《台湾人e5先觉―黄彰辉传》

 | | | 转寄

青山学院ê少年留学生

作者 张瑞雄 2009.03.22

　　少年ê黄彰辉读3年ê中学，就感受tio̍h生做台湾人ê悲哀。虽然长老教中学（简称长中）是台湾siōng早、siōng优秀ê中学，tī殖民地政策之下，无法度直接报考高等学校，ia̍h-sī专门学校，mā无升学ê机会。 文章内容 　　少年黄彰辉读3年ê中学，就感受到生做台湾人ê悲哀。虽然长老教中学（简称长中）是台湾siōng早、siōng优秀ê中学，tī殖民地政策之下，无法度直接报考高等学校，ia̍h-sī专门学校，mā无升学ê机会。父亲黄俟命牧师本身就tī长老教会中学做教师，有真身ê无奈，因此不得已，tī 1930年 3月，hō͘ 15岁ê kiáⁿ到青山学院中等学部，留学一年。黄彰辉为tio̍h求上进，不得以离开siōng爱ê母校，往青山学院中学插班第四年。Tùi án-ne辞别siōng爱ê长中，到东京去求学。

　　青山学院是美国北部ê卫理宣教师tī 1874年创设，比台南长老教中学早 8年。开始ê时chūn是中学，到1920年后期就设有：1、本部；2、神学部；3、高等学部；4、中学部；5、高等女学部，等 5部。所以当1930年，青山学院已经是有56年久长历史ê学园lah。

　　当黄俟命为tio̍h kiáⁿ黄彰辉，考虑去日本ê基督教学校争取中学毕业ê资格ê时chūn，tī青山学院中学部做部长ê是阿部义宗牧师。Tú好，tī 1929年ê热天，阿部部长kàu台湾做北部长老教会青年夏令营ê讲师。伊mā安排行程，kàu南部访问台南长中。Tī青山校刊『高潮』内底，伊用『台湾纪行』为题，记述tī台湾ê视察旅程，其中有关台南，伊讲：

『tī台南，有青山学院中学部ê学生10 gōa名。这chi̍t工（8月6日），kap李穆逸、吴天注、吴来成、方逸川、杨赞勋、林新振、黄显章、黄彰辉等人会谈。这chi̍t阵青年tòa tī南国，受健康ê恩惠kap家庭ê疼爱，tī故乡ê山河内底休困娱乐，欢头喜面，带hō͘我无限ê感怀。』

　　顶面tī记事顶头，吴来成kap黄彰辉已经hō͘阿部牧师列做青山学院中学部ê学生。因为阿部牧师ê『台湾纪行』是1930年刊载，可能伊想应该kā nn̄g-ê新生包括tī内面。按照黄彰辉ê回忆，黄氏父子lóng受tio̍h阿部牧师亲身答应，ài免试接纳siōng优秀ê台南学生插入青山中学部4年á。原来是受tio̍h阿部牧师ê允准kap欢迎，长中就决定派黄彰辉kap吴来成去东京ê青山学院中学部求学。

　　黄、吴，nn̄g-ê学生离开长中（1930）hit年，阿部义宗iáu是中学部ê校长。隔tńg年ê 1931年，伊转任青山学院神学部做部长。Koh tī nn̄g年后ê 1933年，接任青山学院院长。后来，tī 1939年，受tio̍h tī美国ê卫理海外宣教处任命，做日本卫理教会ê第6任会督。伊就ná-ne tī jī次世界大战以前，mā tī所有日本基督教教派受政府ê压力，组成日本基督教团以前，做日本卫理教会ê siōng高ê领导者－『会督』。

　　1930年，天气寒冷ê 3月初，黄彰辉kap吴来成tùi基隆坐轮船，向日本出发。当时往返神户kap基隆ê主要轮船公司，有近海邮便船株式会社kap大阪商船株式会社，单程ài 3工gōa chiah ē-tàng到目的地。到神户就beh坐火车，向东上东京，差不tō ài chi̍t工。对iáu-sī少年ê彰辉，这是头chi̍t pái『过盐水』，离开故乡台湾。后来伊讲，伊会记ti̍t坐船，m̄-koh记无清楚án-chóaⁿ tùi神户坐火车到东京。心内连chi̍t点点ài观光日本ê想法lóng无。佳哉赵天慈老师（黄彰辉叫伊『同年爸』）tú好tī东京，就去接in nn̄g-ê学生。（请看本册p.18，注五，赵天慈为赵爵祥ê kiáⁿ）

　　青山学院中学部kap高等部ê新教室tú好是tī 1929年落成，黄彰辉算是看tio̍h钢筋水泥建造..e、新koh气派ê校舍。战后，tùi 1949年青山学院设立大学部以后，以前ê中学部kap高等部ê nn̄g栋校舍就改为大学部ê校舍。

下图是1930年代后期建设ê青山学院中学部kap高等部ê nn̄g栋建筑物，战后改为大学部ê校舍。(青山学院史料馆提供)

　　tú到日本，有赵老师照顾，心肝感觉lóng bē kiaⁿ。M̄-koh就tī暗时，黄、吴两ê少年接tio̍h通知讲，10天了后ài受插班考试。Koh听讲，想beh插班ê有25名，中学部kan-tāⁿ预定录取4、5名niā-tiā。Nn̄g-ê学生根本无准备，mā m̄知ài tùi siáⁿ-mih所在准备，所以受tio̍h chiok大ê挫折。当然，chit场考试ê结果是惨败，受真大ê打击。黄彰辉大失自信kap体面，感觉见笑kap失望。Tī伊ê《回忆录》内底描述当时ê心情讲：『我甚至想beh自杀。』佳哉，经过赵老师ê交涉，校方hō͘伊恩典，试读chi̍t学期。In特别交代讲：『kan-tāⁿ hō͘ in chi̍t学期，若读bē来，就ài强迫退学，送tńg去厝nih。』按照《回忆录》，hit学期，伊『空前绝后』ê打拚读册，因为这是唯一为家己，为『吾校』（长中），mā为『阮台湾』（咱ê台湾），回复荣誉ê机会。结果，第一学期，伊kap吴来成lóng进入 200 ê同年级ê 30名以内。In ê piàⁿ-sì，真无简单达成愿望。第jī学期就tī分四班ê各班内底，黄，吴lóng进入5名内。黄彰辉感觉台湾ê学生，ē-tàng tī日本人ê本土竞争，得tio̍h胜利。台湾人tī殖民政策之下，是真正有差别待遇，hō͘台湾人看起来，无日本人hiah-ni̍h优秀。因为第jī学期ê成绩，伊kap赵老师chham-siông以后，就大胆向教务主任安井正男请示，kám ē-tàng跳级，直接考高等学校。教务主任赞成伊ê志向，讲：『ē-sái试看māi，若无考tiâu，mā为明年ê考试加chi̍t-pái经验。』结果，hit年tùi修4年课程ê学生内底，全校kan-tāⁿ有黄彰辉chi̍t-ê人考tiâu公立ê高等学校（台湾高等学校）。安井tī校刊『高潮』内底讲：『tùi私立学校考进公立学校外困难！总共有40名青山中学学生（iáu未毕业者）报考，若有十分之一考tiâu就bē-bái lah。』
tī青山中学部，黄彰辉kap其他30-ê同学同齐tòa『学寮』内底。Tī伊ê寮内，有nn̄g-saⁿ-ê年长ê神学生，受学校派遣，来照顾in。有chi̍t-ê同寮同学叫『铃木敏道』，kap伊成做好朋友。铃木就是 5年gōa以后，无phah算、奇迹..e，当伊往tī英国ê时chūn，tī所坐ê轮船『鹿岛丸』顶头，做客务人员ê干部。Tī青山hit年ê生活，hō͘伊开了新眼界，因为伊ùi像铃木hit种ê同学kap教师内底看见，日本人tī in家己ê乡土，展现出来ê人性ê chi̍t面。有chi̍t-pái，教历史ê老师田中先生（tī黄彰辉ê《回忆录》内底，伊讲是『田中』，不过，教师ê名录内所列ê历史老师是朱牟田辙），tī教册当中忽然改变论题，讲：『新闻上所报导..e，tiāⁿ-tiāⁿ lóng kap事实无符合。某某事件，满州事变，lóng是编造出来..e。』伊bat tòa tī满州，tú tńg来无jōa久，tī hia目睭金金看tio̍h日本对邻国犯侵略ê行为，kap tī本国内官方所报导ê新闻有出入。Tī军国主义ê统治之下，敢án-ne ê发言、教学，就是因为教师照圣经ê，尊重上帝ê统治，kah自由、公义、先知ê传统，chiah ē-tàng发挥chit种大无畏ê风气。


　　青山学院中学部tī 1929年所公告ê招生简章内底，注明中学ê设校要点是：


『1、本中学部是依照基督教主义施行kap中学校仝程度ê教育。2、享有tī升学kap兵役方面ê特典，kap官立中学校无任何无仝。』（昭和 5年度tī招生简报）


学院院方对tī国家主义，特别tī政府ê『军事教官』ê介入tī基督教主义学校ê信念方面，发表声明讲：


『m̄-nā无冲突，iáu ē-tàng评价做是互相有补助。』（石阪正信院长昭和五年、六年报告。）


真可能，tī日本ê基督教育界内底，án-ne『合调』ê意图，渐渐tī意念内底调和、合理化。Tùi chit-ê时期开始，kui-ê日本ê基督教会，无分教派，lóng已经列入军国主义射程目标之内。阿部义宗经历青山学院中学部、神学部等部长，koh tī 1933年接掌全学院。6年后ê 1939年做日本卫理教会ê siōng高领导者－『会督』。当时，基督教会受政府ê压力，tú-teh作『合一』ê工作，thang讲得tio̍h chi̍t-ē有châi-tiāu ê指导者阿部义宗。所以tī进行『合一』事工ê期间，伊做『日本基督教连合会会长』，引进到成立日本基督教团ê时chūn，伊就做创立ê议长。1941年受政府ê辅导（斡旋）当『日本宗教大同连盟理事长』，替日本国做基督教『外交官』，tī日本占领下ê中国活动，it直到大战ê终局。Tī军国主义ê压力之下，伊算是tùi家己ê良心会tit过，对tī国际之间、人际关系有帮赞ê tāi-chì，mā thang讲是为上帝国ê来临尽chi̍t分职责。


下图是自1930年初建，留到chit-má ê青山学院中学部ê校舍。(张瑞雄摄影)



　　tī青山学院短短ê chi̍t年内，黄彰辉chi̍t方面尽chi̍t-ê学生ê本分，phah-piáⁿ用功，认真研读学业，无管别ê tāi-chì。另外chi̍t方面伊mā确实浸身tī启蒙性..e、自由主义ê环境内底，拨开目睭，清醒脑筋，体验到尊重正义、kah意和平ê日本人，尤其是基督徒做ê『见证』。Tī伊考进台湾高等学校以后，tī高等学校ê表格顶面，注明伊ê出身学校是青山学院。青山学院就是日本政府唯一hō͘伊认同ê中学学籍ê学校，伊确实bat以出身青山为荣。M̄-koh，真实se̍k-sāi黄彰辉ê人lóng知影，伊本身kap后辈lóng以伊是『台南长荣中学』出身为siōng大ê光荣。因为tī学府内底，伊ê家庭、伊ê教会，融合作伙，成做伊ê为人，培育伊ê智慧kap知识ê栽培kap薰陶ê根源。M̄-koh，kan-tāⁿ chi̍t年ê学籍，就不得不公开声称，黄彰辉ê出身学校是青山学院，m̄是长中。这是军国日本对台湾人施压迫ê结果，mā是殖民主义下台湾人ê悲哀。感谢上帝，tī看起来无出路ê时，hō͘伊预备chi̍t间学院，thang hō͘黄彰辉有chi̍t-ê跳板，thang得有效ê上进升学ê途径。


　　tī chia值ti̍t提出来讲ê是，黄彰辉tùi 1922年到1931年ê 9年内，经历台南师范附属公学校、台南长老教中学校kap东京青山学院中学部三所学校。M̄-koh，伊lóng无享受毕业ê荣光，mā无领到毕业证册。所承受e是崎岖歹行ê途径，艰苦ê道路。M̄-koh，值得大大庆幸ē，就是苦难hō͘伊成做神所beh重用，为台湾kap世界造益ê器具。


下图是chit-má ê青山学院大学部ê校门，chit-ê学府tī 80年以前己经是包含小学到专科部ê综合学院。(张瑞雄摄)



下图是青山学院总院－本部校门。(青山学院史料馆提供)



台湾高等学校


１考验kap献身 根据黄彰辉ê《回忆录》，伊一生所受ê考验当中，siōng重要koh对伊以后ê教育方针有决定性质，就是hit chi̍t-pái台北高等学校ê考试。当时，若beh进入大学，就it定ài通过高等学校。因为高等学校是saⁿ年制，修了中学4年就ē-sái考入去。无，iáu有高等专门学校ê途径。M̄管是师范、商、工、农，专门高等学校毕业以后，就ē-tàng得tio̍h教中学ê资格，kan-tāⁿ是无授予学士ê学位。


　　当时ê台湾人tī教育ê机会顶头，受tio̍h真大ê限制。Tùi下脚ê统计，tùi创设hit间学校到第7届，黄彰辉毕业hit年，就ē-sái看tio̍h，虽然学校是设tī台湾，是唯it ê『高等学校』，m̄-koh，殖民政策大大ê阻碍，tùi án-ne受录取ê台湾人，kan-tāⁿ占chió数，逐年ê总数kan-tāⁿ是30 gōa人niā-tiā。


历年　文日人、文台人、文科计　　理日人、理台人、理科计 1927 26 0 26 44 4 48 1928 55 10 65 44 11 55 1929 52 13 65 48 12 60 1930 57 14 71 56 15 71 1931 51 13* 64 49 12 61 1932 49 15 64 48 23 71 1933 54 16 70 34 21 55 历届计 344 81 425 323 98 421 （*1931年是黄彰辉考tiâu台湾高等学校ê hit年）


当时，tī台湾进入大学ê唯it ê预备途径，就是考取高等学校。其实，『台湾』高等学校，完全m̄是为tio̍h统治ê台湾人，soah是为殖民主义者ê日本人。黄彰辉是第7届ê文科甲类毕业，伊班上ê学生总数是35人，按照伊ê记忆，班上kan-tāⁿ有 6名是台湾人。In hit届ê文科学生总数是70人，其中台湾人chia 16人。理科ê台湾人khah chē，m̄-koh mā无日本人数ê 3分之2。平均历届ê毕业生，台湾人ê总数siōng chē mā kan-tāⁿ有日本人ê 3分之1 niā-tiā。按照老chi̍t-pòe ê前辈讲in ê经验，台湾人往往lóng是tùi 1、20位报考ê人内底，chiah录取chi̍t-ê。接受高等教育ê台湾人，thang讲是人口2万人内底chiah kan-tāⁿ chi̍t-ê人。所以，若有人认为台湾人ê素质kap教育程度kē， m̄是因为台湾人差，颠倒是因为执政者，故意为台湾人计划劣等ê机会所造出来ê。


　　tī《回忆录》内底，黄彰辉讲，考试总共是四科目。伊认为三科考得bē-bái。M̄-koh，『国文』一科，伊抱tio̍h疑问，因为伊ê作文写得真bē-bái，m̄-koh，ài看是siáng读ē，koh做bái ê判断。作文ê要求是写1,500到2,000字，题目是：『变动ê社会内底，学生应该有ê态度。』日本tī chit-ê时chūn，正面对政治上kap国策上ê紧张，每chi̍t-ê考生lóng知影，校方引发chit方面ê观念kap态度，显然是有检举『危险思想』ê用意。对写..落..来ê文章，考生tī后来ê口试，应有防御ê准备。『我kā作文ê题目读完ā』，黄彰辉án-ne述讲，『目chiu kheh起来作一个心内ê祈祷。忽然保罗tī罗马册 5章3-5节闪显上我念头来lah，『hō͘咱mā tī患难中欢喜，因为由患难生出忍耐，忍耐生出练达，练达生出希望，希望bē hō͘人感到见笑；因为上帝ê爱，通过圣神khiā-tī咱心里....。』我马上开始以真紧ê速度写落去，mā决心引用hit段ê经文做我ê结束。当钟响ê时chūn，我如愿ê完成。我连koh-chài读我所写ê内容ê时间lóng无，家己心肝内想写kah bē-bái。』（《回忆录》p.43）


　　大概是因为前三科ê成绩高，所以考日本文（国文）hit工ê下晡，伊hō͘叫入去口试。教室内总共有5位考官，其中ê一位身穿军服ê，坐tī台灯后面一排。无chi̍t-ê笑面。


我入..去，坐..落..来。Tú坐..落..来，hit位坐tī中央ê，少年斯文ê考官突然问起第chi̍t-ê问题：『你是基督徒，是m̄是？』我小khóa惊chi̍t-tiô，但是用真响ê声音讲：『是。』『什么是基督教ê基本教义？』我放松..落..来答应讲：『上帝是爱，咱应该爱神，也tio̍h爱邻人。』『án-ne，』伊停了一下，显出微微ê笑容koh讲：『你kám想过，基督徒是假冒伪善，像耶稣所责备ê法利赛人仝款？in m̄ kan-tāⁿ tī教会抬举，mā四界摆布十字架。』我ê思考一点点á hō͘扰乱进而惊惶，同时mā掀起我ê『基督徒ê奋斗精神』，我讲：『我m̄知你ê意思。我认为抬举十字架，he是基督教siōng重要ê象徵，kap假冒伪善无任何关系。你有可能是错lah，若无是误解lah。』『无，我无错，mā无误解。就kā我讲，你怎样去调和你ê主张讲基督教是爱ê宗教，soah四界去抬举十字架，提醒kā ta̍k-ke讲，是近二千年以前，犹太人钉死去耶稣，到今á日，甚至是二千年以后，iáu teh见笑tio̍h in？』我感觉m̄知如何是好，因为我m̄ bat遇到人，以án-ne ê角度议论十字架。我实在无法度koh忍受，差不多bē记得伊是考官，我是受考..ê，大声kā讲：『你m̄-tio̍h lah。十字架是上帝爱ê象徵，伊为tio̍h beh爱人类，甚至kā家己ê kiáⁿ放leh无顾tio̍h来牺牲。He mā是耶稣爱ê象徵，因为伊服从到死，…』我开始发觉hiah-ê其他ê考官，连hit位军事教官面顶头lóng有khí笑ê款，我就随时停止。


Tī斯文ê主考官面顶头mā显示tio̍h奇妙ê笑容，对我讲：『少年人，看起来你真会晓你ê圣经。M̄-koh你应该好好去思考我hō͘你ê问题。我tú tùi德国tńg来，tī-hia反犹太人ê情绪tú-teh升高，我想，四界抬举十字架，可能kap chit-ê tāi-chì有关。德国hō͘认为是基督教国家，是m̄是？』伊seh过正pêng kap tò-pêng，看同僚koh问，是m̄是beh向我发问。当in lóng摇头答：『无，』我感觉大吐一嘴气。考官就向我讲：『你可以..落..去lah。』我khiā起来，喙内底开始讲：『先生，我，…』m̄-koh我iah-bōe讲完，转身就逃..出..来。心肝内想，考官chin-má一定对于我leh khí笑..我。


我真悲观、忧郁。因为我知影我失败lah。隔日暗时，当我总算来到台南ê厝，因为我是hiah-ni̍h静koh无活气，无人敢问我啥，想无疑，我一定考kah真惨。M̄-koh hit暗，我beh困以前，父亲带领我到伊ê册房，温和ê问我，是发生啥tāi-chì。我见笑koh后悔ê ná哭ná kā一切所发生ê tāi-chì kā伊讲。伊因为我家己ê评估惊chi̍t-ê，伊牵我起来koh kap我相揽（伊以前m̄ bat án-ne做过）讲：『我ê kiáⁿ，你做得真好。你讲了第一pái ê道，koh讲得不止á好。你假使因此考败lah，我mā以你为荣。』我tùi父亲ê话感到真tio̍h惊，mā得tio̍h安慰。但是，隔工早起，he见笑kap失败ê情绪koh来附身。过了一两工以后，父亲送我到旗后，我合意ê姑母hia，一直到发表录取者hit工chiah tńg来。


Hit工，我到beh暗ê时 chiah tńg去厝，心内充满tio̍h失败、破碎，惦念tio̍h he口试ê酸味，惊惶面对厝内ê人。我轻轻á开门入..去。我ê父亲、继母、小妹lóng tī-hia，同齐跳起来，以笑颜欢迎我：『你考tiâu lah。』父亲差不多大声叫讲。Hit工早起，阿婶到学校去看，看tio̍h我ê名字上榜，就马上khà电话hō͘父亲。我非常感激，并m̄是因为喜乐，是因为真pháiⁿ相信ê消息kap放下重担ê轻松。我当时16岁，前途当向tio̍h我展开。


　　hit工暗时，父亲kap我讲到严肃ê我ê生涯问题。『我 ê kiáⁿ，』伊讲：『到今á日我保留chit项tāi-chì，无kā你讲，但是因为今á日ê好消息，chit-má应该kā你讲。当你阿公改信ê时chūn，伊ê生涯有了根本ê改变。Hit时，伊咒chōa，ài做传道者，m̄ kan-tāⁿ伊本身，也tio̍h伊厝内ê长子mā ài án-ne做。我m̄知有这咒chōa，到我考tiâu新设tī台北ê医专，koh得tio̍h奖学金，chiah知影。我请求你阿公准我，但是伊讲：『bē-sái，你tio̍h ài到台南神学校，将来做一个牧师。』我要求伊，但是伊坚决反对。我当时非常无欢喜，想beh逃走；但是chin-má，过了30年以后，我thang诚实讲，我ê传道生涯是真快乐..ê。Chit一生是真受祝福..ê。我无任何后悔，koh chit-má终于感觉，佳哉我决心顺你阿公ê意，愿跟随伊ê脚迹。你是伊ê长孙，是下一代『头chi̍t-ê生ê』。伊tī过身以前提起了 kúi-nā-pái，ài我kā 你讲伊ê誓愿，我 mā kap伊约好一定会照做。时代无仝lah。一方面我kap你阿公ê约一定要kā 你讲，另外一方面我立誓beh你知影两件tāi-chì，我认为非常宝贵，he就是『自由』kap『教育』。上帝hō͘咱自由，koh咱应该宝重伊ná亲像家己ê生命仝款，koh tī上主面前尽责任使用伊。对于教育，koh下一代，必需tī教育kap造就方面，比顶一代求进一步。今á日上主赐hō͘你非常良好而且稀有ê机会，所以tī你所选择ê方向，去为你家己追求siōng高ê成就。』（《回忆录》p.43-46）


　　黄彰辉kā伊讲父亲，伊bat深思过跟随阿公kap父亲ê脚踪，追求教职ê路程，因此虽然伊kah意数理科，mā学了真好，伊soah选择了文科ê哲学报考。Án-ne，父á-kiáⁿ ê心思相会合，伊ê生涯ê方向就tī hit工定局lah。

下图是台湾高等学校时代，穿上制服ê黄彰辉，约1932年。(黄怀义提供)



下图：高等学校歇热期间kap仝年辈ê亲chiâ放松..一..下ê镜头。图ê中间是黄彰辉，图ê正pêng是舅父ê kiáⁿ林瑞云，tò-pêng是姑母洪黄依利ê次男洪思荣。 (黄怀义提供)




２高等学校ê学生生活 黄彰辉深深感觉考取台湾高等学校是chi̍t-ê『奥妙』ê经验，到开学时ê『莫明神妙』iáu继续存在。Tī学校ê告示板，有邀请高校学生参加YMCA（基督教青年会）ê公告，tùi án-ne新生黄彰辉照告示ê时间往开会ê场所。Tī-hia，遇tio̍h he hō͘伊口试难题ê教授。大概是教授先看到学生，因为黄生发觉ê时chūn，教授已经朝向学生过来，hō͘伊无法度逃避。教授名叫石本岩根，是tú tùi留学ê德国tńg来，tī高等学校教德语。伊对彰辉自我绍介讲，伊mā是基督徒，tī德国留学三、四年，koh tú tńg来。


　　后来，黄彰辉tùi伊嘴中听tio̍h一kóa消息kap解释，原来考官预先chham-siông好hit件口试由伊主持，因为in知影伊是基督徒，koh抱好奇ê心，ài-beh看伊怎样对付如黄ê考生，tī国家主义tú-teh抬头、紧张ê情势下，敢公然宣称是基督徒ê学生。口试中提出来ê『十字架』ê问题，对tī伊是chi̍t-ê切实ê问题，因为tī德国，纳粹ê政权公开使用基督教ê『十字架』，来煽动人民仇视犹太人ê感情。石本感觉黄生hō͘伊满意ê回答，但是伊本身mā无对这问题有ē-tàng满足伊ê解答。所有在场ê考官kap石本，lóng对黄彰辉ê勇气kap真挚ê心有所感动。石本讲：「你ê口试，答了非常好。koh另外三ê科目，你mā考得不止á好，尤其是代数kap几何。」


　　黄彰辉回忆报考高等学校ê kui-ê过程，koh想：「kám是好运？ia̍h-sī是tī背后有看bē-tio̍h ê『圣手ê引chhōa』？」


　　满16岁，iáu未达17岁ê黄彰辉，入学高等学校，就是进入完全无仝ê环境，ia̍h-sī ē-sái讲是『chhèng-chhái』ê生活样式。如tī前章已经讲过，当时tī台湾，ē-tàng得高等学校经验ê人，是一万ê人内底ê一ê精英。青年人一旦hō͘高等学校录取，就百分之九十九thang期待进入大学。Koh大学毕业以后ê就职mā受tio̍h保障。现今，tùi严格受管制ê生活，kap tī学业竞争取得上峰ê驱动ê中学生活受解放。所以高等学校学生行为自豪浪荡ê表态，koh-chái来日本ê社会mā容忍in ê偏激脱离常规。譬如，kā in ê新制帽tàn入去路边ê泥水沟内底kúi-nā-pái，一直到有够lah-sap koh烂有够满足伊，chiah载上头顶；穿插各人真随便，无规无举；无真kheh ê大型学寮内底hit种无私人ê空间，soah是两三人同齐thang sòe厝，家己煮饭ia̍h-sī去外口食lóng 随家己欢喜；学习ê课目有变化，真趣味；暗时随家己ê时间，家己选一ê壁角tī Tatami(榻榻米)顶高困。一切lóng是由家己去选择作管制。课余ê时间in所选ê所在m̄是tī学校ê园地，是有人出入ê街路上。黄彰辉透露那三年期间ê自己讲：


『高等学校ê生活对我来讲，是第一pài感受到自由滋味ê时期。我tī he时期，头一pái pok薰，mā头一pái kap警察对抗。He mā显出我体力高峰ê时期。无久我就接受脚球队ê徵招，后来tī球队内成做有名ê选手。』


　　既然án-ne，黄彰辉离开了教会吗？m̄是！伊通过学生基督教青年会，参加研修、讨论kap展开种种ê活动。参加教会ê礼拜是一定ê，koh教主日学校成做伊ê第一要事。进一步，伊mā开始试一kóa『教会政治』ê滋味。因为tú好hit段时间，北部长老教会受加拿大母会当leh面对分裂ê危机。原来加拿大ê长老教会议决kap其他ê教派合一，m̄-koh有一部分ê长老教会决定无beh跟随合一ê决定，另组chi̍t-ê长老教派。派tī台湾工作ê宣教师会，hō͘裁定归属长老教会。支持合一ê宣教师就离开，唯独明有德牧师ang-á-bó͘支持合一，m̄-koh表明ài留tī台湾工作，in ê工作是tī青年kap学生方面。当in受大攻击ê时chūn，台湾ê学生展开运动，发动申请册hō͘加拿大ê教会，要求hō͘ in留tī台湾。M̄知申请册是m̄是生效，明牧师ang-á-bó͘留任lah。


　　1932年是chi̍t-ê难忘ê年，贺川丰彦访问台湾。全岛ê大部份长老教会教牧同齐召开主日学校大会，koh组织全台湾基督青年联合会，黄彰辉两个lóng参与。


下图为黄彰辉高等学校ê毕业证册，1934年3月10日。(黄澄辉提供)