《草地囝仔做牧师》

 | | | 转寄

复兴ê基地

作者 林宗要 2010.08.01

创世记三十五章1～15节

做一个基督徒，tī信仰生活中，tiāⁿ-tiāⁿ会tú-tio̍h淡薄á pháiⁿ决定ê tāi- chì，就是当伊听tio̍h上帝ê声音了后，tī上帝面前，必须ài有真明确ê信仰决定来完成上帝所交托ê tāi- chì，特别是有一kóa利害关系同时teh发生ê时，实在是真pháiⁿ取舍。

M̄-koh，信仰生活ê价值，就是tī chit种取舍中显出，基督徒必须以信仰ê良心做根本来采行伊ê信仰ê决定。Chit种情形，往往是上帝hō͘基督徒ê挑战。

Ná亲像上帝kap亚伯拉罕，当上帝ê吩咐降tī伊身上ê时，伊面对极大ê挑战（创世记十二章、二十章）。上帝命令伊离开家乡到上帝所应允ê迦南地。希伯来书ê作者讲：「出去ê时chūn，iáu m̄知ài往toh位去，因为信，就tī所应允ê 所在作客，kah-ná tī异地tòa帐篷。」（希伯来书十一章8～9节），chit两节圣经充分描写亚伯拉罕对上帝命令ê决定，完全用信心来承接上帝ê命令。另外tī创世记二十章上帝ài伊献独囝以撒ê时，咱ē-tàng想像伊内心激烈ê挣扎，但是最后伊选择服从上帝ê话（m̄是做假ê，是实实在在ê表现）tī chit两件tāi- chì中间，咱ē-tàng看出亚伯拉罕绝对ê信仰，完全ê确信，这tio̍h是伊所以成做信仰之父ê原因。

Chit种情形实在是信仰上ê非常大ê挑战，mā实在表现出信仰ê性格，无用自我取代上帝ê旨意，chit种观念的确立，是健全信仰ê唯一事实。为何真chē基督徒tī社会生活中会表现妥协ê信仰？是因为自我ê成分chē过上帝ê意旨。因此当上帝kap世界同时khǹg tī信仰者面前ê时，就会看出基督徒信仰ê真假，chit种状况tiāⁿ-tiāⁿ会发生，而且基督徒会一直面对chit种选择，若无坚固ê信仰基础，往往会出现信仰ê危机。亚伯拉罕ê孙á雅各，伊ê信仰当然无法度kap in阿公亚伯拉罕相比，伊是承继父祖ê信仰，用现代语来讲，to̍h是世袭ê信仰，世袭ê信仰tī信仰ê表现上有时会有差别，有时会表现出bōe冷bōe烧，有危机性质ê信仰，一旦被引诱，往往无法度确定信仰ê真实价值，因为无真实ê体验。

创世记二十八章描述雅各为tioh8beh闪避以扫ê杀害，离开家乡，tī旷野中梦见天梯，将hit-ê所在号做伯特利，然后去投靠母舅拉班，而且koh成家立业，koh再tńg去故乡。

创世记三十四章记载雅各ê cha-bó͘-kiáⁿ被示剑人侮辱，产生家庭危机ê故事。有一kóa学者认为雅各若顺从上帝，听他ê声音，无停留tī示剑直接tńg来到伯特利（上帝ê厝），可能就bē发生chit种危机，tī属灵ê tāi- chì顶面，咱ê信仰生活，若停tī m̄是上帝ê旨意ê所在，往往会有chiok悲哀ê tāi-chì发生。

当雅各全家tī chit种危机中，伊soah听tio̍h上帝ê喝声「起来！上伯特利去tòa tī hia」（三十五章1节），上帝ê人民，必须ài生活tī有上帝应允ê所在！chit句话to̍h是化解当时雅各in-tau危机ê根本原因。

上帝向伊提出此吩咐，到底有什么特别ê启示？雅各当时ê状况，ē-sái做今á日基督徒生活ê借镜，因为基督徒犹原活tī社会中，所接触ê对象大部分lóng m̄是信徒、异教徒，tī án-ne ê境况中，难免有对基督徒ê信仰生活具挑战ê诱因存在。因此，基督徒若beh确定信仰ê特质，必须ài有相当ê警觉kap敏锐ê观察力，to̍h是信仰ê良心，chiah ē-tàng tī án-ne ê现实ê境况中有美好ê见证。Tī-chia有一件真重要ê tāi- chì，就是ài不断来留心注意听上帝ê声音，chiah ē-tàng完成受托ê使命！上帝为何命令雅各去tòa-tī伯特利neh？咱ē-tàng tùi伊所经历ê伯特利来思考下列chit 几项：

（一） Tī伯特利，雅各体验tio̍h上帝
对雅各来讲，伯特利是伊ê人生关键ê所在，创世记二十八章咱看tio̍h一个奸巧、pì-sù而且m̄-bat离开厝真远ê青年，为tio̍h伊ê行为，必须ài逃离家园，伊拚性命走到伯特利已经是黄昏，只好暂时tòa-tī旷野，chit时伊心中ê情感是咱所ē-tàng了解ê。因为雅各欺骗ê行为hō͘伊ê阿兄以扫ê 不满，伊若无走，koh惊伊ê阿兄ê追杀，性命不保，但是头前是暗暗长路，伊必须tòa-tī荒郊野外，可能有真chē惊人ê野兽。头前ê路途无法度知，后面伊ê阿兄追杀ê危机mā iáu未消除，tī án-ne ê境况中，伊内心一定是无限ê空虚kap绝望，无人ē-tàng帮助伊化解chit种状况，伊是处tī人生ê绝境中。Tī chit种极端ê苦境里，伊体验tio̍h上帝！事实上照雅各当时ê状况，除了上帝以外，实在无其他办法 ē-tàng化解伊当时ê危机！

Chit种体验，是人生ê帮助kap安慰，mā是力量，hō͘伊有能力面对未来ê人生，伊讲：「耶和华真正tī chia，我竟然m̄知影。」（创世记二十八章16节），chit句话真实表达出雅各对信仰ê体验。所以伯特利对雅各来讲，是伊经验tio̍h上帝ê所在！chit种体验hō͘伊tùi世袭ê信仰变做体验ê信仰。过去伊tī厝内ê信仰，是被动--ê、间接--ê，ē-sái讲是现在伊tī伯特利，伊体验ê信仰是直接--ê，因为上帝面对面kap伊讲话！chit种直接ê信仰是今á日基督徒siōng需要--ê！

（二） 保守、蒙恩、得tio̍h应允之地
伯特利对雅各来讲，m̄-nā kan-ta是伊真正认bat上帝ê所在，同时，tī chia伊iáu听见上帝亲自beh保守、赐福伊kap伊ê后裔ê应允。「我是耶和华lín阿祖亚伯拉罕ê上帝……我beh kap你同在。无论你去tó位，我beh保庇你……」(创世记二十八章13～15节)

相信当时雅各siōng需要ê问题，是听见上帝安慰kap祝福ê声音！因为伊ê信仰kā伊讲，伊所事奉ê耶和华是全能ê大主宰。

Tī-chia上帝m̄-nā保证伊目前ê安全koh应允伊未来ê人生亨通发达！无任何不幸忧伤会侵扰伊，相信无任何tāi- chì ē-tàng kap当时雅各所体验tio̍h上帝ê保证kap祝福相比--ê！咱生存tī世上，phah拚追求ê就是安全（平安）kap受祝福ê人生（有成就）。Chit种不断teh追求ê siōng根本事实，就是tī伯特利！所以伯特利是人生体验安全kap承受上帝ê祝福ê一个特别ê所在。可惜现代人往往错过了方向！

基督徒必须明白，伯特利是上帝向所有基督徒应允平安kap赐福ê所在！真chē热心有为ê基督徒蒙恩ê人生，通常lóng将in ê生活建立tī伯特利。

当时ê伯特利是抛荒地，是旷野，但是经过雅各kap上帝发生直接ê接触了后，伊就成做伯特利，所以基督徒teh tú-tio̍h抛荒地或者是旷野时无需惊惶，只要ē-tàng kap上帝有接触ê机会，伊必定ē-tàng成做伯特利。伯特利是人生siàu想--ê，因为上帝无限ê保守kap应允，mā着是人生ê安全kap祝福ê所在！基督徒ê人生ài设法尽量生活tī伯特利ê境况中，只要基督徒存在tī-chia，无论tī生活或者属灵ê事实上，lóng会有优秀ê表现，因为chit种生活环境beh成做基督徒ê ǹg望kap力量，tùi-chia产生真chē荣神益人ê作为。

（三） 性命更新之地
雅各ê真chē不安kap危机tī伯特利得tio̍h完全ê解决。对伊来讲，伯特利是伊信仰ê转捩点，是伊ê人生siōng大ê转机。因此雅各ê人生kap伯特利有密切ê关系，上帝tī-chia特别向伊提起一件tāi- chì，就是伊新ê存在。上帝向伊讲：「你名是雅各，tùi今仔日了后mài koh叫雅各，ài叫以色列」（三十五章10节），chit-ê事实，是表示雅各tī伯特利ài有一个重新ê开始，本来伊名叫雅各，但ài改名叫做以色列，咱若详细看创世记，咱就会明白雅各ê性格m̄是真正直kó͘意，伊hō͘人ê印象是奸巧、不择手段、欺骗兄哥kap老父，然后tī伊ê丈人hia mā 用无正当ê方法得着名利，可见雅各m̄是一位正直ê人。

以色列人（犹太人）ê性格加减表现出像雅各ê款，chit种人是无受欢迎、hō͘人讨厌ê，但是上帝soah命令伊ài上伯特利koh必须ài改做以色列chit-ê名。

创世记三十二章28节，上帝hō͘雅各改做以色列了后，以色列就成做chit-ê民族kap信仰ê合称，未来ê雅各tī伯特利beh成做以色列，是有属tī上帝性格ê人，tio̍h亲像保罗tī哥林多后书五章17节所讲：「若有人tī基督内底，伊就是新造ê人，旧事已经过，lóng变成新ê了。」了后ê以色列kap上帝ê关系就有美好ê表现，无koh像以前hit种受人讨厌ê生活模式，完全变为具有属上帝性格ê以色列。

过去真gâu欺骗、奸巧ê雅各，经过上帝ê怜悯chiah成为以色列，所以伯特利，对雅各来讲是重生之地，kap过去tī示剑无仝， 因为现在伊是tòa-tī上帝ê厝伯特利。Tòa-tī上帝ê厝ê人，伊ê生活、价值观，kap所有ê心态lóng tio̍h ài有符合上帝属性ê气质，因为咱知影，beh承接上帝ê恩典，必须tio̍h建立tī符合上帝所要求ê存在ê内涵。

（四） 敬拜上帝ê所在
伯特利对雅各来讲，是伊ê新性命ê开始，但是chit种新ê存在，m̄-nā是外观，koh-khah表现出伊ê实质价值观。

这就是上帝命令伊必须ài tī伯特利敬拜上帝！雅各以及一切kap伊同在ê人，到迦南地ê路斯就是伯特利，伊tī hia起一座坛，将hit-ê所在号做伊勒伯特利（创世记三十五章6～7节）tī创世记二十八章18～21节mā有记载，ài tī chia建立上帝ê祭坛，伊是敬拜上帝ê所在，是表示雅各对上帝ê感恩以及信仰ê决定，这是信仰者ài进入上帝ê殿堂ê基本要素。啥么人会想beh进入上帝ê圣殿？就是心存感恩kap有意向献身ê人！这是基督徒teh礼拜ê时所需要了解ê，因为，人必须ài有chit种感恩ê心进入上帝ê圣殿，同时用献身ê心情khiā-tī上帝面前，chit种礼拜chiah是上帝所喜乐ê。

「Tio̍h除掉lín中间ê外邦神，也tio̍h自洁。」（三十五章2节），因为耶和华是独一无二ê主，他bat向伊ê子民讲：「除了我以外bē-tàng有别ê上帝」，同时也tio̍h自洁，这是做礼拜ê人所必须具备ê条件。人beh敬拜上帝chìn前，必须先phah破、清除所有ê偶像，然后ài自洁，就是有美好生活ê见证，这是咱所强调ê礼拜kap生活ê配合，人若是只有礼拜bô自洁，án-ne上帝是bē悦纳--ê。

基督徒ê使命就是hō͘上帝ê旨意通透tī人间，这是建立tī有清洁ê礼拜ê生活chiah来，假使tī基督徒心中iáu有偶像ê存在（私意取代神旨就是人siōng大ê偶像！），就无可能有真诚ê敬拜！因为主耶稣bat警告咱讲：「一个人bē-sái事奉二个主。」，当你ê心被自私利益家己所占tiâu，上帝一定无tī你ê性命。基督徒若beh体会伯特利事实，一定会消灭所有ê偶像，并以清洁ê心敬拜奉待上帝！

基督徒对偶像了解，m̄-nā是指hia-ê看会tio̍h ê雕像，圣经中论偶像ê时，iáu包括以人意替代上帝ê位，这mā是拜偶像，tī咱心中真chē 不法ê心思意念，hiah-ê属tī肉体ê私欲所发出ê lóng是偶像，ài进入上帝ê厝chìn前，chiah-ê lóng tio̍h ài kā伊粉碎hō͘伊清气。

有一位学者讲：基督徒若beh踏入教堂，必须将所有ê罪kap恶khǹg tī教堂门口外！

结论：基督徒ê信仰kap环境，有时会处tī危机kap挑战中，信仰ê状态mā会起起落落，今á日所特别需要ê，是得tio̍h有利ê灵属境况，若ē-tàng不断来进入伯特利，to̍h ē-sái hō͘咱ê属灵性命koh-khah完全进步。