《台湾人e5先觉―黄彰辉传》

 | | | 转寄

1954年普世教会协会总会

作者 张瑞雄 2009.04.26

１参与普世总会筹备 1953年春天，tī日内瓦ê W.C.C.传道委员会干事Dr. Hans H. Harms邀请黄彰辉tī 8月中到日内瓦，参与筹备1954年W.C.C.总会内关于世界宣教ê讨议内容、方式、时间分配等等ê tāi-chì。黄彰辉先到日内瓦报到，然后就到Bossey（tī日内瓦ê市郊）赴会。为tio̍h黄彰辉，普世教会协会挤出$800美元，但是伊ê旅费ài $1,200美元，所以Dr. Harms就向Dr. R. E. Feⁿ写批要求英格兰长老教会海外宣道会援助不足ê金额$400美元。这一pái ê参会，就是黄彰辉kap W.C.C.实际上ê关系ê开始，而且kap Dr. Pit Van Dusen作伙共事。Dr. Van Dusen绍介黄彰辉se̍k-sāi世界ê教会领袖，伊讲：『Shoki若m̄是亚洲第一位，mā算是正向上提升ê神学院ê院长。』伊kā黄彰辉讲：『我tùi Dr. Stanley Smith kap Dr. Frank Cartwright听讲你ê tāi-chì，又koh tùi你寄hō͘ in ê批，我感觉kap你有亲像故交。』in tī日内瓦ê时，Dr. Van Dusen定意ài黄彰辉kap世界基督教高等教育基金会建立密切ê关系，in mā讨论ài tī台湾开办基督教大学ê tāi-chì。（到1954年开始筹备事宜，到1955年决定开设东海大学。）Dr. Van Dusen ê建议是，神学院应该成做大学ê一部份，但是伊kap黄彰辉无仝意见ê所在，是黄彰辉认为tī日本统治台湾ê殖民时代，就m̄准台湾人有家己ê学校来决定台湾人家己ê将来，chin-má国民党tī台湾ê殖民政策下，mā无愿意hō͘台湾人家己有启蒙教育kap统治管理ê学校，进而允准台湾人家己对未来有自决ê意识。

黄彰辉tī日内瓦ê时，mā se̍k-sāi 当时ê Bossey W.C.C.学院ê院长Canon Wendel，后来ê主教Canon Wickham，kap后来ê同事Philippe Maury ê父亲Reverend Maury，又koh遇tio̍h同齐参加1939年青年大会ê Robert Bilheimer、Daisuke Kitagawa、Paul Abrecht kap Victor Hayward。Iáu有一位重要人物，就是tī锡兰出生ê神学家Dr. D.T. Niles，伊tī 1939年青年大会ê时，是一位讲师，大概tī Oslo mā扮演领导角色，伊是亚洲教会ê领袖，了后kap黄彰辉保持来往，同齐共事。

Dr. Pradervand mā kā黄彰辉讲，tī开1954年第二届W.C.C.总会chìn前，tī Princeton神学院召开第十七届世界长老会联盟ê总会，所以当然tī台湾ê长老教会mā应该参加两个重要ê世界性会议。黄彰辉心肝想这1954年对台湾ê教会是chin重要ê一年，因为台湾长老教会申请参与W.C.C.为会员了后ê第一pái，以前台湾长老教会mā lóng无明确正式ê派员参加世界长老会联盟ê会议。

　　这一pái ê旅行，hō͘黄彰辉chi̍t-ê好机会，利用暑假ê期间到英国去访问。tùi 1947年离开英国，到1953年koh再访英，黄彰辉直觉ài koh一pái tam tio̍h自由空气ê滋味。1937年以前，主要是台湾tī日本统治下ê教育系统下受教育，所以受教tī日本帝国主义ê殖民地ê人民，根本无自由thang讲。1947年，tī台湾蒋介石ê恐怖戒严令政治下ê台湾，mā无行动、言论kap集会ê自由，所以黄彰辉一到英国，伊感觉有ná得tio̍h精神解放，非常自由。当伊回到英格兰海宣会会所，但是hit-ê会所tī二次大战hō͘德国空袭时e5V2火箭所毁了后，iáu无重建。Tùi战后到chin-má，英国人民虽然iáu是困苦，但是自由气息照常，温馨和睦ê社会iû-oân tī leh，但是大英帝国己经颓废，政府有心重整国家社会，而且前瞻未来kap关怀福利。英国ê社会m̄是共产主义ê社会，mā m̄是资本主义ê社会，政治方面mā改变lah（黄彰辉离开英国前后ê改变），战争中，邱吉尔前首相bat tī大英帝国时是位政治领袖伟人，如今战后，伊连候选资格mā无hō͘列入。但是英国ê根基（有可能是英国人ê气魄）无变。

　　起先是Mr. Feⁿ（海宣干事）安排tī London ê Mary Lebone Church举行chi̍t-ê讨论会，伊召集一kóa人来参加，前半部是有关英长老会hiah-ê人关心台湾ê现况kap教会，kap bat tī台湾宣教工作ê hiah-ê人以后所需要做ê tāi-chì，而且提起长荣中学kap长荣女中ê校况；Mr. Healey为前海宣干事，chin-má为英格兰长老会ê总干事，Mr. Band（万校长为前长荣中学校长）kap兰医生…等等。后半部是Mr. Ken Slack kap Alan Price（黄彰辉tī西敏斯特学院时ê同学）tī会中mā kap黄彰辉讲tio̍h学校ê一般教育，特别是神学院ê问题，亲像：办理学校kap增强校务kap教务ê。

　　会后，黄彰辉到剑桥ê西敏斯特学院访问，特别拜会当时ê神学院校长Mr. Elmslie，kap前校长Whitehorn教授。黄彰辉tī 1942年离校，chit-pái是第一pái离校了后tńg来访问母校，主要kap in讨论beh如何hō͘一位tī 1953年tú毕业ê台南神学院学生张德香来留学两年。

访问了后，黄彰辉到苏格兰ê爱登堡ê New College，想beh kap院长Bailie会晤，伊无tī leh，但是kap教授Porteous（旧约学教授）见面时ê话题讲tio̍h一位bat tī台湾教会有辉煌成就，hō͘人非常思念ê梅甘雾宣教师(Dr. Campbell Moody)。伊是tùi New College毕业ê校友。伊tī台湾彰化县海边一带ê村庄四界行，一面吹小喇叭，一面唤『上帝chhōe失落ê gín-á』，以吸引hiah-ê人来听道koh信基督。后来梅甘雾牧师得tio̍h肺结核，tī台湾过身。这一pái siōng重要ê成果，是讲tio̍h如何hō͘宋泉盛先生（台湾大学哲学系teh-beh tī 1954年毕业ê学生）来New College留学。

　　黄彰辉tī爱登堡探访MacDonald家庭，因为二次大战日本宣战ê时，黄彰辉本有chi̍t-ê礼拜ê青年聚会，但是身份突然变做『敌国外籍』，就以MacDonald ê姓买火车票，kín-kông tńg去兰医生in tau ê插曲。

　　了后，黄彰辉去Glasgow ê三一神学院访问教教会历史ê John Foster教授，伊特别会记得伊，是因为in同时进入Selly Oak College ê。当时黄彰辉是学生，John Foster是去教学。伊ê 着作有《往昔kap现今》一本册。台南神学院ê创设者，而且第一任院长巴克礼宣教师，是Glasgow ê三一神学院ê校友。当时黄彰辉虽无学生thang tùi台南神学院送去留学，但是伊照常想boeh建立好台南神学院kap三一神学院之间ê桥梁。（后来，1964年，黄彰辉担任世界神学教育基金会ê主任时，就请John Foster教授撰写，关于早期教会ê历史，作基金会ê教材。）
　　访过Glasgow了后，黄彰辉马上回London ê Marylebone Church，因为英格兰长老会安排伊tī chia有chi̍t-ê专题演讲，特别有Elmslie校长专程tùi剑桥来为伊司会。但是黄彰辉tùi tú tńg来英国到chin-má ê全程旅途，一直teh伤风感冒，用阿司匹灵支持到chit时，因为无歇困，己经体力透支昏倒，致使无演讲。当伊cheng-sîn过来ê时，会众己经四散，伊感觉这是伊一生中siōng懊悔ê tāi-chì。

因为台南神学院kap南京京陵神学基金ê关系，1953年mā是黄彰辉kap美国卫理会se̍k-sāi，开始往来ê一年。起初是二位tī台湾服务ê卫理会宣教师，带美国纽约卫理会 ê Ralph Ward会督（bat到中国宣教，又koh广受尊敬） ，来访问台南神学院因而开始ê。但是黄彰辉对卫理会 ê印象无啥好，因为Ward会督kap Dr. Frank Cartwright是完全无仝ê两种人。Ward会督hō͘人一种siūⁿ-kòe贵族形式化ê感觉，无像Cartwright平民化，开朗，khò-sio̍k。Ward会督hō͘黄彰辉ê印象，有ná蒋介石kap宋美龄hit批人对台湾施行统治ê气派。佳哉，后来Tracy Jones（伊当时是卫理会掌管亚洲事务ê干事，也bat到中国宣教）kap Dr. Eugene Smith（卫理会海内外宣教会ê总干事）来台南神学院访问，hō͘黄彰辉对卫理会有kóa改观。其实，卫理会对南京金陵基金有真大ê参与kap影响力。

　　1953年，hit年mā是黄彰辉就任台南神学院院长满四年ê一年，mā是伊初任院长时第一批入学ê 12位学生tī这年毕业ê一年。这12位学生中，有四位有史以来第一批女性学生。学生中mā有高俊明，伊后来成做玉山神学院院长，（专门训练原住民为宣教牧师ê神学生），续落来做台湾基督长老教会ê总干事。Tī任中，伊领导教会代表台湾人民做三pái宣言，关于台湾现况kap未来ê运命。为tio̍h忠于伊所信仰ê基督，tī 1980年4月，伊hō͘国民党政府以『藏匿叛徒』ê理由下狱，坐监4年3个月koh 21工。黄彰辉认为高俊明是伊所有学生中『siōng出色ê一位传道人kap教会领袖』。

黄彰辉回台了后，马上chhōe长老教会ê总干事黄武东（伊当时iáu是南部大会总干事，mā tú tùi国外学习tńg来），谈论明年将tī美国召开两个重要ê世界会议，应该提出台湾教会世界性宣教会议ê报告。In ê宿舍lóng tī新楼kap神学院校境内，所以方便作伙讨论。黄武东kā in讨论ê内容发展，着作了90 gōa页ê宣教计划，而且订了1954年2月22日到27日，tī台南神学院召开台湾长老教会会前Evanston会议（注一），chit-ê计划与会议ê结果，就是成做后来ê台湾长老教会倍加运动（P.K.U. Poe Ka Un-tong, the Doubling Movement）ê起源。倍加运动ê前瞻kap动力，就是为tio̍h beh庆祝福音来台100周年（1865年到1965年），ài kā长老会ê会员kap教会ê数目增长为二倍，并且期望每chi̍t-ê乡镇lóng至少ài开设chi̍t-ê教会。

下面ê图是台湾长老教会会前Evanston会议1954年2月tī南神举行ê时留影(张德香提供).


２第一pái访问北美大陆 Tùi无闲ê南神院务，黄彰辉赶紧前往美国。这头一pái ê访美，tī到达最后ê目的地—芝加哥近郊ê伊范斯敦以前，有繁多事务kap使命ài完成。伊所抱ê备忘项目，lóng是关于普世教会ê、神学教育ê、亚洲kap台湾ê宣教ê，但是无随心chah一丝á私人ê利益kap案件。

伊这头一pái ê访美，大概是tùi英格兰坐飞机到纽约。1954年，当时ê空运是依靠螺旋桨式ê飞机，tī大西洋顶大概至少ài降落两pái作加油ê作业。Chit-ê旅途hō͘伊chū-kó͘-bô ê感概。 一、 伊第一pái体验tio̍h大陆ê含义，虽然40年ê一生受了大日本帝国kap大英帝国ê管辖，教育kap生活体验，所tòa过ê所在包括出生ê台湾lóng是海岛。当伊坐船往英格兰，koh tùi英格兰tńg来台湾，所经过ê海港，lóng kan-tāⁿ是欧亚大陆ê边沿niā-tiā。现今，到北美大陆tam到了，开归工ia̍h-sī几工ê车，chiah看到一kóa城市，火车mā ài hō͘旅客tòa宿餐食ê设备。启示录21章ê『海mā无阁有』，chit种ê经验是真有『安宁』、『固定』ê感受。 二、 伊体会tio̍h美国人是真普遍ê高大。伊所遇tio̍h ê欧洲人不时lóng比亚洲人kut-tè高，伊遇tio̍h Pit Van Dusen ê时chūn，想tio̍h伊是例外，但是一到美国，chiah看到hia ê人，m̄ kan-tāⁿ kut-tè高，体型mā大。黄彰辉ê推想是：『因为美国人消耗绝大量ê牛排、牛肉。』其实美国thang有无限chē ê番麦、大米、黄豆、菜蔬、果子，恐惊过剩，政府kā伊制止生产。美国式ê BBQ，一定hō͘ 了黄彰辉深刻ê丰富ê印象。伊去ê时chūn是热天，美国人siōng欢喜tī公寓ê后院，ia̍h-sī院校内ê小公园内一角，设ē-sái烘肉ê所在，排起『宴席』来，是非常豪华ê。这显然是kā英国式：厝内ê、精细ê、『幼路（秀气）』ê无仝，设计出气氛满满ê餐食。美国式ê，是一块块半磅ê牛排、四分ê一块大ê鷄肉、归条ê马铃薯包tī鍚箔纸内烧好ê…等等，是你ê胃口thang容纳ê两倍以上，每pái lóng是向你腹肚ê容量挑战，一直hō͘你食到超满意为止。因为án-ne，美国人真是消费粮食过chē，身躯趋重，欠缺运动，讲tio̍h in ê行动带有欠缺柔软、弹性ê、但是充满过胖、超重ê压力。 三、 美国ê文化是kah-ì『庞大』，这到1954年，甚至往前ê 30年，美国lóng是拥有siōng高ê大厦kap摩天楼、siōng大siōng长ê桥kap吊桥、广大ê农场、超大ê汽车工场、钢铁工厂、飞机工厂；tī大学教育、人才养成方面mā是仝款，tùi世界各地招集了知识份子，从事学术研究。黄彰辉mā tī美国看到了大规模ê，ē-sái讲是居世界性头前ê多所神学院。Tùi一间小而且简陋ê台南神学院看到美国ê大神学院，真有hō͘所观摩ê众多事物压倒ê感觉。

黄彰辉看了北美大陆以后，心里抱tio̍h beh向超大者提供『小是美』ê感想kap意念。虽然当时iáu无『环保』ê风气，伊己经感触到譀大（注：大到hō͘人感觉荒唐）ê消费、欲望、兴趣，对kui-ê世界，人頪是有负面ê作用。基督教ê爱，应该带hō͘世界节制、谦逊、关怀kap分享。

３访问美国教会kap神学院 对少年而且清新ê神学院院长黄彰辉来讲，这一pái ê美国之行，thang讲是世上siōng优等ê『在职训练』。伊ê特徵：是tī真短ê时间内底看tio̍h siōng chē ê施设，见tio̍h可能是siōng chē位ê大名鼎鼎ê神学教授，并且ē-tàng kap教会首长、神学教育家、世界宣道基金会ê干部相会、对谈kap学习。Siōng重要ê学习重点，tio̍h是hō͘伊提炼出家己ê人生目标。伊tī五年奋斗ê过程中，已经明显ê看tio̍h基督教会ê生命是传扬基督ê信息。Tī传扬信息事工ê核心，问题是人kap in对信息ê使命。黄彰辉tī心内，需要经过一段角力，并且tī这角力当中，发现家己、台湾ê教会、kui-ê台湾ê社会，而且看出台湾tī世界上ê地位，kap台湾人kap世界人頪ê互动。黄彰辉ê职责焦点，是启蒙传道人tī台湾实况内生活出有效ê互动。

黄彰辉对笔者一再强调讲：『我m̄是神学家。虽然我知影朝向神学ê方位kap理论，发扬ê呼召。我明确发现我ê使命是做chi̍t-ê神学教育家。神学教育家是倾向于活动ê，所以我无断kap外地、kap世界对谈，koh kap内地台湾绍介kap呼吁。我所关心ê，主若是现职中kap学习中ê传道人；我所关切ê，就是beh传道人知影in ê实况。台湾人对in ê实况忠实尽力，就是等于in对世界kap对基督ê事奉忠实kap尽力。』

1950年代ê纽约协和神学院，tī Pit Van Dusen院长ê领导之下，建立成做美国『siōng大』ê神学研究中心。因此mā ē-sái称谓世界『siōng大』ê神学院。这神学院就座立tī纽约siōng精彩ê教育kap学术ê厝边，像：哥伦比亚大学、犹太人神学院、巴尔拿教育学院、朱利亚音乐学院、…等等学苑。加上河边（Riverside）基督教会chhiok-khiā tī协和神学院边á，而且河边街475号ê美国教会中心，mā tú-teh建设，实在是好kah无话讲ê普世性教会ê教育、活动kap世界互动ê中心。

虽然协和神学院ê环境hō͘黄彰辉真深刻ê印象，伊所得tio̍h ê siōng大、siōng难忘ê感铭，是thang kap世界上盛名ê神学家见面ê一kóa安排：伊thang kap Reinhold Niebuhr（尼布尔），John Bennett，D. D. Williams James Muilenburg见面kap详谈。（《回忆录》p.198）

这m̄是第一pái，但是kap尼布尔教授ê晤谈，算是siōng难得而且欢喜ê。黄彰辉家己提起，chit一位神学大师深深ê影响了伊ê伦理kap政治ê神学思想。当时尼布尔对东亚ê局势非常关心，而且真理解。M̄-koh，这是真好ê机会讲tio̍h台湾ê情势。黄彰辉讲hō͘伊听tī台湾所遭遇ê白色恐怖。Tī台湾ê『中国（国民）党』政府逮捕、酷刑、枪杀异己ê台湾菁英，koh诿罪in是『共匪』。

尼布尔提起『仝款』ê tāi-chì mā tī美国发生，就是McCarthyism。因为当时tī美国若有人hō͘怀疑有共产主义ê思想kap关联，就会hō͘美国政府当局抓去迫害。伊ê政治、伦理要点，就是讲无chi̍t-ê完全合理民主ê政体，但是至少tī民主ê理想内底，基督徒kap教会应该扮演负起国家kap社会ê良心ê使命。

当时tī协和神学院当教授ê『少壮』Bennett、Williams kap Muilenburg三位，tùi 1954年ê访问开始，kap黄彰辉建立了继续真久ê友谊。Kap in ê谈论，tùi一般ê话题进而进入神学教育ê求精，特别着重『少年』kap『新独立国家』内ê教会ê传教人员ê养成kap进修再教育ê分域。黄彰辉向in请求助长台南ê教授阵容。In lóng表示siōng大ê关心，尤其是D.D. Williams是kap尼布尔kap另外一位受托组成北美地区ê神学院协会内ê考量神学课程kap重审神学教育ê目的委员会，hō͘黄彰辉真专门而且周到ê探讨。Tùi 1954年hit一pái ê会合以后，黄彰辉一再tī无仝ê场面tī北美，甚至tī新加坡、欧洲，kap in相聚，论题延伸到伦理、政治kap国际情势。（参看《回忆录》p.201）

Tī协和神学院，Van Dusen特别安排黄彰辉去看图书馆kap Dr. Beech馆长。伊开了bē少时间，说明图书馆员所须要具备ê广泛kap精细ê办事能力。当然，台南无法度tī短短ê几年，甚至无法度以黄彰辉ê一世人，来jiok-tio̍h纽约ê广泛kap精密，Dr. Beech馆长hō͘了黄彰辉chi̍t-ê允诺，beh将盈余、重复ê书本赠送hō͘台南神学院。伊往后ê几年果真án-ne做。Tī Dr. Beech以外，Van Dusen mā安排黄彰辉去探访耶鲁神学院kap hia ê图书馆长Dr. Morris。Dr. Morris是一位教育ê图书馆学者，本身mā是一位广学ê教授，对南神建设图书舘，提议了真重要ê方针。后来tī东南亚神学院协会开办神学院图书馆行政者研习会ê时chūn，委员会就同心合意，聘请Dr. Morris教授担任指导。黄彰辉mā tī普世教协神学基金会任中，聘请伊到其他ê地区（南美、非洲等所在）去指导神学院办理图书馆ê学问。

Tī耶鲁神学院，tī图书馆见习以外，黄彰辉遇tio̍h教务主任Liston Pope博士、宗教教育学ê Paul Vieth博士，kap另外一位教授Charles Forman博士。Tī耶鲁，黄彰辉向in请求接受台湾ê学生到该院校学习，因为耶鲁神学院是耶鲁大学ê一学院，做教务长ê就是神学院ê首长。Liston Pope博士就是做院务决策ê人。伊kap协和 ê Van Dusen博士仝款有远瞻，mā参与教会ê策划，进一步支持普世教协ê关怀、运行kap合作。伊tī两年后ê 1956年，往曼谷赴普世教会协会主办ê会议路途上，专程到台湾访问台南神学院。

Tī普林斯敦神学院，黄彰辉kap John Mackay博士院长头一pái见面，因为世界归正教会联盟总会tī两工后，就beh tī普林斯敦召开，而且John Mackay博士就是联盟ê主席，而且是会场ê主人，大名鼎鼎ê教会领导者、学者，tùi拥有W.C.C.大家庭ê四分之一教势而分散到世界各角落来聚集tī chia。会后koh接连tī伊凡斯敦开第二届ê普世教会协会（W.C.C.）总会，tī he场面，Mackay博士mā担任要职。所以黄彰辉得tio̍h伊拨时间见面，实在难得。tī普林斯敦真短ê时间，见tio̍h Homrighausen博士，koh由伊ê绍介，se̍k-sāi John Baille博士院长、T.F. Torrance博士（爱登堡ê新神学院ê两位，一年前到苏格兰无见tio̍h面ê），koh有捷克斯拉夫出身ê J. Hromadka教授。M̄-koh，tī普林斯敦初次见面，但是以后对台湾教会传道人才做真大贡献ê人，就是tùi德洲欧士珍（Austin）来，无久以后接管普林斯敦神学院教务，koh几年后当任院长ê James McCord博士。因为tī伊当院长ê任期内，真chē南神kap台湾教会ê众牧师hō͘接受到普林斯敦学习。

４代表台湾（基督长老教会）参加普世教协总会 普世教会协会是1948年tī荷兰ê阿姆斯特丹成立。Chit世界性ê基督教组织有ná联合国ê构想，将世界上所有ê基督教教派lóng会集tī chi̍t-ê组织内底，共同追求合一、更新、论谈、祈祷，而且互相图谋容忍kap理解ê合作联盟。主要ê基督教教派己经tī第二pái世界大战以前，己经有过共识。战后kā关于『教会kap职制』方面ê运动联合，成做chi̍t-ê协议性ê组织。虽然是普世性ê教会组织，天主教、美南浸信会、『独立教派』、『纯福音派』kap『圣灵派』各教会lóng 无参与tī chit-ê协会内。

台湾基督长老教会亲像头前讲ê，tī 1951年ê第一届总会议决申请参加普世教会协会为会员，所以这第二届总会是台湾教会ê第一pái。台湾基督长老教会是台湾唯一ê教派中，有够额ê会员有资格参加为正会员。1954年ê台湾长老教会ê总会，就派黄彰辉为该教会ê代表，另外三位，to̍h是：陈溪圳牧师、吴永华牧师，kap杨士养牧师，为观察员参加。Tī普世教协总会前所召开ê第17届世界长老宗联谊会，tùi台湾有四名代表席位，to̍h是顶面提tio̍h ê四位牧师参加，而且第一pái有正式ê代表参加。

黄彰辉记述chit-ê会，真是普世性ê无分邦国、无分宗派，教会ê领袖聚集tī chi̍t-ê地方相交谊、敬拜，m̄-koh人数非常chē，无法度广泛ê互相se̍k-sāi，就靠小组ê聚集kap小委员会ê讨论作深度ê参与。Án-ne大而且普世性ê聚会，hō͘人挑战kap感动。但是真正ê教会ê合作为一，ài仰赖tī各人ê地域、故乡、大学、教会、国ia̍h-sī州ê活动实行，chiah有实质kap意义。就án-ne，tùi台湾来到Evanston ê代表，chah来台湾kap教会ê贡献，kap普世ê教会组成一团。M̄-koh，tī超大ê集会，分hō͘各代表普世教会团结同化ê感受，到各人ê邦国地域、社会、教会去发扬基督所托付，各尽各ê多元ê光彩。

５黄彰辉认同台湾ê演变 1954年tī美国Evanston, Illinois开W.C.C.总会ê时chūn，tī宣教研究大会ê场面内底，中国ê共产化成做讨论ê主题。因为tùi 1949年以后中华人民共和国kā外来宣教人员赶出去，而且禁止国内一切ê传教活动，中国ē-sái讲是tùi世界宣教ê策划内底丧失。关予中国宣教ê chit场讨论变成焦观，与会者ê论调呈现悲观，场内ê khí-mo͘充满沉重ê气氛。主持研讨会ê Dr. D. T. Nile（锡兰出身ê教会领袖）就请黄彰辉，tùi chi̍t-ê『中国人』ê立场讲有关伊ê宣教观点。

以下是黄彰辉ê演讲ê概要：

我tī 6年gōa前（1947年10月），tùi英国回到台湾ê理由之一，就是因为我自认为（ia̍h-sī认为）我是中国人，但是tńg去了后，tī蒋政权ê戒严令下，我开始问家己，我是中国人mah？有可能kan-tāⁿ是chi̍t-ê台湾人。因为受日本ia̍h-sī中国ê统治，差别真chió，因为台湾人犹原是受tio̍h二等国民ê对待。『中国人（华人）』是chi̍t-ê真模糊ê名词，叫chi̍t-ê人『华人』，ná亲像是叫chi̍t-ê人为欧洲人ia̍h-sī安格鲁撒克逊人。我其实无访问过中国，所以无资格像D.T.所讲叫我代表中国人发言。当然，tī台湾有中国人，咱叫hiah-ê二次大战后来台湾ê中国人为『阿山仔』（大陆人ê意思），koh叫家己为『蕃薯仔』（取自台湾地图像chi̍t-ê蕃薯ê岛屿）。

我充份知影『宣教冲激』，因为战争时，我人iáu teh英格兰，tiāⁿ-tiāⁿ tī讲演中家己认同家己是『中国人』，koh活活ê描述中国军队tī英明ê基督徒将军ê领导kap世界有名ê基督徒『蒋夫人』ê灵感ê影响之下，在胆ê抵抗日本军。像真chē ê人，我画出色彩灿烂ê画像！但是，当我过去六年gōa ê年月，亲目chiu金金看tio̍h中国ê军队根本无规矩，高低ê官员食钱臭烂，就bē拍理解为什么国民党tī共产党ê手下完全ê phah败仗。我讲：『我mā bē-sái理解，为什么基督教ê宣教会遇tio̍h chiah-nih大ê阻碍，m̄-koh，我相信，这mā是上帝ê宣教上ê摄理。我赞成tī chit场辩论上chon chē人tiāⁿ-tiāⁿ反复讲，上帝ê审判应该tùi上帝ê厝内ê人民开始。做chi̍t-ê台湾人基督徒，我想起有一pái赤冈ê牧师讲ê道，提醒世人讲：『伊（上帝）tī tò-pêng(以tò-chhiú)做tāi-chì，我soah bē-sái看见。（约伯记廿三9 ）』

当黄彰辉看tio̍h真chē教会领袖为中国宣教ê终结悲叹，亲像踏入绝路，深深感觉这是唤起ta̍k-ke对台湾应该有特别ê se̍k-sāi，进而抱起新ê希望ê机会。伊突然受了灵感讲出: 『阮应该分明tī世界上有chi̍t-ê中国，mā有chi̍t-ê台湾。虽然tī中国ê宣教hō͘基督教会丧志、失望，上帝soah用伊ê tò-chhiú，tī台湾开宣教ê大好机会』。伊讲了以上ê话了后，家己感觉受了感动tī chit种ê讲法是有突破性、而且有新鲜气味，tī chit-ê场合向世界宣称故乡台湾是有独立位格ê宣言。后来伊tī D. T. Nile写ê报告kap 着作内底看tio̍h伊提起『chi̍t-ê中国，chi̍t-ê台湾』ê论调，而且mā用了赤冈教会牧师所作ê约伯记ê注释kā伊解说。

６困难达成ê基督教会普世化 Tùi 1954年tī美国ê Evanston ê普世教会协会总会，到1961年tī印度ê新德里ê总会，大约七年期间，tī台湾mā掀起了普世教会运动。除了台湾基督长老教会以外，iáu有真chē有普世关联ê教会，亲像：圣公会、信义会、卫理公会、美北浸信会等等。经过了教派领导者tiāⁿ-tiāⁿ ê努力，终于达成两项教会合作ê大事业。其一就是庆祝基督教在台一百周年ê纪念庆祝，kap中华民国基督教联合会ê成立。虽然两项成就无机会tī国际上大吹号角ê宣传，m̄-koh tī内底工作ê人，真正费了心血去『抗争』出合作ê见证。对作普世教会协会ê成员ê台湾基督长老教会，he是一件真孤单，又koh坎坷ê路程。因为，除了台湾基督长老教会以外，无任何其他ê教派参与chit-ê普世性ê组织。综合其原因，ē-sái列举以下kui项： 一、 做为正规ê会员，教会至少ài有数以万计ê信徒人数； 二、 中国国民党政权tú tī leh外交ê乌暗时代，恐惊政权权利者以外，有国际性ê交往kap互利ê机会； 三、 因为tī普世教会协会ê成员教会内底，有kóa教会是归属tī共产国家集团。允准台湾代表tī án-ne ê情况之下，恐惊『反共』ê防线难保。 四、 tī台湾ê『反共护教』ê基督教份子，向中国民民党奏出诽谤，讲普世教会协会是亲共ê组织。 五、 tī圣公会、卫理会、长老会等教派（lóng是讲北京语言）ê有力信徒，lóng是国民党政权内ê政要。Tī台湾其实m̄是教会（派）内ê信徒，tùi án-ne是国民党ê基督徒，位居外交界kap内政界ê决策宝座上。

Tī『官话化』ê内政kap外交官吏，根本就无法度去探测ia̍h-sī体验tio̍h英格兰、加拿大，kap日本教会ê互动所体会出来ê根底是jōa-ni̍h-á ê坚固，而且kap国际基督教会ê连带是怎样广而且强靱。虽然bē-sái操中国官话，但是台湾基督长老教会ē-tàng操作chin chē种ê语言，koh-khah重要ê是符合时代ê神，信仰告白语言，hō͘ in有对世界教会kap国际社会ê『见证』。所以，虽然处tī艰难ê环境中，mā ē-tàng得tio̍h无数ê有骨气、有良知ê『华语』牧师，其中特别kap黄彰辉、黄武东有交往ê，就是周联华牧师。

因为黄彰辉bē晓操华语，tī台湾基督长老教会中，mā无一位ē-tàng kap中国国民党政权ê中央kap siōng高峰ê人士来往。周联华就是tī kah-ná是疏通ê绝路时所得tio̍h ê难友。周联华是中国共产党the̍h下全中国（1949年）以前，就到美国留学，攻读神学大约6年，然后tī 1954年到台湾来。黄彰辉kap周联华交谈时，使用ê语言lóng是英语。两人同是从事神学教育，mā对基督教信仰ê『本土化』有深切ê意念kap理解，而且有热情kap见识。

就tī 1950年代后期，周联华tī伊家己ê回忆录内底，述讲伊是án-chóaⁿ kap台湾基督长老教会人士相se̍k-sāi，并且合作：

Tú好是长老会在台一百周年纪念，in预备大大庆祝一下。有人认为中国人从来无家己做生日ê，一定ài会齐所有ê人来开庆生会。Tùi án-ne，tī台湾ê长老会以外ê教会组织了庆祝筹备会，推我做主席。Hit段时chūn，长老会非常积极推行『倍加运动』，南部有真chē教会，增加一倍以上ê教友。In一点mā lóng无『政治』，纯粹是宣教ê，脚踏实地做教会扩展ê工作。（《周联华回忆录》p.270）

周联华继续提起伊kap黄彰辉kap黄武东怎样合作建立神学kap教会ê探讨kap瞻望：

In有两位同工，台南神学院ê院长黄彰辉kap台湾长老会ê总会总干事黄武东，kap我tiāⁿ-tiāⁿ通宵讲话，商讨教会宣教策略，tùi晚饭以后谈到凌晨二、三点钟。彰辉是chi̍t-ê热情奔放ê理想主义者，伊有一大堆ê理想、策略，伊是动口无动手ê人；武东soah是什么话lóng m̄讲，静静听ê人。Mā可能有人会问，我lóng teh做什么，我是问问题ê人。我常问：为什么要án-ne做？kám行得通？然后有时chūn tī一边加油，有时tī一边泼冷水。第二天早起，武东kap我起了早，mā m̄去kap彰辉讲再见，坐了『平等号』火车tńg去北部。武东是无讲话kan-tāⁿ做事ê人，伊ē-tàng kā暗时讨论ê物件，一件件成做行动。彰辉ê头脑、武东ê行动，in二位是绝配，mā成做hit阶段长老会ê全盛时代。（《周联华回忆录》p.271）

到1963年11月22日（注二），圣公会ê吉尔生主教kap周联华邀请了长老会、信义会、卫理会等教会人士，tī东海大学成立基督教会联合会。这联合会共同图谋教派间kap宣教ê合作，渐渐进展到1971年，意图起草制作『国是宣言』为止，有了相当好ê成就，可惜，因为各教派ê政治背景，kan-tāⁿ遗留台湾基督长老教会修练了以后单独教派去发表he历史性ê台湾基督长老教会ê第chi̍t-ê声明。

７印度新德里ê普世教会协会总会 继1954年ê热天tī Evanston、1961年ê冬季tī新德里，召开W.C.C.ê总会，黄彰辉hō͘邀请出席，但是，害--a！伊己经hō͘中国国民党政权点名，bē-sái the̍h tio̍h『出入境证』，因为蒋政权实行『拖』ê政策，开会ê日期tio̍h tī眼前，hō͘人焦急。佳哉有了『总统牧师』周联华kā伊帮助。周联华先去要求见内政部长连震东，因为tī办公室有chi̍t-tiám-á 不方便，就tī连震东厝内接见。连部长kā周牧师讲，因为对黄彰辉ê秘密报告有一大叠，伊m̄敢批准。周联华向连震东訽问，hiah-ê密报是m̄是来自chi̍t-ê来源？是m̄是ē-tàng派人去台南查看hiah-ê人kám有出轨行动？密报有权威性kap准确性？因为看起来，kan-tāⁿ连震东无够移动权势ê『山仑』，tùi án-ne伊向总统府秘书长张群求助，伊tú好是tī中国国民党党部负责siōng高决策机构，其委员除张群以外，有曾虚白、陶希圣，kap谢然之。就吩咐叫黄武东kap黄彰辉总共7 ê人，聚集tī周联华牧会ê怀恩堂。黄武东kap黄彰辉就准备kā关于台湾基督长老教会ê一切，lóng报告hō͘委员会。第二天透早，党部副秘书长谢然之就khà电话hō͘入出境管理局，ài黄彰辉十点钟去领取出入境证（注三）。Án-ne伊tio̍h松一气，黄彰辉就代表台湾基督长老教会，到印度赴了第二pái W.C.C.总会。

注一：tī Evanston开普世教会协会总会chín前，先tī台湾开预备会之意。 注二：to̍h是美国总统甘乃乃hō͘暗杀身亡ê hit一工。 注三：参看《周联华回忆录》p.279-280。