《草地囝仔做牧师》

 | | | 转寄

《草地囝仔做牧师》 编者序

作者 编辑小组 2010.07.18

阮ê教会《基督教门诺会木栅教会》蒙神ê带领，ē-tàng得tio̍h林牧师ê牧养，十gōa年来，chit-ê小教会chiah ē-tàng行得稳健，会友因为受牧师ê指导，不管男女老幼，因为tī信仰上有正确ê认bat，所以无论tī家庭生活方面，khang-khè上，或者是生涯发展……各方面lóng真有成就。咱发现，有chit种深远影响力ê源头，是因为林牧师伊对信仰ê持守kap实践。伊是咱敬疼ê牧师。

回想起伊行过ê艰辛koh丰富ê牧会生涯，牧师lóng是讲：「真正m̄知影是án怎行过来--ê！从来mā bōe感觉thiám，mā bōe感觉欠缺。真是奇妙！」

第一个牧养ê教会是新屋教会。初到客家庄，tùi一句客话lóng bē晓，到ē-tàng用客语讲道，kap会友自然交通；主日学人数chē到四、五十人mā lóng由牧师kap牧师娘包办；草创时期ê新屋教会，简陋ê牧师馆，只要tú-tio̍h落雨天，tī灶脚煮饭lóng tio̍h ài戴葵笠仔。Hit时生活非常清苦，三个囝儿tú好teh发育时期，为tio̍h厝内ê人ê营养，lóng是饲鸡、掠鰗鳅、摸蜊á、种菜来补贴；卖阉鸡得来ê钱，就hō͘ gín-á做学费。牧师娘想beh tńg后头厝lóng因为考虑车资chiah会停脚。探访会友，出门就是kui工，骑脚踏车tī石头仔路顶悬震kah kui身躯麻麻麻。Tī hiah-ni̍h艰难ê环境中，一家大小ē-tàng全心事奉十四年，而且「甘之如饴」，án-ne ê见证，深得会友ê肯定kap尊敬。

后来受虎尾教会礼聘，到了虎尾，ta̍k礼拜除了固定主持三堂ê讲道，mā积极投入各团契ê活动，主日学全盛ê时koh有百gōa位学生。因为牧师ê观念tòe会tio̍h时代ê脚步，趣味koh有智慧，自然mā深得教会青少年ê爱戴。藉tio̍h丰富ê智慧kap爱心，观察会友ê需求，对贫弱ê肢体hō͘ in即时ê帮助，坚固真chē会友ê信仰。

蒙神ê恩典，目前林牧师ê经济算是非常富裕，但是in持守十分简单朴实ê生活，扶助弱小肢体，尽心尽力协助总会推展福音事工，已经生动刻画了一幅上帝ê好管家ê美丽图画。

伊ê生命篇章实在m̄是文字所ē-tàng讲完—ê，tio̍h像保罗所讲ê：「我知影án怎处tī富足，mā知影án怎处tī贫乏，ta̍k所在我lóng不时得tio̍h秘诀，靠he hō͘我加添力量ê，凡事lóng ē-tàng作。」这to̍h是林牧师生命ê写照。咱ē-tàng确信ê是：上帝已经tī他忠心良善ê奴才身上，展现一个美好ê计画，如今chit-ê计画ê主角将信仰ê精义加入性命ê火炉中。焠炼出一道道ê灵粮，hō͘真chē饥渴慕义ê心感觉饱足，咱jōa-ni̍h-á ǹg望有koh-khah chē ê生命因此得tio̍h造就，所以本会成立编辑小组，并利用上班之余ê时，将林牧师ê讲道稿整理出版，希望藉tio̍h文字ē-tàng尽量传达林牧师讲章ê真义，来荣神益人。
编辑小组