《台湾人e5先觉―黄彰辉传》 |
 |
 |
|
 转寄 |
黄彰辉tī东京帝国大学（东大）
作者 张瑞雄 2009.03.29
日本所有ê学校，lóng是4月初1开学。Tùi án-ne黄彰辉提早tī 1934年3月，就到东京，到附近ê东大基督教青年会报到入来tòa。所以伊到帝国大学注册ê时chūn，伊塡ê地址为『基督教青年会学寮』。
大学生ê生活
日本所有ê学校，lóng是4月初1开学。Tùi án-ne黄彰辉提早tī 1934年3月，就到东京，到附近ê东大基督教青年会报到入来tòa。所以伊到帝国大学注册ê时chūn，伊塡ê地址为『基督教青年会学寮』。
东京大学YMCA学寮ê位置，是tùi东大校门ê『红门』正pêng，出入人文学院ê门出去正oat行3分钟，行过chit-má ê东大农学院，过去对面，tī本乡地区ê追分街á顶。出入文学院校上课算是真理想方便ê所在。
东京帝大算是日本国内siōng古、siōng大，而且siōng好ê大学。大学标榜伊学术上ê优越 kap辉煌ê校舍、设备。其实内底根本就m̄是chi̍t-ê有人际关系ê园地。1934年入学ê 8到9位（其实tī系ê日记顶登录有21人，21人可能是全学系ê人数）哲学系ê学生，tī『新生绍介训练』kap面谈了后，kap仝期仝班lóng无接触，mā真少作伙，一直到毕业为止。根本m̄知in tī啥所在，除了会记得一位ê名字以外，黄彰辉lóng无记忆。
学生tī真大ê校园内穿仝款ê制服，戴四角方帽ê大众内，真有迷失ê感觉。伊讲：『佳哉伊得tòa tī有团契性质，mā尊重个人思想、行动ê基督教青年会宿舍内。』（《回忆录》p.60）
YMCA宿舍总共有50个房间，thang tòa 40 ê人。每chi̍t-ê人lóng有家己ê房间，in大约分做6个『村』，每一村lóng分配无仝年级ê学生，成做chi̍t-ê『小组』。In共同遵守两pái ê早起礼拜，mā回览、分享笔记ê消息ia̍h-sī感想。礼拜日mā开主日学，总共教导100个少年kap儿童，由每一『村』负责一大班学童。
全寮ê大学生lóng同齐食饭，食饭ê时chūn，是chi̍t-ê siōng好ê机会讨论ia̍h-sī互相交往关怀，建立chi̍t-ê相爱、有厝ê气味ê大家庭。
Tī寮内有chi̍t-ê大浴间á，是日本式ê烧水槽kap周围洗lù ê空间，日本话叫做『风吕』（发音做Furo），同时总共thang接纳近20 ê人。Tī-hia m̄ kan-tāⁿ是享受烧热ê水，koh-khah可贵..ê，就是ta̍k-ke thang脱光光来谈论国家、国际ê任何话题，无掩khàm ê谈论。因为当时日本己经占领满洲koh设立属于日本ê保护国ê满洲国。日本国内己经是进入军政时期，tī每chi̍t-ê学术kap活动ê所在lóng充满『特务』、『情报』官员，去掠『自由思想』、『造反组织』等等ê分子。黄彰辉逐工lóng真享受chit种ê无穿杉ê开会，寮员ē-sái kā心底ê思想kap话语lóng吐..出..来，同齐分享丰富ê知识、消息kap深思。
寮内大约逐礼拜lóng有讲员tùi外边请来，向全寮ê学生讲圣经，tiāⁿ-tiāⁿ lóng有讲员讲了真精彩，随后ê讨论mā真热烈，黄彰辉特别记得有一位『少年』ê牧师，叫浅野顺一，查约伯记查得真有趣味。黄彰辉kap浅野tī 1966年以后，有机会tī青山学院神学部相会，伊tī hit-ê学院做教授，有机会看tio̍h熟识ê人欢喜开讲。
东大YMCA当时是全日本ê学生运动中心，亲像扮演电脑中枢ê角色。Tī基督教ê学术kap社会运动ê研究kap学以致用ê探讨顶头，是行tī全国ê头前ê。就是因为以学问（学术）kap圣经为siōng重要ê『无教会』学者，tī大学教授ia̍h-sī学习，有时mā吸引校外ê学子进到公开ê场所听讲，东大YMCA就提供án-ne ê会所。当黄彰辉tī学寮ê时chūn，mā tú好是经济系教授，帝国主义研究ê专家矢内原忠雄，受军国主义爪牙人员注意ê时chūn，伊用无惊hiâⁿ ê精神讲帝国主义tī台湾、朝鲜、满洲所施行ê政策，kap所做ê行为。因为真chē伊所提供ê资料，就是提起日本按怎来包庇贪污ê资本家去榨取殖民地ê财产、资源。（矢内原忠雄tī 1929年10月出版了《帝国主义下ê台湾》一册，tī 1934年（黄彰辉入学东大hit年），伊koh出版了《满州问题》。日本政府随kā台湾、满州两册『停止印刷』。黄彰辉毕业ê 1937年，tī《中央公论》杂志上刊登＜国家ê理想＞一文，受了全文削除ê禁令，仝年12月4日，总算受驱逐放弃东大教授ê职位。）
黄彰辉tī东大YMCA学寮ê时期内底，东大YMCA学寮tī大学内底办基督教ê演讲，mā得tio̍h日本学界真有实力koh受欢迎ê贺川丰彦来演讲，伊是引chhōa日本基督教社会运动kap全国劳工者权益运动ê人，tī黄彰辉leh读册ê时chūn，伊bat去过东大ê大演讲厅演讲，ē-sái接纳700-800人ê座位ê讲堂，连khiā ê所在lóng满满。贺川hō͘黄彰辉ê社会意识kap激起基督教良心siong chē koh真大ê刺激。伊志愿加入服务贫民ê行列，逐礼拜有一工去贫民窟内去分食物kap衫。伊讲伊第一pái看到chiah-ni̍h-chē、chiah-ni̍h惨ê人tī日本ê首都，koh tī离开皇宫无远ê所在求生存。
Tī教哲学ê老师内底，有一位出众ê教授波多野精一，是黄彰辉真尊敬ê学者，mā是老师。波多野是一位真有趣味ê哲学家，听课ê学生、社会知识人mā真chē。
黄彰辉tiāⁿ-tiāⁿ听别人讲，贺川ê神学浅薄，波多野ê哲学是大众化、世俗化..ê。其实无一定是án-ne，chit二位lóng是有深奥ê哲理，有趣味生动ê讲述能力，ē-sái吸引人加入宗教kap哲理ê新园地。
黄彰辉hō͘当时ê日本基督教徒ê评语，是『tī信仰（神学）顶头真保守，m̄-koh tī社会活动顶头是真开放..ê（自由派）。』各种大学生ùi无仝ê所在ê乡镇kap教会来，m̄-koh是tī东京，特别tī东大参加宗教ê活动，差不多lóng是无『kap教会取得连系』ê教会生活。
『无教会主义』ê圣经研究班，就tī出众ê教授厝nih，逐礼拜日举行，mā tiāⁿ-tiāⁿ借教室举行『学术性』ê『圣经班』。In至少tī东大内扮演『教会』ê角色，koh是水准真高（若无tī神学探讨上，mā tī圣经ê讲解上）ê『礼拜』。
像矢内原忠雄教授，虽然是经济政治学家，伊mā学习了希伯来文、希腊文，koh领导圣经ê讲解。Siōng hō͘人tio̍h惊ê，就是大学（学府）se̍k-sāi宗教为学术学习ê对象。所以当时， koh无政、教分离ê主张，对东大ê基督教徒ê活动，算真有利，m̄-koh mā变成『帝国主义神道』得利主张，『神道』是国家ê哲理，m̄是宗教ê歪论。
东大YMCA依照伊ê沿革，设有：一、寄宿舍部；二、圣经研究部；三、研究部（学术）；四、图册部；五、音乐部；六、体育部；七、主日学校部等，总共七部（注一）。照当时仝寮ê寮友三轮和敏，in逐礼拜大概lóng有百gōa名ê主日学学生来学习，伊kap黄彰辉lóng是hit间学校ê教员。伊特别hō͘我当时黄彰辉kap伊tī学生所hip ê相片。
下图：进入东大本乡门，向『前田大会堂』院内ê风景。(三轮和敏提供)
下图:黄彰辉(khiā-tī正pêng)kap同学tī『前田大会堂』前hip-siòng。(三轮和敏提供)
下图:黄彰辉tòa寮时代ê东大YMCA学生寮舍ê正面外观。(东大YMCA寮提供)
下图：东大YMCA ê寮内村友留影，二排坐tī中央ê是黄彰辉。(三轮和敏提供)
下图：tī三轮先生所提供ê相片内底，mā有一张是ta̍k-ke tī餐室所hip，大概是饭前ê镜头，黄彰辉tī后面，近tī中央ê所在坐teh。
下图:逐年到圣诞节ê时，东大YMCA学寮内举办圣诞庆祝节目。Tī 1934年12月15日(礼拜六)圣诞节目内底，有『同志ê hiah-ê人』为题ê两幕戏剧，黄彰辉演主角，演戏soah了后hip ê记念相片，相片内底后排倒pêng第三，面上抹白粉ê就是伊。
注一：tùi东大基督教青年会1930年代ê简介采录..落..来..ê。
大学生学术园地 东大YMCA mā出季刊，叫做会报（The Kaiho）。Tī会报内刊登东大YMCA、东京kap全日本YMCA ê活动通知kap报告，国内外基督教会ê消息，季内受邀请讲师ê专题讲演内容…等等。有时，寮内ê同学有论讲、文章，mā ē-sái刊载tī会报顶头。1999年笔者采访东大YMCA寮时，做干事ê是德久俊彦先生。伊是1953年东大经济系毕业，伊hō͘我第17号1935年12月10日出刊ê季刊，内底有一篇黄彰辉所写ê论讲，题目叫做『不安ê伦理性』，真可惜ê是kan-tāⁿ有顶半段，就是因为下半段遗失，所以无法度绍介hō͘读者读。
（以下是hit篇ê译文：）
亲像采金者，m̄管是荒凉ê旷野，四界挖lóng无，为tio̍h无采收，一连串ê吐大气，但是bē有绝望，无iah-siān kap疲劳，忍耐继续落..去，哲学ê探求者，因为有知识ê热心，连续来超越失败ê废墟，迫近去chhōe出bih-tī存在背后ê意义。若m̄是因为爱，谁ē-tàng达到真理？失败就是向前进ê呼召。
对不安了解肤浅ê人，有双重掩khàm。其中之有不安，另gōa mā有不安ê含意。Kan-tāⁿ tī不安状态下ê人，chiah有安心ê应允，无不安ê安心，kan-tāⁿ是自欺ê逃避niā-tiā。
M̄知人罪沈重ē人，岂ē-tàng kap in ê真诚探讨『不安』？永远相下，不安kan-tāⁿ像落叶ê声音，kap海上ê风浪niā-tiā。『hiah-ê幸福ê人』ah！阮到chia告别好..a。
历史上，从来m̄ bat有过亲像现代，hō͘人感觉不安ê时代。Tī所有ê领域内底，lóng充满不安，tāi-ke lóng大声hoah『危机』。不安社会、不安思想、不安神学、不安哲学、不安文学等新语，lóng 亲像有魔术性吸引力。比起中世纪ê乌暗时代，阮ē-sái称做现代不安时代！但是，客观ê世界起了变动，mā无一定会产生『不安』出..来。soah因为主体者ê人本身就是不安，tùi án-ne面临危机。
当然bē少学者往往kā不安当做kan-ta是生物学上、心理学上ê意义来解释，ē-sái讲是独断ê做法。阮所面对ê问题，m̄是关于存在上ê不安，tùi án-ne是siōng根本ê『世人ê不安』ê意义。阮所讲ê不安，就是世上存在意义上ê不安，只要人tī世间存在ê一工，伊就亲像影仝款。He是看bē-tio̍h、摆脱bē-liáu ê宿命性ê不安。Tī永恒内底ê『chit时』中，一直leh『如现』逼伊做判断。因此，不安就是世人tiāⁿ-tiāⁿ存在ê属性。
我ê目的就是先kā惊hiâⁿ不安作以上ê限定，koh来tùi人存在ê属性，来看不安ê根本意义是啥。顶头讲..ê亲像海德格(Heideggar)对不安ê根本看法。伊对不安ê根本把握m̄是hiông-hiông来ē，是经过宗教思想家tùi种种无仝ê观点观察以后，各自kā伊独有特殊ê意义限定。当然，m̄是忽视海德格是kā chit-ê题目提升到哲学顶ê思考koh kā伊解明ê siōng大功劳者，反tò-tńg soah是因为伊tùi原来kan-tāⁿ受Pathos领域消极研讨ê题材，koh hō͘哲学本Logos类型ê哲学看做搅扰者ê概念，转移来做哲学ê中心论题，chit种ê成果就是siōng大贡献。Tùi chit点看起来，阮应该tio̍h se̍k-sāi哲学是脚踏实地，无应该是『为学问而学问』ê闲事。
观看过去ê思想家如何去理解不安ê意义，对阮是有帮助ē。所以我kā以下奥古斯丁，巴斯加(Pascal)，kap海德格对不安所作ê解释，做为参考。
奥古斯丁：神所创造堕落ê人，处tī绝对无法度tùi神独立ê境遇，beh自由soah bē-tàng得tio̍h ê悲剧性境地；koh『自高自大者，必受审判』；由此thang证明人ê不安根源所在。本来是朝向神受创造ê人，tī kha-chiah-phiaⁿ 向衪ê hit-chun就kap神处tī『否定』关系。破损ê人tī现存性上己惊有不安。神kap人tī辩证ssiong对立，正是不安。he一下á就是对神ê答申，同时mā就是有tùi神ê边á堕落可能ê起点。这ē-tháng惊惶ê不安，就是神投hō͘世人ê『不』，mā就是hia-pai ê背逆者奔向逃避ê危机。『神tī其中，伊soah tī神之外，án-ne ê人，án-chóaⁿ ē-tàng期望安泰neh？若m̄是tī祢（神）内底得tio̍h安泰，我ê心怎ē-tàng得到平安ah？』驱使奥古斯丁行上he无尽头历程ē，就是这不安，koh引领伊回归tī神，mā就是这不安。
巴斯加比喻人ná tī无限大kap无限小ê深渊之间徘徊无停，tī旅途上有可能ē-tàng探究到人不安ê根底。对伊来讲，不安mā就是追求神热情ê同时，mā是允准肉身沈醉kap游荡可能ê源头。
讲到现代ê实存哲学家海德格，阮mā ē-sái看tio̍h伊深入分析不安。Tī伊ê哲学内底，亲像ta̍k-ke所知影ê仝款，不安就是伊ê中心概念。当然阮无愿意tī-chia深入伊ê体系，我kan-tāⁿ想指点海德格无赞同头前两者ê所在，但是无kap伊仝调，藉tio̍h消极表明我ê确信。对海德格来讲，不安表示现存ê开示性，因为『存在tī chia ê人』是拍开koh hō͘放tiāu，所以是不安。既然án-ne，不安就是现存ê不安，mā是对家己本身ê不安，所以，不安是指现存ê先驱性，mā就是讲，现存m̄-nā是既存在，mā tiāⁿ-tiāⁿ包含可能ê存在，所以是不安。不安就是对家己ê可能性（结局是家己ê死）ê不安。Tī-chia需要提起ê就是，tī海德格ê思想内底，不安时常lóng是限tī自身ê不安来处理议论。伊tī现存议论ê出发起点，就tī个人。我以下ê说明大槪ē-tàng koh-khah来证明chit点。伊称呼kap一般别人普遍ê人是单纯ê人，chit种人koh m̄是由本来ê自己堕落ē，非我，非伊，thang讲m̄是一切ê人koh是一切ê人，非本来ê自己。阮通常是普通ê chi̍t-ê人。所以不安就显示其开示性，kā家己ê可能存在性开示，kā非本来ê自己引chhōa tńg来本来ê自己。阮必须se̍k-sāi不安，m̄ kan-tāⁿ用tī消极ê观念niā-tiā，mā有积极性ê意义。一定bē-tàng bē记得海德格所讲ê不安，kan-tāⁿ指家己ê不安。因为伊tùi出发点就己经kā现存在规定下。
世上ê现存，是对家己关心者所持有ê负担各自性kap根本规定ê性质。Tī-chia有双层ê两面，一个是觉存kap超越，另gōa一个是现存kap形象，chiah-ê lóng m̄是各种无仝者，反倒tńg是持有各种无仝ê视角ê提显，其实是仝chi̍t-ê构体。所以总体bē-tàng缺一，koh 从一必然转移到别体（像）。
就以上ê海德格ê陈述，ē-sái分析出，虽然伊一直主张现存，tī其存在性上指ê是『借存』，到底伊mā kan-tāⁿ是khiā-tī个人ê言论，随在伊展延到拥有ê社会观，mā bē-sái消除伊个人主义ê色彩。无，我ē-sái试提出以下两个疑问：一，不安kan-tāⁿ m̄过是一个人我ê不安？二，若退一步同意不安是家己ê，亲像án-ne ê不安，ē-sái认为真正不安？本来ê家己，ia̍h-sī非本来ê家己，既然是家己，虽然两者之间有无仝mā无可能有矛盾。敢m̄是kan-tāⁿ有tī超越非连续ê所在，不安chiah ē-tàng真正thang认为不安？换一句话来讲，tī量ê差异内底，iáu bē-sái定出真正ê不安，koh tī质ê相异内底，chiah ē-tàng有觉存理解下ê不安，thang讲。
阮ē-sái koh再进一步验证不安ê根底，koh验出伊ê意义。先tùi日常ê tāi-chì讲起。平常时当阮使用不安这语句ê时chūn，lóng tiāⁿ-tiāⁿ讲是针对siáⁿ-mi̍h tāi-chì感到不安，ia̍h-sī对siáⁿ-mi̍h tāi-chì不安，kan-tāⁿ讲不安是无意义ē。就算m̄知为siáⁿ-mi̍h不安，mā无允准讲he只是心情不安。Chit种ê不安，kan-tāⁿ是不安ê对象tà-bông无明，绝对bē表示其心。所以不安bē-sái无对象koh孤一个存在，是tī相对ê时chun chiah会有。这就是不安bē-sái kan-tāⁿ以个人成立ê理由niâ-niâ。阮暂时kā伊称做不安ê相对性。但是，阮bē-sái kā不安kap恐怖混同。前者用tī对人ê关系，后者用tī对物ê关系。因为地震、洪水、野兽等引起ê m̄是不安soah是恐怖。不安是因为人所以有，这m̄是讲两者之间无关连。自然现象所惹引ê恐怖是媒介，thang kā恐怖转变成不安。个人ê地震恐怖，传hō͘有知识ê人，恐怖就会变成不安。虽然ài有互相对立ê情形，kan-tāⁿ tī人对人ê关系ê时，chiah ē-sái叫ê不安。所以阮ē-sái án-ne讲：kan-tāⁿ tī我kap你相对时，不安chiah会出现。换过来讲，不安是建立tī人伦间地盘上，chiah有可能产生。离开我kap你ê地盘ê不安，kan-tāⁿ m̄过是抽象ê。当然，配角无一定是会确示伊ê存在。偷拿人物件ê人，m̄是因为he物件所以不安，mā m̄是为家己不安，是因为看..起..来是遮tio̍h别人所以感觉不安。Tī-chia ē-sái考虑tùi个人主义ê一方，kah-ná ē-sái来提出有力ê反对，he就是关系死ê个人性。人时常负担tio̍h死为伊存在ê可能，知觉伊像
『不安ê伦理性』ê原文版本： 先驱于伊ê面前。死是终局性质..ê，绝对bē-tàng逃避..ê，家己bē-sái bē承受ê运命。阮ia̍h-sī thang暂时bē记得死，但是he到底mā kan-tāⁿ是暂时ē，因为死是ta̍k-ke有一工必定要tam受ê杯。『人是beh单独行向死chit条路』，巴斯加án-ne讲。死就是kā chi̍t-ê人所有ê一切抢..去了后，iáu留..落..来ê亲像唯一bē-sái攻破ê堡垒。死就亲像是不安内底ê不安，nā是无死，就虽然有〔boring〕iah-siān，mā无不安。Tùi客观ê自然ê观点来看，死是特定chi̍t-ê人ê死。Kā死看成自然ê现象ê话，伊就kap其他ê自然现象无啥无仝。Tī自然现象内底有变化，但是hia koh无本来ê意义ê死。Tùi自然现象ê观点所看ê死，是抽象ê死，m̄是具体ê死。Tùi客观立场看所有物件ê移动变化所感叹，kap主体ê面对死所以战争之间带有质ê无仝。自然ê死，对具体存在ê人来讲，bē-tàng有先驱ê通达thang预知，客观观测ê死，kan-tāⁿ是现象ê变化并bē引起不安。
nā是我ê死m̄是自然ê，soah thang认为人生不安中ê不安， án-ne he感知者ê我到底是啥物？家己仝一体ê我内底thang有无仝，但是绝无矛盾存在ē， án-ne tī-chia hō͘阮考察死所以会来自觉：不安中ê不安ê情形是怎样ê。
我ê存在kap别人相关ê时，我ê死kiám m̄就成做不安？有gín-á ê母亲，比无gín-á ê母亲，是m̄是koh-khah死chhoah？我所以是我，有óa靠别人，离开伊soah bē-tàng为我ê时chūn，死就显示不安内底ê不安。死mā是tī我kap你ê相对性内底chiah会成做现实ê不安。tī伊ê根底带有非我，非你ê绝对别人kā我缚tiâu-teh。介tio̍h死，阮kap绝对者相对，这koh证明死是罪ê控告。因为叛逆ê罪状所以受审判，所以死就是不安ê根底。所以死ê不安是绝对别人ê『Nein（德语ê不）』时，以受裁判者身份tī相对关系内底ê不安。所以死就m̄是一己ê，一方面tio̍h-ài面对相óa他人ê运命，另外一方面ài面对绝对者，所以是不安中ê不安lah。相óa承担ê同伴，to̍h是前者是就不安ê伦理性。绝对者to̍h是后者是就不安ê宗教性来讲..ê。前者ê根源，就thang讲全依赖tī后者。
根据1934年7月ê『会报』17号ê报导，黄彰辉是tī 3月23日，经过东大YMCA青年会ê诠衡会核准入会，mā入宿舍。Kap伊仝月份入舍ê iáu有5位。
Kap黄彰辉仝时期tòa宿tī东大YMCA ê人，tī 1998年，笔者采访ê时chūn，iáu健在ê kan-tāⁿ有2位，一位是神户大学ê名誉教授，mā做过基督教学院院长，己经提过ê三轮kap敏先生，另外一位是后来做医师ê增田隆郎先生。笔者无机会kap增田医师相会，但是，伊写几项对黄彰辉ê感想 kap记忆：一、黄彰辉kap读教育科ê三轮kap敏tī学课上khah相óa，有一kóa课程是科系相重复..ê；二、会记得黄彰辉提起将来生涯ê目标是beh进到神学ê研究，所以tiāⁿ-tiāⁿ tī餐厅kap吉野衡（法学院）、大冢丰（文学院）、吉利kap（医学院）议论『我相信』（Karl Barth， Credo）（注一）、『Kierkegaard』（齐克果）（注二）等等ê论题，谈论ê真热烈；三、增田隆郎氏本身讲是tùi『救世军』一兵卒ê背景到东大读册，伊认为神学ê议论不如『单纯ê信心』hiah-ni̍h重要，所以kap hiah-ê好议论ê一阵保持距离。伊讲：『chit-má想起来，感觉见笑。』四、真可惜，吉野kap大冢两氏过身无jōa久，若是in iáu tī-le，in一定会hō͘ lín真好koh正确ê『思想上ê评估』。
注一：Karl Barth， Credo 是1935年出版..ê。德国ê希特勒tī 1934年就任总统，1935年，Karl Barth就hō͘希特勒赶出Bohn大学教授ê职位。 注二：丹麦出身ê哲学、神学家、tio̍h作家。
下图:东大学生时代ê黄彰辉。(三轮和敏提供)
下图:黄彰辉结束台湾高等学校，去东京tī东京帝国大学文学院前hip-siòng。(三轮和敏提供)
下图：富有历史声誉ê东大文学院附近，通称『赤(红)门』ê校门.(张瑞雄摄)
下图：东大ê本乡门，设tī最近文科lī-chhiaⁿ离东大YMCA学寮行路kan-tāⁿ 5分钟ê地点。(张瑞雄摄)
下图:东大YMCA干部、寮内东大学生kap来宾tī一pái『基督教大演讲会』了后hip-siòng。（约1935年）黄彰辉是第3排正pêng第五ê学生服ê人(东大YMCA提供)。
下图:东大YMCA寮内逐礼拜一请牧师到寮á内来主理全寮ê圣经研究会，chit张相片是会后hip-siòng当作留做纪念。黄彰辉是后排正pêng第二ê。（约1934年,东大YMCA提供）
下图：东大YMCA学寮寮友ê野外郊游情景,黄彰辉是前排tò-pêng第二ê,1934年.(三轮和敏提供)
下图：东大YMCA附设主日学老师黄彰辉kap学生出外旅游时hip-siòng,大约是1935年.(三轮和敏提供)
东大基督教青年会学寮早拜
1．1934年度早拜主理记录 1934年4月25日（拜三） 主理：黄彰辉 圣歌： 264 圣经： 约翰二册第一章 圣歌： 450 出席者： 5名 （杂感） 耶稣基督三十年ê争战，hō͘精神上破产koh beh死ê人类一点点光明。伊tī十字顶所流出尊贵ê血，一直灌输hō͘虚弱ê阮，hō͘阮有对爱ê感激，koh hō͘阮有气力。Tī感受绵绵ê约翰ê心肝内『种植』，喷出爱ê水泉，喙舌内充满爱ê讴歌ê是谁？但是，现今阮所看到..ê是án-chóaⁿ ê世相！强者拚命去chhōe弱者ê肉食，kā信义、爱心抛弃落地，目睭互相ê守leh，teh等待好机会ê来临。Tī án-ne ê时势内底，真chē既成ê宗教虽然无顺应时势，mā变成消极kap防守，kan-tā外表ê tāi-chì，以宗教做安寜家己甚至做修身之术来取代伊。基督教会教派中，mā有呈现án-ne倾向ê人？若有，就真意外，不该。我相信基督教ê本来ê宗旨究竟是积极性质，koh有创意ē。我想，基督徒ê血是时常充满建设性ê破坏精神。Lī-chhiaⁿ我相信（基督徒行动）是理智（IDEA）ê前进，所以路上ê障碍是一定ài斩然ê除掉。主耶稣虽然承受钉tī十字架顶，伊mā无放弃除掉社会ê障碍kap灵魂ê污染ê事工！到底我ê心魂是真容易liâu入去tuh-ku，tiāⁿ-tiāⁿ hō͘时势ê恶魔phah败，受环境ê影响差一点á就失去理性！我真欣慕亲像tī旷野内深思默想四十工ê主仝款，得到koh-khah chē省思ê时间！自从来这寮舍以来，我tùi心肝底真感谢有án-ne ê早祷会，我来chia ê目的m̄-nā是为自身ê修养去求kap神交往niā-tiā。我认为这是为tio̍h he teh-beh来hit时ê预备，mā是为tio̍h爆发去点火，受火热情感ê冷静机会！我真相信chit三个月（早祷）ê机会是像我主tī旷野深思、默想、准备ê期间仝款。
（下图是1934年4月25日早祷会主理以后，黄彰辉亲笔写..落..来ê杂感文章，顶文是笔者ê翻译文。）
1934年5月12日（拜六） 主 理：黄彰辉 赞美歌： ２ 圣 经： 启示录13章 赞美歌： 513 出席者： 4名
1934年5月21日（拜一） 主 理：黄彰辉 赞美歌： 54 圣 经： 启示录20章 赞美歌： 528 出席者： 角田兄、吉利兄、稻井兄、黄彰辉
(感想) 『我beh kā我ê灵piàⁿ hō͘每chi̍t-ê人。…lín ê少年人ài看见远景（异象）。』（行传二17）昨hng是五旬节圣日，圣灵降临mā必须来到阮顶面。就是tī这一工，因为hō͘无胆ê风吹所以四散ê耶稣ê phōaⁿ，khiā立觉醒tī in ê使命。想起hiah-ê无知koh无胆ê一阵过去所为ê时chūn，阮就真好想亲像今á日ê信徒beh án-chóaⁿ去做，chiah ē-táng带动碰壁ê社会，就是阮每chi̍t-ê人看出家己ê异象ê时chūn，chiah ē-tàng tùi静ê信徒跳跃成做动ê信徒。原始教会ê信徒lóng是火种，in lóng是ē-tàng移送点火ê力量，无，是无移送点火bē-tàng ê火种。he『燃烧ê火』是in siōng强ê所在kap力量，mā就形成基督教ê原点，mā就是该宗教成做宗教ê原因。翻倒tńg看今á日ê既成ê基督教ê时chūn，我ē-sái án-chóaⁿ去比喻来说明？
khiā起堂皇ê殿堂内底讲爱ê教会iah-koh存在，in tī内底安稳ê读tio̍h幽雅ê圣经，teh唱音美ê赞美歌，he kah-ná是装饰非常美丽ê电火。伊ê作用是发光，维持留存，就kan-tāⁿ是án-ne niā-tiā？虽然是发光，伊是hō͘玻璃kā包围，所以虽然hō͘周围hoán光，bē-sái烧tio̍h周围ê物体。He kan-tāⁿ thang讲是利便、有利ê存在niā-tiā。宗教之所以是宗教，就tī chit点？若是无m̄-tio̍h ê话，世上就充满比宗教koh-khah有学术kap体系、伦理道德ê学说，四界lóng是，那何必持守宗教？
我认为以前m̄ bat有像今á日hiah-ni̍h chē ê无神主义者，我感觉tī追寻其理由以前，我痛感阮应该探讨hiah-ê静ê、摡念化ê宗教ê必要。今á日ê社会tī所有ê场面lóng呈现伊ê矛盾（碰壁）。M̄-koh，近代人soah追求宗教以外ê拯救施济。Chit种ê心情是teh说明啥？就tī责备近代人ê世俗化以前，我想阮应该责备宗教ê概念化。若ē-sái用我家己ê用语ê话，我是讲: 『he有火种ê宗教，hō͘电火ê宗教取代，所以活活ê宗教转变成做概念论ê宗教』。Tī五旬节ê chit-ê时chūn，阮应该追寻观望什么款ê异象neh？he异象应该是『tùi概念ê爱，转变成做实行ê爱』ê hit种异象。 (顶文是1934年5月21日黄彰辉tī晚祷会所准备讲章ê翻译文，后面ê图是伊亲笔写..落..来ê讲道文章。)
1934年5月29日（拜二） 主 理：黄彰辉 赞美歌： 228 圣 经： 约翰 第五章 赞美歌： 529 出席者： 吉村兄、加藤兄、稻井兄、吉野兄、角田兄、黄
1934年6月7日（拜四） 主 理：黄彰辉 赞美歌： 559 圣 经： 约翰13章 赞美歌： 325 出席者： 吉利兄、稻井兄、加藤兄、黄彰辉
(下图是1934年5月21日黄彰辉亲笔写..落..来ê晚祷会讲道文章。)
1934年9月10日开始1934年度秋季早祷： 1934年9月11日 主 理：黄彰辉 赞美歌： 322 圣 经： 使徒行传5章 祈 祷： 赞美歌： 513 出 席： 稻井兄、角田兄、增田兄、吉利兄、黄
1934年10月11日（拜四） 主 理：黄彰辉 圣 经： 诗篇11篇 祈 祷： 圣 歌： 451 出 席： 角田、吉利、增田、黄
1934年11月26日 主 理：黄彰辉 圣 歌： ２ 诗 篇： 40篇 祈 祷： 圣 歌： 513 默 祷： 出 席： 吉利兄、角田兄、黄
(教会kap个人)
tùi大战（第一pái）以来，m̄-nā是tī哲学界、神学界ia̍h-sī其他所有ê领域，lóng有了强力反省ê需求。凡是无好..ê，lóng受大力ê请tùi塔顶..落..来。强调世人存在m̄独立hit一面ê个人主义，tī达到伊ê至高点，mā同时显示出伊siōng恶chit缺陷ê归结去ap-pik人类。Bē记得伊本来ê使命，无chhái工跟随同化tī世俗文化ê基督教，bē-sái逃避伊ê运命算是应该ê。教会处tī无力状况ê威胁之下，是m̄是因为伊有意ia̍h-sī无意间，bán..落..来he bē-sái食ê禁果ê结果！自由主义教会就是生产无教会主义ê母亲。Kā宗教理解成做以个人主义ê原本，koh tī个人内底去chhōe神，án-ne做就是否定人ê存在，mā-thang讲是失去了耶稣ê福音。
无你我就bē-tàng认知，离开我，你kan-tāⁿ是空虚ê名niā-tiā。『人是tī责任内存在ē』就tī chit种关系内底产生爱。Tī仝性质内无法度有爱，亲像tī电子间无爱ê存在仝款，kan-tāⁿ tī异质之间chiah开始有爱ê存在。
教会kan-tāⁿ看伊ê外观，伊是社会ê一种。虽然看起来是社会ê教会，其实是反抗所谓ê社会所成立..ê，对kah-ná是分离soah kap伊结合ê社会，通过耶稣，神所hō͘伊启示ê团体就是教会。tī耶稣所设立ê教会内底koh无因为伊ê存在去排斥。无，两者tī地上是仝一个体。
Hō͘抽象化ê个人只要是hō͘抽象化，就kan-ta是chi̍t-ê观念niā-tiā，我想就是因为以抽象化当作实际存在，所以教会就受tio̍h误解，koh变做无力。若有人离开教会，犹原是称作信徒，hit人就无适合称做耶稣ê门徒，应该称做近代思想ê信奉者，我敢讲chit-má ê教会己经离开本来教会ê面目真远。我m̄惊告白讲今á日ê教会对我无一thang施。但是我koh bē-sái离开教会，因为离开教会同时ê意思是讲丧失我家己。这是教会若无一定存在，我个人mā无一定存在。但是教会kap我做伙存在，否定是依存他方者ê否定所成立。排斥教会就同时是排斥家己。家己ê矛盾mā就是教会ê矛盾。仝款，家己ê升高kap跃进，mā就是教会ê升高kap跃进。Kā吊桥ê一pêng ê钢组放松，koh叫另外一pêng讲beh koh-khah khiú-ân，án-ne做是无合理。
教会kap个人！两者适合一..ê。当然这m̄是同意讲反复无定。一定tio̍h ài把握耶稣ê启示！ài对人存在有彻底ê省察！ài图谋未来教会ê形相！这是我所受与ê课题。我án-ne提言m̄是向别人意图批评，是对家己ê省思。
（顶文是笔者ê翻译文，下图是1934年11月26日黄彰辉主理以后，亲笔写..落..来ê自我省思。） 
1934年11月30日（拜五） 主 理：黄彰辉 圣歌 240 诗篇 47篇 祈祷 圣歌 510 默祷 出席者：吉利兄、角田兄、黄
1934年12月6日（拜四） 主 理：黄彰辉 赞美歌 50 诗篇 52-53篇 祈祷 赞美歌 450 出席： 角田、吉利、黄
下图:东大YMCA学寮1934、1935年度早拜记录簿表面(东大YMCA提供).
下图:寮内村友立约参加继续早拜koh签名ê一页(东大YMCA提供): 
2．1935年度学寮早拜主理记录 1935年4月9日（拜二） 主 理：黄彰辉 赞美歌： 506 圣 经： 以赛亚 一章 出席者： 吉野、竹本、石堂、黄
爱是咱ê『道』Logos， 祈祷是咱ê武器， 咱恐惊谁阿， 恳求chit本簿子ē-tàng成做咱ê魂（灵程）ê记录。
1935年4月12日（金） 主 理：黄彰辉 赞美歌： 534 圣 经： 以赛亚 第三章 祈 祷： 赞美歌： 322
最近我读锤田研一间tio̍h ê『贺川丰彦』一册到深夜，透过伟大ê圣者来看家己ê软弱，省察出对罪ê无感觉，我kan-tāⁿ感觉应该痛心忏悔。Tī绝对性质ê死面前，一切lóng变成相对。请看hoa̍h-kòe死线ê贺川丰彦！tī伊面前，所有ê事物看..起..来lóng kan-tāⁿ是chi̍t-ê可能ê构想niā-tiā。Kah-ná伊对所有tāi-chì，除非用绝对ê爱来贯穿万事以外，bē-tàng停止。相信伊bē无愿意kap主张『单单依赖信仰』ê狂信家争论。当人kan-tāⁿ强调『道』ê理论，是以精神为本质，koh kā冒tio̍h名誉『成肉体』ê体kap精神隔断，án-ne做就是造成独断ê唯心论宗教。我感觉领教tio̍h唯心论ê宗教便是kah-ná是koh kah-ná m̄是ē，亲像受阉（Iam，去势）所以逃避时代ē，m̄是基督教。
（顶文是tùi 1935年4月12日晚祷会记录，笔者所做ê翻译文，下图是主理以后，黄彰辉亲笔写..落..来ê讲章。）
1935年4月18日 主 理：黄彰辉 赞美歌： 2 圣 经： 以赛亚 8章 赞美歌： 299 默 祷：
1935年4月21日（好天）（日）举行野外礼拜，早起6:30 tùi宿舍出发，到植物园举行合同礼拜，后食早顿（饭团） 1935年5月1日（拜三） 主 理：黄彰辉 赞美歌： 506 圣 经： 以赛亚 18章 祈 祷： 赞美歌： 508
1935年5月6日（拜一） 主 理：黄彰辉 赞美歌： 506 圣 经： 以赛亚 22章 赞美歌： 505 默 祷：
1935年5月10日（拜五） 主 理：黄彰辉 赞美歌： 118 圣 经： 以赛亚 26章 祈 祷： 赞美歌： 228 默 祷：
(短讲): 语言是表现咱存在ê器具。Án-ne，语言是连结『我kap你』ê行为ê瞬间，得tio̍h伊ê主体性。但是，有时语言颠倒发挥魔术ê本性，就表显出客体性ê存在kap咱对立。语言就ná-ne，时常带tio̍h双重性格，像人本质ê规范，人癫癫倒倒体验tio̍h爱kap自由，kah-ná既然是人，就bat直接体会..过仝款，轻可ê使用爱kap自由ê语言。M̄-koh，问啥是爱？kap啥是自由？就无容易得到满足ê答案。若是基督教ê根本意义就是爱，án-ne我想，面临危机ê基督教，就ài以主体去se̍k-sāi爱。另外，自由tī全面受威胁ê今á日，讲若人有自由，án-ne，到底往siáⁿ-mih所在去，chiah ē-tàng chhōe tio̍h新光下ê自由？
（下图是1935年5月初十晚拜做了主理以后，黄彰辉亲笔写..落..来ê短讲，顶文是笔者ê翻译。）
1935年5月15日 主 理：黄彰辉 赞美歌： 294 圣 经： 以赛亚 30章 祈 祷： 赞美歌： 311 默 祷：
1935年5月20日 主 理：黄彰辉 赞美歌： 322 圣 经： 以赛亚 34章 祈 祷： 赞美歌： 320 主祷主：
1935年5月24日（拜五） 主 理：黄彰辉 赞美歌： 322 圣 经： 以赛亚 38章 祈 祷： 赞美歌： 208 默 祷：
1935年5月30日（拜四） 主 理：黄彰辉 赞美歌： 506 圣 经： 以赛亚 41章 祈 祷： 赞美歌： 505 默 祷：
1935年6月初4（拜二） 主 理：黄彰辉 赞美歌： 510 圣 经： 以赛亚 45章 祈 祷： 赞美歌： 450 默 祷：
1935年6月初8（拜六） 主 理：黄彰辉 赞美歌： 509 圣 经： 以赛亚 49章 祈 祷： 赞美歌： 525 默 祷：
1935年6月13日（拜四） 主 理：黄彰辉 赞美歌： 529 圣 经： 以赛亚 53章 祈 祷： 赞美歌： 450 默 祷：
1935年6月18日（拜二） 主 理：黄彰辉 赞美歌： 253 圣 经： 以赛亚 57章 祈 祷： 赞美歌： 322
1935年7月初3（拜三） 主 理：黄彰辉 赞美歌： 450 圣 经： 诗篇 51篇 祈 祷： 赞美歌： 322 默 祷：
1935年7月初5（拜五） 主 理：狩川 浩 赞美歌： 10 圣 经： 耶利米 4章 祈 祷： 赞美歌： 568 默 祷：
（主理者特别记述以下ê言词，值得提出：） 前归工，石堂健二君回乡，现今村民只chhun三名。（就是狩川浩、竹本清kap黄彰辉）希望chit本日志无留tī任何一人手内，请注意hō͘伊ē-tàng顺利ê轮转到各村民手内，读kap书写。
黄彰辉tī东大YMCA宿舍ê早祷礼拜ê记录，tī chia结束，因为9月ê第二ê学期开始，小妹黄淑英、林瑞云表弟（大舅ê长子）、黄雅姿堂妹（二叔ê长女），lóng到东京读册，伊搬去『中野』由父亲黄俟命牧师出资所买ê厝，tī-hia tòa，度过tī东京帝大就学chhun..落..来年半ê时间。
下图是1935-36年，tī东京中野ê厝头前所hip ê相片（当时tú好是落大雪了后）。后排tò-pêng是林瑞云，正pêng是黄彰辉，前排tò-pêng是黄淑姿，正pêng是黄淑英。
黄彰辉tī东大学习ê科目
1934年（昭和9年）度： 支那哲学、文学：儒教伦理概讲－－－ 2时间1单位－宇野哲人 哲学 ：哲学概论－－－－－ 2时间1单位－桑木严翼 哲学演习(Kant)－－ 2时间1单位－桑木严翼 西洋哲学史概讲1－ 2时间1单位－伊藤吉之助 哲学演习(Aristotls)2时间1单位-伊藤吉之助 英米ê哲学（注一）－－2时间1单位－大岛正德 伦理学 ：伦理学概论－－－－ 2时间1单位－和辻哲郎 宗教学、宗教史：宗教学概论－－－－ 2时间1单位－石桥智信 社会学 ：社会学概论－－－－ 2时间1单位－户田 教育学 ：教育史概论－－－－ 2时间1单位－秦山 外华语 ：英吉利语（注二）－－－3时间－－－－佐佐木
1935年（昭和10年）度： 支那哲学、文学：上代支那哲学史－－ 2时间1单位－宇野哲人 哲学 ：西洋哲学史概讲2－ 2时间1单位－伊藤吉之助 Aristotls.ê人间学-2时间1单位-伊藤吉之助 哲学演习(Aristotls.)2时间1单位-伊藤吉之助 伦理学ê根本问题－－2时间1单位－池上镰三 时间ê问题－－－－－2时间1单位－金子武藏 印度哲学、梵文学：印度哲学史概论－ 2时间1单位－宇井伯寿 伦理学 ：伦理学演习(Hegel)-2时间1单位－和辻哲郎 神学ê人间学ê伦理-2时间1单位-吉满义彦 外华语 ：英吉利语（注二）－－3时间－－－－井手
1936年（昭和11年）度： 哲学 ：人间学、问题－－ 2时间1单位－金子武藏 哲学演习（注三）－－2时间1单位－伊藤吉之助 伦理 ：日本伦理思想史概讲-2时间1单位-和辻哲郎 伦理学演习（注三）－2时间1单位-和辻哲郎 论文、题目 ：『アウグスチヌスにtīける记忆の研究』 “Augusuchinusu ni okeru Kioku no Kenkyu” （奥古斯丁Augustine关于记忆ê研究）
根据黄彰辉ê自传，当时ê东京帝大，至少哲学科是由学生家己作kui-ê三年课程ê计划。一年度有三个学期，chi̍t-ê学期大约取 4个单位，必修ê科目少，但是mā因为án-ne，学生有真chē tī课外读册研究ê时间kap必要。所上ê课目，大概lóng是『概论、概讲』。教授lóng无分专门ê题目，根据学生ê需要，替学生考量koh讲述。
根据东京大学ê资料，桑木严翼（1874－1946）tī东大文学部哲学科担任第一讲座，是当时siōng老ê教授，m̄-koh，因为伊tī 1935年已经61岁， tī hit年退休。Mā是黄彰辉入学ê hit年，所以伊一定是为tio̍h beh修桑木ê课，尽力jiok-tio̍h。看伊ê学术记录，黄彰辉kah-ná jiok-tio̍h桑木教授siong尾一班ê课。
注一：tùi东大成绩记录转载：『英米』为『英美』ê意思。 注二：tùi东大成绩记录转载：『英吉利语』为『英语』ê意思。 注三：『演习』是『讨论课』ê意思，像英语内底ê SEMINAR。
- 《台湾人e5先觉―黄彰辉传》文章索引 | RSS | 寄给朋友
- « 上一篇 | 下一篇 »
