《草地囝仔做牧师》

 | | | 转寄

复兴ê道路

作者 林宗要 2010.08.08

以赛亚书五十七章14～21节，五十八章8～14节

现代文明中，人死亡ê两大主因分别是人人所惊ê癌症kap心脏血管ê病变。

有一位长老，平常时身躯健康罕得有病痛。早起chiah kap我讲真chē教会ê事工，但tī hit工暗时差不多九点接tio̍h伊死亡ê通知，原来是关门ê时，声音siuⁿ大，随时休克，送病院急救无效，伊ê死因是心肌梗塞，致使血流无通chiah致命。现代人关心食ê问题，惊无小心会因为胆固醇hō͘心脏血管出问题，所以，造成台湾社会ê充满健康食品kap流行减肥ê现象。

确实顺势ê人生状况是人生活ê条件，tùi每一个角度去思考人生生活ê时，顺势ê人生是理想、健康kap幸福。反倒转来讲，bōe顺势ê状况会造成生活ê混乱、不幸kap病态！

咱看过年时ê 高速公路，本来二、三十分钟ê路程，塞车ê时ài一、二点钟。面对塞车ê情形，bōe hō͘人有喜乐ê心情。Teh塞车ê时，驶车ê人若ē-tàng以平常心应对就已经相当bē-bái，真罕得有喜乐ê心情，大部分ê人lóng会发出怨言，造成无爽快，甚至影响行车安全。

用人体情形来思考ê时，咱koh-khah ē-tàng体会chit种无顺势ê状况，对人生是会造成非常严重ê负面效果。小小ê感冒mā会造成生活上真chē无爽快ê现象，其他比如盲肠炎、结石或者是tī人体内无仝器官中所生ê肿瘤，lóng必须ài赶紧kā伊处理，以免影响整体ê健康，因为正常ê人生是确立tī顺势ê境况中，若无顺势ê时，就会发生危机。水沟若塞—tiâu，垃圾水就会溢出--来：血管若无通，就会造成中风，khah严重会死亡，khah轻--ê会行动不便。用chit原理来思考人生ê时，咱人生ê经营mā必须ài有顺势而且良好ê状况，以免有塞tiâu ê危机！ài如何去化解咱ê人生塞tiâu ê状况，是今á日咱人生siōng迫切ê课题，tùi孩童时代开始，到学生时代，ài hō͘伊ê人生（学习ê人生）顺势通达，学生必须ài忠于学生ê角色，伊若beh hō͘伊ê人生现象有顺势通达ê状况，伊必需要用智慧kap能力好好--á去经营，脚踏实地骨力做穑，chiah ē-tàng有理想ê结局。Tī教会属灵生活ê营运mā kap chit-ê原理相仝，一般ê基督徒认为教会是传教者teh经营，平信徒只要好好--á做礼拜to̍h ē-sái，chit种观点是m̄-tio̍h—ê，因为教会是全体基督徒所共有ê，基督徒有责任hō͘咱ê教会建立tī理想顺势ê过程中，tī-chia需要全体基督徒ê参与kap分享，这是今á日教会ê重大事工，基督徒tī信仰生活中bē-tàng做会hō͘ chit-ê爱ê共同体ê教会ê塞tiâu ê 物件，bē-tàng因为咱ê存在，chiah kā教会生活塞tiâu bē-tàng正常流通。基督徒bē-tàng成做教会ê肿瘤，来阻碍教会功能ê发挥！tī现代教会中，咱tiāⁿ-tiāⁿ会听tio̍h人批评某人是某教会ê癌！

基督徒信仰生活ê重点，tī保持咱kap上帝之间属灵道路ê通顺，m̄好因为生活状况来阻碍kap上帝之间应该有ê连结，chit种kap上帝之间建立良好ê通顺管道，是教会生活ê内容。教会生活ê主要功能，就是不断用各种方法，清除kap上帝之间ê真chē障碍物，来建立kap上帝之间顺势ê属灵道路，这是基督徒ê教会生活ê使命。

但是tī现实ê状况，基督徒tiāⁿ-tiāⁿ会因为外在环境阻碍tio̍h咱kap上帝之间ê关系，mā就是tī咱kap上帝之间ê路上，有带真chē人情世故、事业khang-khè、无正常ê心态，阻碍tī咱kap上帝之间，因此造成咱beh行chit条路ê时会增加真chē困难，hō͘咱无法度顺利处理咱ê心路历程，这是浪费ê人生！iah就是本来chit条路是单纯好行ê心灵道路，因为咱ê人性软弱，变成有真chē塞tiâu ê路，今á日ê教会ài像先知所讲ê：「有声讲，Thūn高，thūn高，备办路，tùi我ê百姓ê路中除去窒碍。」。（以赛亚书五十七章14节）

（一） 建立正确ê观念
教会ê复兴siōng主要是在tī上帝圣灵ê感动，iah就是咱所了解ê圣灵ê同工，tī教会中所有ê基督徒若有圣灵ê感动或者是充满ê时，教会自然就会复兴，因此咱ē-tàng讲复兴ê主体，是tī圣灵ê同工。基督徒必须明白，圣灵充满ê真实意义，m̄是只有hiah异常ê动作——讲方言或者是祈祷ê极端肢体动作，因为chiah-ê方言kap特殊祈祷属灵状态ê解说是见仁见智ê！

Tī现实ê教会生活中，过分重视chiah-ê神秘ê作为时，有时会谤渎上帝ê名，乱用圣灵来满足家己ê私欲，如骗色、骗财！所以咱必须对「圣灵充满」建立正确ê观念。

圣经讲，若无hō͘圣灵充满，就bē认基督耶稣做救主（哥林多前书十二章3节），亲像保罗因为圣灵充满hō͘伊勇敢tī公会见证基督耶稣是人类救主（使徒行传九章8节），司提反hō͘圣灵充满了后就有美好ê见证（使徒行传六章7节），使徒行传记载保罗hō͘圣灵充满做极美好ê福音事工，历代教会中，mā有真chē hō͘圣灵充满ê人，chiah-ê人tī信仰生活方面mā可能无像灵恩派人狂热ê肢体表现，但是soah ē-tàng tī in真静态ê信仰生活中看tio̍h chiah-ê人ê 高尚品德，以及hō͘人肯定ê宗教行为。因为tī chiah-ê人身上，咱ē-tàng看出：1） in有非常圣洁ê品格。2）in ê生活是建立tī顺服上帝ê旨意，凡事lóng以上帝为主ê生活方式是chiah-ê受圣灵充满ê人ê人生内容。3）in ê生活kap信仰ê表现lóng受上帝kap人ê喜爱。一个基督徒ê生活，若有chiah-ê内容，虽然伊bē晓讲方言，mā bōe有真狂热ê属灵动作，但是咱ē-tàng肯定ê是，有chit种信仰kap生活内涵ê基督徒是完全受圣灵充满ê人。

圣经tī-chia kā咱讲复兴所必要ê条件，是建立tī正确ê信仰价值观。比如1) 就是tùi咱ê属灵道路上清除障碍物，hō͘咱kap别人之间ê管道通达无阻碍。2) 另外一件重大ê事实就是体验上帝ê同在。（以赛亚册五十七章14～15节）

咱知影上帝临在ê头一项条件是tī以赛亚书五十七章15节所讲：「我khiā起tī至高至圣ê所在，亦kap心神痛悔谦卑ê人相kap khiā起，」，这就是上帝临在ê事实，tī chit两节经文，已经清楚kā咱讲ài确立复兴ê道路ê正确价值观念，tī-chia咱已经明白复兴ê首要条件就是tī你ê心中有忧伤悔改ê心灵。诗篇五十一篇17节：「上帝ah，忧伤痛悔ê心，你无beh看轻伊。。」伊同时mā是上帝拯救ê对象（诗篇三十四篇18节）。「耶和华oá近伤心ê人，　　拯救灵性痛悔ê人。」因为伊是踏入上帝恩典之门ê第一阶段，咱看耶稣tī路加福音中，有关法利赛人kap税使ê祈祷ê比喻（路加福音十八章），就会明白上帝所喜乐ê是人用忧伤悔改ê心灵去面对他！这是咱ê教会生活中一件真实在ê真理。

（二） 信仰kap生活ê一致
咱已经知影复兴ê道路是基督徒必须用具备信仰ê正确观念做基础，án-ne chiah ē-tàng建立真正心灵ê复兴，因为tī chit-ê前提之下，上帝ê灵chiah有可能进入tī人ê心中，当一个软弱无完全ê人，心中充满上帝ê灵ê时，就会有新kap充满能力ê人生作为。因为咱知影，复兴ê道路的确m̄是kan-nā停tī hiah-ê人ê观念ê chit-ê阶段而已。因为人ê观念若无用行动做基础，伊ê观念是lóng无价值--ê！所以tī复兴ê道路上，人不但ài有正确ê观念，同时必须将伊ê有理想、有价值ê观念kā伊行动化，mā就是信仰kap生活ê实质关系。因为信仰若kap现实脱节，án-ne自信是无价值ê。现实ê环境中，有真chē人，tī信仰ê世界所表现ê kap伊ê实际生活完全无仝，mā就是tī人ê现实生活中，看bē-tio̍h伊tī信仰世界所表现出ê优雅kap美好ê行为！

Chit种只有tī宗教气氛ê世界会看tio̍h信仰者所表现出来ê虚假ê敬虔（有人对圣经真熟练而且真gâu讲道，祈祷时mā会流目屎），ē-sái讲是tī日常生活中，比平常人khah离谱、堕落、腐败、无恶不作，亲像先知对当时以色列人ê指责，以赛亚书五十八章1～7节，只重视看会tio̍h ê外表，kap耶稣tī马太福音二十三章对法利赛人ê批评仝款，信仰siōng惊人ê现象，就是信仰kap生活无相仝，这是现代教会siōng弱ê部分，是教会必须ài koh检讨ê。

Tī现实ê教会生活中，有一kóa基督徒表现出kap上帝ê关系非常ê热烈、敬虔，但是伊tī社会生活上所表现ê性格是刻薄无情、品性残酷、行动奇怪，一方面手the̍h圣经、圣诗，嘴唱哈利路亚，另外一方面ê心思teh思考伤天害理不法ê tāi-chì，chit种情形是今á日咱ê教会ài虚心去检讨ê实情，tio̍h亲像上帝藉tio̍h先知以赛亚书五十八章1～7节所讲--ê，tī chit段圣经，咱看tio̍h，当时以色列人ê宗教信仰以及生活ê 无仝，in实行宗教ê禁食行为（通常被认为是宗教生活中ê siōng koân境界就是禁食、祈祷）。但是tī-chia，上帝soah责备in ê虚假（以赛亚书五十八章3节），因为上帝所喜爱ê是信仰kap生活ê一致。

亲像以赛亚书五十八章6节以下所讲ê，有行为做基础ê禁食chiah是上帝所欢喜--ê。Tī-chia必须有实际关怀ê行动（比如：解放受无公正压迫ê好人，关心无物件thang食、无厝thang tòa、无衫thang穿ê人！以赛亚书五十八章6～7节）。

这就是主耶稣向hiah-ê 谦虚实行他旨意ê人tī马太福音二十五章分别山羊kap绵羊ê比喻所讲ê话。

因为tī现实ê状况中，基督徒若是无法度表现出属于上帝属性ê公义、怜悯关怀ê行为，kan-ta去实行禁食祈祷ê生活，是无意义ê！

今á日台湾教会真流行tī祈祷山禁食、祈祷、灵修（有一kóa所在kui年ê时间表lóng排满），假使只有停tī chit种境界，m̄是重视现实环境中真chē人生ê不幸kap苦难ê时，ài如何去解释咱ê信仰？这是值得现代教会迫切去思考ê重大课题。

（三） 敬虔事奉上帝（以赛亚书五十八章13～14节）
咱已经讲起基督徒必须正确建立信仰ê价值观，chiah ē-tàng结美好ê信仰果实，因为通常人ê行为lóng是伊ê心态所自然产生出来ê结果。这就是咱所强调人ê心态，就是伊ê做人ê种种表现，tī人ê性格上，咱tē-tàng完全理解chit-ê状况。

Chit种正确ê信仰价值观，是teh说明，基督徒ê信仰生活必须ài一致，chiah会发挥出伟大ê功效！

只有tī人间社会发挥信仰ê实质价值ê时，chiah ē-tàng带动基督徒属灵道路ê复兴，会成做chit种信仰kap生活一致ê关键，to̍h是在tī基督徒kap上帝之间，有敬虔ê心来奉待上帝！伊是表现对上帝ê热爱，有像上帝属性ê实在。当一个人对上帝有热爱，而且有上帝属性ê人生生活ê时，一定ē-tàng看出复兴ê动力tī其中。

所以先知kā咱讲，复兴ê道路是先ài纠正人kap上帝之间ê关系，ài hō͘人kap上帝之间ê关系正常、完美，确定人对上帝有敬虔ê礼拜以及有感恩ê心情去奉待他，所以先知tī-chia强调守安息日ê生活。当然m̄是讲守安息日ê人，一定kap上帝之间，就有绝对ê良好关系，但是若beh kap上帝建立良好ê关系，一定会有遵守安息日礼拜ê生活，因为这是siōng起码ê条件。Tī基督徒礼拜ê生活中，咱必须ai3koh-khah反省，chit-ê siōng基本ê问题，若bōe-tàng做好，其他ê问题，大概mā bōe有理想ê结果，这是真理。

人讲基督徒ê人生是tùi chit-ê安息日到后一个安息日。Tio̍h是讲，基督徒ê人生是夹tī安息日ê中间，所以一个真正ê基督徒，是经由安息日了后，ē-tàng hō͘其他六工koh-khah显出意义kap内涵，因为咱知影安息日是上帝祝福ê日子，上帝赐福tī安息日，身为上帝子民ê基督徒，若bōe-tàng好好á利用伊，其他ê六日自然mā bōe有啥物好结果。因为一个无重视安息日ê人，ná有可能重视其他ê六日？chit种道理是咱ē-tàng了解--ê。人若ē-tàng重视、好好利用安息日，其他ê六日一定会因为chit-ê圣日ê缘故koh-khah充实，这是信仰生活ê公式，mā是历代教会所经验出来ê结果。基督徒ê信仰生活公式，若了解，自然tī信仰生活上就bē有问题，亲像数学上ê公式对学生ê理解程度有深切ê关系仝款。

用chit种信仰生活ê公式来衡量咱现实ê生活ê时，加减就ē-tàng测出基督徒属灵道路大概ê状况！

虽然chiah-ê问题tī咱ê生活上是真细ê tāi-chì，但是却是上帝应允咱复兴ê路径，以赛亚书五十八章13～14节是上帝向咱所提出ê应允，只要照上帝ê话去生活，你属灵ê路况必定是完美理想ê。

结论：只要人ē-tàng顺从上帝，实行主ê道路，上帝ê应允kap赐福就会降tī你身上，发出kah-ná天星ê光，耶和华beh做你ê保护，你求告，耶和华必定垂听，你ê人生会kah-ná肥沃ê田园，有流不尽ê泉源，耶和华beh 提升你，承接应允之地！成做非常完美ê境况，这就是复兴。