《宁毁不銹―马偕e5故事》

 | | | 转寄

杏林春常暖

作者 曹永洋 2009.04.19

马偕tī 1872年3月9日来到淡水，根据伊日记ê记载，当时台湾麻lá-lí-á 当流行，居民bē少因染tio̍h chit款病来死..去。

Chi̍t百jī-cha̍p gōa年前，台湾各地ê卫生环境普遍lóng iáu真差。it般民众khiā家ê周围lóng发真chē草，水沟á无通，sì界lóng làm土，báng-á真厚，所以传染病sì界传播。

伊免费用金鸡纳霜特效药替患者治病，chit种药á hō͘人叫做「马偕ê白药水」（气味真苦，了后改做药片）。Iáu有染tio̍h「腿脓疮」（俗名臭脚黏）ê患者mā真chē。

马偕由英国买牛奶色ê膏药，kô͘ tī患者脓烂ê所在，效果真好。Hiah-ê khè药膏ê瓮á，直径12寸，瓮á口直径5寸，瓮á高1尺2寸。Hi̍t种药á ùi伦敦Darin Brotters制药公司买..e，部分ê药瓮á iáu保存tī今á日「偕医馆」内。

来台初期，伊用可能ùi多伦多kap纽约时代学ê医疗技术，tī台湾布教ê仝年开始为患者治病。有ê病患甚至行5、6哩来沪尾就诊，为tio̍h jú来jú chē ê病患，5月5日另gōa租chi̍t间厝当做医馆，叫「沪尾医馆」，地点tī今á日淡水三民街口。马偕siōng早期tī厝内看病ê时chūn lóng是亲自诊断，学生（包括信徒5人kap第it代门生）做助手。淡水英商5行ê Frmkyn医生mā来斗saⁿ-kāng。

租厝成做「沪尾医馆」了后，另外chi̍t位5洋行医生林格（Dr. S. Ringer）mā来斗saⁿ-kāng。
马偕担任伊诊病时ê翻译，mā hō͘学生有机会见习。林格医生前来帮忙有7年hiah久。当时基隆mā有几位gōa国医生参与医疗工作。
无久马偕向母会申请chi̍t位专职医生。1875年1月29日加拿大派来第jī位宣教师，华雅各医生（Rev. J. B. Fraser, M. D.）到淡水来协助。可惜2年后，华雅医师ê bó͘来过身，华雅医师只好chhōa 2个cha-bó͘-kiáⁿ tiām-tiām-á离开台湾tńg去加拿大。

1878年有1个葡萄牙人，因为破病来「医馆」求治，kúi工了后不幸死亡。林格医生为tio̍h查出原因，就kā病人ê尸体剖开化验，结果tī肺部发现指甲hiah大ê虫，这是全世界第i̍t pái ùi人体内发现「肺侄虫」，tī-chia chìn前，医学界bat ùi动物体内发现「肺侄虫」，m̄-koh人体内发现是头一pái。因此tī医学病例史顶头mā是值得写记录ê代志。

1879年3月马偕买「沪尾医馆」东pêng ê土地，策划起新医馆，tī林格医生kap Maun医生ê协助下tī 5月18日完工开业，koh tī 9月14日举行新医馆开幕礼拜，由马偕证道，众朋友kap医馆内底ê助手lóng到场参加。

马偕结婚了后ê第jī年（1879年12月26日），伊chhōa bó͘第it pái tǹg加拿大。长女偕妈连6个月大，第jī cha-bó-kiáⁿ、孤kiáⁿ chit时iáu未出世，算算leh这是伊tī台湾宣教7年了后难得回乡的旅行。

离开台湾chìng前，伊kā当时北部22所教会，大概3百名信徒交代第3位宣教师闰虔益牧师kap 21位本地传道师。

Chit段期间伊tī加拿大各地演讲证道，mā bat去美国几pái，伊去演讲募款是为了ài tī台湾展开第2期ê宣教工作。

加拿大皇后大学趁伊chit-pái回国时，颁hō͘马偕「神学博士」学位，藉tioh8an2-ne表扬伊teh海外宣教ê成就，了后世人lóng尊称伊「马偕博士」。

1880年底，美国底特律有chi̍t个妇人，为tio̍h纪念马偕船长（Captain Mackay）捐出3千美金，协助马偕tī台湾ê宣教工作。马偕运用其中ê 2千5百kho͘美金，tī 1883年起「沪尾偕医馆」，简称「偕医馆」（Mackay Hospital）。

1884年8月6日，清廷为tio̍h越南问题kap法国开战，俗称「西á反」，本来tī安南局部性ê战争，演变为两国全面性战争，交战竟波kap台湾。

法国派出了两支舰队，分别由海军少将李士卑斯kap中将孤拔领军，停tī基隆、沪尾gōa海。法军ê战略，原本beh夺下台湾当做进攻福州ê跳板，进chi̍t步koh消灭清国海军，nā是攻打台湾就选择产煤丰富ê基隆做目标，台湾巡抚刘铭传亲身去前线督战，法军第it波攻击bōe-tàng成功。

8月底法国海军koh强烈攻打基隆，chit时沪尾战况mā真危急，刘铭传决定去援助沪尾。Chit时出现tī沪尾ê法国舰队向岸顶开炮，民众kap士兵伤亡bē少。



10月8日法军登陆，双方teh沙仑展开chi̍t场血战，交战ê结果，偕医馆真自然tio̍h成做清军ê野战病院。

为tio̍h抢救伤兵，马偕动员学生kap街á顶ê市民，用门板当作担架，扛来ê伤兵放满医馆ê门口，路边kap桥ê sì周。当时gōa国医师约翰生kap战时驻tī淡水港ê英舰「柯克哈特号」军医布罗恩等，mā热心参与救治工作。

中法战争结束了后，治台七年，对台湾近代化贡献突出 ê刘铭传，10月19日派淡水防卫司令孙开华提督，亲自到偕医馆向马偕致谢，并以墨西哥银万jī赔偿遭暴徒拆毁ê教堂，koh感谢in救治伤兵正义ê行为。

「偕医馆」亲向chèng前讲..e，是马偕博士tī 1883年起好..e。建筑费ê来源是美国底特律ê chi̍t名妇女，beh纪念死去ê翁婿马偕船长捐献..e。目前伊iáu koh tī淡水街á顶kap淡水礼拜堂离无jōa hn̄g。内面保存真chē马偕当年使用过ê用品、医疗器材、相片kap其它珍贵资料hō͘人参观。

讲到目前tī台北市中山北路2段92号ê病院大楼，1956年4月18日，根据长老教会第9届北大第123条款，议决确认做「马偕纪念病院（Mackay Memorial Hospital），这chiah是纪念马偕博士创建ê病院。伊经过拆掉kap重起ê蜕变，chiah有了今á日雄伟ê规模kap设备。
M̄-na án-ne，台北iáu有淡水竹围分院kap台东马偕纪念分院，马偕遗泽台湾后代子民m̄是3、2句话ē-tàng讲完..e。