《宁毁不銹―马偕e5故事》

 | | | 转寄

弦á声永远bē停

作者 曹永洋 2009.04.12

今á日ê淡水kap百gōa年前ê沪尾港，已经有真大ê差别。清澈ê河水phah无去..a，淡水河变成chi̍t条乌河。河对岸ê观音山，it向是画家笔下chi̍t座iau-kiau ê青山，m̄知tang时山顶已经有真chē bōng，山脚高大ê楼á厝mā kā美丽ê景观破坏去..a。

Hiah-ê人亲目睭看tio̍h古迹，心肝内lóng忍bōe-tiâu莫名ê感动kap乡愁；俯瞰淡水河，马偕博士ê后辈柯设偕先生笔下所描绘ê淡水「诗美之乡」，mā跃siōng tī历史ê舞台。

1872年3月9日马偕自沪尾登陆，先tī街á顶租chi̍t间hoàn厝，开始教育ê工作。伊tī传道ê旅途中，mā随时随地授课，地点包括伊ê khiā家、淡水海边沙滩、大cheng-á脚ia̍h-sī现在淡水高尔夫球场附近ê小山仑顶。

「神学院开拓时代」ê露天教育，差不多thang kap印度诗人泰戈尔创办ê国际森林大学ē比phēng。上课ê时有蓝天白云，微微á ê清风kap水声做伴。

露天教育时代ê早期弟子，包括siōng早受洗ê gō͘-ê门徒以及陈荣辉、陈云腾、萧大醇、刘求、许锐等22名学生。

牛津学堂tī 1882年7月21日起好。仝年9月14日正式开学。

当时无入学考试，学生lóng是各地传教师推荐ê优秀青年。chit批学生包括洪安、曾俊、何狮、叶顺、郭希信（郭主）、高才等18人。

牛津学堂所教授ê学科，除了神学、圣经，iáu有社会科学（历史、伦理）、自然科学（如天文、地理、地质、植物、动物、矿物）、医学理论到临床实习等。

开学初期ê教师阵容是án-ne：马偕博士教圣经道理、圣经历史、解剖学、地理学、植物学；严清华牧师教马可福音、中国历史;陈荣辉牧师教天文、地理；连和教中国字部kap中国历史；洪胡教希伯来书。Chiah-ê老师lóng是马偕tī露天教育时代所训练、教育ê早期学生。

马偕博士讲授动物、植物或者是矿物的时chūn tiāⁿ-tiāⁿ the̍h实物来说明。譬如the̍h猪ê腹内来说明，或者是the̍h各种矿物来hō͘学生in看，有时iáu会hō͘学生去采集各种指定ê植物。Tī hit-ê时代chit种实地教学会使讲是真先进..e。



学生暗时集合tī讲堂内底，发表hit工ê心得，上医学课程之外，中昼歇困息的时chūn mā到偕医馆去协助帮忙马偕博士，情形ná今á日医学院学生tī病院实习ê型。学生讲道ê训练或者是讨论，mā通常tī讲堂内底演练展开。

牛津学堂tī当时ē-sái讲为chi̍t间相当进步，教学方法真现代化ê学堂。

牛津学堂创设3年了后（1885年）9月21日，英国长老教会tī府城（台南）创设长荣中学。10年了后（1895年）日本侵占台湾，日人伊泽修二率领6位教师，tī士林近郊ê芝山岩惠济宫开班授课。了后ê 50年内（1895－1945），台湾先民早期ê汉学á教育宣告结束，台湾正式进入日据时代全面殖民教育ê时期，台湾ê教育史mā发展成做另外chi̍t种全新ê局面。

西洋传教士tī台南展开ê教育、医疗奠基工作，马偕ê牛津学堂、偕医馆ê创立，lóng tī日本据台chìn前tio̍h已经开始，彰化基督教病院，mā tī日本登陆隔年1896年11月23日，由兰大卫医生创立，了后由伊ê kiáⁿ兰大粥来接伊的工作，父kiáⁿ 2代做伙为台湾医疗宣教工作，tī中部写出动人ê chi̍t章。