《宁毁不銹―马偕e5故事》

 | | | 转寄

第it-ê门徒

作者 曹永洋 2009.03.01

马偕学习语言，研究文字lóng是为tio̍h宣教，m̄是为tio̍h学习来学习，koh-khah m̄是一种纯粹ê研究。

以家己古老文化做中心ê汉人，tùi明朝后，to̍h kā外国人lóng看做蕃á，全部lóng是无开化ê「番á」，所以叫红头毛ê荷兰人「红毛蕃」，叫基督教 「番á教」，kā水泥叫「红毛土」，「火柴」叫做「番á火」。
马偕开始tī淡水以文字传道，找一大张中国报纸，kā十诫印tī报纸顶，贴tī 厝门ê gōa口，这张纸随hō͘人kô͘ làm土，koh hō͘人thiah-tiāu，tah第二张mā仝款ê运命，等kàu贴第三张，chiah好好á保留..落来。

Chit位汉化siōng深ê西洋传教士，对台湾农艺亦有贡献，譬如菜头（菜头）、臭棉子（柑á蜜）、菜花（花á菜）、高丽菜（廿蓝菜）、敏豆、胡菜头、甜菜、外国芹菜等¨¨，有bē少是伊tùi欧美输入种籽，chiah 藉tio̍h教士、信徒，tī台湾各地栽种，渐渐推广生炭..e。

Tī北部淡水tòa..落来ê马偕kap tùi南部..起来ê男仆，逐工暗时固定lóng会tī厝内作伙唱圣诗kap读圣经。In ê行为引来真chē外人ê注意。

有一工透早..起来，一个少年人，名叫严清华。伊ê汉文造诣真深，举止斯文， 谈吐mā真清秀。马偕对伊印象真深。

严清华ê khiā家是离马偕厝主kan-tā三分钟脚程ê三栈厝，后来翻起做有名ê「白楼」（目前已经拆归若年..a）。

伊来ê第一暗，马偕送伊一本圣诗。以后连续三暗伊lóng找伴作伙来。上尾á一暗作伙来..ê iáu有二十gōa ê地方士绅kap教师。

In之间难免有人带tio̍h怀疑ê态度对马偕，所以tio̍h针对宗教比较chit-ê主题，kap伊展开一场辩论。当in发现chit-ê「番á鬼」竟然对儒、释道、mā有精确ê见解kap研究，心内难免感觉敬佩。上尾家己知影无法度辩赢马偕，一阵人tio̍h lóng来离开。

半点钟后，chit-ê青年koh tńg..来。伊向马偕表明心志，愿意接受基督当做伊 ê救主。

Chit-ê大家叫伊「阿华」ê青年人，做过官吏ê私人秘书，bat去中国各地旅行，也bat tī北京tòa过半年。

第二工，严清华就搬进去马偕住ê所在，成做马偕ê仆人、学生kap朋友伴。

马偕离开加拿大，立志beh去东方宣扬福音ê时阵，就认为tio̍h ài由本地人来管理本地ê教会。原来tùi南部同齐来ê男仆，发现主人无眠无日学习台语、汉文，心肝底感觉真iah-siān，无jōa久就离开无做..a。

Tī生活中失去助手ê马偕，祈祷上帝ē-tàng赐hō͘伊一个ē-tàng担任圣职ê青年。Chit-ê祈祷应验了。

22岁ê严清华，是一个老实ê仆人，mā是siōng聪明kap kut-la̍t ê学生。马偕教伊阅读kap书写罗马字，伊进步真紧，hō͘人感觉真意外。

马偕mā把握机会向阿华学习台湾话，渐渐来克服发音ê困难。2个人tī厝无出门ê时阵，kui工同齐证册、唱圣歌、研订圣经，反覆来练习功课，厝边看tio̍h chit种情形甚至认为in起siáu..a。

严清华成做马偕tī台湾第一个ê门徒。伊事主忠诚，追随马偕四界传道，tio̍h 像提摩太追随保罗hit种。