化做焦土。M̄-taⁿ án-ne，实际上是为tio̍h tek-tio̍h胜利，英国人tio̍h付出chi̍t-ê大帝国。战争kā帝国ê一切 Infra Structure冻结，终战了后mā bē-sái kā帝国本土kap殖民地依存流通ê机器重新phah开。其实，各殖民地lóng leh chhōe机会，tī战争ê时chūn kap战后ê大英帝国tú-teh放松ê时，加紧in ê独立主张kap运动。亲像印度、巴基斯坦、孟加拉、马来西亚、新加坡、缅甸、锡籣等，受统治地区，lóng chi̍t-ê chi̍t-ê向大英帝国要求独立。当时ài做跨国ê旅行一定ài靠越洋航海，所以tī大战期间，大部分ê船只kap船员lóng因为海上战争，沉..落去海底来死..去。连siōng基本ê军事人马ê复员，殖民官员ê重整，lóng开两三年hiah-nih长ê时间，koh-khah免讲是一家三口ê外国人，想beh讨tio̍h船ê空位转去地球脚chiah-phiaⁿ hit-pêng去。

1945年9月25日（日本向同盟诸国投降了后四十工），英格兰长老教会海外宣道会开会ê时，黄彰辉向该会表示伊想beh tńg来台湾，帮赞台湾ê教会事工。伊请示该会，是m̄是tī伊转去台chèng前，先tī英格兰长老教会封牧。宣道会chiaⁿ赞同chit-ê提议，但是认为必须等待台湾长老教会对chit-ê提议ê意见chiah-koh决定。

Tī 1945年10月23日宣道会会议内底，黄彰辉为tio̍h台湾陈述伊家己ê观察，请该会转去台湾重新出发，koh tī台湾工作，因为tī战后ê台湾，日本ê制度已经废除，日本神道ê信仰mā乌有khì，chit-má tú-teh考虑用siaⁿh-mí来替换。因此chit-ê时机，对宣扬基督教ê信仰是siōng好..ê，lī-chhiaⁿ mā是重建台湾教会基督徒生活siōng好机会。所有ê教会mā应该有责任保持kap中国大陆教会密切chì-chiap kap关系。

1945年11月20日，黄彰辉向宣道会建议，应该为Rev. T.W. Douglas James建立chi̍t-ê记念奖学金，hō͘海外教会所kèng..出来ê学子ē-tàng kàu西敏斯特神学院读册。宣道会议决由干事kap黄彰辉协调，tī āu-pái会中提出koh-chài讨论。

1946年1月22日，黄彰辉表示伊beh tńg去台湾，tī伊ê故乡台湾ê教会服务。宣道会议决尽量赶紧hō͘伊tńg去台湾，koh替伊付bó͘-kiáⁿ ê旅费，另外加上100英磅，支付伊tī台湾iáu-bōe有收入chìn前ê生活费。

1946年2月27日，黄彰辉kap万荣华（长荣中学前校长）见kòe面了后，写批hō͘海外宣道会干事Mr. Short，替黄写绍介批hō͘当时留驻伦敦ê中华民国总领事，名叫P.S. Tan，请求kā该国ê护照发hō͘伊。Mr. Short tio̍h tī 3月初6照伊ê要求写批，虽然无留记录，一年了后，黄tī回程ê时chūn，伊所持用ê护照tio̍h是中华民国ê护照。

　　kàu 1947年为止，黄彰辉tī英格兰lóng总tòa十年，tng准备tńg来台湾工作ê时chūn，世界主日学协会（总部tī美国纽约ê 156-5th Ave.）致Mr. Short干事批函邀请，派黄彰辉做台湾长老教会代表，去Oslo参加7月22日到8月初1 ê第二pái世界基督教青年大会ê会议。海宣委员会议决，提供经济kap旅费方面ê帮赞：『台湾长老教会chaⁿ希望有人代表台湾参会。Tī英国tńg来台湾ê路途中，派伊参会，是省钱koh siōng适当ê举动。』

黄彰辉参加伊第二pái世界性基督教青年ê会议，tio̍h是tī挪威首都ê Oslo举办ê盛会。这会kap 1939年所参加ê会议有chiaⁿ-chē仝款ê所在。Chit-pái mā是有1500人参会。这两pái会议lóng hō͘伊有chiaⁿ深ê印象。黄彰辉tī Oslo参加会议ê时chūn，tú-tio̍h 一kóa bat参加第一pái世界基督教青年大会ê人，mā kap伊仝款，tī chit-pái ê会议中，扮演领导ê角色。

会后像顶koân讲ê仝款，tī黄彰辉tńg来台湾前，英格兰长老教会海外宣道会干事ê Mr. Short为黄彰辉向中华民国申请护照，仝时chūn向驻伦敦大使馆绍介慰祢是黄彰辉ê太太。黄师母kap in ê kiáⁿ大卫是使用英国护照去台湾ē。虽然hit时，国民党政权已经tī台湾导演出空前绝后ê 228大屠杀，tī英格兰ê黄彰辉kap长老教会海外宣道会，lóng无一sut-á ê戒心。恐惊hiah-ê派去tī台南ê宣教师mā lóng iáu tī五里雾内底，因为tī台湾kap南京ê政府，kā二二八屠杀ê新闻封锁，口传ê消息，上加mā kan-tāⁿ是一ê人ê观点niā-tiā。除了导演ê国民党政权当局以外，tī岛内外根本tio̍h无人知影归ê悲剧ê真相。

Án-ne ê情形下，黄彰辉ê家族tio̍h tī 1947年6月，kap兰大弼医师ang-á-bó͘（妻：高仁爱Jean）仝船，离开英格兰（兰医师tī英国休假ê一年期间做了一kóa国内访问），tī新婚仪式了后beh tńg去福建服务ê航行路途，ài kap黄彰辉ang-á-bó͘同齐kàu香港。In所坐ê船，名叫：S/S Empress of Scotland，因为beh满载需要旅行ê乘客，所有ê乘客lóng男女分两pêng。对tú新婚ê兰大弼、高仁爱医生ang-á-bó͘，算是chiaⁿ大ê委屈kap牺牲。tùi黄彰辉ang-á-bó͘ kap小大卫mā是大大ê不便。佳哉，in两户会tit thang互相扶持kòe kò gōa月。8月15日，黄彰辉使用印有船名ê批纸，写批hō͘ Mr. Short，报告伊参加第二pái世界基督教青年大会ê情形，kap伊ê感受。

船到新加坡ê时，有kúi-nā-ê学员军人热情招待黄彰辉归家，去各处旅游。暗时in回船顶时，chah tńg来众学生所赠送ê真chē礼物，兰医师亲目看，非常欣羡。

下图是黄彰辉tī回国ê轮船S.S. Empress Of Scotland上写hō͘ Rev. W. Short ê书信,书写ê日期是1947年8月15日,批内包含报告Oslo主日学教育kap青年大会ê情形.(其一)

下图是黄彰辉tī回国ê 轮船S.S. Empress Of Scotland上写hō͘ Rev. W. Short ê书信(其二).

下图是黄彰辉tī回国ê轮船S.S.Empress of Scotland上写hō͘ Rev. W.Short ê书信,书写ê日期是1947年9月5日,信中提起tī新加坡停泊时ê经验kap观感(其一)
. 下图是黄彰辉tī回国ê 轮船S.S.Empress of Scotland上写hō͘ Rev. W.Short ê书信,书写ê日期是1947年9月初5(其二).
. 下图是黄彰辉tī到香港了后写hō͘ Rev. W.Short ê书信,书写ê日期是1947年9月初10,批内提起蔡爱智专工来看伊(其一).

下图是黄彰辉tī到香港了后写hō͘ Rev. W.Short ê书信,书写ê日期是1947年9月初10(其二).

Tī香港伊遇tio̍h长荣中学时代ê同学蔡爱智（后来tī美国西雅图做日本教会牧师，伊ê夫人是日系二世ê美国人），beh tńg去美国ê路途专工来香港chhōe黄彰辉。伊tī台湾看tio̍h二二八屠杀惨剧kap延续ê恐怖。受害人内底包括前长荣中学ê老师，董事长林茂生博士。伊是hō͘骗有tāi-chì ài伊列席，hō͘ chhōa走了后tio̍h无消无息，听讲隔tńg工tio̍h hō͘匪类政权偷偷á thâi死，koh消灭尸体，遗物，证据。虽然黄彰辉诚相信蔡爱智牧师ê消息kap苦劝，照常是chiaⁿ想beh tńg去厝内，而且心肝底iáu相信大战期间，英美同盟国所讲..ê，蒋介石kap宋美龄基督徒ang-á-bó͘ ê『信仰kap虔诚风度』ê印像，上尾决心结束十年chiah tńg来台湾故乡ê第一pái归程。其实，比遥远ê伦敦，tùi香港kàu台湾是chiaⁿ短ê旅程，koh-khah免讲二次大战结束已经两年，除了台湾以外，in一家口koh无别ê所在thang去。

1947年9月，当伊tńg去台湾ê时chūn，kàu基隆码头迎接ê人，有身长高、体格瘦瘦ê妹婿钟启安。钟启安是驻tī台北ê基督教青年会(YMCA)ê组织者，有国际组织ê见识，mā有经营kòe地区单位经验ê 才子。以后台湾ê YMCA有健全ê成长，是因为有伊ê专业智识kap有促进国际交往ê能力所带来..ê。二次大战期间，因为台湾殖民地ê男子照法律无徵兵ê义务，钟启安tio̍h tī日本接受chiaⁿ chē基督教青年会ê委托，担任实质上做管理ê干事。一直kàu战争soah以后，完善办理移交受托ê单位koh hō͘日本人管理ê事宜，然后tńg来国内，受tio̍h chin chē日本YMCA同仁ê好评kap怀念。

黄俟命牧师等待大kiáⁿ彰辉ê回国，等十年ê时日，ē-sái讲是siōng欢喜ê一位。黄彰辉mā是chiaⁿ希望ē-tàng khah早看tio̍h父亲，但是tī码头顶无伊ê身影，因为伊tit-tio̍h脑溢血，虽然ē-sái行动，但是讲话iáu bē-sái家己控制，留tī台南。对黄俟命全家来讲，tōa-kiáⁿ ê回国是解救经济上困境ê希望，因为当时黄家无chi̍t-ê人，tī-leh奉职，无钱养育全家。

黄彰辉全家tio̍h kap妹sài钟启安kàu台北，tī基督教青年会（当时koh保存日本人留..落来ê会堂、教室kap宿舍）tòa kui nā工。等kàu随船运来ê行李过关、领kàu手以后，chiah坐火车忍受chiaⁿ长ê旅程kàu故乡，目的地ê台南。无简单结束两koh gōa月ê旅行，tùi英格兰回kàu台湾ê台南。

1948年台湾基督教青年大会

黄彰辉全家tńg回台湾，tī基隆码头chiūⁿ hōaⁿ，tio̍h kàu台北ê钟启安传道师家歇困，治疗hin船ê身躯。M̄-koh，两位传道师ê头壳内lóng teh想，beh án-chóaⁿ去起台湾青年ê事工。所以，马上tio̍h同齐，开始讨论ài án-chóaⁿ召集台湾教会ê青年，来举办一pái盛大ê营会。kàu 1948年8月（回台后整整一年），确实tī台湾淡水成功举办大会，有1500人参加。

战后，因为台湾换殖民者，一日之间停止日本制度，koh换来kui-ê中国ê一套。其实，中国tī台湾接kah乱七八糟，青少年根本tio̍h无人生方向ê读册，册局提供ê册mā无够满足求知ê需要，无外来ê刺激，无承受继往开来ê理念，mā无灵感ê来源。M̄知án-chóaⁿ做宣传ê，每chi̍t-ê教会lóng kah-ná听tio̍h有án-ne chi̍t-ê青年营。对chiaⁿ chē青少年来讲，坐火车kàu台北，lóng是一生中ê头一pái。看tio̍h 1,500个青年聚集作伙听讲，作伙食饭，koh包kā kui-ê淡水线ê火车包..起来来回kàu台北，特别tī新公园聚集做礼拜，hit种心理ê冲击，chiaⁿ有力mā chiaⁿ深刻。

Hit千五百位青年，tio̍h是后来ê教会ê领导者。笔者ê丰原教会『青年会YMCA』，tio̍h鼓吹苦劝所有20-gōa ê青年lóng去参加。差不多所有初三kap高中生lóng hō͘吸引去参加lah。M̄知会方是怎样去抓来，阮中学生lóng有大学kap神学ê学兄、学姊照顾。当时黄彰辉tī长荣中学教册，促成chiaⁿ-chē同学去参加，tī长荣女中有伊ê小妹黄淑惠（升高三），全力鼓励所有同学去参加。当年，笔者tú tùi初中毕业，mā己经考取高中，心内chiaⁿ轻松。Tī新ê地平线顶所看所听，lóng感觉真新鲜，kah-ná是透kòe chi̍t-ê窗á，看tio̍h世界ê青年kap展现tio̍h ê上帝国，mā看tio̍h充满希望ê台湾。

其实，国民党tng-leh中国各地丧失国土kap国民，无闲守卫寸寸遗留ê领土、失去ê人心。国民党军无战tio̍h逃走，一直phah输，续续逃走。撤退逃走ê速度赶bē赴进攻ê共产敌党，人民心传心，传达『失望』、『无信任』、『恐怖』ê ià-siān，像电讯仝款chiaⁿ紧传遍中国。

Kan-tāⁿ有台湾，m̄知国民党政权过去ê剥削、腐败、自私、无能，人心iáu无受败类党团制造ê污染渗透。虽然tī经济、行政方面己经显示出臭味，台湾人，尤其青少年iáu相信基督ê信息，ē-tàng tit-tio̍h为政者ê赞同kap维护。虽然经kòe二二八屠杀惨剧，hit时iáu无丧失kui-ê中国koh招致戒严令ê施行，禁止大型ê集会，lī-chhiaⁿ参会者lóng自然用台语（台湾基督长老教会用语）做大会用语。

hō͘大会聘请做会长，是黄武东牧师，当时是台湾长老教会南部大会ê副议长，但是tī 1948年，因为议长杨士养牧师健康无好，chiông án-ne由副议长代行。为siaⁿh-mi̍h聘请南部大会人士，koh m̄是北部大会ê首长做会长neh？解答，可能就是因为tī初步梦想ê阶段，黄彰辉kap钟启安ê前瞻、企图lóng tit-tio̍h南部教会（少年）领首ê赞同kap热诚所致。其实代表台湾长老教会ê人物lóng iáu chiaⁿ少年，黄武东chiah 39岁，黄彰辉34岁，钟启安mā chiah 30岁左右niā-tiā。

tùi 1947年9月27日，黄彰辉tī基隆登陆回国以来，iáu无kàu一年，伊kap受伊激励ê青年同工，kā黄彰辉ê梦兑现，koh hō͘ in tī二二八暴力事件了后，差不多siōng kē-tiau ê台湾青年一sut-á ê希望。

Tī大会内，主题演讲ê讲员有三位，两位是钟启安tùi上海YMCA请来..ê，另gōa有一位就是土产，tú tùi欧洲tòa 10年tńg来台湾ê黄彰辉。伊tī演讲ê主题内底，讲台湾教会应该团结合一。因为伊讲ê是标准ê台湾话，所苦劝ê教会ê实情koh是真切实、要紧，伊ê演讲引起一chūn ká螺á风。亲像kui-koh月前，tī斗六所召开ê第九届南部大会，伊讲台湾ê南北教会应该ài合一，神学院mā ài继续合辨，以求实质ê合一。伊koh重新讲hit句有名ê『United we stand. Divided we fall.』一句话。M̄-koh这一pái，伊hō͘ chi̍t-ê chiaⁿ趣味koh实际ê例，讲：『阮应该ài做Omelet （搅蛋煎），mài煎出两粒目chiûe卵仁。指南北教会各一，bē-sái溶做一体。作Omelet，你tio̍h ài phah破外壳，然后phah碎koh 溶合ê一片，无简单成做chi̍t-ê美好ê Omelet。』

黄彰辉tùi外国chhōa tńg来ê『信息』，大大ê开启少年人ê眼光，tuo̍h án-ne在场ê青年决定以大会ê名义起稿，koh决定送交一封公开批，促进南北教会（大会）ê合一。青年ê呼吁，引发了教界为政者ê注意，进一步koh去考虑合一ê tāi-hci3。青年m̄是kan-tāⁿ作án-ne ê呼吁，koh进一步进行合一ê行动。1948年7月初2开始，青年家己进行合一筹备，隔tńg年tī 1949年5月初3，正式成立无分南北ê『台湾(T)教会(K)青年(C)团契』ê总会，简称做T.K.C.。

亲像顶面己经提起，从事青年事工kap学生工作ê钟启安，伊是有非常出色ê组织能力者，koh是教会ê支持者。虽然tī YMCA组织内底服务，伊无bōe记tit kā青年会ê活动、组织，kap各地区ê教会继续取tio̍h连络。黄彰辉回国后chiah第一pái kap钟启安tī基隆见面，后来ê三工，in随开始梦想án-chóaⁿ去建构青年ê大集会。10个月了后ê大会ê讲师内底，hit两位tùi上海YMCA来ê讲师，是钟启安交涉聘请过来..ê。按照黄彰辉ê《回忆录》，钟启安chit种ê人bē受教会政治ê束pa̍h，koh ē-sái唤醒少年人ê良知，去为南北教会ê合一筹谋计划。信徒内底贡献tī青年ê大盛会，kap南北合一ê呼吁ê『青年领导者』，有一位律师，名叫陈朝景，是东港教会ê长老，黄彰辉《回忆录》内底起到伊tùi组织T.K.C.ê贡献。（《回忆录》p.123）tùi北部大会mā出现chin-chē合一『青年勇士』，亲像：郑连坤、张逢昌，kap长老董大成(台大医学院教授)。

(下图是tī 1948年热天，空前盛大ê台湾基督教青年大会tī淡水开催ê记念留影，黄彰辉是三位主讲者之一)

台南神学院第三任院长 １少年任重 1948年11月26日，台湾南部ê英长老教会宣教师会作了以下ê议决: 『（因为黄彰辉已经tńg来台湾，南部大会议决台南神学院复校，英长老教会宣教师，南神院长满雄才牧师推荐黄彰辉接任院长一职），本会议决逐年补助黄彰辉300英磅，作为伊tī台南神学院院长ê年薪。其中200英磅，由台南宣教师会ê预算内底提出支付，chhun-ê 100英磅tùi本会hō͘台南神学院ê补助内底提供』。Án-ne ê决策，对宣教师会ê去向kap影响，台湾ê本土人士取代欧美人士负起自主、自育、自传责任ê历史性意义非常大。Tī人事顶面，台湾有黄彰辉chit位唯一ê人才，ē-sái庆幸。M̄-koh，tī财政方面，台湾长老教会iáu有chiaⁿ长ê路chiah tòe-ē-tio̍h财经上完全ê自立。

1949年8月22日，黄彰辉受封立牧师，koh就任台南神学院ê院长。以家族来讲，伊是第三代做牧师。老父年岁高，脑溢血中风chē年，非常kà意听tio̍h kiáⁿ做牧师，koh成做神学院院长。黄彰辉感觉读长老教会中学（长荣中学，1927年kàu 1930年）kam-nā iáu是昨hng ê tāi-chì，chit-má tio̍h已经是身负重任ê院长。tùi台南神学院来讲，伊是第三任ê院长，但是mā kan-tāⁿ是35岁ê少年人，自忖这是m̄是妥当？当时ê神学院院长理所当然ê认为应该完全参与教会各事工，伊就tī chit种ê众人ǹg望之下，tī各地区kap各阶层ê教会活动内底，开始扮演参谋指导ê角色。以当时ê台湾教育程度来讲，伊是受tio̍h chiaⁿ高而且正规ê学术训练。Tī教学方面，伊bat有tī英国ê SOAS教语言ê经验，tńg来台湾了后mā bat tī长荣中学教英语。Tī牧会ê经验方面，勉强ē-sái讲是承接阿公kap父亲tī教会内牧会ê经验，thang做参考niā-tiā。比伊少年2岁ê安慕理做了副院长，tú tùi福建tńg来赴任，in俩人tio̍h tī án-ne经验欠缺，差不多是一无所知ê情况之下，突然间ê扮演各教会中领导ê角色。

下图是chit-má ê台南神学院校门，其小巧静观情景是tùi 1948年，战后复校以来无变。(张瑞雄提供)

下图是台南神学院ê礼拜堂，tī黄彰辉院长任内所建筑。(张瑞雄提供)

佳哉，神学院内底有2位资深老师：一位是杨士养牧师；另外一位是黄主义牧师。杨牧师bat有牧会经验，mā做过南部大会ê议长，tī战争非常困难ê期间，伊用议长身份，协调台湾长老教会kap日本基督教团ê隶属问题。1948年1月初9，第9届南部大会ê通常议会，是tī黄主义牧师所驻堂牧会ê斗六教会召开，此议会是黄彰辉tńg来台了后，第一pái参与ê议会，会中议决beh为台南神学院复校。黄主义牧师kap伊bat同时tī东京分别读东京帝国大学kap东京神学院时就se̍k-sāi。虽然黄主义牧师tùi台南神学院ê复校是siōng有力ê拥护者kap发言人，mā tī神学院专任教学年gōa，但是当黄彰辉tú就任院长，伊就赴美读协合神学院（Union Theological Seminary）lah。佳哉有黄李秀贤（黄主义）师母留tī神学院，tī总务kap会计方面做黄彰辉siōng大ê帮手。

２财政ê挑战 黄彰辉承接ê有悠久历史ê神学院，soah因为战争关..起来，无财源、欠人管理，受tio̍h chin chē沧桑，是koh破koh旧ê校舍，七修八调ê门窗，内底phàng-kìⁿ ia̍h-sī残破ê家具。chin chē栋『新楼』建筑物，mā欠缺修理tio̍h提供hō͘宣教师kap教授tòa。下底ê相片是1952年所hip ê众老师ê留影，图面ê背景是主栋校舍ê面目。伊受风雨kap日头，年久失修，呈现出旧旧ā，壁顶hō͘染做kui-ê lah-sap ê灰乌颜色。

黄彰辉接任ê时，台湾ê经济社会tú tī chiaⁿ惊hiâⁿ ê时期。1947年228事件，蒋政权ê军队大量ê移sóa台湾，施行杀戮，koh招致中国

下图是1952年南神一部分ê老师，Tùi tò-pêng：白励志宗教教育主任，黄彰辉院长，安慕理副院长，梁德慧牧师，杨士养教授。(张瑞雄提供)

下图是1950年3月黄彰辉院长接任后第一pái ê毕业留念留影,前座中央是南大议长黄武东kap黄彰辉院长,后排是上年九月入学ê学生(张德香提供)

共产党ê军队四界游击成功。kàu 1949年ê两年之间，蒋政权失去所有大陆ê领土，kan-ta chhun óa百万ê军队kap统治官僚占领台湾，一时tio̍h-ài强逼所有ê小学生停止上课，提供军队进驻使用。

台湾ê人民tī经济方面受逼迫，tī非常短ê时间内底，tùi 1945年饲600万人口ê岛内资源生产量，增加了战后ê新住民kàu 1949年ê 750万人口，台湾民生ê大课题，tio̍h是四名旧台湾人tio̍h beh饲chi̍t-ê新台湾人。烦恼ê源头，tio̍h是新ê台湾人m̄是beh来同甘受苦，soah是tī政权操纵之下享受『特权』。虽然in ê权益无像梦想ê局长、专员、主任ê富裕，但是tī基层ê台湾人民就受了挨饿kap苦惨ê年日。

1945年末期，当时ê日圆（日本投降了后变成台币）对美元ê汇率是1：1，到1950年发行新台票，旧台票对新台票ê汇率飞涨为40,000：1。Bat有chi̍t-ê米商，建议黄彰辉先付八礼拜ê米钱，米商答应会tī八周内，无停止一直运送米来学校。但是米商送五礼拜ê米了后，就停止送米。伊无法度koh运米来，是因为米商破产倒担。Tī货起chiaⁿ hiông ê情况下，预付金tùi付款人是有利ē。

1950年，tī高雄新兴教会召开台湾长老教会第十届南部大会通常议会，议会中有台南神学院ê年度报告，黄彰辉以身为院长，第一pái创新向大会报告院务。当伊提起南神ê财政ê时chūn，因为伊tùi会计无熟，tī伊报告做坏chi̍t-ê买卖ê时chūn，感觉pháiⁿ势。有一位长老是吴天锡，提问kám有督察做学校ê鉴查工作。黄彰辉chiaⁿ pháiⁿ-sè回答，学校ê帐目全tī伊口袋内底ê一本小册子内底，tùi án-ne要求大会协助伊设立chi̍t-ê健全ê学校财务会计制度。Tī议会中，伊报告讲，教务方面kan-tāⁿ有三位专任ê教授，kap四、五位兼职kap义务ê讲师。Tī án-ne师资欠缺ê情况下继续kàu 1952年，伊写批hō͘英格兰海宣会ê干事Mr. Feⁿ ，报告讲伊kap安慕理，逐礼拜lóng必须教学20小时以上，同时iáu-beh做学校行政工作，kap向教会募捐ê工作。伊向Mr. Feⁿ 求助如何加强学校ê师资阵容kap扩大招生ê tāi-chì。

Tī通货膨涨下，伊逐工lóng ài用hiah-ê人所奉献ê金钱，马上买米来屯积置产，用来支付院内ê老师kap行政员工ê薪水，kap学生ê奖学金kap食住ê费用。（当时来就学ê学生，校方lóng是免费提供食住。）所以，chit种ê费用chiaⁿ大，tī当时台湾ê社会经济chiaⁿ惊hiâⁿ ê时期，黄彰辉接任神学院院长，无论对神学院ia̍h-sī伊家己，lóng是非常大ê挑战。

1951年3月7日，第一届台湾基督长老教会总会，tī台北双连教会举行，此届总会是南、北部大会ê总合。南、北部大会各派出20位牧师，20位长老，3位宣教师、一位干事，kap一位神学院院长出席。Tī总会会中，议决ài台湾基督长老教会参加『世界长老教会联盟』kap『普世教协议会（W.C.C.）』。参会者对前项无异议，但是对参加『普世教协议会』，就有chiaⁿ chē意见，无法度百分之百ê认同。因为共产党篡国，国民党退守台湾，随蒋政权来台湾ê新台湾人，带来óa 一百ê各种无仝ê基督教教派，基督教kap天主教会合..起来，至少有2,000 gōa位欧美籍宣教师转移来台，致使本来差不多是长老教会独占地ê台湾基督教ê社会tāu-tāu-á复杂，面tùi须要考虑ê问题变成chiaⁿ chē。黄彰辉提议总会原则上参加，但是交由总会所组织ê委员会23人继续研究，koh照会两ê母会后进行。

　　1951年，tùi外国尤其是美国来ê kúi位特别ê人物，来访问台南神学院，第一位是Dr. Stanley Smith，当时伊是南京神学基金会ê代表，因为中国大陆ê竹幕已经关..起来，所有tī大陆ê宣教师lóng hō͘赶..出来，无任何传道人thang..入去，基督教若无讲是受tio̍h阻断，mā ē-sái讲是受tio̍h非常大ê限制，kap外界已经完全隔离。Dr. Stanley Smith bat tī英国剑桥Westminster神学院读册，án-ne算..起来是kap黄彰辉、安慕理同是校友，mā bat tī南京ê金陵神学院教kòe册，tī中日战争ê时，mā bat hō͘日本liah去，伊chin-chiàⁿ ē-sái代表南京金陵神学基金ê重要人物。伊tiām-tiām听黄彰辉说明台南神学院ê现况，mā kàu学校内四界参内底ê建筑kap环境，伊tùi华人ê神学院ê教育非常认真kap关心。伊参观ê时，tùi黄彰辉讲：『我iáu无看tio̍h你ê图书馆。』黄彰辉感觉有tām-pô-á pháiⁿ势，因为神学院根本无图书馆，tùi大门入去后ê tò-pêng有一间房间，大概是三米乘五米大，thang tī房间内读册，但是根本bē-sái算是图书馆，黄彰辉tùi Dr. Stanley Smith ê说明无完全ê理由是，因为台南神学院已经关7年ā，其间无人管理所以流失书kap资料。Dr. Smith对黄彰辉讲，图书馆ê设立是非常重要ê tāi-chì，应该khah紧筹设。

Dr. Stanley Smith结束访问ài离开ê时，kā黄彰辉讲有关伊ê希望，是请黄彰辉将所谈ê tāi-chì列出提议书寄hō͘伊，伊会为伊筹款，果然kàu 1952年，chit笔筹备ê款项就来lah，mā因为án-ne成立chi̍t-ê『在职传教师进修班』。

另外一位重要人物是Dr. Pit Van Dusen，伊当时是美国纽约协合神学院院长，mā是南京金陵神学基金会ê董事长。当时作者读一年级，一年级学生坐tī礼拜堂内底ê前第一排座椅，我当时tio̍h坐tī第一排ê siōng中央ê座位，黄彰辉请所有tī chia ê师生唱一首歌来欢迎Dr. Pit Van Dusen，黄彰辉问ta̍k-ke ài唱to一首歌，góa因为知影有一首歌是所有学生lóng会唱，mā唱kah chiaⁿ好，gōa大声讲：『第333首』。黄彰辉chiaⁿ清楚听tio̍h gōa讲ê话，就ài ta̍k-ke同齐唱chit首诗『咱tio̍h来吟诗，吟诗赞美耶和华』。当ta̍k-ke齐声合唱非常有力有精神ê时，响亮ê歌声充满 kui-ê会堂，ta̍k-ke感觉有圣灵ê充满。我kàu chin-má iáu相信，hit-pái透kòe全体师生ê歌声，感动Dr. Van Dusen ê心，hō͘伊感觉m̄-nā tī台湾教会ia̍h-sī亚洲教会，将来世界传道ê希望，就tī chit群少年ê神学生ê身上。我m̄敢讲是m̄是阮所唱ê歌hō͘伊chit种ê灵感，ia̍h-sī伊早有ê想法，伊讲ài tī少年新兴ê教会开chi̍t-ê『少年新兴教会领导者ê研习班』（非欧美ê教会），而且请黄彰辉做研习班ê主席。Chit-ê研习班是等黄彰辉ē-tàng拨时间ê 1959年kàu 1960年间chiah开办..ê，除了有黄彰辉参加之外，tùi台南来ê iáu有刘华义牧师hō͘邀请参加。

笔者ē记tit tī Dr. Van Dusen来访ê前后期间，有一工，黄彰辉院长骑铁马经kòe通往长中ê长女南pêng墙围á piⁿ ê巷á，hō͘茂盛ê竹丛中ê荆莿hôe tio̍h目珠受伤，有二礼拜hiah久，伊一直感觉目睭无爽快。从来m̄-bat因为破病请假ê黄院长，soah为tio̍h chit-pái ê眼疾，有二礼拜无授课，hō͘我印象chiaⁿ深。

1951年，金陵神学基金会ê执行干事Dr. Frank Cartwright mā来访问台南神学院。笔者tùi伊无印象，可能伊是tī我iáu无入学ê九月以前来访，mā可能伊来访ê时chūn，无kap学生交往ê机会。M̄-koh hit年以后，伊ê名字成做神学院大笔财源ê代名词。因为ta̍k-ke用台湾话称伊为『卡到来(Kha-to-lai)』。

下图是tī 1952得tio̍h金棱神学基金会资助后第一pái招开ê进修科结业纪念留影(张瑞雄提供).

３户口登记制度ê刁难 日本政权tī台湾设置户口制度是tī 1900年。对台湾ê统治来讲，户口制度算是殖民政策执行上siōng有力ê工具。M̄-koh，tī国民党政权ê统治下，kàu 1947年ê二二八事件，kap 1949年国民党hō͘彻底赶出中国大陆，全然占领殖民地台湾为仅有ê『领土』为止，所做ê户口政治，thang讲是马马虎虎。后来，逃kàu台湾ê『中央政府』，看tio̍h日本政府所留..落来ê是chiah-nih好，免拍拼tio̍h tit-tio̍h siōng有效果ê控制人口行动ê武器：『户口登记』制度，就开始koh-khah严厉ê使用。

1947年，当黄彰辉tńg去台湾ê时chūn，伊遵守做chi̍t-ê国民ê规矩，去登记户口（注一）。但是，伊随时受国际结婚者ê问题。会记tit he是二二八大屠杀发生ê当年。伊tī 9月tńg去台湾ê时chūn，iáu是恐怖漫延全岛，因公务执行ê愚昧，民心非常无安定，尤其是受高等教育，mā就是受了日本教育ê人，tú-teh隐藏身份，向地下避难ê时期。因为án-ne，英籍ê朋友hō͘彰辉chi̍t-ê提议，koh安慰mā希望án-ne做，就是kā伊kap细汉kiáⁿ大卫ê英国国籍守tiâu。

黄彰辉chhōa厝内底ê人tńg来，而且全家tī台南ê新楼时常作伙生活。但是国民党政权就用『户口登记』制度ê『武器』来牵制伊。chiaⁿ-chió数ê人知影伊tī国民党政权下是chi̍t-ê孤星。因为笔者tī台南神学院求学期间，bat kā户口sóa kàu南神地址，当时ê户长是黄彰辉院长。笔者mā由黄明辉医师tit-tio̍h in两兄弟记载作伙ê户口誊本，其中关于黄彰辉ê记载，确实有非常奇怪ê所在。以下将两节记载抄录koh绍介hō͘读者做参考。

『民国肆拾年（1951年）拾月拾参日迁出（改编）台南市东区东北里伍邻参肆户，东门路贰贰捌号。民国肆贰年（1953年）拾壹月贰肆日迁徒地迁移台南市东区泉北里伍邻四一户，东门二二八号，户长黄彰辉ê户内为迁徒人口。……』 （请看下面『户口誊本』图片）

下图(1)是黄彰辉1956年以后ê户口抄本ê一栏。Tī这户籍记载，ia̍h-sī讲『无记载』事项值tit特别ê注意。看伊ê配偶栏是空白，伊当时ê户长是伊ê继母黄吴樱桃女士，所以ē-sái讲是『家属』。黄氏出国拿『中华民国』护照，Tī护照顶面记载『iah bōe结婚』，tī这户口誊本thang看tio̍h国民党政权ê『作祟根据』。

图(2)是笔者ê『废户』（『现住所』kā资料寄kàu籍贯后存留..落来ê户籍记录）户籍誊本ê一栏。Tī这户籍记载内底，tùi 1951年10月13日起，迁徙户口入tī台南神学院地址，1953年当时ê户长就是黄彰辉院长。

奇怪! ia̍h-sī讲是上帝特别ê恩典kap安排，tùi伊当了院长ê时chūn开始，伊就是神学院户口上ê家长，所有留宿tī台南神学院ê众学生，lóng是加入以院长黄彰辉为户长（tòa tī东门路228号）ê 大家庭（注一）。这是jōa-ni̍h-á亲切，做学生ê人是jōa-ni̍h-á荣幸，历史上ê稀奇ê tāi-chì。

依照顶面ê图，黄彰辉ê户籍有双重ê记载，一方面，伊是神学院户ê户长，另外一方面，tùi 1957年，伊mā tī伊ê继母黄吴樱桃做户长ê东区围下里博爱一巷22号ê户内，tùi伊ê『家属』，黄俟命kap林金ê长男（注二）。记载配偶姓名hit栏，留tio̍h空白。Án-ne ê户籍，就是表示tio̍h伊ê身分等于是未婚，mā无任何关于伊儿女ê记载。笔者bat有机会kap办理户籍ê人谈论起黄彰辉所受ê户籍待遇，伊一直讲，án-ne抹消配偶ê名字，是bē符合户籍规定ē。笔者ê归纳，是认为tī台南市政府ê背后，有『中央』ê意图，要冷待ia̍h-sī贬低黄彰辉ê人格kap信誉。

固然，当黄彰辉申请护照出国ê时chūn（第一pái是1951年），伊ê婚事记栏内底，就明明ê标示为『未婚』。Tī伊ê回忆录内底，记述伊bat向官方指正chit-ê严重ê teng-tâⁿ，但是伊所得tio̍h ê回答是：『因为你ê配偶是外籍人士。』『若伊归化，而当伊归化了后，就ē-sái设置户口，mā就ē-sái承认伊ê配偶称谓。』中央级ê官员刻意ài『迫求』án-ne chi̍t-ê kap外国籍人士有深密交往，koh有外国ê势力ia̍h-sī保护ê人，无法度tī伊ê身上加害ê情况之下，想尽办法tī人格上侮辱伊。真正是án-ne mah？

黄彰辉感觉siōng震怒ê是，因为政府人员向有关教育kap宗教圈ê社会人士告称：『黄彰辉chit-ê人做什么基督教牧师，什么神学院院长！伊kap外国婆（女子）同居，而且生育四个gín-á！』（请看『回忆录』p.237）伊向笔者讲，伊所处ê境遇是，『中国官员』tiâu-kang ài丑化台湾ê领导者，ài hō͘ in失去道德kap领导ê魄力，koh呈现出台湾人ê次等卑贱ê『劣根性』，低陋ê『气质』。Chit种ê中央政府政策，mā正是反应tio̍h二二八屠杀事件ê惧民心态，kap抹杀台湾领导人才kap『台湾意识』ê意图。（请参考『回忆录』 p.236）

４回国后第一pái koh再出国 1951年7月，是回国后第一pái出国，短时间受Stephen Neil会督kap Dr. Rajah Manikam邀请，到瑞士ê日内瓦。主要ê目的是参加亚洲宣教策略会，kap关于台湾基督长老教会参加为普世教会协会W.C.C.会员ê事工。虽然是真短ê旅行kap会谈，chit-ê行程，thang讲是伊踏上世界舞台ê第一pái。

除了 Bishop Neill kap Dr. Rajah Manikam之外，mā kap Dr. Pradervand会面。（因为日内瓦方面ê总干事Visser t-Hooft kap神学家正无闲讨论神学问题，kap 1954年第二pái总会ê总题，无法度会见黄彰辉。）加拿大联合教会派驻台湾ê明有德宣教师(台湾基督长老教会英文干事)，己经写批通知普世教会协会有关台湾长老教会，chit-má己经成立chi̍t-ê南北合一ê总会，而且有参加W.C.C.意向ê议决。日内瓦ê W.C.C.当局就kap黄彰辉作深入ê讨论，关于台湾教会ê往来kap现况。Neil会督bat tī 1949年访问kòe台湾，mā提议台湾长老教会参加W.C.C.。这一pái kap Neill会督kap Dr. Pradervand交谈，探知in tùi台湾ê总会m̄是以全议会裁决，soah是留hō͘总委会kap英格兰母会chham-siông后处理ê tāi-chì，有质疑ê所在。In ài知影tī准备W.C.C.总会ê委员会处理该案kám妥当，ē-sái进行接纳ia̍h-sī等kàu后pài ê总会chiah受理。Neill会督是án-ne细腻，Dr. Pradervand khah无挂虑hit点程序ê问题，伊beh听看māi台湾总会议决ê讨论过程，kap交代总委处理ê理由。黄彰辉为in说明全议程ê结果kap理由了后，in两人tio̍h感觉chiaⁿ放心。

chit-pái ê日内瓦会议上，tú-tio̍h Pit Van Dusen（纽约市拹和神学院院长），tùi黄彰辉个人kap tùi南神来讲，是chi̍t-ê转捩点。因为tī无久ê将来，台南神学院ê发展得tio̍h伊chin大帮赞。台湾长老教会mā tùi英格兰母会ê扶持成熟了后，得tio̍h『外交』上ê自由因而得tio̍h以 Van Dusen院长为首ê美国基督教会各教派ê协助，行入普世化、国际化ê路途。（节录自《回忆录》p.153）

５ tùi安慕理牧师ê谈话讲起 1947年Shoki tńg来台湾，先tòa入两连宿舍。1948年9月，安慕理tùi泉州来台湾，就搬入两连宿舍ê tò-pêng。（起先，1948年2月，安慕理来台湾，tī传教师会ê大会讲『今á日ê新约神学动向』，根据安牧师所讲，是『beh试我是m̄是ē-sái（有资格）教神学院』）。黄彰辉kap安慕理两户之间有门ē-sái相通往，有tāi-chì ài参商，ia̍h-sī ài互相通知时，to̍h ē-sài使用。这门亲像是故意留tio̍h ē-sài随意通往，mā ē-sài讲是无安置隔户ia̍h-sī分家ê，án-ne，有kúi-nā-pái，安牧师ang-á-bó͘醒来，看见小大卫（黄牧师ê大kiáⁿ儿）khiā-tī in ê门外向内底探视tio̍h。

　　tùi 1948年到1963年，这两户tī校务上、家务上，甚至tī生活上ê亲近合作，kap支持上ê密切，thang窥见一斑。这期间，tùi安牧师全家搬入，后来koh搬出回英国，前后共有15年。亲像头前所讲ê，1959年，Winifred带四个gín-á回到英国，以此计算，就是11年，两个家庭和睦相处，亲近生活。

　　tio̍h者会记tit tī 1951年7月考台南神学院ê时chūn，安牧师在场主持口试，chit入学，伊tio̍h tńg去英国做一年ê休假。安牧师全家回英国ê时chūn，仝船有黄武东牧师，预定tī英国学习一年，吴基福医师tī英国学习三个月。ē记tit安牧师kúi-nā-pái提过hit时ê经验讲：『黄武东牧师chiaⁿ热心讲道。』安牧师tī 1952年度开始ê时，就己经tńg来教笔者hit班，进入第二年ê新约课目。

下图是黄彰辉任南神院长时所tòa ê宿舍外观。正pêng ê一半是黄彰辉院长kap家族ê居处，tò-pêng ê一半是安慕理副院长kap家族ê居处。（张千惠提供）

　　关于国民党（KMT）政府ê恐怖影响tio̍h台南神学院，特别有两件tāi-chì，ē-sái tī chia提起。大约tī 1950年后半，ia̍h-sī 1951年前半，那时沈毅敦iáu tī leh，伊大约是tī 53年上半年离开台湾回英国ê。当时KMT政府己经搬káu台湾，KMT除了台湾以外，tio̍h无领土ah。有chi̍t-ê暗时，己经过了半暝以后，有一队讲北京话ê秘密警察人员，来黄彰辉牧师ê厝头前phah门，讲：『黄院长！』ài伊开门，黄牧师就开相通ê门，到安牧师hit-pêng来，短短ê商量以后，决定以安牧师为应门者，伊就khiā-tī凉台顶，向楼脚五、六个人问：『beh什么？』in讲：『有人beh邀请黄院长去，beh招待伊。』安牧师用北京话讲：『lín若beh邀请伊，为什么半暝以后来neh？伊无tī-teh！困ê时chūn，án-ne大声，会影响四周围ê人困眠！』in讲kah jú大声，安牧师mā无细jī讲：『阮chia是外国人tòa ê所在，lín án-ne阮必须向英领事馆报告，请in向政府当局取缔！』in tī-hia hoah大概有30分钟，就离去。隔暝，沈毅敦kā通往宣教师楼ê铁门锁起来，但是到半暝以后，听tio̍h大声kiāu铁门ê声音，无人去chhap in。连连kui夜继续án-ne搞门，日时黄牧师出去，一定有安牧师同齐行路。

　　当时有侯全成医师kap陈朝景律师，黄彰辉牧师kap安慕理牧师就向in参商，侯全成医师因为有国民党籍，得tio̍h效果，要求特务机构tī抓人以前，一定beh向教会ê国民党人士通知，了后，tio̍h无án-ne ê搅扰发生。

　　另外一pái，大概是1952年10月，特务人员tī礼拜日透早来到神学院，我就向黄彰辉牧师kap安慕理牧师报告，黄牧师ài我叫杨士养、梁德慧lóng来chia，特务ài学校交出四年级学生卓荣祥。Tī院内庭园上临时形成ê教授会，kap特务人员ê会谈内特别有趣味而且有意义ê，就是神学院方用英语，由梁牧师翻成北京语，特务用北京语，梁牧师就以北京语翻hō͘对方。我感觉chin稀奇，tī台湾有án-ne chi̍t-ê神学院，伊ê教授只ē-tàng讲英语kap台湾语niā-tiā ê情景！
　　hit工，卓荣祥是tī北港事奉，特务特别等候，kàu卓荣祥讲道结束了后，chiah下手lia̍h伊。后来koh kā神学院kap院长卓君讲关tī什么所在，mā答允无体罚卓荣祥，ia̍h-sī phah伊，12月chiong近ài放伊ê时，学校有大餐，就因为校方知影卓荣祥ê监狱，所以ē-tàng送一份去hō͘伊食。

　　án-ne，mā ē-sái看出1950年到1951年，KMT tī台湾iáu是怀tio̍h新占领，『剿共产党』ê恐怖心态，特别是惊台湾ê精英，无惜总剿灭。到1952年秋天，国民党『乱政团』己经镇压了台湾各地，对真正ê『共匪』kap『kap外国有连系』ê『世界级人士』可能会有辨别，就khah chió黑白来lah。

　　笔者tī 1954年9月kap郑连明牧师、陈沧发牧师仝团，kap孙鸿沂牧师仝连，hō͘徵召去受训6个月ê通信兵。Hit时tī营舍内ê长排木板床顶，睡tī我边á ê人，有一工the̍h出伊ê『特务证』hō͘我看，mā说明了伊ê任务：一是，伊出示该证时，坐公共交通施设m̄免付钱；二是，伊ē-sái向特务组织密告任何人，hit人就随时会hō͘ lia̍h去；三是，in特务人员ē-sái领普通工作单位ê薪水，加上特务机构ê薪水。
　　可能就是有人诬告黄彰辉牧师，藉此the̍h真好ê奖金，而且诬告伊ê人，大概mā是tī神学院近处ia̍h-sī校园内生活，ē-sái用任何纸片，批信『投书』作密告ê根据。讲到卓荣祥后来透露，是tī嘉义农业学校读册ê时chūn，有一位老师疼惜伊，hit位老师hō͘认为是共产分子，就因此伊mā hō͘连坐诬告。假使伊hit时无tī南神，得tio̍h侯全成医师、陈明清、陈朝景律师等ê保护、参谋，可能in就无管张三李四，就先kā卓荣祥牧师歼除掉lah。

　　1947年，二二八事件ê时chūn，里港ê陈朝景长老帮赞了一位战后来台湾ê人，bē致使hō͘愤怒ê台湾人无理无法度ê害死。但是害--a，国民党政府kap军人平静了台湾人『叛徒』以后，陈朝景长老失踪lah，连一点讯息lóng无。佳哉hit位受陈长老保謢、救活ê朋友拼命去chhōe伊。两个月后，tùi秘密、乌暗ê监狱救伊出来，免冤枉死。

６弥迪理牧师关于Shoki 弥迪理(Daniel Beeby)牧师到台湾是1950年，一开始受派tī长荣中学教学。当时伊iáu teh适应台湾ê生活，mā tī南神思考伊来kàu台湾ê使命。伊写批去设tī美国纽约ê Board of Higher Education and Ministry (基督教高等教育机构)，因为伊听讲美国基督教协议会有1,300,000美金，是归属tī中国教会ê高等教育基金，等待beh开支hō͘适当ê基督教教育院校。伊发现tī台湾koh无隶属于教会ê高等教育施设，tùi án-ne伊写批hō͘设tī纽约ê高等教育机构。

　　基金会hō͘伊tio̍h惊，因为批讲beh伊去探究到底什么款ê教育方式ē-tàng象徵新时代ê教育理想。伊就向宣教师会请假三个月，遍访美国ê基督教大学教育施设，然后提出报告，建议设置手脑并用ê教学，劳学并重ê学府，he就是chin-má ê东海大学设校siōng原先ê起点。

　　弥迪理对Shoki ê判断kap领导是chiaⁿ威服..ê，因为tùi伊ê游览探讨tńg来时，伊发现Shoki己经tī伊出差期间，向董事会kap总会禀请派任Beeby做南神ê旧约学教授。当时伊感觉黄院长kan-tāⁿ以单方ê需要为优先，实在有点á受强制ê感觉，但是mā感觉ē-sái顺南神ê需要接受落来，这影响tio̍h后来伊tio̍h-ài到纽约接受2年ê神学博士ê课程。伊回想当时ê『委屈』是上帝ê恩典，因为1972年伊突然hō͘蒋政权ê KMT踼出伊所爱ê『故乡』台湾，tī无亲无戚、无路、无望ê时chūn，来了 Selly Oak College hō͘伊旧约学教授ê职位。以西理屋为据点，伊tio̍h-ài继续伸手，帮赞栽培台湾kap台湾长老教会ê爱乡土、爱自由民主ê学者kap斗士。

弥迪理起先做宣教师派去厦门ê时chūn，起薪hit年俸200英磅，实在是sàn kah可怜，但是后来到台湾ê时chūn，发觉到tī台湾ê众牧师ê薪俸kan-taⁿ是伊所领收入ê十分之一。伊当时所受tio̍h，关于台湾ê生活kap文化冲激是bē chió..ê。

弥迪理tī台湾体验了第二pái ê金元贬值，是四万元旧台票兑换一元新台票。伊讲第一pái ê体验是tī福建，伊所看tio̍h ê，中国政府ê撤底腐败、无能、自私是无法度thang形容ê。Tī伊离开厦门以前，伊经验了 1比1,000,000 ê金元贬值。Tī台湾，社会、教会kap家庭ē-tàng tī财难ê幽谷下继续成长，追究根底，就是有现代化ê经济基础kap教育ê普及。黄彰辉kap台湾教会ê领导者，得引chhōa台南神学院，行过旷野荒地，进入新koh光明ê境地，mā嘉惠了台湾岛国民ê心灵建设，实在应得精神史上bē贬值ê中心格位。

注一：黄彰辉留英期间，伊ê户籍随父由员林迁回台南青年一横巷7号，1951年改为博爱路一巷22号。讲到怎样分设新户做住寮神学生ê户长ê经过kap理由，则不详。 注二：根据黄澄辉（黄俟命ê五男）讲：『当年由员林迁户口到台南ê时，bat发生迁移上ê teng-tâⁿ。因为澄辉tī员林ê户籍无取消，hō͘彰化县控告为「逃兵」受通缉，koh遭遇台中地方法院受审之难。』