《草地囝仔做牧师》

 | | | 转寄

幸福ê人生（二）

作者 林宗要 2010.08.29

申命记二十八章1～4节；希伯来书十二章5～11节

每一个人心中lóng teh期待幸福ê人生，因此所有ê人mā lóng 尽力teh追求chit种人生ê幸福，当然，因为每一个人ê价值观无仝，难免对幸福有无仝ê观点。一般人ê观念，人所追求ê幸福通常lóng是以现实为主，比如财富、权力、平安等等ê现实问题，tī圣经中mā有chit种情形。旧约中讲福气时，通常是指性命、长寿、财富、kiáⁿ儿kap平稳ê生活等等，chiah-ê观点kap现实人生ê想法真相siâng。咱看圣经中上帝hō͘以色列人ê应允就知影，上帝要求以色列人kap他ê关系ài纯正，他就会将hiah-ê人所爱ê性命、长寿、财富、kiáⁿ儿ê成就，以及平安ê人生赐hō͘只要遵守他命令ê人，tī圣经中chit种讲法四界thang见tio̍h，譬如十诫中ê孝敬父母，保罗讲这是chah应允ê诫命，人若遵守这诫命，就会得tio̍h亨通长寿ê人生（以弗所书六章３节），约伯记一章２～３节，讲约伯ê家境时，因为伊ê财富hō͘伊成做当地ê大好额人，mā是hō͘人认定为siōng有福气ê人，而且伊ê财富kap众kiáⁿ儿mā是hō͘人感觉幸福ê因素之一（诗篇一二八篇）。另外tī旧约中强调chit种幸福ê人生，除chiah-ê物质条件外，tī kap上帝关系上mā仝款--ê完美，chit种内在心灵ê完美mā是成做人生幸福ê要件。

基督徒ê幸福观，当然有一般现实面ê考量，而且基督徒ê人生种种现状，若是tī非常困难时，beh如何见证信仰生活ê价值？假使每一个基督徒lóng生活tī chiok恶劣ê现实环境中，如何向chiah-ê重视现实ê一般大众，见证基督耶稣ê福音？这是非常困难--ê。所以tī现实ê世界，有成就之基督徒，若ē-tàng有见证ê生活， án-ne，tī上帝国ê宣教事工上必定khah有正面价值。Tī chit种情形之下，基督徒ài骨力phah拚，用伊所有ê智慧kap信心建立koh-khah有成就ê人生，来成为荣耀上帝ê工具，án-ne对教会chiah khah有正面ê影响。当然tī-chiah所要求--ê，是信仰kap生活完全一致，chiah ē-tàng表现出正面ê信仰价值。尤其是tī有利益tio̍h提、重利轻义ê台湾社会，基督徒koh-khah ài明白，咱ê信仰tī时代ê功能是什么？

特别是对tī追求人生幸福ê心态上，基督徒必须ài有khah正确kap符合上帝心意ê价值观，chiah ē-tàng tī现实中显出信仰ê内容，咱ê信仰chiah ē-tàng真正成做光kap盐来影响、调和社会，koh表现出信仰ê实际价值。

所以基督徒必须ài建立正确ê幸福观以导正咱ê信仰kap生活ê真实内容。

诗篇十七篇14～15节「耶和华ah！求你用手救我脱离世人，脱离he只有tī今生有福份［分］ê世人，你kā你ê财宝充满tī in ê腹肚，in因为有kiáⁿ儿就心满意足，将in chhun--e 5财物留hō͘ in ê孩儿，讲tio̍h我，我必定teh义中看见你ê面，我醒ê时chūn tio̍h看着你ê形像，就心满意足。」二节经文lóng提起心满意足。（请注意，人生状况ê心满意足，to̍h是咱所谓ê幸福ê人生），前者是tī物质ê丰盛kap多子多孙，后者是看见上帝ê形像，二者ê差别非常大，前者所重视ê是tī今生ê物质世界，好亲像保罗tī腓立比书三章19节「in ê结局是沈沦，in ê上帝是家己ê腹肚，in以家己ê见笑做荣耀，专门以地上ê事为念。」一个人若只注重看会tio̍h ê今生（会记得！圣经中讲—着世界时用花kap草来比喻伊，虽然有时真荣华，但是目一nih就干干阿，这是真实世界），kan-nā追求今生ê福气，伊ê结局是虚空。诗人讲：「世人行动实是幻影，in无闲真是了然，俭ê钱kap财宝，m̄知将有siáng beh来收走」（诗篇三十九篇6节），chit种人生现象是每一个人lóng会体验tio̍h ê，只是人tī现实ê境况中，定定会因为利害关系来迷失，这是基督徒ài省思ê。通常基督徒lóng真清楚tī属灵ê过程中，上主对咱ê要求kap咱应该有ê本分，只是有时tī现实ê人情世事顶面，咱无法度表现出khah符合信仰要求ê生活，soah造成基督徒ê信仰生活成做有名无实ê状态。

一、 过失得tio̍h赦免，罪过得tio̍h遮khàm ê人生（诗篇三十二篇1～2节）
Tī-chia所讲ê「过失kap罪过」lóng是指对上帝ê违背，破坏法律中上帝ê诫命，这就是圣经所讲ê过失，讲到罪过tio̍h是偏离中心，丧失人生正规ê圆，另外一种就是不义mā算别人hō͘-- ê罪过，心怀奸诈是指人性ê道德ê混乱，放sak了人生正道，生活tī恶质ê境况中，就是不义。

诗人以chit三种不法ê罪过得tio̍h上帝ê赦免、遮khàm，tī chiah-ê人心中，就是心无奸诈，chit种人生就是幸福ê人生，chit种人生ê特色，就是ē-tàng进入kap上帝有纯洁ê灵交ê关系。

Chit种无罪（罪已经被上帝赦免）ê人生tī心灵上有无限ê喜乐kap充满，chit种状况就是成做人生幸福ê要件，因为一个幸福ê人，心中必定完全充满tio̍h喜乐kap满足。若无是无幸福thang讲ê。咱以实际生活为例，一个普通人若犯了什么对良心有负担ê过失或者罪过时，mā可能伊ê作为无人知影，ē-sái讲是伊会一直受tio̍h良心ê谴责，行动上有时会有无正常ê表现，主要因为伊所犯ê过失hō͘伊良心不安，甚至成做生活上ê负担。心肝cho-cho koh惊惶不安ê人，是无幸福thang讲。

有一个故事讲一位优秀ê学生用弹弓phah死厝边阿婆ê鸡母，认为无人知影，soah hō͘另外一位居心不良ê学生看tio̍h，后者利用资优生ê弱点kā伊khà油，父母hō͘伊ê钱差不多全部hông提去阿，tú-tio̍h考试ê时，koh ài hō͘伊看答案，因此造成chit位资优生ê忧闷，bē食bē困，因为án-ne来变瘦，hō͘阿母发现了后chiah共伊讲实情，了后伊ê阿母 chhoah伊到阿婆in家会失礼koh赔偿阿婆，伊得tio̍h阿婆ê赦免，koho-ló伊ê真老实，伊mā因为án-ne内心充满tio̍h喜乐kap满足。隔转工hit位居心不良ê学生照常向伊khà油，伊坦然无惊惶mā无加共伊chhap，当chit位有心机ê学生kā 阿婆讲ê时，颠倒hō͘阿婆骂。Chit-ê故事kā咱讲一个真理，就是内心ê平安源自内心ê坦然自在ê感受，确实，一位基督徒kap耶稣建立完美良好ê信仰关系ê时，必定会体会tio̍h罪得tio̍h赦免ê hit种内心ê轻松，主耶稣teh传教福音时，定定向hiah-ê求医治ê人讲「小子ah！你ê罪赦免阿」chit种罪得赦免ê情况，to̍h是形成基督徒充满tio̍h喜乐ê原因。基督徒ê生活中，ài充满tio̍h喜乐，chit种喜乐ê生活，是出自基督徒对罪得tio̍h赦免ê内心之感受，咱看撒该ê情形，就会明白chit种ùi内心发出ê喜乐真情ê流露，tī伊体验基督hō͘伊ê救恩了后，伊所表现出来ê感情kap向基督ê决定，伊愿意将财产ê一半救济sàn-chhiah人，若有对人欺骗ài 还四倍，chit种出自内心喜乐ê人生结局，就是伊完全体会tio̍h罪得tio̍h赦免ê甜美。所以咱ē-tàng了解诗人tī-chiah所讲ê chit种幸福ê人生ê内容是过失得tio̍h赦免，罪恶得tio̍h遮khàm ê人生。

二、 一生一世有上帝ê恩惠kap慈爱ê人生
头前咱bat提起，过失得tio̍h赦免，罪恶得tio̍h遮khàm ê人生是有福ê，因为伊ē-tàng体会tio̍h被上帝赦罪时内心所充满ê喜乐，实在是任何tāi-chì lóng无法度相比ê。但是基督徒必须ài清楚，被上帝赦免是一个人kap上帝之间ê关系ê起步，tī伊ê面前iáu有一段相当漫长ê人生路途必须ài去经营，起步虽然重要，但是koh-khah重要ê是继续ê生活内容，因为人生m̄-nā tī起步，koh-khah是tī继续行到人生ê终点，mā就是tī人生ê结局时，chiah ē-tàng论定人生ê成败，咱由实际ê状况来了解chit种情形，有真chē人ê起步真好，真有成就，ē-sái讲是tī性命ê继续中soah表现出失败ê人生内容，因此到终点时，chiah来面对tio̍h悲惨ê人生状况。

另外有一kóa人teh起步时ē-sái讲是坎坷，无论做任何tāi-chì lóng无顺利，lóng无成功thang讲，咱甚至thang用问题一堆来形容，万项tāi-chì lóng bē-sūn-sì，做tāi-chì无好ê结果，相信tī咱ê现实状况中，每一个人lóng会有所感受。人生是严肃ê存在，bōe-sái chhìn-chhái、马虎ê心态去经营，必须是严谨ê生活，chiah ē-tàng有美好充实ê内容，因此起步ê完美是无法度保证人生ê终结亦是完美ê。

Tī性命ê每一个时刻lóng必须尽心、尽力去面对，chiah ē-tàng建立理想ê人生景况。年轻ê时得tio̍h父母、家庭ê培养kap建立，到人格独立时，每一个人必须亲身面对人生，当然每一个人ê一生lóng 无可能完全仝款，有人ê一生充满奋斗，有人ê一生soah是轻松过日子，koh-khah有人ê一生是teh病痛中经过，一生m̄知流过外chē目屎，亲像苦海歌所形容，人生ê苦难，实在有各种无仝ê问题。

Tī chit种情形中，一个上帝赦罪ê基督徒ài如何去经营人生？这是一个关键性ê问题，tī-chiah咱应该思考，诗篇二十三篇尤其是最后hit节「我一生一世一定有恩惠kap慈爱跟随我，我koh ài tòa-tī耶和华ê殿中，直到永远。」

诗篇二十三篇是咱lóng真熟练ê。描写上帝照顾伊ê子民ná亲像牧者照顾羊群一般，有chit种心灵经验ê人生必定充满tio̍h喜乐kap满足，这是因为作者完全体验tio̍h上帝斟酌ê照顾kap引chhōa，无论tī何种ê人生境况中－－是死荫ê山谷或者敌人ê面前，lóng m̄惊gū害，因为伊完全经验过上帝恩典kap慈爱ê同在kap保守，对一位被上帝救赎ê人民，这是无tè比ê经验，tī你ê性命中，是m̄是体验tio̍h上帝ê恩典kap慈爱跟随你？这是基督徒ê信仰kap生活ê关键，是成做基督徒信仰价值ê重心，基督徒必须有chit种人生体验，就是kap诗人仝款ê体验，m̄-nā是口语上，却是真实ê人生经验，伊是确立tī基督徒对耶和华上帝ê信仰。Tī圣经中咱tiāⁿ-tiāⁿ会看tio̍h ê形容上帝ê属性ê一句话「他有怜悯、有恩典，bē chhìn-chhái受气，而且有phông-phài ê慈爱。」（诗篇一○三篇8节），「他ê慈爱是永远存在」（诗篇一○六篇1节，一一八篇1节）也tio̍h「归在敬畏他ê人」（诗篇一○三篇17节），tī圣经中四界lóng有慈爱kap诚实，恩典kap慈爱，牧师ê祝祷文mā有「主耶稣ê恩典，天父ê慈爱，圣灵ê感动」，因为恩典kap慈悲实在是tī复杂ê人生状况中siōng ē-tàng引chhōa属于他ê人行tī任何人生路途中ê siōng大ê动力，所以一个幸福ê人生，必须tī伊ê人生中，无论任何状况，经验tio̍h上帝ê恩典kap慈爱陪伴伊ê一生！

三、 听从上帝，肯定他管教ê人生
（申命记二十八章1～14节；诗篇九十四篇12节）
约伯记［纪］五章17节「上帝所处罚ê人是有福ê，所以你bē-tàng看轻全能者ê管教」，希伯来书引用箴言三章11～12节「bē-tàng看轻耶和华ê管教，mā bē-tàng厌siàn伊ê责备，因为耶和华所爱ê，伊一定责备，好亲像老父责备所爱ê kiáⁿ儿」tī申命记二十八章1～14节是强调听从上帝ê人ê祝福「你出mā蒙福，入mā蒙福」，出kap入是人生ê行动ê全部，伊是建立tī听从上帝ê话ê世界，tī圣经中，听从上帝ê话kap上帝ê祝福是bē-tàng分开ê，chit种应允是上帝kap以色列人立约ê根据，tī旧约中四界thang看tio̍h chit种应允。圣经时常用听从他ê教导koh有去行ê人，要求属于他ê子民ài有chit种信心ê行为。诗篇九十四篇12节「耶和华ah！你所管教，用法律所教示ê人是有福ê。」tī信仰ê路上，基督徒kap一般人仝款，mā会有起起落落ê人生状况，尤其是上帝对伊ê子民，定定会藉tio̍h各种无仝ê方法，有时hō͘ in phông-phài ê恩典kap慈爱，hō͘人体会tio̍h人生phông-phài ê甜蜜，但是有时上帝mā会藉tio̍h人所认为ê苦难kap不幸ê事件，发生tī伊ê选民中，就是圣经中所讲ê上帝ê管教kap督责，虽然chiah-ê管教kap督责是人无愿意去承受ê。

咱若以父母对kiáⁿ儿ê管教kap督责来做比喻，咱就会了解父母the教示需要管教e5kiann2儿时，lóng是用心良苦，但是以kiáⁿ儿ê立场来讲，in会真pháiⁿ接受，因为tī-chiah有责备，有时甚至会有体罚，kiáⁿ儿实在无愿意接受父母chiah-ê处罚，m̄-koh对确实有问题行为e5kiann2儿，父母必须hō͘-in相当程度ê管教kap督责，主要是teh引chhōa in行向完美ê人生。

以chit种情形来思考基督徒kap上帝之间ê关系，咱就khah ē-tàng了解，圣经中所要求ê听从上帝，肯受管教ê人生必定是上帝所祝福ê，因为上帝ê用心kap父母仝款是因为疼ê引chhōa，藉tio̍h管教kap督责伊ê子民，生活the符合他旨意中，所以基督徒若有chit种听从上帝而且肯受管教ê信仰生活时，必定有美好ê人生结局。

咱看主耶稣teh客西马尼ê祈祷，向上帝祈求徙走苦杯。但是主耶稣完全顺从天父ê意思，虽然他必须面对痛苦ê十字架，但是伊ê结果咱若看保罗tī腓立比书二章6～11节，咱就会明白主基督顺从天父ê旨意，甘愿接受chit苦杯，结果他成做全世人敬仰ê对象。启示录三章19节「凡我所疼疼ê，我就责备管教伊」。

结论：过失得tio̍h赦免，追求一生有上帝ê恩典kap慈爱，以顺服ê心去听从上帝ê话，肯接受上帝ê管教，绝对无m̄-tio̍h！