《草地囝仔做牧师》

 | | | 转寄

幸福ê人生（一）

作者 林宗要 2010.08.22

申命记五章29～33节；诗篇一二八篇1～2节

Tī中国古早时有一个老大人ê马phàng见ê故事，是teh说明，目chiu前虽然有损失，但是伊祸是抑是福iáu bōe-sái确定！祸福ê定义，是以现实ê状况来决定，因为chit款tāi-chì tī 现实生活中，是定定会发生--ê。

1982年八月台湾三义ê天顶有一ê大空难，其中有一对翁仔某（太太已经有身三个月），翁婿tī公司尾牙时摸彩抽到幸福奖，就是去高雄耍二暝三日kap两张机票，hit时全公司ê人，lóng认为伊是siōng好运ê人，因为抽到特别奖，但是伊选一九八二年八月二十二日ê hit-pang 飞lemg5机，soah tī三义ê天顶发生爆炸，机上ê人全部受难，chit-ê时chūn，无人会讲伊是好运--ê，soah讲，伊ê运气实在真歹运！若是he时chūn mài抽到特奖就好阿！相信tī 人间社会中，chit种祸、福ê状况，实在m̄是咱chiah无完全、有限ê人生所ē-tàng设想或者是料想会tio̍h--ê，相信tī咱每一个人ê人生经验中，对chit种祸福ê定义，必定有深刻ê感受，chit种状况，tú好说明人生ê有限性kap无完全。

虽然是án-ne，但是每一个人tī有限ê性命里，犹原一直追求tio̍h心中所认为幸福ê具体事实，亲像财富、权力、健康、趣味等等，但是有chiah-ê条件ê人到底有幸福boh？相信咱ē-tàng用咱ê思考去了解，实际上无完全ê！因为有真chē 有chiah-ê条件ê人，tī其他ê方面soah无一定是幸福--ê。

Tī一般人ê眼中，运命好、境遇顺--ê，就是幸福！因为in对幸福ê定义是指thang值得欢喜ê福气，mā就是tī人生中常有值得欢喜ê事，这就是hiah-ê人眼中ê幸福，若以人生有thang值得欢喜ê事来做幸福ê要件时，相信tī咱ê人生中，每一个人加减lóng会对幸福有所感受。

过去ê中国人社会ê三多五福（三多：多财、多寿、多男丁；五福：寿、富、康宁、有好德、考命终），tī农村社会ê门联或者la̍h-ji̍t-á ê花草，定定是以财、子、寿为主题， tī人心中所ǹg望ê人生内容，确实是chit种ē-tàng满足人现实ê三多五福，m̄-koh伊kám是人生实实在在 ê绝对幸福？

M̄-koh事实上，造成人对幸福ê观感ê问题，较m̄是tī外在条件，是tī内在感受。（当然这kap人生ê现实状况以及人生价值观，lóng有深刻ê关连。）tī顺利ê环境中ê人生，伊ê生活啥物lóng无欠，ài啥就有啥，m̄知天地有几两重，因此往往无法度对幸福有所感受。活tī顺境ê现代少年家，若kap前一代ê生活相比较时，顶一代ê人lóng会认为现代ê gín-á实在好命！但是chiah-ê 食好穿好ê现代少年家，无一定认为in ê命好到toh位去！事实上，咱mā ē-tàng tùi in ê生活中去体会tio̍h，确实tī in ê人生路途上，有无数ê压力kap各方面ê负担，（kan-nā以学业做例，咱就会明白in ê重担实在够重！tī chit种负担中，in ê人生kám ［ē-tàng］有幸福感？）咱知影幸福是人ê心中无过分ê负担，chiah有幸福thang讲，一个处tī极端ê负担中ê人生，实在真pháiⁿ体会tio̍h幸福，chē是以现实ê环境条件评定人生有幸福á无。但是有一kóa人，因为有纯正ê人生观，对tī现实状况所发生ê问题，就会有无仝ê表现，譬如：某长老ê孤子，三十gōa岁就tio̍h血癌死去，因为伊ê信仰，tī处理上有非常坚强ê表现，另外来看一有一位妇人，因为后生发生不幸，伊因为ta̍k工操烦，变成精神失常。

Chit种状况teh说明，人ê心态以及价值观，往往对人生有决定性ê影响，chiah会hō͘人生ê结局有真大ê差别。一ê老妇人有二个后生，一e5teh卖盐，一e5teh卖雨伞，因为án-ne伊ta̍k工lóng会怨叹、挂虑后生ê生活，惊会因为天气ê关系影响后生in ê事业，后来经过人ê指点，请伊用kap过去无仝ê想法看天气kap gín-á ê职业时，结果就完全无仝！果然，chit位老妇人了后ê生活，是以感谢来代替怨叹。Chit件 tāi-chì teh说明，仝款ê一件tāi-chì，经由价值观念ê转变，所产生出来ê效果完全无仝。

Chit种价值观念改变人生ê事实，是咱每一个人生中定定会发生--ê。因此，咱ê人生若ē-tàng以信仰kap智慧去建立纯正ê人生价值观（符合神旨ê人生）时，相信每一个基督徒ê生活，lóng会确立tī上帝所喜乐ê人生状况中，对基督徒来讲，生活符合神旨，就是成做人生幸福ê要件。诚然，一个基督徒ê生活若一直活tī上帝所喜乐kap祝福（这两件事实在圣经中是定定连作伙--ê）ê过程中，伊的确会感受tio̍h生活中ê福乐满满，chit种现实会tùi基督徒ê信仰生活开始，以充满感恩ê心情去面对所有ê人生现象，往往会有真丰沛ê人生，tùi chit种生活中表现出来，chē就是幸福ê人生。

真chē人「人在福中不知福」，chit种人ê特色，就是无感恩ê心，in所有ê lóng是不满或者怨叹。假使，人是用chit种不满kap怨叹建立in ê人生ê时，无论伊ê人生境况如何，lóng无可能有幸福感！因为幸福是发自内心ê满足，m̄是由外面sak入就有。确实tī人生ê现放中，咱ē-tàng深刻ê体会tio̍h，chit种ùi心中所满出来ê幸福，chiah是真正ê幸福，伊bōe受tio̍h现实ê任何境况来kā伊改变或者转换--ê。

（一） 倚靠上帝ê人生（申命记五章29～33节）
「凡投靠伊ê，lóng是有福ê」。（诗篇二篇12节）

「Lín ài tam tam主恩ê滋味，便知影伊是美善，投靠伊ê人有福了」。（诗篇三十四篇8节）「万军ê耶和华ah！倚靠你ê人，便是有福」。（诗篇八十四篇12节）「当将你ê事交托hō͘耶和华，并倚靠伊，伊就必定成全」。（诗篇三十七篇5节）其他iáu有真chē经节提起，凡是óa靠上帝ê人生，ài得tio̍h丰盛（箴言二十八篇25节），凡是倚靠耶和华ê，to̍h得tio̍h安稳（箴言二十九篇25节），诗人mā讲：倚靠耶和华ê人，kah-ná锡安山，永远bōe动摇（诗篇一二五篇1节）。

Tī咱ê一生中，若有安稳、丰沛koh永远bōe动摇ê景况时，chē ē-tàng讲就是幸福ê人生。圣经强调，chit种人生的确立是在tī倚靠耶和华，耶利米书十七章5～8节，先知明白指出人生ê两条路，一条是倚靠人ê道路，另外一条是倚靠上帝ê道路，先知以生长tī旷野中沙漠ê树á做例说明，两者之间ê差别，ná亲像tī诗篇一篇3～4节，诗人以栽tī溪边ê树á来形容伊ê茂盛kap发达，耶利米书十七章7～8节讲倚靠耶和华ê人生，mā是án-ne：「倚靠耶和华，以上帝为伊所倚靠ê人有福气，伊beh像水边所栽ê树，树根伸入水中，m̄惊旱灾、烧热，树仔ê叶仔时常chiah青，tī干旱无水ê年头mā bōe烦恼，并照时chūn结果子」。Chit种描写实在充分表现出倚靠上帝ê人生伊ê完美结局。

Tī实际生活中，确实有真chē ê基督徒，in信仰ê果实，是超过人所想像ê，上帝无限ê恩典kap赐福tī in身上，ná亲像教会生活中，真che7tui3上帝忠实ê传教者，以in当时生活ê清苦，根本无可能有加ê能力去教育kiáⁿ儿完成高等教育，但是有一kóa人soah有非常完美、理想ê kiáⁿ孙，是超出人所ē-tàng理解--ê。就是先知耶利米所讲--ê，chiah-ê专心倚靠上帝ê人，in ê人生ná亲像栽tī溪边ê树á，无论外在境况如何，in lóng受tio̍h充分ê保护kap照顾（来自上帝ê祝福！），tùi圣经中约瑟ê生涯，咱mā thang看出，伊是一位完全倚靠上帝ê人生，无论伊ê境况比如何，伊所表现ê人生内容，就是完全确信上帝，hông卖做奴才ê时、tī卫兵长in-tau做总管ê时、因为坚信上帝受害tī狱中，以及后来chiok chhiaⁿ-iann7teh 做埃及首相时，伊所表现出来ê生活，就是倚靠上帝ê人生。

倚靠上帝ê人生，难免mā会tī人生过程中有真chē问题，但是有上帝ê保守kap照顾，问题ē-tàng得tio̍h化解，因为倚靠上帝ê人，伊kap上帝之间已经确立了对上帝ê信赖、尊敬、欣慕kap疼ê关系，人生kap上帝若有chiah-ê信仰ê因素ê存在，自然kap上帝ê关系是非常有价值，chiah-ê就是幸福ê人生条件。

（二） 敬畏上帝，行他ê道路ê人生（诗篇一二八篇：耶利米书七章23节）
只有倚靠上帝，iah无法度完全表现一个人对上帝信仰ê具体、积极ê心态，所以一个确信上帝，倚靠上帝ê人生，必须以敬畏ê心去行上帝所要求ê信仰ê道路，这就是咱所beh思考ê问题，敬畏上帝，行他ê道路ê人生是幸福ê人生。Tī路加福音十一章27～28节mā有记载，主耶稣辩驳犹太人ê言论了后，有一位妇人听了真感动才o-ló耶稣讲：怀你胎ê kap乳养你ê有福了（十一章27节），但是，耶稣讲：是，soah不如听上帝之道才遵守ê人有福了（十一章28节），tī-che对话中，咱ē-tàng了解真正ê幸福ê人生，是建立tī一个人ē-tàng敬畏上帝才行他ê道路ê人生，tī教会ê信仰生活中，咱定定ē-tàng体会tio̍h chit种信仰所带来ê人生ê幸福。

台湾教会ê头一位基督徒高长，伊初信基督时一无所有，心内只有上帝，同时mā完全行他ê道路，chit种结束，造成了上帝ê祝福tī伊ê kiáⁿ孙ê身上，这是台湾教界所留落来ê信仰ê美谈！确实，一位真正敬畏上帝koh行他ê道路ê人，必定会受上帝ê祝福，有上帝祝福ê人生就是幸福ê人生。

咱看诗篇一二八篇1节「只要敬畏耶和华，遵行他道ê人，便是有福」，第2节以下tio̍h开始列出具体ê受祝福ê人生，食家己所得ê食物，享福kap事事顺利，非常完美理想ê人生，bó͘-kiáⁿ ê亲爱kap平安、健康（第3节），同时chit种上帝ê祝福ài继续到伊ê kiáⁿ孙（第5～6节），虽然只有六节圣经，但是ē-tàng完全看出一位敬畏上帝行他ê道路ê人，上帝án怎赐福，先知耶利米提起上帝只吩咐以色列人一件tāi-chì，就是听上帝ê话，「我就做lín ê上帝，lín mā做我ê人民，lín行我所吩咐ê一切道，就ē-tàng得福」（耶利米书七章23节）。先知tī-chiah所讲ê kap诗篇一二八篇1节ê内容完全仝款，就是敬畏上帝kap行teh他ê道路ê人生。

对一位倚靠上帝，确信上帝ê人来讲，伊ê生活ê主要内容，必定是敬畏上帝，而且完全行他ê路，意思就是照上帝ê道理、上帝ê要求去生活ê人生。

Tī-chia咱必须明白「敬畏上帝」ê意思，敬就是尊敬、敬疼ê意思，畏乃是有惊惶ê意思［义］（心服chiah尊敬），基督徒是m̄是敬畏上帝直接关联到咱ê生活，当咱生活tī正面ê世界时，咱会体会tio̍h上帝ê仁慈，就会敬爱他，ná是咱生活tī反面ê世界时，上帝ê公义就会显现在咱身上，咱就会惊惶上帝chiah反悔认罪。Chit种敬畏ê心态，to̍h是基督徒信仰生活ê真正人生内容，人就会体会出「敬畏耶和华，是智慧ê开端」，chit种智慧ê人生，是引chhōa人活tī上帝ê旨意ê世界。Tī-chiah，人所有ê表现lóng是符合神旨ê要求，mā就是行他ê道路ê人生，mā就是咱所强调ê幸福ê人生（箴言八章32～36节）。

（三）喜爱tòa-tī上帝ê圣殿ê人生（诗篇八十四篇1～7节）
主基督教示学生讲「因为你ê财宝tī hia，你ê心mā tī hia」（马太福音六章21节），咱ē-tàng了解主基督所讲ê chit句话ê意义，tī人生中，咱mā有chit种经验——有时为tio̍h一件tāi-chì或者事业来专心投入，soah疏忽了其他ê存在，譬如有一kóa事业家全神贯注tī khang-khè上，来疏忽家庭chiah产生悲剧ê情形时常听会tio̍h。确实，人ê财宝tī hia，人ê心mā tī hia。一个受上帝祝福ê人，伊kap上帝ê关系必定是建立tī完美ê过程中，chit种完美ê信仰过程，成做伊kap上帝之间ê心灵契合，伊是基督徒个人ê信仰生活。当然包括伊ê心灵kap上帝间ê灵交。以及个人teh属灵ê追求、灵修、研经、默想等等，lóng会帮助人kap上帝之间建立美好心灵ê果实。除了chia—ê，信仰者欣慕忆着上帝ê圣殿，mā是成就了人kap上帝tī心灵上ê互动。一个忆着、欣慕上帝ê圣殿ê人，伊ê心必定充满tio̍h对上帝ê敬仰kap爱慕，因为圣殿是上帝tī ê所在，所以一个欣慕、意爱上帝ê圣殿ê人，自然就会敬仰上帝，而且以上帝做伊人生ê准则，chiah实践符合上帝心意ê生活，是发自内心ê深深喜爱，就是信仰ê动力。同时chit种欣慕意爱上帝ê圣殿ê行为，mā包含一个人因为信仰chiah表现出来ê行为，因为信仰者若无行为是无价值ê，是死ê信仰，chit种信仰对人kap社会lóng无好处。

一个欣慕意爱上帝圣殿ê人ê生活，确实m̄是将伊当作一种仪表或者形式，he是通过上帝ê圣殿ê实际（积极）ê运作，来表现出具体ê信仰内容tī社会中，这就是咱tī教会生活中一直强调ê有见证ê信仰，m̄是像法利赛人式--ê，只有外表ê形式。

Koh借tio̍h参与kap投入上帝圣殿ê种种作为，成做信仰ê动力，进一步发挥到ē-tàng造就、帮助对人类社会有影响力ê基督徒生活，这chiah是圣经中所提起ê欣慕上帝ê圣殿实在ê内容。诗篇八十四篇2节「我羡慕梦想耶和华ê庭园。我ê肉体、我ê心肠、向永生上帝呼吁」表示全人格（感情、理性、意志）ê欣羡上帝，chit种出自全人格ê信仰决定，自然会造就有深度、有内容ê人生。Chit种人生，一方面对人类会有正面ê价值，另外一方面伊本身mā成做领受上帝无限祝福ê人生。

咱若看诗人tī诗篇八十四篇6～7节ê说明，伊tī心灵上所得tio̍h ê喜乐kap祝福是无tè比［无thang可比］--ê，目屎山谷变做泉源之地，koh有秋雨ê福盖满了kui山谷，in teh行ê时一定会koh-khah食力。

Chiah-ê描写lóng说明了，身在荒芜沙漠者ê人生体验，大概无一项祝福会比chit种泉源以及秋天ê雨水，koh jú行jú有力量thang可比--ê。诗人ê体验，确实是对耶和华ê圣殿ê羡慕kap梦想ê结果。

因此咱ē-tàng讲，幸福ê人生是来自心灵欣慕上帝ê圣殿。伊ê重点是tī「心」所产生ê爱意、ǹg望存有爱心kap上帝之间ê心灵契合！（以男女之间ê交往ê状况tio̍h ē-tàng明白欣慕kap互相意爱ê实在！）

结论：追求人生ê福乐，是人生生活ê重点，虽然幸福ê观点kap定义，每一ê人无仝，但是对一个信仰者来讲，伊确实是建立tī kap上帝ê正确关系顶koân。