《宁毁不銹―马偕e5故事》

 | | | 转寄

余音仍绕梁

作者 曹永洋 2009.05.03

合唱团团员内底陈酒治、骆先春等日后lóng成做出名ê音乐家。陈泗治校长m̄-nā是优秀ê作曲家，mā是杰出ê钢琴家，伊后来tī战后担任20 gōa年淡江中学校长。伊回想恩师吴师母ê时chūn讲： 「吴师母教钢琴认真严格， chi̍t点á lóng无清采，伊tiāⁿ-tiāⁿ对学生讲：『音乐无「差不多」这款代志』」。There is no “just about”in music.


台湾教会tī亚洲bat有「唱诗ê教会」ê美誉，吴师母thang讲是大功臣。1930年4月29日伊bat亲身tī当时音乐水准siōng高 ê医专讲堂（今á日ê台大医学院前身）指挥chi̍t场创新koh盛大ê大型演奏演唱会。团员除淡水中学、淡水女中学生以gōa，iáu包括 台北几所礼拜堂ê圣歌队参与演奏。演唱者有百gōa位，伊ē-tàng得tio̍h「北部教会音乐之母」ê美名m̄是好运 --ê。


台湾基督教长老教会1964年编订ê圣诗第317首＜你若欠缺真失望＞ê歌词，to̍h是出自吴师母ê手笔。当年吴师母写chit首圣诗ê时，to̍h是吴威廉牧师陷tī宣教困境ê时chūn。牧师娘所写圣诗，歌词是án-ne：


「你若欠缺其失望，我当尽力来帮助，救主看了就欢喜，显明真实趁道理。¨¨咱决意相爱，咱决意相爱，咱决意相爱，求圣神来帮助。」


吴牧师看了真感动，伊重新找tńg来信心，重头koh来，认真继续tī chit块土地上继续为主做工。吴牧师过身了后，牧师娘iáu sì界作育英才，伊m̄-nā致力tī音乐教育，是音乐界ê慈母，另gōa伊mā是信徒伟大ê慈母。


伊关心传道师ê家庭kap贫苦ê信徒，伊对家己苛刻，对待人真好，tiām-tiām-á行善，tī透早或者是半暝探访病人，伊ê话中总是充满仁慈、温暖，推动教会事工，有头有尾，m̄-bat改变，是真有效率ê行动家。


吴师母tī 1960年以93岁ê长岁寿安息主怀。伊无论tī教会、学校或者是病院，甚至tī ma-lá-lí-á病院，伊留tī hiah-ê人ê心肝内ê印象就是爱kap实践。


Chit-ê对台湾奉献真chē ê翁á-bó有2男4女。长男tī第it-pái大战中不幸死--去。次男为医生、长安为护士亦是宣教师。次女siàu年tio̍h来过身。 第saⁿ ê cha-bó-kiáⁿ做医生，第sì ê cha-bó-kiáⁿ做护士。Chiah-ê后生cha-bó-kiáⁿ对台湾社会ê贡献mā真chē。


Tī chia特别beh来提起，后来koh有chi̍t位ùi加拿大来ê德明利姑娘（Miss Esabel Taylor, 1909-92）。伊到台湾了后接--落来吴师母培育音乐人材ê工作。30到70年代bat tī淡江男、女校就读ê学生，无人m̄-bat chit位出名ê钢琴大师。


台湾乐坛真出名ê骆先春、陈酒治、陈信贞、郑锦荣、吴淑莲、林淑卿、詹怀德、骆维道、郭淑道¨¨lóng是伊ê高足，台湾百gōa年来，ē-tàng有án-ne高ê音乐水准，人才辈出，吴师母kap德姑娘灌溉ê心血功bē-tàng无。