《台湾人e5先觉―黄彰辉传》

 | | | 转寄

Tī台湾成长ê家族

作者 张瑞雄 2009.05.03

1947年当黄彰辉一家三人踏上台湾ê土地ê时，伊可能未全然准备好去承担khǹg tī面头前ê挑战。Kan-tāⁿ有两岁ê大卫，chiah teh操练一kóa单语ê发音，iáu无学习怎样贮藏由记忆得来ê知识去比较台湾kap英格兰ê情况。但是，对34岁ê少年妈妈慰尔，当时ê台湾经验是足够威胁到伊生命存活ê冲击。因为文化、言语、食物、气候、水土、环境等，就连吹tio̍h ê风lóng是怪异生份。物资欠缺kap无闲ê生活，不允准伊停落来学习做适应ia̍h-sī调整。Koh kui-ê台湾社会lóng受激烈ê物价膨胀冲击，黄家tùi英格兰chah tńg来ê储畜换成台湾ê纸币了后，经过几nā月ê日子就化成无用途ê纸堆。虽然tī黄家所khiā起ê「新楼」已经来了二次大战在台事奉ê宣教师沈毅敦、满雄才 ang-á-bó͘等ê英国人。但是kap黄彰辉ang-á-bó͘同年辈ê「同事」lóng iáu无到场，hō͘慰尔饱受孤单ê气味。

下图是慰尔tú到台湾时(1947年秋天)ê容貌(张进女－阿丹提供)

到台湾beh两年，大卫大约四岁ê 1949年5月3日，二男麦克Michael tī台南出生。Koh过两年ê 1951年11月30日，黄家koh一pái报喜，是长女爱连Eileen ê出生。虽然院长ê宿舍就tī神学院kap新楼ê大围墙内，夫君黄彰辉日夜lóng是为院务、教务、(教)会务，等等事工ê准备、讲授、拹商、kap会议奔走，差不多lóng无家庭ê时间。慰尔mā bē-sái kan-tāⁿ管家务kap儿女ê关照教育，iáu须要应神学院ê需求，充当英语课ê老师。Tī这种繁杂、无闲ê家庭内底，黄家由石远生医师ê绍介，得tio̍h一位名叫张进女(偏名阿丹)ê女子做专业ê管家。阿丹性情伶俐开朗，尊重家主ang-á-bó͘，真得黄家大小ê爱载。后来mā得家主ê绍介，kap tī神学院就职ê张志重(偏名叫「丁矣」)结婚成家。

下图是「丁矣」kap「阿丹」tī黄家主ang-á-bó͘「年老」时摄影hō͘ in做留念ê相片(阿丹提供)

下图是当阿丹tī菜园工作，遇tio̍h脚踏车ê果子摊叫卖，慰尔开门出来买果子，顺手摄相取农业社会做seng-lí女性ê镜头(约1950年，阿丹提供)

Tī黄家阿丹发挥伊农村出身ê本事，帮赞家主养羊取羊乳补给gín-á ê营养，种菜收成无受污染、而且防治孵寄生虫ê生菜做沙拉。Án-ne，不时为tio̍h黄家ê餐桌，提供koh经济koh营养ê餐食。

1947年热天tùi英格兰tńg来台湾ê时chūn，黄彰辉就向tī伦敦ê中华民国大使馆申请「中国」护照，慰尔就申请伊本身kap 随行ê大卫（连tī一本）ê英国护照。1947年是二二八大屠杀ê仝一年，台湾iáu是恐怖漫延全岛，民心非常无安定ê时期，因此英藉ê朋友lóng苦劝黄彰辉ang-á-bó͘将慰尔kap小儿大卫ê英国国籍留leh。

到1949年，二男麦克（Michael）tī台湾由台藉ê父亲而生，黄家就开始受户口登记制度ê压制。黄彰辉为此到台南市东区区公所去办手续，本认为极平常ê tāi-chì，但是其后果是出乎意料之外ê，户籍当局对黄家编造出一椿不寻常ê tāi-chì。因为个gōa月以后，市政府通知黄彰辉，讲：『除非慰尔归化，若无麦克bē-tàng登记上户口』。这真正是青天劈雳，市政府mā讲：『这是siōng高上司内政部ê指令』。Tī淡水ê英国领事bat劝告讲，因为动荡中ê中国局势，慰尔kap大卫iáu是保留tio̍h英国国籍为上策。所以黄彰辉就采取暂时ê措施，保留慰尔ê英国国籍，koh请兰大弼医师kap吴阿玉（Miss Gretta Gauld）护士长发hō͘ in出生证明，提交领事馆，kā麦克ê国籍身份确立，koh登记入慰尔ê护照顶面，做伊ê旅行伴随者。（《回忆录》p.134）

下图是约tī 1950年春天留影ê黄彰辉院长全家福(胡德提供)

下图是1959年慰尔师母携眷回英格兰chin前ê全家福留影，摄这相片大约是tī 1957年。(高俊明提供)

1951年，爱莲（Eileen）出生，koh几年了后tī 1955年，三男(老么)安得烈（Andrew）ê出生，lóng按照麦克ê时chūn ê例去设英籍kap登记in ê名字做为慰尔ê家族。M̄-koh，麦克ê出生户口登记事件，像chi̍t-ê起点，本来kan-tāⁿ是希求户籍事项ê解决，反倒变成是「中央政府」搅扰黄家ê开端。

1952年kap随后约每一年，申请「中华民国」护照ê时chūn，「中央」就hō͘伊chi̍t-ê「打击」，tī「结婚」ê记事栏内底故意盖上「未婚」。经过黄彰辉每pái向政府抗议，lóng无得改正。

Tùi麦克户口登记事件算做起点，tùi「中央」通过台南东区区公所，每月lóng有「月定通告」来询问为什么拒绝将黄家ê儿女登记为「中国国民」，因为黄彰辉kap市政府kap区公所人员相识，伊向in说明：『m̄是我拒绝，是政府拒绝登记in做「中国」国民ê。』（《回忆录》p.134-135）chit种ê困扰继续了整整10年，到1959年，慰尔kap儿女离开台湾以后，hit件「月定通告」chiah终止。

M̄-koh，真遗憾ê tāi-chì，就是连tī台湾长老教会内底，mā有教会牧长kap教会人士做国民党政权ê传声筒，mā做监视厝内事ê线民。因为政府通过「教派联谊会」，尤其是「反共护教联盟」（这是美籍传教士麦金泰（Carl MacIntire）为首所组织ê会，mā经过长老教会总会认可过ê）传达政府ê「风声」讲黄家有丑闻。就tī长老教会百周年（1965年）ê大庆典结束以后，黄彰辉卸任总会议长一职，去做普世教协ê神学基金会干事后ê隔年，tī 1966年ê总会通常会议内底，有一位长老教会牧师讲员（明显是反共护教ê一员）起立，做一项临时动议：『ài谴责黄彰辉bat kap chi̍t-ê女士同居，koh生了四个私生子。』虽然tī会中真少数ê人chhap伊kap伊ê动议，但是chit-ê tāi-chì，真hō͘教会省思，mā证明黄家tī迫害监视下所tam受ê痛苦kap冷汗。

单身ê院长（1959－1965）

Winifred chhōa儿女『tńg』去英国，he是1959年ê tāi-chì，按照英格兰长老教会海外宣道会记录，会方hō͘了伊需要tńg去英国ê理由。Tī宣道会圈外ê伊，mā大部分接受宣教师ê待遇，但是无宣教师ê身份。宣道会bat ài伊去受兰大弼医师ê健康体检。黄彰辉为伊申请飞机票费，但是宣道会大部分kan-tāⁿ肯hō͘ i坐船ê旅费。 当时kam是决定chi̍t tńg去英国就无beh koh tńg来台湾，bē-tàng知影，但是事实上，in一tńg去英国，就无koh再tńg来台湾lah。大卫本来是会讲不止á好ê台湾话，而且上了台湾人ê台南胜利国校，m̄-koh伊tiāⁿ-tiāⁿ以家己是英国人为傲。 慰尔母子对台湾ê se̍k-sāi无足，身为父亲ê黄彰辉，有7年ê光阴无kap in同齐tòa，伊又koh是非常ê无闲，对家己ê囝儿，无法度亲身传授教育，连分享台湾家系历史ê机会lóng无。黄彰辉tī回忆录ê记载，讲tio̍h bat kap大卫讲起，但是因为慰尔ê影响，kap无台湾ê社会环境hō͘ in成长上ê助长，囝儿tùi父亲所得有关台湾ê印象，kan-tāⁿ是南神ê外壳kap宣教师会ê点滴niā-tiā，对台湾ê环境kap历史，lóng无收藏tī脑子内底。这mā实在是台湾人ê悲哀，就亲像使徒保罗所讲：『家己得tio̍h，厝内ê人soah无法度得tio̍h kap体会。』彰辉虽然是有家族，伊soah亲像第一世纪ê使徒保罗仝款，世界上四界lóng去，虽够额世界化（globalized），soah tiāⁿ-tiāⁿ lóng是tī路上奔走。

难得ê一年学业假期

1958年，黄彰辉bat想过应该经过了做神学院院长10年以后，ài放假一年。这对伊有kúi-nā层ê意义：1) tùi台南神学院ê行政、人事、教学kap建设完全脱离；2) 心灵上需要充实；3) kā过去十年当中所读、所教kap所经验ê，作一kóa思考上ê辨别、分析kap整理；4) 接触世界上新ê神学家、神学教育家，kap教会领袖，进而得新ê操练、刺激、挑战kap启发。

Chit-ê时chūn，慰尔己经感觉精神kap身躯有kóa tòng-bē-tiâu，而且无jōa健康，需要养生。Koh gín-á，尤其是长子大卫需要有正规ê、英国ê教育（这特别是慰尔ê希望）。

当伊teh对将来ê进展考虑ê时chūn，真tú好有以下四个邀请：1) Overdale College, Birmingham ài伊做一年ê William Paton客座教授(Lectureship)。对chit项邀请，黄彰辉感觉tòa宿tī院校内供hō͘携眷人员ê宿舍，thang保持家庭ê团圆kap温馨ê优点。但是缺点就是，教册十年，ká-sú koh再连续教一年，继续作学术kap灵性上ê『付出』，就无充实家己ê机会；2) 芝加哥大学ê神学院邀请黄彰辉做客座教授。教授ê内容是关于基督教ê宣教研究kap教学。Chit项邀请，虽然有收入，但是无够做全家庭ê旅费kap养育ê费用，koh kan-tāⁿ是一年hō͘ gín-á教育上片断无连续ê安排，无法度圆满，而且，这mā m̄是充实家己ê理想环境；3) 南京基金会ê卡特莱干事提供tī杜鲁大学（Drew University）神学院教册，教关于东南亚宣教方面ê课程。Chit项条件比前者好chin-chē，但是其缺点大部分mā是kap顶一项仝款；4) 当伊iáu teh犹豫徘徊ê时chūn，tùi Dr. VanDusen（纽约协合神学院院长）来了邀请，就是以前已经向黄彰辉提过ê，但是这一pái ê邀请是真具体ê。邀请黄彰辉tī协合神学院教『向世界ê宣道学』，伊mā ē-táng自由ê tī神学院校内选修所欢喜ê科目，充实家己。

Tùi以上四项机会，伊选了第四ê邀请。但是án-ne，伊iáu是bē-sái满足慰尔kap伊想tio̍h ê，众细kiáⁿ应得siōng好ê生活环境kap教育机会。当然，慰尔所想ê是『kan-tāⁿ限制tī英国』ê机会。

黄彰辉就向英格兰长老教会海宣干事Feⁿ探听，英格兰长老教会海宣是m̄是ē-tàng支付黄家囝儿ê生活kap教育费用。黄彰辉tī 1958年11月10日致Feⁿ ê批内，án-ne讲：『我虽然有意愿beh kap家族同齐tī英国一年，我kan-tāⁿ想先路过英国kap家族同齐tòa chi̍t kò͘月。我ê行程是1960年7月tī新加坡参加神学研究会，kap东南亚大学kap神学院院长会议，然后经过英格兰去美国。我希望我所有经由东南亚kap欧洲，往返New York ê旅费ē-táng由南京神学基金会负担。』

Tio̍h án-ne黄家终于决定1960年到1961年，全家先『tńg去』英国，然后黄彰辉chi̍t-ê人去美国，tī纽约停留一年，tī协合神学院一面教册，mā一面学习、研究。到一年结束了后，koh再取道英格兰一家团圆，然后tńg来台湾。

Tī 1961年春天，加拿大杜仑多ê Knox神学院，因为黄彰辉对台湾ê神学教育、教会领导，kap tī东南亚神学上kap世界ê教会（WCC内）所做ê丰功伟业kap贡献，授予伊荣誉神学博士学位（Doctor of Divinity）。

国民党政府kap台南神学院

国民党ê中华民国m̄是法治ê国家，所以一遇tio̍h难题，就kā所有ê法律根基，以吊消ê方式，又koh以权力为政者ê方法，就是戡乱时期临时条例，ka上戒严令去实行。既然台湾ê菁英lóng hō͘剿灭，若koh加害有国际眼光kap关联ê黄彰辉，专制ê政权tio̍h ē-táng高枕无忧。Chit点，tī黄彰辉kap台南神学院，算是错失了瞄准，因为黄彰辉有留英kap tī英格兰教会工作ê经验。通过普世教会协会ê关联，世界各地ê人se̍k-sāi黄彰辉，mā普遍知影台南神学院，m̄是归属历史上所se̍k-sāi ê中国，tùi西欧、美洲、非洲ê教会领袖陆续来台访问，mā建立友好ê关系。但是，kap国民党ê中央政府，就是完全ê隔绝，无来往。台湾神学院soah因为孙雅各院长以前kap吴国桢省长tī普林斯敦大学同学过，所以tī台湾重温以往ê友情。因为in两人ê私人关系，吴国祯省行政长官，承诺台湾神学院ê学生在学期间，容允ē-táng延缓召集到毕业了后。有一段时期，因为有án-ne ê特别优遇，一kóa学生选台神，m̄选台南去学神学。

但是tī国民党统治下ê台湾，政府根本就无关心『宗教ê学校』，认为无chhap伊，自然tio̍h会消灭。可能就认为神学院mā是像一般ê宗教『出家者』，就无koh回到社会内去关怀教会kap社区内ê会友生活。Ia̍h-sī亲像道士，根本就是以传统ê学徒ê方式，就事就地实习出来。神学院有伊ê历史，有伊ê传统，有伊ê国际联系，mā建立kap教会kap社区ê关联。

神学院ê教授从来无经过教育部认可、考核，教会mā m̄-bat向政府申请学生毕业时ê学位ê承认。Tī战时期间，甚至战后ê中华民国，无时间，mā无实际去考虑宗教学府ê督导kap学术方面ê评估由教育部承担，就分派hō͘内政部管制。In ê部属根本就bē-sái胜任，无老练，mā无诚意去chhap伊，án-ne，政府根本就无机会去审核神学院ê内容。

当长老教会两位黄牧师（黄武东kap黄彰辉）参与『东海大学』ê设立ê时chūn，美国教会ê领袖（亲像Stanley Smith史密斯）主张，台南神学院应该ài kap he将建立ê教派联合ê大学合并。美国ê领袖对tī台湾ê教派ê分布ê se̍k-sāi kap合作上lóng无一丝á ê经验。实际上，当时tī台湾ê宣教师是爆满了全岛，除了长老教会以外，ē-sái讲是宣教师ê人数thang kap诸教派内ê会员人数相比。因为tùi中国大陆真短时间内撤退到台湾，in lóng无机会恢复教派ê幕僚（uparatus），领导ê牧职人员mā siūⁿ少，而且kap社区ia̍h-sī厝边互相无se̍k-sāi。唯独长老教会就有600到700间教会，分散tī台湾全岛。

长老教会以外ê基督教领袖，lóng是先是国民党员，而且是担任政府ê要职，其次chiah是隶属教派，而且教派mā kan-tāⁿ有tī组织ê过程上ê关连niā-tiā，所以当时ê建校局势是tī『台湾基督长老教会』kap『国民党官员ê基督徒』两者之间讨论出来ê。当然，第三者就是美国教会联盟（NCCUSA）下ê普世基督教高等教育基金会（United Board of Higher Education）。（1965年以后，chit-ê委员会支付了 bē少基金hō͘黄彰辉所掌管ê普世神学教育基金会。）第三者只ē-tàng够设置『建校（东海大学）委员会』，tī认为有妥当ê继承者ê时，就结束in ê干预，koh滙了庞大ê金额，hō͘东海大学董事会去掌理。Ta̍k-ke lòng知影，东海大学除了起头ê几年以外，lóng ē-sái讲是国民党员基督徒所掌理ê大学，一点lóng无地域ê教会，连联合教派ê教会lóng无法度参与其中。

黄彰辉后来感慨无量ê讲：『若当时我（kap董事会）承诺hō͘南神kap筹备会同齐建立『东海大学』，我就送掉这间神学院，koh连chi̍t-ê影像lóng bē-sái留hō͘台湾基督长老教会lah。』（参看《回忆录》p.215-6）

黄彰辉bat问过ài得tio̍h政府（教育部）认可ê条件，就是：1. ài用满清语（Mandarin）教学；2. ài政府政治ê干预，亲像：设置军训教官、设军事课、政治（洗脑）ê周会、每日ê升旗等等；3. ài采用所设置ê安全室（特务人员）；4. 可能学生ê招收lóng ē受tio̍h干涉，废弃教会ê小会推荐，进而编入为中国(国民)党一党独裁所beh求ê『联合招生』制度。

国民党压制政策m̄-taⁿ tī『神学院独自行』家己eê路，bat发布公文命令，神学院bē-tàng使用这款ê名称，应该改做『神学书院』。据笔者记忆，黄彰辉根本无理睬hit ê命令，无一工终止过传统ê称谓，koh称伊kap长老教会所授ê神学教育ê机关为『神学书院』。长老教会kap黄彰辉院长勇气thang嘉许。

台南神学院ê cha-po͘学生，每chi̍t-ê人lóng beh颤抖ê「等待」学业ê中断，koh hō͘国民党独裁政权徵召到军中服役。一旦hō͘徵召，tio̍h ài放下功课ê计划，去受『中国ê洗脑』教育，『召集令』只 hō͘ hō͘徵者三、四ê礼拜ê准备期间。去，有时是四个月、六个月不等ê受训期间，koh服役期间，自一年、二年，甚至到三年ê期间，sam-put-téng。Koh服役期间所受ê教育，就是灌输tio̍h『共产主义ê不伦、不德、m̄是、共产党ê为非作乱，毁坏中国ê传统文化』。Koh来就是『提示日本ê侵略，不道德、不仁义。Kan-tāⁿ有中国国民党chiah是好ê政府，koh有好作为，善良纲纪』。其实伊是空论，koh无什么实践出来ê好榜样，就是利用权力，洗台湾青年ê脑袋，当做挡共产中国来袭ê堤防。

台南神学院ê众学生所受ê困扰kap打击，算是非常大。M̄-koh，tùi神学院毕业ê台湾长老教会ê传道人，lóng克服了这种种ê坎坷，进到宣教ê前线去。

下图是基督教tī台湾宣教百周年庆祝盛典tī台南长荣中学举行ê一景。(摘自黄武东回忆录)

下图是基督教tī台湾宣教百周年庆祝盛典会场现场，1965年6月16日。 (取自长老会总会资料集)

台湾基督教宣教百年庆典（1965年）

英人医师马雅各来台湾行医兼宣教是tī 1865年6月16日开始。到1965年是百周年。最后ê十年，mā作倍加运动ê策划，tī 1965年配合tī百年盛典内庆贺。台湾长老教会ê庆典，当然是由总会议长来主持，koh hit年ê议长就是黄彰辉牧师。tùi 1951年成立台湾教会总会以来，议长宝座lóng是一位一任，kan-tāⁿ有黄彰辉是唯一破例tī第四kap第十二届hō͘选做两pái议长。总干事ê职务tùi 1957年开始一直是由黄武东牧师担任。台湾教会特别推选黄彰辉ê用意，是为tio̍h beh向世界宣扬kap感谢黄彰辉瞻前ê眼光kap领导ê能力。Ta̍k-ke对黄彰辉kap黄武东ê搭配，tī 1955年提出具体ê倍加运动计划，记忆犹新。

台湾基督长老教会ê南北两大会tī 1951年3月5日合一进而成立总会。其实当时ê合一是象徵ê性质无带动全教会ê实际连结kap动力。M̄-koh，成立这一pái ê合一，就马上『处理』好参加普世教会协会(W.C.C.)ê决意，mā传达到日内瓦ê本部。Hit年ê热天是台湾教会kap W.C.C.关系ê开始，mā就是黄彰辉引领台湾教会踏上普世舞台ê起点。国际性ê交流、关心、研究、支援、基金会等等lóng接踵而来。Án-ne台湾长老教会真侥幸ê比以『反共护教』为招牌刁拨、分化教会制造混乱ê份子，早一步整合步数koh逃脱了灾难。Hē『反共护教』集团是亲国民党、友政权，而且是反台湾ê。In ê头魁是所谓『传纯福音』ê麦坚泰(Carl McIntire)。Tùi台湾长老教会参加W.C.C.开始，一直到1965年内，四界lóng teh chhōe空隙、缺点、kap机会大唤m̄是koh kā伊攻击。he一kóa『反共护教』ê兄弟，mā时常向政府奏称W.C.C.是『亲共』、『自由派』(指讲chit派ê人无信圣经ê绝对权威，无信神迹，甚至命名为「敌基督」作诽谤) 。

为tio̍h beh hō͘ 1957年第四届ê总会成做名符其实ê总会，南部大会就议决废除大会koh hō͘属下各中会直接参与总会，mā决定以后改为每年召开年议会。Án-ne，ē-sái讲是合一后第一届ê总会内，选出黄彰辉为议长，黄武东为第一任总干事。倍加运动已经进入第三年，ta̍k-ke对前瞻有共识kap自信。

Koh过八年ê 1965年sī台湾基督长老教会设教一百周年ê百禧年。Tī 1963年第十届总会议决应该隆重举行纪念大典，又koh议决邀请各基督教会kap团体，共20 ê团会参加。1964年3月16日长老教会邀请各愿意参加ê教会kap团体代表，tī台北基督教青年会召开座谈会，到4月15日成立筹备委员会，公推周联华牧师为主席，方大林牧师为书记，黄武东牧师为总干事（注一）。真chē纪念行事中，设定6月16日到22日为纪念周，分别tī台南(16、17日)、东部(19、20日)kap台北(21、22日)等三地区举行。Tī台南ê两工内举行纪念宣教大会、纪念感谢礼拜、纪念大游行、倍加运动成就感谢礼拜、纪念音乐游艺会、纪念历史文物展览会等六项节目。其中siōng精彩有意义ê行事就是过去十年来持续ê努力koh完成ê『倍加运动成就感谢礼拜』，tī 17日下晡tī长荣中学体育场，由总会议长黄彰辉主礼举行。

担任百周年庆祝筹备会主席ê周联华，有以下关于伊所牵连ê报告。Tī筹备会ê起头，就有由创设人万国教会联盟麦坚泰（Carl McIntire）ê组织ICCC（International Christian Council of Churches）。（注二）百周年ê庆祝行事一开始，周联华报告讲：

麦坚泰亲自就任，佩了记者证来督师。头chi̍t-ê消息传来，有两位苏联代表ài闯关。当时我非常笃定，khà电话到入出境管理局，报告in，我已经kā外交部核准ê外宾名单交hō͘管理局，『把关』m̄是我ê责任，请入出境ê移民官注意就是lah。后来，chiah知影这kui位是世界长老会（注三）总会ê总干事kap瑞士改革会ê议长，in ê英语lóng有kóa德国kap瑞士音，误认为苏联ê代表。In有护照，为什么无用护照来审核neh？后来，in总算入境，但是这kan-ta是困扰ê开始。（《周联华回忆录》p.271-272）

到台南ê庆祝游行ê前一工，周联华hō͘警务总部参谋总长tī台北召见。参谋总长要求周联华作以下四项承诺：

一、 lín ē-sái游行，不准有任何ê声音； 二、 lín tī游行过程中，m̄准发任何宣传品； 三、 台南小流氓真chē，lín m̄准kap任何人惹事、相phah； 四、 限tī hit暗十一点结束。 （《周联华回忆录》p.272-273）

周联华回到台南饭店koh遇tio̍h棘手ê问题，就是饭店ê值班人员hō͘告知in无欢迎苏联人客，饭店mā已经租满人客lah。周联华就坚持ài hō͘ hit两位贵宾siōng好ê套房，mā承受了ài叫美国人搬到另外一个饭店。

第二天早起，伊tio̍h-ài应付记者追问『W.C.C.亲共』、『苏联人来宾』等问题，一直到十点钟，tio̍h-ài到太平境教会ê庆祝礼拜以主席ê身份讲道。伊bē-hù 换衫裤，就穿诗班袍上台去讲道。（节录自《周联华回忆录》p.274-275）

Hit暗，tī游行开始以前，kā游行时ài分ê传单全部切碎，koh到印刷处所kā版子拆掉。游行队伍分做每队200 ê教友，各由一位教友任队长管理，作无声ê游行，连赞美诗mā bē-sái唱。M̄-koh kui-ê游行ê纪律chin好，因为队伍ê尊严，hō͘领导者心安koh佩服。无到11点，最后ê一位游行者来到目的地，所有ê队伍解散，划下戒严时期ê宗教游行ê盛举，终告成果完善。讲到本来预定tī花莲举行ê游行，虽然得tio̍h警察局ê允准，庆祝百周年ê筹备会kap当地ê信徒商量了后，决定无beh举行lah。（节录自《周联华回忆录》p.276-277）

为tio̍h一百周年庆祝盛典，由国外应邀来台湾参加ê来宾大约有两百gōa名。加拿大长老教会代表团30名，美国长老教会代表团30名，世界长老教会联盟执行委员kap其他各差会议长等约40名，mā有tùi东南亚姐妹教会来ê华侨教会代表约100名，lóng踊跃来台湾参加。

美国长老教会代表团ê领导是当时ê总会议长威廉．汤普生，tī十kui年了后，伊受选担任该会ê总干事。伊tī一pái『教会kap人权』ê演讲中，提起伊对台湾基督教百年庆典ê印象，讲到：

『1965年热天，内人kap我参加由廿七人组成ê美国代表团，访问台湾，参加台湾宣教百周年庆典。阮实在为所遇tio̍h ê台湾基督徒ê烧热诚、坚定ê信仰感动，阮mā因台湾基督长老教会为庆祝百周年所推动ê倍加运动ê成功来欢喜。阮到过台北、台南、高雄、台中、花莲kap其他真chē地方，所到ê所在，阮对台湾人民ê勤奋、成就印象chin深。

对我来讲，经验ê高潮是tī台南。Tī长荣中学运动场ê大聚会了后，成千上万参加庆典ê基督徒组队去市街，tī演奏『我是耶稣基督精兵』ê乐队引chhōa之下，提灯游行。有几十万ê台南市民排列tī街路边静静ê观看。我ê朋友黄彰辉博士，是当时台湾基督长老教会总会ê议长，邀请作为美国联合基督长老教会总会议长ê我，kap伊行tī游行队伍ê头前。当我加入游行队伍ê时，我感受tio̍h充满tī he情境中ê紧张气氛。

我听讲有关当局真勉强ê批准该游行。伊是头chi̍t-ê非由政府家己主办ê游行。明显ê，in烦恼伊会成做chi̍t-ê政治事件，一直到开始游行前kui小时，政府官员iáu teh要求更改游行路线。游行队伍mā hō͘禁止唱歌，所以乐队kan-tāⁿ好重复演奏仝chi̍t-ê作曲。有一pái tī队伍oat-oan ê时chūn，爆出kah-ná枪炮ê声音，tī确定是旁观者放鞭炮了后，ta̍k-ke ê忧虑chiah消除。……』（《出头天》168-169页）

六月ê庆典以后，八月五日tī台中举行全台湾ê主日学大会，八月十九日tī台南举行全岛基督教青年大会，koh tī八月17日到20日，假台南长荣中学体育场举行纪念运动会。庆祝ê各tāi-chì以10月25日到30日，tī台南神学院举行ê，第二世纪传道方策研究会做为结束。受邀参加该会者有各有关差会代表，kap国内各教会单位ê代表。

Tú好，tī伦敦ê英格兰长老教会做海外宣道会干事ê，就是tùi 1948年到1959年tòa仝楼ê厝边，mā做过台南神学院副院长ê安慕理牧师。伊知影kui-ê台湾基督长老教会ê一百年历史，mā彻底知影黄彰辉全家ê背景。为tio̍h英台两教会写简要ê历史，mā hō͘台湾教会史料，作展览之用。为各合作教派kap台湾长老教会准备，tī十月中召开宣教百周年ê过去kap将来ê研讨会。

为tio̍h黄彰辉kap夫人慰尔，安慕理做了一椿非常有意义e5tai7-chì hō͘ in作庆祝百周年ê礼物。伊安排，mā tùi英格兰长老教会海宣会捐献hō͘慰尔回台kap做总会议长ê丈夫同齐主持庆祝ê tāi-chì。安慕理mā特别安排出资hō͘黄家ê三男安得烈(Andrew)同行。当安得烈tòe慰尔渡英ê时chūn，伊chiah四岁，这一pái tńg来台湾伊已经是bat tāi-chì ê九岁lah。Tú好tùi 6月到8月是歇热期间，无影响伊ê功课，也thang请亲戚照顾三ê兄姊而留tī英国。Án-ne黄彰辉ê家庭ê一半难得tī台湾团圆，并且作伙庆祝台湾教会ê百周年。

注一：本来另外一个台湾siōng有历史ê真耶稣教会mā hō͘邀请参加庆祝筹备会，并且非常踊跃，但是因为kap台湾基督长老教会有史以来tī神学上kap往来上所bē-sái容忍ê对立所以撤消。 注二：万国教联ICCC是bē-sái kap W.C.C.比较ê，伊是小，而且『对全世界ê影响力mā无大，是chi̍t-ê相当保守，反乌人，反闪族（犹太人），反共产党ê chi̍t-ê tùi长老会中分裂出来ê chi̍t-ê教派。正因为伊反对长老会，所以伊就beh拆散长老会。头chi̍t-ê矛头针对韩国，因为韩国人mā非常保守，而且是绝对反共，所以合作无间，韩国ê长老会因此受到极大ê伤害。』（《周联华回忆录》p.269） 注三：这是『普世归正教会联盟』ê误称。