《草地囝仔做牧师》

 | | | 转寄

社会ê良心

作者 林宗要 2010.07.25

「社会」chit二字是无人m̄知、时常听见ê一个名词，到底伊ê定义如何？siōng简单ê解释就是：tī仝一个时期、仝一个地域，人kap人之间关系ê总合。

咱lóng明白，人生kap社会ê关系非常密切。当然，社会是非常复杂ê，既然是人kap人ê关系，因此只要发生tī hiah-ê人生活上ê状况，lóng可能tī社会上看tio̍h，有人用五花八门或者是包罗万象来形容形形色色ê社会情形。

咱知影人kap人之间ê关系相当复杂，所以由人所形成ê社会，复杂mā是自然ê。

咱看社会ê现象就ē-tàng明白，伊kap人生有密切ê关系，因为伊是人生ê所在，社会动态对人生有直接或者间接ê影响，譬如政争会引起经济不振。另外如垃圾场ê设置，附近ê人一定起来抗议，核四电厂四周ê人mā极力反对，台塑六轻本来预定tī宜兰县设立，因为地方反对chiah变更tī云林麦寮（mā有反对者，但是地方政府赞成chiah tī-chia定案）。残障团体数年前tī台北市枫桥新村设立儿童发展中心ê时，社区居民lóng起来反对，理由是破坏环境ê安宁、对儿童有不良影响、安全ê问题、降低社区khiā起ê品质、房价落价……等，in讲，甘愿捐款一笔钱hō͘ hit-ê中心，请in迁到山ê khah内底ê所在……chit件tāi-chì tī当时引起相当大ê震撼，有人甚至写文章批评hiah-ê人无爱心、无同情心，因为hit阵弱智ê儿童已经有够可怜，为何社会koh用chit种态度来对待in？chit项事实to̍h是 teh反应社会问题，因为hit-ê新村附近hiah-ê人认为tī家己ê社区中，若设立chit种机构，一定会影响in ê社会环境。七十年代ê美国，有一kóa khah富裕ê乌人有时会用khah koân ê价数走入去白人区置产买厝，（如五十万ê价值会以五十五或者六十万成交），但是了后hit所在ê房价一定落价，chit种意识型态，往往带来真chē社会问题。

基督徒kap社会：圣经中明白kā咱讲，基督徒kap社会ê关系是密切ê，因为教会通常tī人chē ê所在，而且，过去教会往往以神圣自居，致使教会kap社会出现鸿沟，教会用「圣」来自称，如圣殿、圣徒、基督圣教、圣日、圣典等，用「俗」来称呼未信耶稣ê人。这是教会以圣ê篱笆来围tiâu教会，致使生活tī教会ê圣徒kap一般世俗人隔离，譬如犹太人tī社会中形成小团体，过分强调家己ê神圣，看别人为俗物，这m̄是教会应该有ê态度。今á日教会必须进入社会，感化社会，进一步来净化社会，做社会ê光kap盐，这chiah是教会ê本质。Tī历史上，教会难免受tio̍h时代潮流ê影响，一位教会历史学家将教会历史分做四个时期，每期以简单一句话说明伊ê特性：
（a） 初代教会：教会征服世界ê时。
（b） 中世纪教会：教会成做帝国ê时。
（c） 宗教改革时：教会振动世界ê时。
（d） 现代ê教会：是世界振动教会ê时。

相信咱ē-sái ùi chiah-ê事实体会tio̍h二千年来教会ê演变。咱若以台湾基督徒发展ê情形来看，加减ē-tàng明白chit-ê动向。台湾初期教会（以长老教会来讲），当时教会ê病院、学校、音乐lóng tī台湾社会ê领导地位，如马偕、彰基、新楼病院，当时ê医疗水准lóng是一等ê：淡江、长荣中学，tī当时koh有赢过公立学校：教会音乐mā是当时音乐界siōng koân水准，m̄-koh今á日neh？医疗界iáu有马偕、彰基，二间中学已经无上榜，音乐neh？只tī教会内！现在ê教会脉动已经tī第四期：世界teh振动教会！ 咱若想tio̍h chiah-ê问题，大概thang明白，过去ê世界teh困，现在已经醒起来ah，（自文艺复兴，工业革命了后），过去咱教会tī清醒中，面对困ê世界iáu有办法，但对困醒ê世界soah the̍h bē出新ê方法，一百gōa年来ê长老教会，或者是咱现在ê教会，是m̄是iáu延用旧法？虽然有心想beh变，但iáu chhōe bē不出一条新路！

Tī急变ê社会中，教会kap无应变ê作为，这就是今á日ê教会问题，欧美ê传统教会，出席率无够10％ ê近半数。台湾教会情形有khah好，通常lóng有六、七成ê出席率，为何教会失去吸引人ê力量？是社会变迁？人生活ê安定？或者是教会无物件hō͘人？抑是教会siuⁿ过保守？咱必须明白，教会ê存在是为tio̍h社会，所以必须进入社会做光做盐，主耶稣讲：灯ài khǹg tī灯台顶，m̄是khǹg tī斗底。

因为教会离开了社会ê教会，便失落伊存在ê价值，chit-ê事实，任何一位基督徒必须谨慎记tiâu在心，chiah ē-tàng tī社会上有良好ê见证。

一、 亚伯拉罕ê受召
亚伯拉罕tī信仰史上是受人所尊崇ê信仰典范，伊一生ê行动lóng teh说明信仰ê事实。尤其他ê受召koh-khah是说明教会ê存在kap社会ê价值，因此咱ē-tàng tùi亚伯拉罕来看今á日咱ê信仰生活。亚伯拉罕信仰ê开始是伊ê受召，本来伊tòa-tī巴比伦ê吾珥城，上帝却ài伊放弃原本生活ê所在到上帝所应允ê迦南地。亚伯拉罕ê受召就是teh说明人信仰上帝ê第一步，就是勇敢踏出伊熟悉ê生活环境！因为hit-ê所在，m̄是上帝应允之地，却是反背上帝旨意ê所在。一个确信上帝ê信仰者ê第一步，就是ài行到上帝应允ê所在，来运行伊ê人生！

咱若看创世纪一到十一章，至少会明白当时ê世界kap人类有四大项问题：1.始祖被赶出乐园。2.该隐thâi死亲小弟亚伯。3.挪亚ê大水。4.巴别塔。四pái lóng看tio̍h人类反背上帝，一pái比一pái严重。Tùi十二章起记载了亚伯拉罕ê受召，tī上帝远大ê计画中，亚伯拉罕ê受召被安排tī chiah-ê人反背上帝了后，上帝选召亚伯拉罕ê目的，是teh完成伊对人类拯救ê事工，这是圣经作者特别ê安排，当咱用chit-ê情景来思考今á日教会ê时，咱koh-khahe7-tàng了解基督受召，本质上kap亚伯拉罕受召有仝款ê目标kap使命。 基督徒ê被呼召，ná亲像当时亚伯拉罕受召仝款，有上帝完全美好ê旨意，就是ài每一位被选ê基督徒ē-tàng tī伊有限ê生命中完成上帝ê旨意kap计画。但咱必须记tiâu，咱受呼召，完全是因为上帝ê恩典，并m̄是tī品格上比别人khah完美，这是基督徒一定ài确立ê信仰内容。Tio̍h亲像亚伯拉罕当时被上帝选召亦是án-ne！

被召ê时，ài tī受召ê过程中体会上帝丰盛ê恩典并完成受托ê使命（就是成做上帝拯救罪人ê工具），án-ne chiah ē-tàng彰显教会存在ê内容kap价值，mā就是tī生存环境中发挥教会ê特质。当然被召ê路途无一定顺利，咱看亚伯拉罕ê生涯tio̍h ē-tàng明白，伊ê人生是坎坷中，体验上帝ê引chhōa kap恩典！这是基督徒信仰生活上ê典范。基督徒ê人生无一定一帆风顺，有时ài tī极端ê景况中去体会上帝ê丰盛，tī困苦中学习成长定定是基督徒信仰生活ê一部分，当然上帝若祝福，信徒tī顺境中去营造信仰是siōng好ê状况！

二、 现实ê教会
咱已经明白亚伯拉罕ê事实犹原是现今教会ê状况，教会ná亲像当时ê亚伯拉罕仝款，tī恩典中被召，beh去完成上帝或者是人类历史中绝对ê计画！但m̄是完成式，犹原是现在进行式，ná亲像亚伯拉罕受召了后致使完成了上帝ê托付chit段时间，就是亚伯拉罕ê.「信仰之时」，今á日教会ê「信仰之时」是接tio̍h主基督ê呼召了后到确确实实khiā-tī主前，把握应允ê chit段时间（ná亲像以色列人出埃及到进入迦南地ê旷野期间！）chit段信仰ê时间，是咱现实ê教会ê生存状况，tī-chia有真chē ê问题kap困难、不安、危险会tú-tio̍h，上帝呼召亚伯拉罕了后并无赐伊一个永远安宁平安ê所在，伊犹原ài面对真chē现实ê困苦状况kap漂流ê生活，tī伊ài得tio̍h上帝绝对应允ê迦南地，伊必须面对真chē现实ê状况，如家庭、亲人、生活、外患、饥荒等问题！这是亚伯拉罕ê现实生活，chit-ê现实mā是教会ê景况，教会被召了后，无一定会tī永远安乐ê现况中，上帝hō͘教会tī真chē现实ê逆境中完成对人类拯救ê事工，这是教会历史所kā咱讲ê信息。

咱看现实ê教会，有时定定tī苦难中敬拜上帝，初代教会受逼迫，台湾初代基督徒ê患难，中国大陆ê地下教会等，lóng说明了现实教会ê真chē景况。台湾ê现况是值得庆幸ê，因为无koh有迫害，却失去了信仰ê警觉性。学习顺服tī现实ê境况中是当时亚伯拉罕siōng大ê特质，教会（基督徒）tī现实中必须ài去学习亚伯拉罕ê信仰生活，无论任何境况lóng愿顺从上帝，有时照理来讲是无合理ê tāi-chì，iáu应该保持顺从（如献以撒！）tī咱信仰过程中，mā会tú-tio̍h chit项事实，但上帝soah要求咱tī困境中去学习顺服ê恩典！

当然，有时教会mā会表现出软弱无完全ê一面，保罗tī哥林多后书四章7节：咱有chit-ê宝贝khǹg tī瓦器内底，教会ài不断来建立tī认bat家己ê软弱kap无完全时，伊chiah ē-tàng去追求全能、完全ê主上帝！当基督徒ê信仰有chit种表现ê时，上帝ê能力会加tī无完全、软弱ê人身上，hit时软弱ê人所体会tio̍h ê m̄是软弱、无完全，是上帝ê全能kap绝对ê能力，咱若khiā-tī上帝chit pêng，什么人ē-tàng抵挡咱？历代教会就是倚靠chit种绝对ê大能力来完成上帝所交托hō͘教会ê使命！

三、 社会ê良心（代祷者ê角色）
教会ê存在，m̄是只为家己，犹原是为上帝kui-ê拯救ê计画，ná亲像亚伯拉罕受召，m̄是为伊个人，是beh完成上帝对全人类救赎ê大事工。咱看亚伯拉罕kap上帝ê对话，就ē-tàng明白，教会ê存在至少有二个决定性ê目的： （a）教会ê存在，必须ài成做社会ê良心。Tī一个腐化ê乌暗社会中，若有教会ê存在，至少ài ē-tàng tùi教会中，chhōe-tio̍h hō͘上帝悦纳ê义人，thang用来消除社会ê原因，因为亲像亚伯拉罕向上帝祈求，若有十个义人，上帝会为hiah-ê义人赦免所多玛。

Chit-ê事实说明一个真理，hō͘教会koh-khah明白其存在ê真正价值，因为义人ài ùi chia出来，至少因为教会，ē-tàng有真chē thang抵消上帝怒气ê义人。这就是án怎讲会强调教会必须是社会ê良心，尤其是tī chit-má乌暗腐化ê社会，基督徒一定会时常把握家己，成做净化社会ê功能。当然，基督徒无可能kap主耶稣仝款有拯救ê能力，但是咱ē-tàng经营咱ê人生现况，tī现实世界中成做上帝所喜乐ê义人，上帝一定会为chiah-ê他所喜乐ê义人kā伊行赦免ê恩典！

（b）另外一方面，咱必须明白，亚伯拉罕tī-chia所表现ê是成做一位代祷者，khiā-tī上帝kap众人之间，成做中介者（调停ê人），ná亲像主基督成做人kap上帝之间ê中介者，咱看tio̍h亚伯拉罕向上帝所提出ê问题，虽然是简单平常，但其中隐藏疼心，chiah-ê人若照上帝ê公义是ài hông除灭ê，但是亚伯拉罕不断来祈求上帝，chit种热爱人类ê心，to̍h是完全ê爱ê发挥，chiah ē-tàng彰显教会存在ê意义，koh-khah m̄免讲，教会ê标帜是爱（十字架to̍h是爱ê标记），十字架犹原是教会向人自我绍介ê记号。但是咱ài会记得bē-tàng kā这形式化，必须hō͘伊实实在在来表现出十字架ê爱tī人间！

Chit点是现代教会不足ê所在，咱是m̄是bat为四周hiah-ê teh-beh灭亡ê灵魂迫切tī主面前祈求neh？基督徒是hông叫做义ê人，m̄是挂名ê义人，是有防腐作用ê义人，圣经箴言十章24节：恶人所惊ê一定chhōe tio̍h伊，义人所愿ê一定蒙受应允。25节讲：暴风一过，恶人归tī无有，义人ê根基是永久。

结论：咱ài学习亚伯拉罕对上帝完全ê信靠，对人类灵魂ê热爱，以及谦逊ê心，koh一pái做信仰ê省思，咱ê存在如何？tī腐化ê社会中，咱kám有发挥基督徒ê功能？或者是成做别人ê阻碍？