《台湾人e5先觉―黄彰辉传》

 | | | 转寄

黄家三代牧师kap台湾

作者 张瑞雄 2009.03.08

海岛台湾ê特色 台湾是chi̍t-ê海岛，伊ê特徵就是海岸线真长，因此，外来ê生理人、海盗、逃难者、冒险者，甚至用武力征服ê统治者，lóng ē-tàng真简单to̍h登入岛内。16世纪，当荷兰（占领南部38年）kap西班牙（占领北部17年）商业殖民主义集团入来台湾ê时期，华人iáu是chió数，大部分lóng是平埔族群。In是性情温纯、宽容、kah意和平、真简单tio̍h来相信外来ê人，koh kap in融合。今á日ê台湾人，tī in ê根底，iáu是维持án-ne ê个性。因为平埔族kap原住民族群ê文化，无文字thang好来表达，koh因为地形khòng-khoah，所以人mā真chió，自然物产丰富，m̄免开垦做田，成做phah猎kap采集土地自然成长ê食物来生活ê社会；征服者tiāⁿ-tiāⁿ利用岛民以原住民自居，m̄-bat有对外发展ia̍h-sī宣传家己ê野心kap主张，侵略者就lām-sám扭曲解释，故意 tùi外宣传讲台湾人是野蛮人。

以得tio̍h贸易上ê lī-sûn为目的koh霸占台湾ê荷兰人，为tio̍h beh生产甘蔗，制造粗糖，切割平原ê开垦地为『大结』、『中结』、『小结』koh大量『雇用』当地人，mā tùi大陆『移民』农奴入来台湾。原底tio̍h是多种族ê社会，koh-khah紧混合，慢慢á转变做chi̍t-ê phah猎ê人kap农民共存ê社会。华人ê农民jú来jú-chē，殖民地ê管理者mā hō͘华人方便入来tòa，koh发现采用海峡对岸ê器具、方法kap语言，对生产有帮助。虽然án-ne，农耕ê华人大部分lóng是罗汉脚。In只要得tio̍h安定ê生活，koh有屯积小khóa钱财，自然就kap当地ê cha-bó͘结婚，采行多妻主义。经过两三代以后，kui-ê平埔族群tâu-tâu..á tio̍h hō͘人来『同化』。Tùi原先tio̍h tī台湾ê人来讲，这就是hō͘人征服，渐渐失去原本非汉族ê传统文化kap认同。

下底一系列ê图片是ùi大概75年前(1930年代)发行ê台湾风景明批片: (图一:顶图是台湾siōng高ê山峰玉山)

(图二:正pêng ê图是台湾siōng壮观ê太鲁阁山谷)

(图三:台湾siōng水ê淡水湾)

(图四:台湾庄脚ê农家)

(图五:75年前ê台南赤崁楼风光)

《台湾历史年表》附录（《台湾历史年表》第20页底）内底指出：

＜台湾自古未属王化＞1723年8月19雍正帝ê意见koh讲：『台湾地方，自古m̄-bat属于中国，皇考（康熙帝）圣略神威，放入去版图』（＜雍正朝东华录＞，１） 陈惪华等撰＜大清一统志＞卷271＜台湾府，建置沿革＞内底mā提起：『台湾自古是荒服ê所在，无通中国，名曰东番。明á载启中，hō͘红毛荷兰夷人所占领，属于日本』（1774年版）án-ne讲，m̄-koh 1842年版（473卷）tio̍h tû-tiāu『属于日本』四字。

1662年，当荷兰殖民者向郑成功投降ê时chūn，台湾ê平埔族推算大概有四万人。Chit种人口是延平郡王ê数目，反应tio̍h in所能统治到，koh有交往ê数目。因为koh追溯12年ê 1650年，平埔族推算óa七万人口。真无可能tī短短ê 15年内底，杀掉三成ê人口，m̄-koh真可能台湾人民行避汉、荷两族ê敌对仇视。Koh照陈绍馨《台湾省通志稿》ê推算，荷兰据台ê末期，汉人人口达到25,000人，虽然比原本ê台湾人khah chió，m̄-koh真紧jek过。

《台湾历史年表》附录（《台湾历史年表》第13页）指出：

＜汉人ê态度＞因为惊郑成功phah台湾，汉人纷纷准备逃亡。汉人领袖kā荷兰人密告，koh指出就算国姓爷bē-sái攻占ia̍h-sī保有台湾，伊带来ê船mā会夺走大量ê粮食、牲畜……等，以维持伊ê军队。由此会使看见tī荷兰人统治时期，汉人就亲像荷兰外来人，kā台湾ê物件带出去，mā准备逃亡。《hō͘遗忘ê台湾》

『延平王国』占领台湾ê时chūn（1680年），台湾ê人口hō͘推算是120,000人口，到150年后ê 1830年，就增加到2,000,000，chit项tāi-chì tī移民ê国家台湾，是真自然ê代志，m̄-koh学台湾历史ê人tio̍h-ài会记tit，清朝tī 150年ê仝时期，向台湾『海外丸泥』《稗海记游》（《台湾历史年表》第24页），实行禁止渡海政策，总共有beh一半（75年）ê日子。对清国来讲，台湾是逃避罪犯，无从事正经工作ê流氓，ia̍h-sī爱冒险ê无赖汉所beh去ê所在。对定居真久ê台湾人来讲，hit ê所在是『有唐人公，无唐人妈』，罗汉脚ê汉人开荒ê新天地。母系为主ê平埔族羣，算是有好ê配对，hō͘征服，mā仝时间征服异己，koh产生台湾独有特殊ê民族kap文化。

M̄-koh，tùi郑成功kā伊ê『延平郡王国』强制建立tī台湾人民ê头顶以后，kā『华人』kap『华语』定..落来，制造『明清沙文主义』做伊ê统领，通行全台湾。结果就是，致使平埔族kap原住民族群公然hō͘叫做『蛮番』kā伊侮辱，以谋求汉文化ê统合，kap遵行对官吏有利『皇帝』式ê儒教伦理。Ùi 1758年到1759年，mā就是郑成功占领台湾后大概100年，清朝皇帝通过tī台湾ê官吏，开始普遍『赐姓』hō͘平埔族人。Tùi hit时chūn开始，thang讲『平埔族羣』有决定性ê来实行汉化。Án-ne，岛屿上ê人民，tī遗传维持平埔族kap原住民族群ê遗传基因，tī文化kap认同上soah hō͘『汉化』。

图一:大概80年前ê台湾庄脚ê风景

二:一百年前往来台湾kap支那(中国)之间ê船只

第一代宗教家黄能杰牧师kap元配夫人－杨俨寒 黄彰辉ê阿公，名能杰，字志诚，1853年出世。伊ê出世tī延平郡王国延长ê清帝国统治下，台湾南部ê东港龟怡庄。黄家祖先tùi金门移民到台湾，到黄能杰已经过七代..a，siōng-chió lóng有200年..a，tùi 1600年就住tī台湾。Án-ne，黄家是早一代ê移民者，算是己经『台湾族羣化』，mā tī文化社会上『本土化』。当地人se̍k-sāi ê伊是做道士..ê，以东隆宫（注一）为中心，服务一kóa心神不安、身躯欠佳ê人。因为，chiah-ê人通常hō͘人认是需要宗教治疗。伊认为家己比别人koh-khah khiáu，有能力吸引群众ê注意，进一步koh hō͘ in相信，伊chit位道士ê神明koh-khah厉害，koh-khah有能力。伊学tio̍h ê法术，siōng得意koh独有特殊..ê，就是『鸡卵登竹篙』ê神术。M̄-koh，后来，伊坦白讲hit-ê技巧是代先准备蜘蛛丝缠tī竹竿顶头，chia̍h kā蜘蛛放入去卵壳内底，hō͘伊做出奇迹ê表演。黄能杰建立ê『法术』，iáu有用『医术』做辅助治疗水牛破病ê药草。

因为伊有专长，mā有实际ê事迹，伊家庭ê经济iáu bē-bái。m̄-koh，tī伊ê心内，一直有讲bōe出来ê空虚；一方面伊立志beh做一个ē-tàng帮助人ê导师，伊ê良心一直要求家己，讲话ài老实，做代事ài认真。伊坚持chi̍t-ê原则，每一pái收费，lóng是照伊家己所开ê处方kap劝导，是m̄是对顾客有帮赞；另外一方面，伊kap in bó ê遭遇 kiáⁿ儿夭折ê痛苦，tùi án-ne心肝内一直追求一种真实、可靠ê帮赞。

英国人宣教师马雅各医师来台湾是1865年，hit时chūn chiah 12岁，tùi伊做道士，koh已经结婚，ǹg望ē-tàng生kiáⁿ chhī kiáⁿ ê情形来看，伊接触基督教ê信息，大约是tī伊beh 30岁ê时chūn。照记载来看，伊是tī 1885年（hit时chūn 32岁）入学台南福音书院（今á日ê台南神学院），仝年，马雅各来台mā已经过20年..a。黄能杰本底就是宗教家，tī伦理、道德、生活指导ê判断顶头，已经有bē少ê心得，koh加上tī文字kap学问方面，mā有相当ê基础kap水准。

hit时chūn马雅各tī台湾传道设教，是以台南做中心点，无jōa久，tī台南受tio̍h困难，行医传道受tio̍h阻碍，伊转移到高雄ê旗后。旗后ê对岸，tī打狗ê岗上，设有当时英国驻tī台湾ê领事馆。后来，台南人对外国医生ê态度渐渐转变和善，马雅各就转去府城行医、传道。按照东港长老教会ê历史，tī马雅各来台三年后ê 1867年，就kap李庥牧师（Rev. Hugh Ritchie，1867年来到台湾，1879年死tī台湾）到东港行医传道。后来李庥牧师不sám时到东港主持礼拜，得tio̍h当地ê信徒协助传道，租草厝举行礼拜koh建立礼拜布道场所。续落来tī 1871年，来chi̍t-ê牧师，名叫甘为霖（Rev. Wm. Campbell），伊tī台湾南部一带kap台湾人交往、传道。有一pái tī 1878年，tī台湾南部恒春县（东港ê南）ê沿岸，台湾人发现有两只美国人ê船，船长企图beh kā其中一只phah hō͘沈..落去。In就去请英国人甘为霖宣教师来看。当时欧美对亚洲各国施行治外法权，m̄肯hō͘欧美人士受tio̍h台湾ê官吏审判，船长kā驻tī打狗ê英国领事馆申诉，骗讲船是hō͘台湾人phah沈..e，船长应当ē-sái领保险金。为tio̍h chit-pái ê审判，甘为霖kap当时ê恒春县县知kap台湾人合作，伊替台湾人翻译兼作证，结果是美国船长败诉。当时，黄能杰是m̄是已经kap甘牧师、李庥牧师ia̍h-sī其他ê宣教师有联络，hit项tāi-chì对伊kám有冲击，无记录ē-tàng查..a。m̄-koh当时hit项tāi-chì发生，伊ê年岁大概25岁，koh tòa tī离事件无远ê东港，hit时chūn ê知识分子，应当是有接触新闻ê机会。M̄-koh，ùi chit-ê tāi-chì thang证实，tī日本占领台湾ê 20年前，台湾人社会就是án-ne，沿海就已经真chiap kap欧美kap世界各国，有事物kap人际ê交往kap接触。

1887年，黄能杰tùi台南福音书院毕业了后，一直到伊去世，lóng总传道40年。福音书院tī学中（注二），伊接受宣教师会（甘为霖牧师为代表人）差派去澎湖传道，tī任职澎湖期间，伊失去ko͘-kiáⁿ约西（Iok-se）（注三）tī海难。派遣到澎湖3年后ê 1890年，第二后生受命tī东港龟怡庄出生。黄能杰前后受差派tī澎湖、竹仔脚、凤山、楠梓，kap旗后各教会传道kap牧会。伊hō͘封做牧师，是tī 1903年12月28日tī楠仔坑（楠梓）举行。Hit日所hip ê记念相片，chin-má保存tī总会长老教会ê资料馆内底。楠仔坑ê教会是伊、师母kap in kiáⁿ俟命所开设..ê，真感动人ê是，当时俟命iáu kan-tāⁿ是13岁ê gín-á niā-niā。

黄彰辉tī《回忆录》提起家己ê阿祖－俨寒，tī家族内底伊是一位真重要ê长辈。根据彰辉ê母亲口传，阿公黄能杰改信基督教ê决心，背后有bó͘俨寒ê善导kap力劝，另外伊对in kiáⁿ ê教育mā真特别。

当in-ang tī福音书院求学ê时，1887年kap kō͘-kiáⁿ三ê人去澎湖，tī一pái渡海过海峡ê路途hō͘大暴风袭撃，真细汉ê独子tī海浪下来失去生命，tī tit-boh hō͘淹死ê瞬间，m̄-nā m̄惊眼前ê死亡，iáu安慰周围ê同难者讲，主beh来接伊去..a。Tú-hó͘俨寒女士遭受丧kiáⁿ痛苦ê时chūn，伊腹肚内有妊，正是第二后生俟命―彰辉ê父亲（注四）。Tī台湾圣徒ê传记内底有记载，大概13年了后（1903年），能杰、俟命父á-kiáⁿ tī楠仔坑（今á日ê高雄市楠梓区）开设教会。俟命虽然kan-ta是小学生，伊ê活动表现，已经hō͘认定是会有成就ê宗教家，不幸俨寒女士就tī楠仔坑开设 siōng盛ê时期过身。

俨寒女士除了做『师母』、『女传道』以外，mā是一位受庄民爱戴ê助产士。伊无推辞来为有身ê家庭服务，mā为破病ê妇女伸出帮赞ê手。当俨寒女士过身ê时chūn，根据黄彰辉牧师传述伊母亲所kā伊讲ê话讲：『kui-ê楠仔坑ê庄民，无论基督徒ia̍h-sī m̄是基督徒，lóng为伊ê死哀悼chi̍t-koh月久，in mā tī墓地建立chi̍t-ê碑，高十米，向(ǹg)庄ê中心大道，来记念伊。』（p.24）黄能杰牧师ê讲道影响真chē ê楠仔坑庄民，m̄-koh以生活体现出道ê师母，koh-khah感化了 kui-ê庄，伊真是正港ê宗教家。

黄能杰tī财政顶头真有能力，辞去楠仔坑教会牧会ê职位，sóa去旗了后，伊是做『非全职..ê』自由传道。这是因为伊tī财政顶头真优裕，m̄免óa靠教会ê谢仪来糊口ia̍h-sī养育 kiáⁿ儿。根据伊ê第三后生黄祺昌（tī 2002年ê时chun tio̍h 93岁）所讲，黄能杰（父亲）tī高雄市街á有厝teh出租，有租金ê收入。Koh根据伊ê孙á黄澄辉（黄俟命ê五子）所讲，黄能杰（阿公）ê家庭有真chē ê田园财产，tī大战以前，设有佃农耕作管理。

回溯100年前ê台湾，优秀ê少年人，若无地主ia̍h-sī官吏ê背景，除了行宗教家一途以外，就无其他ê出路。因为当时ê宗教家，thang兼任教育、医疗、冠婚葬祭、心理分析、占卜、气象地理、讲述、俳演等等于一身。有相当长ê海岸线ê台湾海岛，对有学习心得ê黄能杰，这正是形成伊内心台湾精神ê土地，tùi伊接受基督教成做chi̍t-ê西式ê宗教家，就大大来开展伊ê眼界，致使伊ē-tàng发挥思考kap学问、奉现社会、参与社会改进等等ê志业。

Tī《回忆录》内底，黄彰辉提起伊ê第一位神学教师，就是阿公―黄能杰。伊回忆tī 10岁到11岁ê时，阿公黄能杰约70岁，tī高雄ê旗后担任牧师，照逐年ê例，父亲黄俟命牧师一家人tī-hia渡过chi̍t-ê暑假，hit两个热天，孙á彰辉是独一ê学生。旗后半岛尾ê山顶有一座灯台，hia有300石阶thang peh起lih。大概tī半路，tī tō-pêng有chi̍t间古庙，庙ê正pêng对面就是阿公黄能杰以前牧会ê教会，thang接纳80到100人做礼拜。Kap礼拜堂连作伙ê建筑物就是牧师馆。教会ê边á有一座两层楼ê洋房，是以往英籍宣教师使用为tio̍h避jōa ê所在。Hit座楼顶有kòng阔ê阳台，ùi高雄港看去ê景致真正是天差leh地，尤其是港ê对岸灯点..起来ê时chūn，凉风吹来，正是世上siōng好ê教室..a。阿公是讲古ê高手，吸引是孙á koh是学生ê彰辉ê注意力。故事ê内容tiāⁿ-tiāⁿ是án-ne起头：有chi̍t-ê青年本来是为非sám-chò、lōng-liú-lian，到伊tú-tio̍h chi̍t-ê人，叫做耶稣，然后伊ê生活改变..a。听起来ná亲像是一位真无聊ê人，其实m̄-nā，chit位青年出头真chē，因为伊本底就是魔术师，会晓变魔术，亲像hō͘鸡卵爬上竹篙，tiāⁿ-tiāⁿ hō͘听ê人听kah入神。然后，koh有新ê魔术故事，koh引伊入神。讲tio̍h耶稣，有反高潮（Anti-climax）ê感觉。m̄-koh，以耶稣为中心ê宗教家，像黄能杰有创意ê过来人ê经历，bē感觉无聊，颠倒是真精彩、生动，真有启发ê效果。

阿公黄能杰对『小神学生』所beh强调..ê，就是以前伊做道教ê宗教家ê时chūn，伊是以『学问kap神术』为贵。到tú-tio̍h基督以后，伊m̄标榜伊ê『学kap术』，koh全心、全情、全意追究宇宙ê真道kap创造主ê奥妙，mā真心诚意来服务人群。

下图是台湾南部siōng早期牧师中ê五位.

１黄能杰牧师自述ê履历 黄能杰ê原籍是清国福建省泉州府同安县金门水头乡，主后1854年9月12日，出生tī凤山港东中里龟怡庄。14岁tī内关帝庄拜欧阳辉做老师，学习经书八koh月。17岁拜东港街后塭庄黄再来做老师，学习法术。19岁拜师由泉州府晋江县渡台tī东港街ê陈乌尾，koh深入研究学习法术。m̄-koh tī伊26岁ê时，代先听过洋人tī庄内传道，hō͘基督教信息吸引，转变做接受传道师赵爵祥（注五）ê教化，归入基督教信仰。27岁由英人巴克礼博士为伊洗礼，伊受洗ê日期为主后1881年1月16日。5年后ê 5月，当伊32岁ê时，进入台南府城内ê『英国大学』，就是日后ê台南神学校

下面ê图是黄能杰牧师亲笔自述ê履历书

。33岁（主后1886年12月）接受英国宣教师会委任，职为传道师，tī澎湖岛妈宫街礼拜堂宣教。36岁tī台南府凤山礼拜堂宣教。37岁tī楠梓坑街礼拜堂宣教。38岁接受委任，tī东港中里竹仔脚庄礼拜堂宣教。42岁接受委任，转去楠梓坑街礼拜堂宣教。46岁接受楠梓坑街礼拜堂民众ê推选，成做耶稣圣教长老（注六）。主后1903年12月28日，tī楠梓街礼拜堂受封为牧师ê时是49岁。（由黄能杰牧师ê自序文登载tī赖永祥教授ê《教会史话》第五辑。）

２一位法师归基督ê故事 　　 chit篇黄彰辉牧师亲笔写宝贵ê文章，是伊为英格兰长老教会读者绍介伊阿公kap阿妈ê见证文。（原文刊载tī《远远ê地平线（Far Horizons）》季刊1940年10月号Page 78-79。）

　　我受委托kā bat tī一kóa教会讲过，有关阿公（黄能杰）kap阿妈（俨）ê见证，写出来分享hō͘读者，这是我kap小弟iáu少年ê故事。Lín kám ē-tàng来想tio̍h有一间中古ê教堂，建立tī ē-sái了望海洋ê山仑（旗后）？附近有一栋建筑物，chìn前是宣教ê医疗院，后来提供hō͘阮阿公归家tòa，同时mā是宣教师ê休假场所。Chit间厝虽然khah旧，m̄-koh ē-sái观看四周围ê风景。伊有真阔ê楼台，ē-sái了望山仑下脚ê海港kap对岸ê高雄。凉爽ê黄昏，是阮欢喜聚会ê良机。请画看mài án-ne一pah画：一阵cha-po͘-gín-á（包括堂、表弟）tī月光ē-kha，围tī in阿公ê身躯边，看tio̍h tùi港口出出入入ê舢板kap小篷船，tiām-tiām听tio̍h台湾古早ê故事。

　　突然间阿公问阮讲，kám知影伊tī成做基督徒以前，是做甚么tāi-chì ê？阮惊一tiô，听到伊以前bat m̄是基督徒，就用期待ê好奇眼光注目看伊。过了一下，伊开始讲述以下ê故事：

惊hiâⁿ ê世界 　　『细汉kiáⁿ..a，我khah-chá bat是东隆宫庙内底ê法师，hiah-ê人惊我，认为我ē-tàng求风喊雨。In对我惊hiâⁿ mā怨恨，因为我bat用邪恶ê咒语kā in威胁。In tiāⁿ-tiāⁿ供奉一kóa金钱kap礼物hō͘我，以求平安。In ê惊hiâⁿ，就是我ê收入。譬如，我bat警告hiah-ê人，若无the̍h出钱来，恶鬼就会来chhōe in。有kóa人m̄相信，我就作假heh惊in，骗讲恶鬼真是chit-ê时chūn来..a，一直到in相信。我会tī暗时去hiah-ê m̄信ê人in tau，kā chi̍t-kōaⁿ鱼lân-chhè贴tī in ê门顶头，tī月光下，chiah-ê鱼lân-chhè会闪烁tio̍h特别ê光彩，引来夜婆群（在台湾有真chē chit种动物）ê攻击，门就án-ne hō͘夜婆phah，门内hiah-ê人受heh惊，认为是恶鬼真正来lah。这就是我ê谋生方式，我ê生计建立tī hiah-ê人ê惊惶kap我ê假鬼假怪ê骗局顶头。』

　　『我heh惊hiah-ê人，我家己ê惊hiâⁿ比hiah-ê人koh-khah深，因为实际上，我知影hiah-ê恶鬼是我家己编出来ê，我惊将来hiah-ê人会看破我ê骗局，若真是án-ne，我beh安怎？因为我ê罪恶kap hiah-ê人ê惊惶，我无法度kap hiah-ê人来往，感到非常ê孤单，我深受无法度知影ê乌暗ê痛苦。为tio̍h beh暂时bē记得不安ê痛苦，我就沉迷tī淫乐，亲像生活tī旷野内底。因为我生活tī自欺欺人当中，koh kap至亲好友断绝来往，我ê光景就jú来jú bái。』

基督ê呼召 　　『有一工，我听讲有chi̍t-ê外貌奇特ê洋人来庄内，讲述有关耶稣ê怪谭故事。令我愤怒ê是，有一kóa人tùi我chia转向hit-ê洋人，无koh来庙nih。我决定beh到hiah-ê人kap洋人聚集ê竹围庄闹事。到hia，我听看看..leh，对洋人ê面貌kap目睭kap别人无仝，感觉真趣味。我gōng-gia̍h tī家己竟然tī注意听伊所讲ê话，he是有关老生常谈ê浪子故事。忽然发觉我ê愤怒消失..a，我ê心受tio̍h奇异ê感动。离开ê时，我ê斗志kap自尊心受击挫败，有chi̍t-ê声音对我teh叫：「bē-tàng听洋教..e！」另外一个声音轻轻..a讲：「tńg来我chia，来！」hit几工，我一直过tio̍h矛盾踌躇ê生活，当我jú抵抗hē轻柔ê呼声，就jú受tio̍h伊吸引。』

　　『kúi-nā-pái我偷偷á到布道所注意听，有一工，我koh听到仝款ê浪子kap慈父ê故事，我无法度koh再忍受落去，就偷偷á行出去，目屎chho̍p-chho̍p滴，思想浪子所讲ê话：『我tit罪你，我无够格koh做你ê kiáⁿ儿。』tńg去厝内ê路nih，我一直念chiah-ê话，chiah-ê话就án-ne印tī我ê心肝内。Tùi hit时chūn开始，我感觉新ê生命tī我ê心内产生。虽然旧ê罪iáu刺tī心肝内，m̄-koh我感觉伊tī对我讲，我是伊ê kiáⁿ儿。因为伊ê安慰，我受tio̍h抚慰（我hō͘伊ê安慰所抚慰），我每礼拜日lóng去布道所，无koh去庙lō͘。』

　　『我厝内ê人kap庄内ê人知影我去注意听洋教，以前惊..我庄内ê人，lóng取笑kap骂我，hiah-ê恨我ê人，chin-má看我bē起。我ê兄弟kā我heh惊讲，若无停止去布道所，ài kā我赶出家门。有一pái，伊tī我到教会ê路途中，beh kā我谋杀，m̄-koh hō͘我意外逃走去，m̄是！是神ê旨意。因为我答应一位朋友，beh chhōa伊去教会，koh行别条路。虽然有chit种ê逼害，mā bē-sái抢去我新ê生命。细汉kiáⁿ..a，tùi hit-ê时chūn，我学习koh-khah chē ê真理，我知影kap真神ê和解，就是kap人和解ê根基。』

　　hiông-hiông，阿公停..落来伊ê故事，停一下..a，tio̍h真肯定来讲：『我真希望lín ê阿妈iáu活teh，伊就ē-tàng kā lín讲tī伊身躯顶所发生ê tāi-chì。』伊无继续伊ê故事，因为无lōa久以后，阿公tio̍h过身去。

家境ê改善 　　我大汉了后，有一工，阮老父kap我讨论有关我未来ê工作生涯，伊提起阿公，同时真清楚来讲到阿妈ê往事。伊iáu讲，我ê阿公阿妈kap tú过身ê母亲kap伊bat主张，我若同意，应该tio̍h做传道人。然后，伊提起有关阿公无讲出来ê阿妈ê故事。

　　『你阿公tī成做基督徒chìn前，惯势tiāⁿ-tiāⁿ苦毒你ê阿妈。但是有一工，』阮老父继续讲：『你ê阿妈注意到，一定有什么tāi-chì发生，hō͘一向对伊残忍ê翁婿有改变。伊无koh到庙nih，ta̍k工tī厝，沉迷tī一本小小ê册内底。伊一直感觉真奇怪，m̄-koh m̄敢问伊teh读什么册。另外，伊ê言谈kah以往lóng无仝，变kah对伊细jī koh仁慈。』

　　『一工暗时，伊无法度koh按耐看伊teh读什么册ê想法，半暝，当逐个人lóng困去，伊静静起床，真惊hiâⁿ掀开hit本册，koh开始读。（he是马太福音书首版单行本）伊hō͘册内ê故事感动，tùi hit时，伊每工半暝lóng起来读hit本册，tiāⁿ-tiāⁿ惊厝内底ê人发现伊作ê tāi-chì。一直到有一工ê暗时，当伊leh读ê时，hiông-hiôn发觉伊翁khiā-tī伊ê后壁，伊真紧张koh惊hiâⁿ。』

　　阮老父停落来，我看伊kám-ná有什么心思真注意leh我。过无jōa久，我轻声问伊：『后来neh？』伊讲：『in对哭来和解，tùi hit时开始，in就kā家己献身hō͘上帝。』

　　无久了后，我ê阿公阿妈受tio̍h家庭逼迫搬出去，in所受ê逼迫，有来自亲人，mā有来自朋友kap庄内ê人，m̄-koh in ang-á-bó͘之间ê恩爱，hō͘ in心内充满tio̍h欢喜，in开始向四周围 hiah-ê人，传讲赐hō͘ in新生命ê hit位ê故事。我ê阿公成做一位传道人，了后做牧师（台湾siōng初期ê五位牧师之一），四十年无休困服务真chē教会，宣讲好ê信息，一直到伊蒙主恩召过身前ê两个礼拜。

　　我来英格兰chìn前，bat转去阿公以前tòa ê所在拜访众亲chiâⁿ。我去过hit-ê老庙宇，mā看tio̍h一kóa巫师对四周ê妇孺焚香念咒，我惊kah gōng-gia̍h而且感概回想阮阿公kap伊ê厝内ê人，in mā-bat做过仝款chiah-ê tāi-chì。我欢喜感念神ê恩典，kap众宣教师牺牲ê爱，传达hō͘阮这重生ê生命，同时我mā问家己：这kám tio̍h是我ê恩赐kap使命？

第一代黄能杰牧师ê相片：收藏tī台湾基督长老教会资料馆ê chit张相片，是1903年12月28 日，tī楠仔坑教会封牧当日所hip。当时，长男俟命（无tī-teh相片中）kap母亲俨寒女士协助建设教会ê事工。这相片表明初代受封做牧师ê人穿插是汉式服装，mā无亲像color等任何牧师职ê标志。Ē-sái看见当时tī领导地位ê宣教师会，想beh kā本地人ê宣教本土化，所代表ê chi̍t-ê例。

黄能杰牧师ê续室：tī俨女士过身以后，黄能杰牧师kap陈悦治女士结婚。图中ê eⁿ-á是续弦后所生第一个gín-á－次女加妙。陈女士是彰化人，少女时tī彰化基督教病院做兰医生ê护士，tī第一任翁婿了后，做黄能杰牧师ê续弦。(黄祺昌提供)

黄能杰牧师kap kiáⁿ儿: 黄能杰牧师生育成人ê kiáⁿ lóng总有6 ê人。chit张相片当时，siōng细汉ê四男瑞庆iáu未出生。图内底后排tò-pêng是长子俟命（抱tio̍h小妹加妙），正pêng是次子朝祥，前排tò-pêng坐leh是能杰牧师，中ng hō͘抱..lē ê是三男祺昌，前排khiā--leh手the̍h雨伞ê女子是长女依利沙白。(黄祺昌提供)

黄彰辉牧师幼年时代ê相片：chit张相片是黄彰辉牧师大概四岁ê时chūn所hip黄能杰牧师ê全家福。相片内底siōng老..ê是黄能杰牧师，hit时，伊tī旗后做牧会ê工作。前排tò-pêng第一ê gín-á是黄彰辉。（黄祺昌提供）

注一：黄能杰ê后祠认为东隆宫是过去黄能杰ê宗教职业óa靠。 注二：请看《教会公报》1886年10月。 注三：日本tī台湾开始设户口制是1900年，以后，黄俟命是厝内siōng大ê kiáⁿ儿，所以黄能杰tī户籍上登录伊为长男。 注四：请看Edward Band tī 1936年tī东京ê Ginza，由Christian Literature Society所出版ê『Barclay of Formosa』－p. 77-78 注五：赵爵祥传道师是台湾人tī长老教会高等学校ê第一任校长赵天慈ê父亲。 注六：『耶稣圣教长老』言词ùi p. 12 ê自述履历表，其理由不详。

第二代宗教家黄俟命牧师kap夫人－林金 黄俟命是1890年3月3日出生。He是tī清国phah输日本，日本占领台湾施行殖民地统治ê前5年。因为黄能杰kap俨寒ê tōa-kiáⁿ，tī澎湖ê海上遇难丧命，日本tī台湾设置户口是tī 1900年，黄能杰就tī户籍顶头报黄俟命做『长男』。tùi伊出生了后，黄家经历竹仔脚kap凤山ê牧会kap传道ê生活。1903年，当黄能杰受封ê时chūn，伊是13岁，iáu teh小学学校读册。M̄-koh按照记录，伊是tī楠仔坑（楠梓）帮助父亲开设koh建设教会ê事工。伊tī 16岁（1906年）tùi 楠梓公学校毕业，同时进入台南长中（注一），读三年就毕业..a。

Tī黄俟命毕业长中chìn前，伊已经考tiâu台北ê医学校。m̄-koh伊ê父亲能杰牧师全力soat-ho̍k，劝伊进学台南『大学』－神学院。能杰牧师ê理由，就是伊改宗入信ê时chūn，立誓beh奉献『长子』作上帝ê圣工。虽然俟命内心有过战斗、踌躇，mā经过迫切ê祈祷，伊终于决心行上chit条坎坷、pháiⁿ行十字架ê人生路。以后，当伊遇到hō͘逼辞职中学校牧，koh hō͘逼离开所建设ê台南东门教会ê时chūn，tī 1909 年所选择ê决志浮siōng心肝头。m̄-koh伊一再kā in kiáⁿ彰辉讲，伊无后悔放弃医业ê路，koh选择牧师chit条路。1909年，伊tùi án-ne进入台南神学院，tī台南神学院读4年，tī 1913年毕业。

长老教会tī台湾一向是真重视gín-ná ê教育，所以tī宣教师会内底分宣教、教育、医疗、妇女等部，每设教会ia̍h-sī布道所，就tī礼拜日做礼拜，koh礼拜日开设附属ê小学、中学ê主要目的之一，就是想栽培kap提供小学ê教师，koh所有ê小学mā归中学校长管理。m̄-koh照1914年接管ê万荣华，当时只chhun台南kap彰化两所nā-niā。理由就是，经过18年ê统治了后，日本己经tī各主要市镇设正规ê『公学校』，koh教会ê财政、规模kap教学内容，lóng比bē起官方设ê学校，koh失去吸引力。1913年，『大学』新毕业ê青年黄俟命，就受派到彰化教会附属小学kap长中预备科担任教师，就tī伊做教师ê第二年，tī 1914年生了黄彰辉。

毕业后两年，就是1913年到1915年，伊tī彰化教会ê附设小学教册。黄俟命kap林金ê长子，就是伊tī彰化期间，tī 1914年8月20日出生..ê。因为是tī彰化出生，所以hō͘做彰字。Koh决定所有cha-po lóng加用辉字，koh为伊起名『彰辉』。1915年到1916年，kan-ta一年tī盐水港教会任传道师，因为长中ê万荣华（Edward Band）校长召请伊去担任舍监兼任圣经教师ê职物。Tī-chia需要记一笔..ê，就是黄俟命教学所使用ê语言是台湾河洛话，所用ê文字就是汉文kap罗马字。伊持有考取医学专门学校ê经验。当然，实力就是包含tio̍h使用日语ê能力。m̄-koh，因为读神学，准备做台湾人ê传道教师，伊就无继续tī日语方面加强练习。身为台湾人ê悲哀之一，就是日本政府无容允台湾人用家己ê言语教授kap接受教育。伊后来就hō͘逼迫离开所执教ê中学职位。

当黄俟命失去了长中教册ê工作，koh hō͘逼离开东门教会ê牧师职位ê时chūn，伊iáu ē-tàng自付旅费，到东京去kap长子彰辉tàu阵tòa。Tī伊siōng艰难ê时期，伊一家口á ê生活费、gín-á ê教育费、后生彰辉ê学费，lóng iáu tio̍h维持。Tī当时ê社会内底，维持án-ne ê生活、交通、gín-á教育ê费用，算是真贵..ê。Koh当时ê帝国大学无奖学金，教会mā无能力帮助传教者ê子女。台湾长老教会第一ê传道人，基本上是『堂会』，ē-tàng支付伊一家ê生活费，chiah得『宣教师会』hō͘伊封立为牧师..ê。M̄-koh薪水ē-sái讲大部分lóng停留tī宣教师会所设定『siōng底限』。所以众kiáⁿ儿上长中、长女、神学院，lóng由宣教师会支付奖学金注册就学。笔者又koh无读到宣教师会ê记录内底，就黄彰辉ê高等学校kap帝国大学就学事项，指出『支付上高等教育学府ê奖学金』。所以真可能，黄彰辉ê全部留学、旅费kap生活费，lóng是由家产来开支..ê。可能是án-ne ê家庭背景，养成黄彰辉带有m̄惊日本人，mā m̄惊洋人，敢主张家己ê意志，有ná『少爷』ê气派。

Tī黄俟命任职长中教员期间，伊mā tī东门长老教会兼任牧师ê工作。1920年，南部基督长老教会中会任命伊为教师，伊受委任兼任台南东门教会负责人。因为东门教会tī地理上，最近tī长老教会ê中学kap女子中学，koh伊主张礼拜日ê礼拜，应该tī礼拜堂敬拜，所以伊致力贡献tī募捐，来建设ē-tàng容纳1,000人ê礼拜堂。礼拜堂是tī 1926年落成。经过真chē年ê经验kap phah-piàⁿ，真无简单tī 1927年5月12日tī该会受封立为牧师。

黄俟命就职长中ê舍监兼校牧时，chiah 26岁，校长万荣华mā kan-tāⁿ 28岁。Tùi 1916年到1934年，lóng总做18年。万校长tī伊ê『长荣中学历史』内底，提起伊ê功劳，讲：『tī伊任校牧ê 18年内底，lóng总有344名学生接受成做基督徒。1934年当伊离开ê时，koh tī学校ia̍h-sī升学ê人有133名，职业不详ê人（做农ia̍h-sī经商）有65名，做牧师ê有41名，做医生ê有37名，齿科医生有14名，企业家23名，公务员ia̍h-sī事务员15名，教师7名，死亡9名。』

万校长回忆讲：黄校牧tiāⁿ-tiāⁿ为tio̍h学生ê违规伤心，善导in解决问题。不sám时tī深夜chhōe学生讨论，mā为in ê需要走chông。有时chūn实行处罚，m̄-koh tiāⁿ-tiāⁿ善导学生祈祷。万校长有一pái比喻in两人tī学校ê作用，有ná『tī chi̍t-ê体内ê头（指校长）kap心（指校牧）』。万校长mā真满意长中通过黄校牧kap年经ê郑溪畔、潘道荣合作，举办全岛主日学校教员ê训练会、教材ê编制kap使用ê指导。In mā起用中学ê学生，到地方教会去从事宗教教育kap灵性成长上ê指导。

1934年伊ê离职，是因为日本政府强制要求教育机构ê日本化，koh皇民化当快速teh抬头，学校内底无koh允准无使用日语ê教师。黄俟命牧师长中离职了后，就tī台南东门教会做专任牧师。虽然伊bē-sái继续做中学教师，m̄-koh伊无放弃对市政ê参与kap关心，tùi 1933年到1935年ê两年内，伊甚至hō͘选做台南市『东门町地方委员』（像今日ê市镇民代表）。台湾教会ê历史家杨士养牧师tī伊ê传记内底，hō͘ 伊chi̍t-ê评语讲：黄俟命牧师『灵命丰富，讲道有力感动人心』（注二）。

第二代ê宗教家黄俟命，虽然tī真chē束缚之下，犹原ē-tàng发挥教诲、感化少年一代ê人，伊ê一生thang讲是不断tī殖民政策下抗争，tī本地人当中宣扬kap教化基督教ê信念，家己一生过刻苦、耐劳、勤俭ê生活，m̄-koh伊hō͘真chē受伊教化ê人过tio̍h丰富ê人生。伊是chi̍t-ê完美ê基督教宗教家，当牧师做牧养人群ê典范，做教师感化求上进新一代ê世间师表。伊是所有台湾人内底、ùi顶面领受siōng大ê灵性根源ê先知，伊ê生命mā是台湾精神ê siōng大表现。

黄彰辉讲，伊ê第二位ê神学教师就是伊ê父亲黄俟命。伊扮演ê角色就是：父亲、教师、牧师，综合成做真完美宗教家ê榜样。13岁ê少年黄俟命，tī楠仔坑就已经发挥领导ê天份、优秀ê宣教、传道ê能力。伊就是tī 1903年6月17日透过宋忠坚接纳成做教会成人会员，日本统治台湾满10年ê时chūn，正是日本tī台湾ê总督府承认长荣高中做『高等学校』ê 1906年，黄俟命入学hit间学校。Tī当时ê台湾，除了神学院当时通称『大学』ê学府外，koh无任何koh-khah koân ê人文、哲学、历史等高等教育ê学府。所以伊tī 1909年毕业了后，续落来入学台南神学院，koh tī四年后ê 1913年ùi『大学』毕业，少年ê时chūn，已经是实践ê宗教家，chit-má koh-khah是满腹学问ê学者、师表。

黄俟命受派tùi彰化到盐水港牧会，m̄-koh tī-hia kan-tāⁿ一年，因为万荣华ài伊加入中学ê教师阵容，当圣经kap汉文ê教师mā兼寄宿生ê舍监。万荣华讲，当伊接管中学ê时chūn，学生总人数60名，所有ê学生lóng tòa tī学寮内底，黄俟命就离开了牧会ê生活，koh进入牧养学校kap学生ê生活。伊tī长中工作lóng总是18年ê光阴。

四百年来，tī殖民主义政策ē-kha ê台湾人，从来to无机会参与全岛性ê政治。因为tī外来政权ê统治下，政治ê要位一向lóng是由特权者－日本人来做。好ka-chài，tī基督教会团体内底，特别tī长老教会体政内底，台湾人有机会学习民主政治。众宗教家就得tio̍h机会，tī组织『中会』kap『大会』以后，hō͘选做教会ê议长soah成做全岛、全国性ê首领。黄俟命是tī 1939年4月21日当选南部大会议长，chit时tú好世界大战爆发前ê冬半，长男彰辉离开台湾去英国了后，经过了一年八个月，日本政府对基督教会施加压力，致使万荣华mā tī he年11月，结束tī台湾ê英人长老教会宣教师会，tńg去英国。

林金是黄俟命ê夫人，mā是黄彰辉ê母亲。根据kiáⁿ儿ê回忆，伊是神学注释ê老师，每一pái对『阿公』所讲ê故事，ia̍h-sī对事物ê描述有疑问，伊一定会去问伊，对十岁前后ê少年，伊是百科全书，mā是解说家。做舍监夫人ê伊，实际上是寮母，ài注意关心寮内中学生ê身躯kap穿chhah、食、tòa、行ê问题，为tio̍h翁婿担任宗教家、校牧ê职务，伊『必然』mā『应该』是专业koh无报酬ê『义工』。彰辉kap差一岁ê永辉开始有记忆ê时，就是tī学寮边á，差不多是tòa tī玻璃窗内面ê宿舍、舍监ê背景内底生活。彰辉tiāⁿ-tiāⁿ回想伊家己kap台湾人基督徒ê认同ê根源时，tī头壳内lóng有母亲对世界、岛内社会、家族kap教会ê注解、解说、ia̍h-sī关察做根底。

下面ê图是黄俟命牧师亲笔所写ê家庭记录，虽讲是户籍表，其实是各人ê洗礼、坚信礼等等ê记载。表内底吴樱桃女士是黄俟命牧师ê续弦师母。
下面ê图是黄俟命ê相片

注一：伊入学hit年，日本总督府认定hit间学校做私立台南长老教会高等学校，以后，一直到日本结束殖民统治为止lóng叫做『台南长老教中学』，以下简称『长中』。 注二：参看杨士养牧师所tio̍h：《台湾信仰名人畧传》第二册－p.83-86，kap杨牧师tio̍h、林信坚修订本：《信仰伟人列传》p.85。

第三代宗教家黄彰辉牧师 黄彰辉三字，tī台湾，发音作Ng Chiong-Hui，tī家庭、朋友师长kap同学、教授同僚kap学生、教会内ê同工kap会友之间，伊是hō͘人称呼做Ng Bok-su。Tī日本ê统治之下，官界kap教育界lóng受压迫使用日语，所以仝款ê三字，变发音作Shoki Ko。tùi伊入公学校（小学）到完成大学，甚至到英格兰留学，kui-ê受教育ê期间，伊lóng hō͘人称呼为Ko Shoki。Tī蒋介石统治下ê台湾，官用语是北京话，伊ê名改发音作Chang-Huei Hwang（常简写为C.H. Hwang）。1965年，离开台南神学院，定居tī英国以后，hō͘名Shoki Coe做法定ê名字kap称呼。Án-ne，tī伊ê一生中，伊就有四个语言，发音ê名字。伊mā使用过三个国家，用三种无仝并音名字ê护照。黄牧师tiāⁿ-tiāⁿ感叹讲：『名字hiah-ni̍h chē，koh领过hiah-ni̍h chē国家发ê护照，m̄是彰显台湾人荣光ê历史，是指故乡经历真chē世代受压迫ê悲哀。』

伊为tio̍h准备成做第三代传教师，tī 1937年读完东京帝国大学哲学系，koh再立志往剑桥ê西敏斯特学院（Westminster College）留学。黄俟命有心ài彰辉知影in厝ê根，kap tī ia̍h-bōe归依基督教信仰以前ê宗教型态、文化情境，kap生活伦理现况。Tī往英格兰留学chìn前，父亲黄俟命ài黄彰辉到『故乡』ê东港去访问『郡叔公』。伊是阿公黄能杰siōng少年ê堂弟，大概大黄俟命10岁，大彰辉30 gōa岁nā-niā，生活富裕。彰辉tī『郡叔公』厝里tòa两三工，主要ê向导就是『郡叔公』ê长子天德，kan-tāⁿ大彰辉一两岁。有一工暗时，chit位少年ê堂兄天德，找伊去看阿公能杰tī归依基督教以前，做法师时ê庙宇。起头，彰辉好奇，想beh向前探望，m̄-koh无久就起惊hiâⁿ ê情绪，koh变成破病仝款。伊所感受ê心理ê高昂kap忧郁，致使伊ē-tàng体会到家庭tī信仰上ê『埃及』旧故乡ê状态，kap『出埃及』前后ê心路历程。

Án-ne受高等教养造就ê黄彰辉，是黄家第三代ê宗教家。Tī 1947年，tùi英国回乡当时，是台湾出身ê宗教厝内受siōng高ê正规教育ê人物。像伊ê父亲服务长中18年，伊mā任教tī长荣中学两年。两年后ê 1949年，35岁，伊就受封立做牧师，koh担任台南神学院院长。Tī台湾siōng久ê大学程度ê学府历史内底，伊是台湾本地人第一位做院长。Tī 1949年当时，伊可能mā是siōng少年ê高等教育学府ê首长。牧师ê称谓，是基督教会hō͘神职人员ê职称。学者ia̍h-sī宗教家，无一定就是牧师。m̄-koh，牧师ê职份，就是一定beh向一阵ê人，负起灵性方面ê养育，生活上ê指导，顾in全部ê人ê福益ê责任。

Tī神学院做院长，mā担任系统神学ê教授，伊ê任务影响kui-ê台湾基督长老教会。因为伊教导神、人、教会，kap社会、世界ê连贯kap互动。神学是牵连到科学、政治、经济、医疗等等ê伦理、理念ê领域内底ê。所以伊主张神学是人tī活活ê社会、国家、世界ê实况内，不断teh进行ê『省思kap考究』。

黄彰辉后来称家己为『神学教育家』。ùi chit种ê称呼，咱thang看见伊有『神学家牧师』ê志向。伊kā一生主要ê精神灌注tī『思考』、『启蒙』、『感化』、『养育』ê工作内底。m̄-koh因为是时代ê需要，mā ài顾tio̍h『人事』、『管理』、『经营』、『硬体』方面ê院务。伊ê牧养工作，m̄-nā是学生ê功课、生活环境，延伸到in ê健康。会记得，1951年入学ê学生李培道入台南病院治疗，伊听tio̍h李需要输血，就去病院请医师kā伊家己ê血抽hō͘李氏。教授内底，bē少人mā得tio̍h黄院长ê『鼓励』、『催逼』、『推荐』，去外国深造。Tī伊做院长ê 16年内，伊所接触ê牧师、长老、教会，遍布全台湾。伊tiāⁿ-tiāⁿ唤醒台湾ê教会：『宣扬基督教ê好消息，mài单独行事。世界角落lóng有同道、同志、同工teh关心、祈祷，in mā需要咱关怀、代祷。』黄院长tī台南神学院任职ê期间，破例接受台湾基督长老教会总会议员推选伊两pái（1957年kap 1965年）担任总会议长。虽然tī伊ê时代，身为台湾人，tī政治上无法度到siōng-koân，soah tī教会内底做首长，整合会内ê各种组织、运动kap展望，koh ē-tàng对所共存ê社会kap政治团体，表明关怀。Koh-khah进一步，mā tī国际社会负担教会领袖ê义务kap责任，参与国际教会ê外交kap合作，koh奉献tī建立世人ê和谐、合作kap世界ê和平。

Tùi 1965年，伊辞去台南神学院，koh进入普世教会协会（World Council of Churches)内底，专职服事tī全世界上神学教育ê进展。伊做普世教会协会ê神学教育基金会ê主任干事（原先ê名称是：The Theological Education Fund，后来改称做Programs for Theological Education）。Tī伊ê属下，bat有非洲出身ê神学家图屠牧师（Dr. Desmond Tutu），mā有亚洲出身，做过神学院院长ê女神学家周藤牧师。图屠牧师因为是南非出身ê乌人，目chiu金金看『分离歧视乌人ê政策』，身tī伦敦以世界当做舞台，soah心tī故乡想念千万受歧视、压迫ê同胞。Tī 1975年，当伊hō͘选做约翰尼斯堡第一位乌人福音派主任牧师ê时，图屠牧师kā伊ê去留，kap对乡土ê使命等ê烦闷，the̍h到主管黄彰辉牧师面前ê时chūn，黄牧师鼓励伊tńg去『kap同胞同甘苦』。隔冬1976年，图屠牧师hō͘选做赖索托主教。Tī 1984年10月，图屠牧师因为领导以非暴力反对人种歧视压迫ê活动，koh得tio̍h诺贝尔和平奖。

黄彰辉ê脚踪遍布世界各洲。伊ê任务特别注重tī帮助、加强发展中国家kap地区内ê教会kap神学教育机构培养传道人才，tī参与欧美ê教会活动ê时，mā tiāⁿ-tiāⁿ为第三国家ê弱势教会代言。伊tī chit-ê职位lóng总做14年，到1981年退休为止。

黄彰辉tī普世教会协会服务ê 14年内，台湾基督长老教会进入伊以前所教导ê学生做领导ê时代。In展开教会做全台湾、全岛人民讲出心声，声明台湾ê前途，应该由台湾人民来决定ê信念。以总干事高俊明kap总会议长、总会常务委员会组成ê教会首长做决死ê觉悟，作出了三pái勇敢ê声明。第一pái是：『国是声明』（1971年）；第二pái是：『咱ê呼吁』（1975年）；第三pái是：『人权宣言』（1977年8月16日）。国民党政权对长老教会出自宗教信心ê教会声明kā伊歪曲、曲解，像面临大敌仝款hō͘伊chiok大ê压迫。Tī国外ê黄彰辉，热心帮助，soah chiūⁿ国民党ê乌名单，tiāⁿ-tiāⁿ来到东北亚kap东南亚，soah无法度回国为后辈鼓励相助。Tùi án-ne利用一pái到纽约ê机会，tī 1972年12月25日，kap tī北美ê三位台湾人基督徒领袖，同齐发表『台湾人民自决运动宣言』，koh发起『台湾人自决运动』。这运动thang讲已经是由台湾岛内纯粹ê宗教活动，变成世界性、国际性ê宗教人士ê政治活动。Án-ne，tī台湾，为tio̍h beh对付压制人民400年ê外来政权，thang讲是由宗教家藉tio̍h上帝所赋予心灵ê力量kap勇气，去帮助改革旧ê专制kap压迫ê政权，koh换来新ê民主。这是台湾ê宗教历史上ê创举，mā是宗教家黄彰辉所留hō͘伊ê学生kap后辈ê典范。