《台湾人e5先觉―黄彰辉传》

 | | | 转寄

三代黄牧师ê比较

作者 张瑞雄 2009.03.15

１.tùi服装讲起　　 台湾人平常lóng讲，基督教是洋教。Tùi 17世纪以后ê基督教是经由西洋人传过来，tùi án-ne ê历史观点看起来，这是事实。m̄-koh，黄能杰hit一代ê基督徒，kan-tāⁿ se̍k-sāi基督ê宗教，根本m̄知基督有什么『洋不洋』。In tī穿、食、tòa，特别突显tī外表ê穿插顶头，完全是维持台湾人平常ê现状。因为，tī伊所有留..落来ê相片内底，伊lóng是穿汉族ê祖先所流传落来ê『台湾装』。Chit项tāi-chì kap tòe tī府城台南，教导宣教师台湾话ê林燕臣秀才改信基督教了后，tī台南神学院kap长中教册，一向lóng是穿『台湾装』仝款。

日本占领台湾早期ê历史内底，记载tio̍h siōng开化，mā siōng早采用西装ê台湾人就是李春生。Tī日本占领第二年ê 1897 年，李春生受tio̍h台湾ê日本总督邀请去日本旅行ê时chūn，tī东京伊kap三个孙á决定，穿插换采用『西装』。看到日本人无反对采用新式、雅观，koh方便ê服装，伊kap孙á lóng kā头壳后壁ê辫á ka掉，订做西装，买皮鞋，kui-ê人改头换面。

第二代ê黄俟命，就改装采用西洋ê方式。当时ê日本国内，tī政府ê正式场面，lóng采用西洋式ê服装。Tī军队、公立学校ê教师、学生，lóng已经kā『洋式』ê制服普遍化。Tī台湾，siōng早ê府城『大学』（台南神学院）、淡水ê『牛津学院』（台湾神学院）内底新ê一代、kap长老教中学，大约tī新世纪初，已经适应『洋式』ê制服。跟随英国籍ê宣教师，众学生tâu-tâu-á惯势西洋人ê穿插，mā tùi接触tio̍h ê外国历史、地理，开始欣赏适应tī新时代ê正式服装kap运动服装。Tī黄俟命做学生kap牧师ê生涯内底，真chió看见伊穿『台湾装』hip ê相片。m̄-koh照伊第五个cha-po澄辉讲..e，黄俟命平日tī厝内底lóng是穿『家居服』。厝内底留..落来bē chió ê『台湾装』、『农民装』。Tī 228事变期间，澄辉bat穿父亲ê『台湾装』去学校读册。可见黄俟命m̄-nā是清朝时代出生tī台湾ê『汉族』，tī私人ê穿插顶头，mā保持『汉人』ê认同。

下图是1927年黄俟命穿『台湾装』ê相片。


Tī第三代黄彰辉ê相片集内底，ē-sái看tio̍h一张伊穿『台湾装』ê相片。这是1937年，准备tī 8月前往英格兰留学时，kap伊ê阿婶－黄李金凤女士同齐摄..e。当年，彰辉已经tùi日本siōng高学府东京帝国大学毕业，像伊有能力得tio̍h chit间大学ê文凭，he是hō͘所有日本人感觉骄傲..e。Án-ne ê学者、文人，是有为、有成、有品、有格，koh是日本人siōng高级ê典范，m̄-koh，黄彰辉到底是台湾人，伊ê心肝、意识、认同，是正港ê台湾人。就是因为chit-ê理由，hit年4月tùi东京帝大tǹg来台湾以后，tiāⁿ-tiāⁿ行tī街路，ia̍h-sī访问亲人朋友，lóng有高等特务跟纵，hō͘伊感觉lóng无法度kap有识之士分享、讨论，根本就无法公开谈论台湾人ê心思、意念。M̄-koh，像伊hō͘『台湾装』包起来照相，就是向世界宣告，伊有台湾话、台湾意识、台湾基督教会信仰、台湾魂，真chē ê 才艺、气魄，正leh等待时机，有一工ē-sái用来发挥台湾人ê意念kap抱负。

黄彰辉出国ê时chūn，台湾是日本正港ê殖民地，hō͘看做外沿地，所有ê岛民kap chham台湾有关系..e，lóng是beh受『改正、改进』、『清洁、纠正』、『耻笑、bē顺眼』ê对象。对án-ne ê欺负、压迫，台湾人所表现ê『气魄』，就是加强学习压迫者hit-pêng ê文化、心理、心态，koh培养出家己ê知识、能力kap忍耐。

真难能可贵，tī伊所持有到英格兰ê行李内底，就有hit套『长衫搭马褂』ê『台湾（汉）人ê礼服』。为什么作者敢án-ne讲neh？就是因为有活跳跳ê见证人，梅佳莲（Dr. Kathleen Moody）宣教师tit beh tùi高女毕业ê时chūn，黄彰辉tī chi̍t-pái宣教讲演ê行程内底，到伊学校去演讲，hō͘伊真深ê印象。伊tī心肝底发出一种催逼ê声音，促成伊后来献身到台湾，参与宣教ê阵容，thang讲是归功黄彰辉ê『信息』kap人格。

下图是1937年，自日本转去台了后，去英格兰留学前ê相片。仝年热天，黄彰辉启程去英格兰chìn前，kap阿婶黄李金凤女士合摄ê 相片，chit套『长衫叠马挂』是伊专工为留学英所准备..e。


自从成家koh回国kàu台湾了后，黄彰辉kám有穿过án-ne ê『礼服』，作者leh想，可能无。因为战后ê台湾，tī政治顶头kan-tāⁿ有混乱kap腐败，经济上无人ē-tàng对明á载ê生存有把握，加上kap『唐山人』ê接触，致使台湾人对中国人ê『价值观』失去信心，mā对中国ê文化感觉chiok失望，致使台湾人对『大中华』ê感觉、意识、生活、服装、习惯，lóng引起反感。Ná亲像作者，生tī黄彰辉15岁以前ê台湾人，差不多lóng无看过穿『长衫搭马褂』当做礼服..e。In kā日本人所留..e，对『洋装』ê美感mā真欣赏，就离『汉式』ê服装lú来lú hn̄g。

黄彰辉tùi英格兰tńg来ê时，伊就tiāⁿ-tiāⁿ tú-tio̍h国民党政权以『边疆』心态对付台湾kap台湾人。其实，中国败坏ê政权，对待台湾人比『边疆』民族koh-khah差。因为，对待『边疆民族』是用可怜、同情ê心态做出发点，所以ē-sái用优越、文明自居。m̄-koh，当beh对付台湾人ê时chūn，虽然伊是充满『敌国』气质『特别区』ê人，伊有高层次ê文明享受，mā bat有海岛国所享有、kap异国异族ê交往。对待in，使用『见笑』、『藐视』、『感化』to̍h bē-sái，就是用武力，屠杀hit种siōng野蛮ê方法去镇压。台湾人ê意识、心灵ê医治，nah ē-tàng以强迫giú得tńg来neh？

２语言ê能力　 衫是反应出chi̍t-ê人ê内涵、文明、艺术、文化涵养、社会环境等等ê外在表现，语言就是chi̍t-ê人ê内在人格化ê实质表现。人所有内涵ê充实变化，kan-tā ē-tàng靠教育ê力量kap实行，教育mā因为án-ne大大来依赖言语做媒体。Tī 19世纪ê末期，所有台湾ê平埔族群lóng己经汉化..a，hit时ê台湾平埔族群大部分lóng使用河洛话。河洛话ê主要骨干kap发音，kap『唐、宋』朝代ê中原语言siōng óa，这语言实在真phāⁿ、好听、有魔力，koh有文字thang久长ê保存..落来，致使台湾ê平地居民真自然tio̍h来采用。

Án-ne，黄能杰hit一代ê台湾人已经达tio̍h成做『单一语言』ê社会..a。因为是单一语言，黄能杰ê生活环境，算是单纯、幸福，无外来ê挑战。统治者日本，tī无法度强迫lóng用『华语』ê情形之下，kan-tāⁿ thang hō͘台湾人普遍来使用河洛语（注一）。

黄俟命出tī 1890年出世，tī日本iáu未统治台湾chìn前，tī 1885年『长老教中学』（简称长中）设立了后5年。Tī长中内底所使用ê文字kap语言，一直是以汉文kap罗马白话文表达ê河洛语言，tī 1895年10月19日，日本军队占领台南府城ê时，全台湾chiah正式hō͘日本统治，tī 1896年4月，日本军事政府hō͘废除，由文官政府替换，日本化教育制度mā tùi chit时开始。起头e5kau3 10年，自1896年到1905年期间，日本为全台湾日本化教育制度koh筹备学校、教员kap经费。1905年，日本tī台湾设立ê汉人公学校（小学）有：本校144，分校23，教员700，学童28,051，学校入学率有4.66%。所以，当年ê长老教中学ê教育制度，iáu无hō͘日本干涉，照常是英国长老教会教育制度下ê台湾汉人本地ê教育方针，真受台湾人尊敬kap推崇。（林茂生博士所tio̍h《日本统治下台湾ê学校教育》p. 104、p. 275）

Tī 1906年，16岁ê黄俟命，入学就读长中，3年后ê 1909年，伊升学读当年ê大学（以后ê台南神学院）。伊接受高水准ê教育，soah m̄是tī日本语言ê教育制度之下，后来伊kap伊ê kiáⁿ彰辉讲tio̍h伊本来有机会读医学，进入日本制度下ê学校，改学日本话，m̄-koh伊无án-ne做，证实黄俟命有以台湾ê语言kap台湾ê传统来做重要ê使命，比改学日本语言ê日本化医学kap行医ê就业机会koh-khah重要kap宝贵。Tī 1913年，黄俟命大学毕业，头chi̍t-ê工作是到彰化教会附属长中预备科（小学）授课，教汉文、台湾话kap其它科目。虽然伊真phah拚beh为台湾人保存家己ê文化资产，m̄-koh跟随当时ê台湾教育日本化潮流jú来jú强，台湾ê教化soah jú来jú虚微。Tùi 1916年起，伊接受万荣华校长ê邀请，就tī长中任职校监，koh kà汉文kap圣经，到1930年初期，日本军国主义giâ头，日本tī台湾ê政府开始对教会学校施加压力，强迫要求语言ê日本化kap思想ê皇民化，学校ê校长一定ài是日本人，学校ê学生一定ài参拜日本神社，koh一再催令施行全校日本化，一直到1936年，黄俟命hō͘日本政府强迫离职，因为伊虽然真有才能，m̄-koh坚持无用日本话kà册，koh反对长中学生到台南神社参拜。

第一代ê黄牧师kan-tāⁿ以伊ê母语台湾话，就ē-tàng行出伊ê人生路，kàu第二代ê黄俟命，虽然ē-tàng讲家己ê母语台湾话kap强权统治者ê日语，m̄-koh伊以台湾话为主，hō͘人认为伊ê日本话无够水准，伊ê人生因为án-ne soah来食亏。这就是tī日本统治压迫下，讲台湾话ê台湾人ê悲哀。日本人自认是高贵ê日本话，原底tùi唐宋时代ê中原语言来..e，譬如讲：苏东坡、王维…等唐宋八大家，就是台湾人ê祖先河洛话中原人所传授日本..e，koh kàu日本统治台湾ê时，日本ê汉字发音，大部分kap河洛话ê汉字发音仝款，日本soah反客为主，乞丐赶庙公，颠倒头khǹg，实在是无耻koh好笑。

1922年，当黄彰辉入学台南师范学校附属公学校ê时，台湾ê适龄儿童入学比率已经达到28.8%，5年后ê 1927年，当伊进入长中ê时，日本tī台湾ê本岛人初级教育，己经达到30%，日本化kap『华语化』ê教育工作iáu无达到1/3，m̄-koh『除非以日本华语受教育以外，nā无受教育ê机会，tio̍h无就职农工业kap公务职位ê可能。』己经成做hit时ê局面。

Chit种ê社会，教学状况就己经tī长中课程内底反映出来..a，tùi 1927年到1931年ê 3年内，tī长中读册ê黄彰辉，逐学期lóng ài修习汉文、台湾白话字（文）、『华语』（日文）kap英语。这是充分说明当时ê台湾人tī社会内底ài生存，一定ài研习日本文，koh为tio̍h beh进入上级学校kap国际化，英语mā tio̍h-ài修好。Iáu有就是，tī台湾基督长老教会ê学生，tùi起初就己经奠定台湾话kap汉文（河洛读法）ê能力。

当黄彰辉15岁（1929年－1930年）ê时chūn，伊用汉文作文章发表tī学校ê刊物内底（p. 44, 45），这就表示伊tī三种语言内底接受训练，koh坚定持守固有ê台湾语文基础kap实力。Chi̍t-ê人ê认同是tī伊ê语言ê实用kap表达顶头，所以只要伊ē-tàng稳固伊ê母语（河洛语），其他语言ê思考kap能力ê表达，就ē-tàng 随文koh提升。

日本政府ê教育政策，hō͘黄彰辉真大ê障碍kap麻烦，代先是无承认长中是政府所认定ê学校，后来就是无承认hit间学校毕业生升学考试ê资格，所以除了以中学作为辍学点ia̍h-sī进入神学院，做台湾教会ê传道人以外，学生就一定ài转校kàu受『政府承认』ê学校去。这就是黄彰辉无tī长中继续求学到5年毕业，koh转到东京青山学院中学部（卫chhap综合学院）求学一年，得tio̍h中学四年肄业ê资格去考高等学校（1931年）ê背景。

Hit年tùi青山学院中学部四年á koh考tiâu高等学校（有保送帝国大学ê保障），kan-tāⁿ有伊chi̍t-ê人，所以伊mā算是为tio̍h青山学院争取chi̍t-ê荣誉。黄彰辉后来回顾讲：『我家己感觉为台湾人mā为长老教中学争取荣誉，因为投考国立ê高等学校，对我来讲，就是以日本人ê语言（台湾人ê外华语）kap日本人tī仝一个水准去phah拚，koh得到超然ê成绩kap胜战ê效果。』

Tùi世人语言ê使用顶头来做chi̍t-ê批判，虽然ùi顶层ê压迫者来看是征服受压迫者，其实，tùi智慧kap能力来看，受压迫者m̄-nā ē-tàng运用征服者ê语言之外，mā有能力看破顶层统治者ê思想、动态kap意图。

以黄彰辉本身作例，历史hō͘日本chi̍t-ê讽刺，就是伊受了日本siōng高学府ê东京帝国大学ê教育，因为伊是殖民身分持用日本护照，tī二次大战期间，颠倒得到相当好ê机会，tī伦敦大学ê『亚非语言研习学院』教授chi̍t-kóa从事反日ê英国军事人员kap官员所需要ê实用日本语。伊一生所学ê『日本』m̄知hō͘ 『吾国日本』jōa大ê损害，koh hō͘『敌对ê英国』有jōa大ê利益。

关于黄彰辉ê语言，tī-chia mā必须提起伊ê『北京话』（英语叫 Mandarin，thang译成满清语）。1942年，日本向英美宣战，展开二次大战后，黄彰辉就思考家己ê华人背景，tùi án-ne向英长老教会宣道会kap SOAS（School of Oriental & African Studies）『亚非语言研习学院』申请学习『满清语』。后来，tī台湾担任神学院院长期间，伊bat透露ē-tàng听bat『满清语』ê能力，m̄-koh真难开嘴运用hit-ê语言。Tī台南神学院，伊kap台湾长老教会仝款，一贯主张以台湾话kà册，所以伊就kui-khì m̄免『满清语』..a。Án-ne，soah带来新ê『华语压迫』潮流，中国国民党tū台湾一党专制时代初期，有时用强逼ê手段，使用恐吓ê方法，有时用软ê手段，使用流言中伤ê方法，去打压伊kap伊ê神学院，mā ē-sái讲是打压kui-ê台湾基督长老教会。中国国民党政权故意（ia̍h-sī无知地）扭曲：主张使用台湾话ê团体ia̍h-sī社会，就是属于下贱ê无受教育ê kē级kē层ê愚民。

第三代ê黄彰辉，虽然是达到教育kap才能 ê siōng高峰，koh成就多语言ê知识分子，m̄-koh因为伊是台湾人，讲ê语言koh是台湾话，伊chhì-tio̍h『满清语沙文主义政权』（注二）ê台湾人ê悲哀。真好运ê tāi-chì就是，伊克服日本ê『优越表态』，mā仝款来对抗『满清沙文主义』koh得tio̍h胜利。

注一：河是黄河，洛是洛水。作者持有福佬人ê文化，相信文化ê祖先是由黄河洛水流域tī宋朝／南宋时期集体南移koh khiā起tī福建一带。 注二：沙文主义是tùi Chauvinism译音koh来，本意为主张男尊女卑者，现代人应用来表示自我中心偏见主义者。

幼年时代ê清醒

黄俟命搬入长中ê学寮边á ê舍监宿舍朱西寮（Chu-se-liau），he是1916年ê春天。这是tī东门城外ê新校舍kap学寮（朱西寮）tú落成无久，tī 真e̍h ê空间内底，黄家kap寮生ē-sái讲是kheh作伙。黄彰辉ê幼年kap少年，lóng kā chia当作厝。搬入去中学环境内ê时，幼少ê彰辉iáu无kàu两岁。伊开始有家己意识kap记忆ê时，伊发现有chi̍t-ê好游伴，就是减伊一岁ê永辉。

幼少ê彰辉，tī厝内ê生活，tùi父母感受tio̍h台湾人所通称ê『慈母』kap『严父』ê真正ê含意。

有一pái，tī烧热ê热天，幼少ê彰辉家己chi̍t-ê人tī厝外，差不多褪光光，tó tī草埔顶。hiông-hiông有双翼飞机，飞真kē。伊m̄-bat看见án-ne ê怪物，chiah-nih大，koh飞chiah-nih kē，thang明显看tio̍h tī机翼kap机体顶头ê『旭日』标记。伊chhoah chi̍t-ê，koh惊hiâⁿ、koh烦恼，pi̍h-pi̍h-chhoah逃入去厝内，想tio̍h天顶mā有某种存在向下看土kha。伊感觉，hit-ê存在是bē-sái逃避、隐藏、ia̍h-sī容忍pīn-tōaⁿ..e。

Koh chi̍t-pái，当伊ê阿叔黄朝祥kap阿婶李金凤tī中学ê学寮朱西寮举行结婚典礼ê时chūn，伊头chi̍t-pái食tio̍h phong-phài ê宴席。伊kap永辉ê穿插是阿婶送hō͘ in..e，有够sùi koh iân-tâu ê衫裤。Tī镜内反映出来ê两兄弟，看起来真斯文、iân-tâu，真phái hō͘人认..出来。M̄-koh，in tio̍h-ài正装，不止是宴席，以后ê新娘ê茶宴，甚至kàu所有ê来客离开，chiah ē-táng tùi盛装内底来tháu放。Tī伊ê《回忆录》（S. Coe, Recollections and Reflections），伊感叹讲tio̍h chit-ê tāi-chì讲：『我感觉真未爽快。这kám m̄是我已经开始感知所谓『文化』、『教养』、『文明』tī侵害我ê『自然』、『天真』ê存在？』（《回忆录》p.10-11）

(下图是1910年代后半tī台湾天顶飞ê双叶飞机，幼年ê黄彰辉hō͘伊chhoah chi̍t-ê。)


(下图是黄彰辉ê a叔黄朝祥kap阿婶李金凤ê结婚照相。当日幼童彰辉kap永辉穿盛装归仝，做童伴。(黄怀义提供)


Tòa 4年宿舍朱西寮以后，tī 1920年，黄家搬入东门城内óa东门长老教会东门町4丁目70番地ê教员宿舍。Tī hit-ê环境内底，彰辉tòa 7年半。hit段时间ê后壁5年，是去台南师范学校ê附属公学校读册，tī公学校是kap小弟永辉仝期。Tī《回忆录》内底，彰辉描述讲，两兄弟虽然差一年四个月，做哥哥ê伊是瘦瘦、破病、细细只、头大，tiāⁿ-tiāⁿ tio̍h头壳痛。有chi̍t-kóa人hō͘伊ê外号，叫伊『大头』。颠倒是小弟身材高、体格勇壮，siōng无mā比哥哥koân一两寸。

彰辉、永辉两人是做伙sńg ê好朋友、mā是教会内底儿童节目ê伴。彰辉会记伊tiāⁿ-tiāⁿ kap小弟仝班学习，同齐去学校读册kap放学，过kah真快乐。伊所记忆ê siōng快乐..e，mā变成i siōng尾ê搭配。He是1925年圣诞节期间ê代志。In两人kàu姑丈洪朝抽、姑母黄以利ê教会kap厝内，渡假chhit-thô。Beh tńg去hit工，永辉hiông-hiông感染破病，tńg去台南ê时chūn就发烧。可惜，1926年2月9日，永辉就过身..a。伊ê死对厝内是chi̍t-ê打击，对彰辉koh-khah严重。He是彰辉对tī『公学校教育』感觉悲观、忧郁ê开端。

soah..落来，面对黄家siōng大ê灾难，就是林金女士（彰辉ê母亲）ê死。Tùi永辉死去了后，母亲ê身躯jú来jú虚。伊犹原ta̍k工作工lóng无停，mā phah-piàⁿ做chi̍t-ê母亲ê角色。伊是tī 1926年ê秋天，soah永辉死去七个余月了后，tī 9月24日过身。留..落来三男、一女。Siōng大汉ê彰辉chiah 12岁，公学校4年级。Chi̍t-ê小妹淑英、小弟明辉，kap siōng少年、iáu是eⁿ-á ê安辉。

苦难ê 1926年一过，koh遭遇chi̍t-ê悲痛关头，就是能杰『阿公』ê死。伊ē-sái讲是享受长岁寿ê福气。Tī 75年前ê台湾，ē-tàng活kàu 75岁，算是达成经验真丰富，看过世界真chē ê事物，mā感化真chē ê后辈。伊做道士ê世界，引chhōa家族破壳，进到ē-tàng体会跨过海洋hit-pêng ê世界，mā看tio̍h国际交往ê实况。Tī伊传道ê生命内底、接触、启发、安慰，mā引chhōa真chē人追求真理、和平、希望ê道路。所以伊ê死，thang讲是凯旋转去天国。伊ê葬仪是庆祝伊获胜利ê盛会。虽然án-ne，一连串ê悲剧，严重动摇幼年彰辉ê心灵。

(下面ê图是黄俟命牧师，林金师母ê全家福。前排由左是彰辉，明辉，安辉，淑英，kap永辉)


Tī台南师范学校附属公学校tú升5年级（1927年4月）无jōa久ê时chūn，有一工，黄彰辉kap 10个同学同齐tùi学校转去ê路，hiông-hiông ùi细汉冈顶头有一阵小学ê日本gín-á 向in唤叫讲：『清国奴』、『胆怯鬼』、『笨蛋』、『敢来！相打』，就走来phah台湾gín-á 。Án-ne，无想tio̍h会kah in 相phah，m̄-koh黄彰辉mā奋勇迎战。Phah到kui面lóng伤、手肿、跛脚，就忍痛拖tio̍h身躯转去。隔工父亲送伊kàu校门，吩咐伊照实kā老师报告。校长已经得tio̍h通知，准备ài严厉处罚。虽然chiah 5年级，彰辉比其他ê同学khah bat代志，自然成做hit阵gín-á ê发言人。伊讲hit场激烈ê相phah是日本gín-á大声骂『清国奴！等等』，koh起脚动手，台湾gín-á kan-tāⁿ是应战，是日本gín-á先出手phah来..e。校长认为公学校学生无做m̄对，所以吩咐in转去休养chi̍t礼拜。后来，彰辉听父亲ê解释chiah知影，原来『清国奴』是讲『二等国ê满州（清国）奴隶』，án-ne，iáu不如二等，是三等国民ê意思。

当然，黄彰辉所代表ê hit一阵台湾gín-á，无论tī道义、体力ia̍h-sī斗志，lóng比日本殖民主义统治者ê gín-á khah koân。当in大汉，台湾ê精英tī学问、办事、做人方面，lóng有辉煌ê成就。真可惜ê一点，就是台湾人ê运命，致使in大汉后，iáu tio̍h ài受殖民主义中国统治，继续做二等国民。

(下图是驻日韩人画家金斗铉所画『台日小学生ê战斗』ê图画) 「hiông-hiông一阵日本小学太保ùi山仑来，大声喊：「清国奴！胆怯小鬼！敢phah，来！phah！phah！」，就向阮phah过来。阮只好奋勇应战。」――黄彰辉


少年时代－快速ê成长

　　1927年年初ê升学考试时期，虽然黄彰辉chiah读完 5年级，伊参加长中ê入学考试，伊考tiâu..a。Án-ne，伊就m̄免koh去hit-ê回忆重重，hō͘伊忧郁ê台南师范附属公学校。伊kap逃课ia̍h-sī拒绝学校读册ê学生有相仝ê一点，就是无tùi公学校毕业，所以无tit-tio̍h毕业证书。进入中学ê初期，学校感觉不安，恐惊伊kap另外一个同学，赶bē-tio̍h修完6年课程然后毕业ê学生，kā in编入预备科。过chi̍t学期，老师发现，in tī学科有真好ê成就，án-ne就hō͘ in kap别ê学生仝款ê待遇。

(下图是tī 1924年黄俟命长荣中学学寮舍监（前排tio̍h乌色衫裤ê lâng）kap全寮内寮室长合影)


　　入去长中了后，因为当时学校ê政策kap要求，黄彰辉就搬入学校寄宿舍ê『东寮』。虽然，东、西寮lóng有舍监，校长万荣华亲自做学寮ê总监理，大概因为tī学寮有规律ê生活，彰辉ê身躯由软弱变成做坚强、健康。Tī长中ê同学，无koh叫伊『大头』..a。伊参加校内ê脚球队，走紧、踢好，koh建立『有干劲ê选手』ê声誉。

　　黄彰辉ê专长是汉文。伊ê家族是典型ê『台湾人家族』。Tī父亲黄俟命ê家庭，逐工早晚lóng有家庭礼拜，读圣经，mā有汉文ê课程，圣经是采用巴克礼所翻译ê罗马字圣经，罗马字ê台湾话，对学汉文ê人是有帮助无排害..e。这是kap后来统治台湾ê国民党外来政权ê主张讲，『罗马字对党国ê文化有害』，tú 好无仝。因为台湾话ê罗马字，tī使用上，每chi̍t-ê字lóng定位正确ê发音，加上真顺ê音声『八音』。殖民主义kap专制政权lóng采取『单独语言』政策。Án-ne ê独裁者，惊hō͘征服者拒绝彻底遵守伊所制定ê规则kap命令。独裁者永远bē-sái体会ê秘密，就是hō͘压迫者，ē-tàng使用压迫者kap hō͘压迫者两者ê语言，m̄-koh压迫者kan-tā ē-tàng讲in家己5语言niā-tiā。

　　早tī中学二年级ê时chūn，黄彰辉写ê作文已经tī学校内底，成做学生ê典范，刊登tī校刊『辅仁』第五号。伊ê文章ê题目为：『惜时』，全文tī下脚：

『惜时之要，古今东西，皆同其轨也。东方有言曰：『一寸光阴一寸金，寸金难买寸光阴。』西洋有谚曰：『时者金也。』果如是，尺碧非宝也。寸阴宜竞也。勿论所治何事，所从何业，其不可不者一也。商人重机敏，敏则得利，先则制人，后者为人所制。工人琢玉，旦旦而改之。农夫则披星载月，而后有获也。吾人入于此中学受中等教育，莫乎成德达材。然少年易老，学业难成，池塘春草梦寐未觉，阶前梧叶业已秋声。不竞竞业业，难乎有成矣。』（1928年 7月刊）

　　进入三年级，伊koh用汉文论述『通商』，刊登tī校刊『辅仁』第六号，内容tī下脚：

『世界万国以其地势及位置及气候之不同，出产物因之而异。各国民天才亦有特长，物品技艺因之而异。故此国之所有，往往彼国无之，于是国与国有无交换，是谓通商。通商亦为国家要事之一。通商便利之地方，居住者恒享种种之珍品，与各国之文化，可以阜人民幸福。移出输出之事，移出者运出本国各地之谓也；输出者运出各国之谓也。运入于我国之输入又曰入口。凡出入口货之关系甚大。有二大别。入口货多者，国必富，反者必贫。虽然入口货少于出口货，亦关系于物品之价值。今本当出入之货价而核之，每年出口货之价值，多于入口货，故可知台湾物产丰富，不但供给住民，亦能供给他国之需要也。』（1929年 7月刊） 　　
文中thang看出少年黄彰辉对殖民政策下ê台湾地位kap丰富，koh受制限经济ê状况，已经有认bat。

　　照记录，黄彰辉tī长中三年期间所学习ê课目有：圣经、修身、讲读日文、日文文法作文、习字、汉文、读译英文、英文文法、英作文、英习字、日本历史、东洋历史、日本地理、世界地理、算术、代数、几何、植物、动物、生理卫生、物理、化学、图画、唱歌、体操、台湾语。

　　依照长中ê成绩表，彰辉求学ê名次，第一年平均是79点，tī 56人中排第33名；第二年就跳到平均81点，排位第 9名；第三年，就是伊离开hit年，伊就koh跳到平均86点，排全班第2名。伊特优成绩ê课目（90分以上）是：圣经、读译英文、英文文法、代数、几何、生理卫生等等。

　　tī顶头讲ê课程内底，值得注意..e，就是当时tī长中，同时教日本语、英语kap台湾语文，三种语言ê课。Koh加上汉文，恐惊tī世上真少有教chiah-ni̍h-chē语言ê学校。Chit方面表示台湾长老教会，长荣中学是tī受压制ê状况下，教必要ê语言；另外，表示in有多样性人民ê经验kap认知，mā表示hit间学校内底，日常lóng ē-tàng体验tio̍h国际性、种族性相通ê乡土意识。

　　逐礼拜，拜六ê下晡，学生ē-sái有外出ê机会。M̄-koh，tī外出以前，学生tio̍h-ài彻底piàⁿ扫房间kap学寮，mā-tio̍h整理分配tio̍h ài照顾ê花园。kàu检查ê时间，万校长就出巡全寮kap庭园。若发现有无清气，整理无完全ê所在，负责hit-ê工作ê学生就ài留tī学寮内底，做割草等等ê『处罚』。学生lóng真期待，逐礼拜六下晡ê『放出监牢』。一方面是ē-sái去街á路看看..leh，koh ē-saih展in是长中ê学生；另外ē-sái去料理市场食各种爱食ê食物；siōng尾mā ē-sái看长女ê姊妹，因为in mā逐礼拜仝时间『放出监牢』kàu街á路。

　　逐礼拜日，顶、下晡两pái，中学（女学mā án-ne）ê学生tio̍h-ài排两列，去东门教会参加礼拜。m̄-koh受选择kap训练ê学生，就受派tī东门ia̍h-sī邻近ê教会kap地点，服务做主日学教员。

台湾siōng早ê中等学校－长荣中学（注）

　　Tī台南市今á日称做『长荣中学』ê学府，是台湾siōng早ê欧式中等学校。早tī 1883年，就是英籍宣教师来台传教ê 1865年算起18年hit年，英国长老教会tī台湾南部ê宣教师会议决创设中学。筹备两年后，tī 1885年完成，tī chit-má ê台南盲哑学校地点，hō͘名做『长老教中学』。He就是tī日本殖民化台湾ê 10年前就已经设立..e。

　　án-ne，tī殖民地支配开始，日本军队进驻台南府城ê 1895年，已经有7届ê毕业生散布tī台湾南部。

　　1906年 6月30日，日本殖民化ê 11年，受台湾总督府允准立案做『台南长老教会长荣高等学校』。当时tī日本接受高等学校，就是有今á日大学ê程度，毕业生就有资格做中学教员。其实，照万荣华，hit年年初有日本警察巡逻东门城中地区，看tio̍h一间学校。伊ê印象真深刻，就抱tio̍h好奇心问校内ê人士，告知是英式ê上级学校。警察就通报，台北ê总督府mā善意来允准，叫『高等学校』。Tī日本，hit时hō͘称做高等学校ê学府，lóng tī无jōa kú以后成做大学。独独，台南ê高等学校，chiah两年，tī 1908年6月9日就hō͘总督府发令tùi高等学校降kē水平，koh改称做『长老教长荣中学校』，koh简称『长中』。以后，因为殖民化政策ê强化，日本当局对台湾人『上级学校』教育ê制度hō͘伊差别待遇，以阻碍台湾人升学ê机会。

　　tī长中历史内底，占siōng重要地位ê人物就是万荣华。tùi伊1914年 9月接管学校，kàu伊tī日本ê皇民化压力离开ê 1939年11月，前后贡献25年ê岁月。

　　万荣华原来上任是tī 1912年，当时26岁。伊是tī 1912年初，tī剑桥大学、西敏斯特学院完成学业ê时chūn，接tio̍h tī台湾ê宣教师会ê邀请，kap海外宣道会ê派遣。本来伊已经tùi剑桥大学毕业，女王学院（Queens College）ê数学系，tńg去家己毕业ê中学教册一年。伊读神学ê目的，是为tio̍h beh做教育方面ê宣教师。m̄-koh伊志愿一世人做教育ê事工。1912年kàu台湾ê时chūn，虽然长老教中学马上需要伊，因为台湾是tī日本ê统治下脚，有学日本话ê必要，所以就去东京学习两年ê语言。

（下图：长荣中学校门。）


　　万荣华接管ê时chūn，长中chiah迁入chit-má ê学校ê新地址。Tī伊做校长ê 21年内，学校有真大ê进步kap成就。Tī宗教、智育、体育kap人格ê教养方面，lóng提升到真高ê水准。Kan-tāⁿ有chi̍t-ê非常重要ê缺点，就是日本政府当局一直m̄ hō͘伊正规学校ê认定。Án-ne，hit间学校ê毕业生，hō͘断定为无资格报考高等学校以进入大学。这是日本政府对台湾人ê岐视，koh是真明显ê苦毒。

　　根据万校长ê回忆，tī 1930年台湾总督府教育厅杉本长官通知伊，虽然长中tī『建筑kap施设』、『基金』、『教员ê素质』，各方面lóng符合规定，m̄-koh hit间学校若无辅导学生去台南神社参拜，就bē-sái得到立案ê认可。学校ê理事会讨论 chit-ê问题ē结果是bē-sái赞同chit-ê要求。因为接受神社ê参拜，m̄-nā是违背基督教ê信仰，mā是否定宗教ê自由。台湾长老教会ê南部大会mā反对chit种ê规定。日本基督教教育连盟kap日本基督教会连盟，lóng真同情长中ê反对ê立场，（tī日本本土ê文部省无向基督教会学校作án-ne ê要求，要求是发自统治殖民地ê总督府。）m̄-koh in bē-sái为台湾ê教会学校讲话。隔转年，日本民政党倒去，军国主义抬头，长荣中学就失去chì-chiap kap认同ê可能。

　　1933年，日本政府集中媒体攻击长老教中学。Tī英国做教会活动ê万校长，sûi tńg去台南。学校m̄-nā得bē tio̍h政府ê认同，koh-khah进一步要求一定ài非采取做完全ê日本化学校。万校长是剑桥ê硕士，koh tī日本学过日本话ê文人，有世界lóng有ê资格。做理事长ê林茂生，m̄-nā是tùi日本siōng好ê东京帝国大学毕业，koh已经tī 1929年得tio̍h美国哥伦比亚大学ê博士学位转来..e，持有世界水准ê学者。日本殖民主义政策，就是无注重台湾人学者ê存在。（chit点thang kap国民党ê中国殖民主义政策相比，残忍度未输日本，因为蒋介石政权，tī 1947年，kui-khì kā林茂生博士杀掉。）

　　koh tī 1933年，趁万荣华校长转去英国活动ê机会，日本人ê教员，无顾代理校长kap理事长ê反对，『偷偷á』带领学生去做神社参拜。当然，chit-ê举动引起校牧黄俟命牧师kap理事长林茂生博士ê辞任。年底，万校长转去台南，已经是事后，无弥补ê可能。后来ê理事会就议决，理事长由驻任tī台湾ê日本长老教会ê牧师上与次郎充任，koh向日本长老教会申请一位日本人，kàu台南就任校长ê职物。Tī 1934年ê 10月日本长老教会大会议决，派海军上校退休ê加藤长一郎tī 1935年2月，kàu台南长中（聘请）担任校长。虽然中学kap教会一直退让，皇民化ê压力一直无断，日本政府ê要求，干涉一直lóng无断。譬如讲：校长kap理事长必定ài日本人做、学校理事会ê理事ài有一半以上是日本人、教职员mā一定ài一半以上ê日本人、课堂上一定tio̍h用日本话讲课、学校内底bē-tàng有圣经等等ê宗教课目、军事教育成做必修ê课目、学寮ê舍监一定ài由日本人做，等等ê规定。加藤接校长，万荣华决定继续留tī学校事奉，因为伊感受tio̍h对学校ê使命，甘愿继续留tī学校，做数学kap教导学生生活ê老师（实际上ê校牧）。Án-ne，黄彰辉回述hit时ê长老教中学bat讲：『以后，hit间学校实际上ê管理，已经tùi台湾人hia，hō͘人换掉..a。』（《回忆录》p.51）

　　虽然校长换..a，niū位hō͘加藤长一郎，日本ê殖民政府iáu继续为难in 6年，无简单tī 1939年 6月21日（kap长老教会女子中学仝日），台湾siōng老ê学府，tī所有ê学校lóng受承认以后，最后chiah得tio̍h 实行殖民政策ê日本政府来承认，叫做中学校。这是日本苦毒台湾所产生ê笑话：『tī日本ê统治下脚，siōng早设立ê中学，得tio̍h最后ê认定kap立案。』关于『神社参拜』，教会得tio̍h军国政府硬性ê『解释』讲：『神社参拜m̄是宗教ê行为，án-ne是国家教育ê一项仪礼。』这是盲目ê日本军国殖民主义扭曲真理所产生出来ê杰作『歪理』。

(下图: 长老教中学师生受迫tī台南神社参拜)


注：自『长老教中学』到『长荣中学』ê称谓小史如下： 1885年，成立『长老教中学』。 1906年，改称『台南长老教会高等学校』，自称『台南长老教高等学校』。 1912年，改称『长老教中学』。 1922年，改称『私立台南长老教中学』。 1939年，改称『台南私立长荣中学』。 1949年，改称『台湾省台南市私立长荣中学』。