《草地囝仔做牧师》

 | | | 转寄

理想ê建立

作者 林宗要 2010.08.15

尼希米记四章7～23节

自从以色列人kap上帝确立契约关系了后，上帝就要求in ê信仰kap生活内容必须ài符合上帝ê心意，ài常常谨慎，bē-sái有lán-si疏忽来影响in kap上帝之间ê信仰关系。因此，上帝向信仰者所要求ê 是以谨慎觉醒ê心去建立符合选民身分ê生活方式。

Chit种生活方式就是选民蒙福ê主要原因，án-ne，in tī社会上，也ē-tàng发挥做一个上帝子民ê实质价值，这就是上帝拣选in ê目的。

Tī上帝对人类ê期待kap计画中，他确确实实对人类有chit种要求，咱看创世记第一、二章ê创造论，tī上帝创造秩序中「上帝看tio̍h一切所造ê lóng真好。」（创世记一章31节），chit句话是上帝创造ê时所讲ê，伊说明了上帝创造ê事工ê完美kap理想，所以tī上帝创造ê计画中，他看一切被造物lóng真好，他将人类安置tī伊甸园中，自有伊ê期待kap要求，上帝要求人必须有合上帝心意ê人生内涵，人chiah ē-tàng以真实ê心态面对上帝。因为tī上帝ê计画中，他要求被造之物，tī in ê境况中，做一个相对称ê存在者，上帝一定bē要求hiah-ê鸟兽以人ê模样去面对上帝，只要被造物tī伊ê程序中，按照实况去做，就是完成上帝交托ê使命。

可惜人类无法度维持上帝所希望ê秩序，mā就是人bē-tàng照上帝ê命令，tī创造ê程序中，人将秩序错乱了，本来人必须顺从上帝ê话，但人却无听上帝ê话soah去听从诱惑者ê声音，phah乱了上帝创造ê秩序，造成人被上帝逐出乐园ê结局。

同时咱了解，反背上帝创造秩序ê社会ê实况，必定会产生负面作用，chit-ê事实就是咱所看见，自有人类以来，四界充满了人性ê问题。Ùi古早到taⁿ，咱详细观察社会中ê问题，就会知影：人因为违背了上帝创造ê秩序，致使人ài活tī脱序ê社会状况中，主要ê原因是人破坏了上帝所创立ê秩序，chit-ê秩序ê重点teh说明人kap上帝之间ê人格关系。

对以色列人来讲，in kap上帝ê关系既然是确立tī彼此ê特殊契约上，对chit-ê契约ê履行mā就决定in kap上帝间ê实质关系，mā就是in kap上帝之间有一种特别ê秩序存在，以色列必须用谨慎自守ê态度去经营in kap上帝之间ê关系，就会得tio̍h上帝所应允hō͘ in ê人生（民族）ê繁荣kap祝福。

Tī旧约圣经中，讲tio̍h上帝对伊ê选民ê祝福以及hō͘ in ê人生条件，伊ê重点tī选民对上帝忠诚ê信仰生活。Tī忠诚ê信仰生活中必须具备ê犹原是谨慎，自觉ê人生态度kap信仰ê绝对性，chit种生活ê内容to̍h是信仰ê性格。

当时尼希米所领导ê上帝之城ê重建khang-khòe，一方面是表现出选民信仰生活ê愿望、因为过去in ê民族被掠到巴比伦，上帝之城受tio̍h严重ê破坏，以色列人民中ê精英被掠到巴比伦，生活失去自由，chit段被掳ê生活，tī in ê信仰上有非常深刻ê反省——为何上帝ê选民会遭遇án-ne悲惨ê人生状况？当然，咱若有旧约圣经kui-ê以色列ê历史，尤其是士师记ê内容，to̍h是说明选民ê生活史是siáng建立tī反背上帝之上，上帝tùi án-ne差遣外人来攻击in，人民受欺压受迫害，in认罪悔改，求上帝帮助，上帝兴起士师，解救以色列人，了后chit种情形一再循环发生，这是士师记ê大概内容，以色列人chit种生活内容to̍h是伊 tī上帝面前实实在在ê信仰kap生活ê写照。

一、 理想ê丧失
以色列人有一个理想，就kan-nā in tī埃及做奴才时，摩西代表in向法老王所求ê一句话：ē-tàng生活tī自由自在敬拜上帝ê所在，这是以色列人出埃及ê主题。确实，chit种ē-tàng生活tī自由自在、tī ē-tàng敬拜上帝ê环境to̍h是基督徒理想ê生活内容，是信仰者应该争取ê，mā是理想ê人生，因为知影做一个上帝ê人民tī伊ê人生境况中，若无chit种thang自由自在kap上帝交往、敬拜上帝ê时间，𥴊kám ē-sái叫做理想？这是有缺陷、无完美、有瑕疵--ê。理想ê希求是人生活ê重点，失去伊，人生就无意义，仝款ê道理，tī信仰ê世界，信仰者iah一定ài有伊信仰ê理想 kap希望，向理想ê目标去发展、追求，建立理想ê信仰生活ê实在，tī信仰生活史中，确实有真chē人持守tio̍h chit种理想kap希望，in甚至为tio̍h chit-ê理想甘愿付出一切，有时连性命mā献上，成做教会历史上真chē ê殉教者。

M̄-nā限tī信仰世界，人生现实中mā会有tsit-ê状况，有人为tio̍h人生某种理想chiah奋斗，甚至牺牲一切，尤其伊 tī极权政治中，有chi̍t-kóa自由ê斗士，愿意冒一切危险去追求in心目中ê理想，咱ē-tàng tùi台湾ê政治实况了解tsit-ê情形，chit几年台湾ê民主运作确实比以前进步，形成ê原因，是因为tī过去台湾社会中有真chē人为tio̍h tsit-ê理想chiah奋斗、phah拚，经过流血、囚禁、牺牲性命所换来ê代价。

Chiah-ê人心中lóng充满tio̍h无上ê理想，所以理想是人生生存ê siōng大目标kap重心，假使一个人心中ê人生理想破碎时，往往会失去求生ê意志，咱有时会见tio̍h tī chit款情形中ê自杀者或者自暴自弃ê人。

选民ê理想，照tio̍h in kap上帝之间ê关系，in应该希望ē-tàng tī上帝ê圣城耶路撒冷，自由自在ê敬拜上帝，这是in siōng大ê理想，ē-sái讲是chit-ê理想破碎了，tī主前五八六年圣城被巴比伦王phah-pháiⁿ，对hiah-ê心向祖国ê以色列人，in体会tio̍h理想破坏ê悲哀，咱读耶利米哀歌全卷五章，就ē-tàng明白当耶路撒冷毁灭ê时ê悲惨景况，以色列人认为chit-ê悲哀就是家己反背上帝ê旨意，是家己犯罪ê结果（耶利米哀歌一章5节），chia详细说明圣城灭亡时ê社会景况、敌人ê侮辱、人民ê悲哀kap无助、人民受曲辱困顿，甚至teh腹肚 iau时，母食囝肉（四章1～10节），chit种描写 tī leh说明in理想ê破灭，因为in体验tio̍h chiok大ê kiaⁿsiau，选民ê尊严被糟躂，家破人亡，in无法度按照家己ê心意去生活，一切lóng ài受tio̍h约束，chit种失去自由ê现象是人生siōng大ê悲哀，tī chit款情形下，咱了解当时选民心中ê感受，kap in响应尼希米重建ê事工所付出ê努力是肯定积极ê，主要原因是tī弥补in过去ê缺憾——被kioaⁿ百多年ê体验。Tī人ê一生中，有一kóa人会因为tú-tio̍h大触磕chiah刺激伊ê重新建设chiah有真大ê成就，以色列人亡国，确实造成伊ê信仰顶悬ê大转变，因为in体会tio̍h理想ê丧失，这是非常悲哀ê代志。

二、 Óa靠上帝ê帮助
Tī hit种状况中，尼希米chhoah着当时有心ê选民去做重建圣城ê khang-khòe，in认为圣城是in生活ê理想kap重心，可惜因为祖先反叛上帝造成圣城毁坏以及家破人亡ê凄惨景象。 尼希米ê新使命就是重建毁坏ê圣城，当然这是非常辛苦ê khang-khòe，而且人ê力量有限，若m̄是óa靠上帝ê帮助是无法度完成ê，tio̍h亲像基督徒信仰生活ê过程中，mā会tú-tio̍h真chē 艰苦ê事实，但是信徒一定会体会tio̍h「óa靠hē厚赐我力量ê，我凡是lóng ē-tàng」，tio̍h亲像主耶稣kap学生kap hit位 好额ê青年对话了后向学生讲ê「tī人这是bē-sái--e，tī上帝凡事lóng ē-tàng」，确实信仰者若无chit种体验，伊ê信仰一定有真chē问题存在。

当时ê尼希米面对建立共同ê理想chit-ê伟大ê问题时，伊所表现出来ê就是倚靠上帝帮助chit种绝对ê信心，确实，当时in ê环境非常恶劣，ē-sái用内忧外患来形容，m̄是一般ê人力ē-tàng面对，m̄-koh对上帝ê人民来讲，唯一ê办法就是经营信仰ê事工，专心ńg望全能ê主，这是当时尼希米siōng主要ê khang-khòe之一。

（A） 以祈祷开始「阮ê上帝ah！求你垂听，因为阮被藐视」（四章4节）。
「m̄-koh阮祈祷阮ê上帝……」（四章9节） 面对tio̍h hiah-ni̍h chē挑战kap破坏ê事实，一方面in ê防备，另外一方面就是表现出信心ê事工，óa靠上帝ê帮助，chit位伟大ê领袖tī tú-tio̍h重大ê困境时，伊无倚靠家己ê才能 kap办法，是以信仰，确信上帝帮助伊面对hiah-ni̍h重大ê问题。以祈祷开始是表示服从上帝ê旨意，顺从上帝ê命令。

（B） 以信心去感动人：
Beh建立共同ê理想ê前提是建立tī确信上帝会帮助ê信仰上，一方面以祈祷顺从上帝ê指示，另外一方面是用信心感动人，「我察看了，就起来对贵胄、官长kap其他ê人讲免惊in，当纪念主是大koh 可畏ê，lín ài为着兄弟、囝儿、牵手、家产争战。」（四章14节）

Tī逆境困苦中，siōng大ê安慰力量是来自信仰ê感动，尼希米以chit种绝对确信ê信心去面对tī恶劣环境当中ê人民，的确产生良好ê效果，因为tùi信心所产生出感动ê力量，是超过人ê想像，因为往往有真chē人无法度理解ê神迹会发生，因为chiah-ê神迹，mā只有tī信仰ê世界chiah ē-tàng实现。

（C）人格ê感化kap个人ê牺牲（五章15～19节）建立共同ê理想犹原是以人格参与事工，就是用有ê见证去完成共同ê理想，tī chit段圣经中，chit位伟大ê领袖m̄是高高在上，却是用奴仆ê形象kap民众生活作伙，用实际生活表现出伊心中ê理想，伊爱民如子以及付出所有tī伊ê理想ê事工上，chit种以完美ê人格感动呼召人参与，以及绝对付出个人所有ê情形，往往是成做hiah-ê人所钦仰kap效力ê主因。为何政客会失去民心？原因tī-chia，以中国近代史做鉴戒，这是值得思考ê一件代志。只要选民ē-tàng响应chit位伟大ê领导者ê人格感化，服从伊ê作为，相信任何艰难ê理想目标lóng会达成。

三、 提防破坏力，完成理想ê实现。
咱知影tī人间社会中，若有理想ê建设时，就有破坏力量ê存在，这是人间道理，传道册讲「拆毁有时，建造有时」当尼希米beh建立共同ê理想时，就已经有破坏力存在，可见伟大ê理想背后存在chiok惊人ê破坏力。咱mā ē-tàng ùi人类生活内容去体会chiah-ê事实，甚至tī被认为是爱ê共同体会ê教会生活中mā有chit种可能性，当教会有理想ê蓝图出现时，定定会受tio̍h无理、无情ê反对、批评、甚至攻击，虽然chit-kóa反对者定定口口声声讲是因为教会，但是事实是teh表现出人性自私kap恶劣ê性格。 当时尼希米tú teh chit种状况中，hiah-ê反对者绝对m̄是出tī爱护圣城，这是咱ē-tàng理解ê，因为tī有上帝美好旨意ê事工中，必定mā有真chē反对破坏ê动作。

因此，beh建立共同ê理想ê心理准备，就是提防破坏力，了解chiah-ê反对者ê企图，以相当程度ê准备提防chit种破坏力，chiah ē-tàng达成建立共同理想。尼希米一方面对反对者ê破坏企图相当清楚，另外一方面是以伊ê人格去感化所有ê人，hō͘伊ê同心合意，m̄是只有尼希米一人演独脚戏，是动用所有ê人投入并参与chit-ê共同理想ê建设，chit种同心合意所产生出来ê共同力量ê发挥，就是完成in ê理想bē-tàng欠缺ê力量，塞内加（Seneca）讲：「上帝hō͘人成做多数者，犹原是tī互相援助。」的确，同心合意ê力量是完成理想ê大动力，无论家庭或者是企业团体或者是政党ê运作，甚至咱ê教会lóng必须以chit种心态去经营chiah ē-tàng达成理想ê现实，若无就是失败。

Tī-chia，咱ē-tàng明白，同心合意是成功ê主要条件。「人民专心作工」（四章6节），「各人做各人ê工」（四章15节），「各按宗族the̍h刀the̍h枪the̍h弓……」(四章17节)tī chiah-ê经文中thang看tio̍h，当时tī尼希米带领下ê民众已经成做一ê力量，m̄是一盘散沙，tio̍h是众人成做一体，共同为理想来付出，kan-ná亲像保罗tī以弗所册四章论教会中无仝ê肢体，为建立耶稣基督ê教会，人人各尽伊ê职，无分你我，ē-tàng建立共同ê理想。 咱ê教会虽然小，但是mā有各种事工需要咱用无私奉献ê心kap丰富ê爱心去参与，若ē-tàng án-ne，教会自然会发生无比ê力量去完成建立共同ê理想kap目标。时常听见一句话：合一就是力量，咱教会所需要ê就是chit种力量，chiah有能力面对强敌。

另外一方面，咱mā看tio̍h当时以色列人是以武装来参与khang-khòe，当然今á日教会事工推行mā可能有无方便ê所在，但是伊说明了：这是当时环境中完成理想一定ài ê方式，mā说明咱今á日信仰生活ê内容是必须持守儆醒ê心灵，谨慎、警醒！ 结论：圣城ê毁害是上帝子民ê悲哀kap负担，重建是上帝子民ê使命。但是完成理想一定有真chē阻碍。尼希米ē-tàng持守：（一）对上帝绝对ê信心，（二）对人民ê爱心去行。Chit二者实在是胜利ê根本动力。