《草地囝仔做牧师》

 | | | 转寄

幸福ê人生（三）

作者 林宗要 2010.09.05

马太福音十一章4～6节；提摩太前书六章11～16节
Tī北部ê台湾教会，只要讲tio̍h马偕博士（牧师），无人m̄知，伊确实是一位真了不起ê人。伊tī福音ê宣教史留真chē值得纪念ê伟大事迹落来。伊过身了后，宣教ê khang-khè，mā由真chē宣教师继承伊koh奠定稳固ê基础。Chiah-ê宣教师将伊ê 一生ê青春贡献hō͘台湾ê教会，其中受大家siōng推崇ê就是前台湾神学院院长孙雅各牧师翁仔bó͘。Chit对翁仔bó͘奉献tī台湾教会ê心力，是无法度消除--ê。孙牧师担任台神院长有二十四年久；孙牧师娘所创办ê芥菜种会，是顶港有名声下港有出名ê，对台湾原住民、有问题ê青年、乌脚病、鸡爪疯病人ê服务，tī当时ê台湾社会除了伊无别人阿，可见孙牧师翁仔bó͘对台湾ê贡献有jōa大！In是tī马偕牧师了后hông 认定ê第二号有功人物。

照圣经ê真理来讲，chit种尽忠职守ê上帝仆人，应该受tio̍h上帝大大ê祝福chiah-tio̍h，但是事实并m̄是án-ne，孙牧师翁仔bó͘有一个后生一个 cha-bó͘-kiáⁿ，孤kiáⁿ叫做万福（1930～1938），soah tī结婚两年了后致tio̍h小儿麻痹，行路无方便，kap in bó͘离婚了后来到台湾倚靠父母，老母真细腻ê照顾伊ê生活。经过chiah-ni̍h大ê打击ê孙万福，m̄管伊ê信心有jōa好，一定是懊恼、失意，失--去无笑容，kui工坐teh轮椅顶koân等别人ê奉待伊，因为gín-á ê不幸，对chit-ê家加减mā有影响。

用台湾人ê眼光来看，孙牧师ê gín-á无传宗接代，是一件jōa-ni̍h-á严重ê tāi-chì但是外国人或者现代人，khah ē-tàng突破chit种观念。圣经中tiāⁿ-tiāⁿ会发现，上帝对顺服者，有特别ê祝福，hō͘ in kiáⁿ孙万代，好比海沙hiah-ni̍h济，尤其是以色列人ê始祖亚伯拉罕，用撒、雅各等人lóng受过chit种祝福。其实chiah-ê属世ê物件，是khiā-tī人ê立场去思考上帝ê应允。但是tī信仰ê领域内底是kap人ê想法全然无仝。有一kóa hông公认ê模范信徒或者忠心ê仆人，并无得tio̍h上帝特别ê眷顾kap恩待，有ê时koh受tio̍h koh-khah大ê灾难，chit种类似ê事件，tī教会中不时teh发生，有热心疼主、疼教会ê长老，伊ê孤kiáⁿ iáu未四十岁就过身ah，mā有本身致tio̍h癌症，iah koh真少年tio̍h过身--ê，有热心教会事工，甚至iáu做一个人布道ê长老，伊ê家境无好，kiáⁿ儿不才，着算是牧师，kui世人替主作工，mā有类似情形。Chit款类似ê问题，咱应该如何去面对neh？

顶面所讲ê chiah-ê问题，其实lóng是信仰心态ê问题，每一个信徒ài如何去面对chit种严肃ê信仰生活？信仰ê tāi-chì，真chē是无法度用一般ê道理去解释ê。当一个人tú-tio̍h无法度用人ê立场去解释ê问题ê时，就需要用信心去面对伊。这就是所谓ê信仰生活。基督徒ài了解「信仰生活」m̄是kan-ta参与教会ê chit种服事而已，siōng要紧ê是当你tī/teh人生旅程上出现状况ê时，ài怎样去面对，án怎去荣耀主。当问题来临ê时，你犹原疼主，尽心尽力ê事奉主，这就是信仰koân度ê表现。

所谓幸福ê人生，tio̍h是身体健康，有快乐ê精神，khang-khè顺势，事业有成，kiáⁿ儿将才等等。但是人生不如意ê tāi-chì十件有八、九件，tī人生ê过程中，tiāⁿ-tiāⁿ有病痛哀伤，不如意、生活有困难，kiáⁿ儿读册、khang-khè无顺，或者seng-lí失败等等，chiah-ê tāi-chì mā时常teh基督徒ê生活中发生，一个真实ê基督徒，tú-tio̍h chiah-ê问题ê时ài如何家己处理？He就是需要koh-khah坚定ê信仰，全心倚靠上帝，chiah ē-tàng克服、解决困难。

一、 掠tiâu主ê人生：（提摩太前书六章11～16节）
Chit段圣经是保罗向提摩太ê指示，主要是ài伊离开真chē无适当做耶稣基督仆人ê 不良行为（见提摩太前书六章3～10节），chiah-ê pháiⁿ行为对属于上帝ê人是无好--ê，会有负面ê影响，所以ài逃避伊，去追求属灵ê美德kap持守真道。保罗koh-khah ài提摩太掠tiâu上帝，倚靠他，tī信仰ê比赛顶koân phah拚走chông，替家己得tio̍h永远ê性命，这是信仰生活ê基本原则，基督徒若无法度持守伊ê信仰ê时，to̍h无适合叫做耶稣ê门徒。

旧约圣经约伯记，撒旦向上帝提起约伯，因为上帝特别赐福hō͘伊，所以约伯ê信仰kap人格chiah会hiah-ni̍h完美。假使上帝tùi约伯身上撤走hiah-ê hông认为是幸福条件ê财产kap kiáⁿ儿ê时，伊kám ē-tàng继续疼上帝？为tio̍h考验约伯ê信心，上帝允准撒旦攻击伊、phah-pháiⁿ伊，结果证实约伯iáu 无因为本身受tio̍h灾难，来影响伊对上帝ê虔诚信仰。撒旦用各种方法来打击约伯，soah无法度成功ê时，上帝向撒旦讲：「你虽然ài我去攻击伊，无缘无故ê去phah-pháiⁿ伊，伊犹原持守伊ê纯正。」（约伯记二章3节）虽然约伯受tio̍h hiah-ni̍h大ê苦难，家破人亡，全身生毒疮，但是伊ê信心犹原坚定，一丝á lóng无受tio̍h动摇，连伊siōng亲密ê bó͘，lóng无法度忍受hit种苦楚，chiah叫伊弃绝上帝去死！但是约伯颠倒讲：「你讲话像无知ê妇人仝款，嗳！kám讲咱tùi上帝手内底得tio̍h ê福气，kám m̄是受灾祸mah？」Tī chiah一切tāi-chì顶面，约伯并无用chhùi犯罪，无讲一句怨言。这是约伯使人景仰ê所在。换做咱kap伊仝款，tú-tio̍h hiah-ni̍h悲惨ê运命ê时，加减lóng会怨天怨地，m̄-koh伊soah无怨恨上帝，颠倒是koh-khah倚靠他，chit种tùi真诚发出ê信仰，就是基督徒蒙福ê原因。圣经上讲约伯最后受tio̍h上帝大大ê祝福。Chit-ê故事kā咱讲幸福ê人生，就是倚靠主基督持守真道ê人生。这kap保罗向提摩太所讲ê真理相仝。伊讲：「做一个上帝子民，必须『持定永生』，同时『ài守chit-ê命令』，一屑á lóng袂使用tio̍h lah-sap，一直到咱ê主耶稣基督显现。」（提摩太前书六章14节）chit种信仰chiah有伊ê价值。当咱得tio̍h信仰ê应允了后，ài一直teh信仰ê道路上向前走tsông，一直到终点，就是khiā-tī主耶稣基督面前ê时。一个人ê信仰，好亲像走相迮，无论出发ê时走了gōa紧，终点chiah是决定输赢ê关键。有一kóa基督徒ê信仰过程是án-ne，一开始真完美、真理想，无想tio̍h tī半路中跋倒，有人会徛起来继续走，有人就无法度koh徛起来，结果是失败。所以基督徒必须ài了解掠tiâu上帝，持守伊ê命令，chiah是蒙福之道。以赛亚书五十六章1～2节耶和华án-ne讲：「lín ài遵守公义，……án-ne持守ê人，tio̍h有福阿。」主耶稣用掖种ê比喻，向伊ê学生解释啥物是好土地ê时，他讲：「那落tī好土地内底--ê，tio̍h是人听道了后，持守tī老实善良ê心内，而且忍耐tio̍h结实」（路加福音八章15节）。

蒙福ê人生，一定是会结信仰ê果实，伊是掖tī好ê土顶koân，chiah ē-tàng结出美好果实。主耶稣mā讲用诚心持守真理，chiah有可能结果子，结果子ê信仰，chiah ē-tàng得tio̍h上帝ê祝福。Chit-ê真理，咱thang tùi 二千年来，教会所发生ê事实看tio̍h上帝ê祝福时常是hō͘ hit kóa tī信仰顶koân有结果子ê人。我koh一pái ê强调，基督徒ê信仰生活，一定会持守上帝ê话。箴言ê作者劝少年人讲：「持守真理ê人，有福了。」主耶稣基督tī启示录向当时ê教会来要求信徒ài持守真理。「lín ài持守，一直到我koh来。」（启示录二章25节）「你ài持守你所有--ê，mài hō͘人夺走你胜利ê华冠」（启示录三章11节）光荣ê见主，kap得tio̍h荣耀ê冠冕是基督徒siōng值得骄傲ê信仰。主教咱ài持守真理、tòe他，chiah ē-tàng得tio̍h幸福ê人生。

二、 告白基督信仰ê人生：（马太福音十六章17节）
有一pái耶稣问伊ê学生：「人子是siáng？」有人讲是施洗约翰，有人讲是先知以利亚或者耶利米。西门彼得讲：「你是基督，永生上帝ê 后生。」耶稣对伊ê 回答真满意，马上向伊讲：「西门你有福ah。」（马太福音十六章17节），che说明，讲出耶稣基督信仰ê人有福气。耶稣讲，他ê教会boeh建立tī ná亲像彼得有讲出耶稣基督ê信仰ê基石上，教会有chit种信仰了后chiah ē-sái叫做教会。

主耶稣对「幸福」chit-ê词ê看法，kap别人无仝，他所强调--ê人生ài具备对基督耶稣坚定的确ê信仰、大声讲出信仰，m̄是tùi人本身主观ê认知，是tùi父神所启示，tùi上天来ê属灵帮助ê信仰，chiah会hō͘人带来真幸福。世上有一kóa教派ê信仰非常异常，表现出真无人道ê作为，像中南美洲，毒杀全体教徒，1993年4月美国大卫教派kap政府发生枪战，八十六名信徒全部死亡，教主柯瑞许家己号做有罪ê救世主，伊有十九ê bó͘；1996年2月，基督教天体会会友，主张人m̄免穿衫。Chiah-ê教徒in lóng有讲出tùi耶稣基督ê信仰。但是chit种异端ê信仰，并无符合上帝ê旨意，m̄是真诚ê信仰心声，无属灵ê感动，bōe ē-tàng替人类带来幸福正面ê影响。

进一步讨论，讲出tùi基督ê信仰，m̄是kan-ta用chhùi讲讲--ê承认表白，siōng要紧ê是ài实际来行动，tùi生活中去见证信仰。Mā就是主耶稣tī马太福音七章24节所讲--ê：「听见我chiah-ê话chiah实行--ê，ná亲像khiáu-khiáu人kā厝起tī磐［盘］石顶koân。」chit种信仰ê基石若稳固，无论风涌有jōa大，lóng bōe歪bōe摇。这就是主所讲--ê智慧ê人生。

一个基督徒，tī伊ê人生ê旅途中，若ē-tàng将伊全部ê生活，依赖主、［，］交托hō͘主，完全照主ê旨意去实行，相信伊一定ē-tàng体会tio̍h上帝无限ê恩典kap祝福。若是咱一生得tio̍h充分ê神恩kap赐福，m̄就是幸福ê人生mah？

基督徒beh得tio̍h幸福ê人生，其实真简单，只要持守主耶稣ê道理，tī日常生活中确实去实行伊，幸福ê人生就会向你ia̍t手。

三、 无因为基督chiah跋倒ê人生：（马太福音［章］十一章6节；路加福音七章23节）
一个人若对主耶稣产生giâu疑、误解、chiah来跋倒、弃绝，chit-ê人断然无法度享受tio̍h主耶稣基督丰盛ê慈爱kap祝福。Chit句话，就是主耶稣基督面对施洗约翰ê质问chiah向伊ê学生所讲--ê。我tī学生时代（神学院）bat去看电影，事后mā时常kap同学、先生讨论「看电影、pok薰lim酒」ê问题，讨论结果就ná哥林多前书十章23～24节所讲--ê「万项tāi-chì lóng thang做，但是无一定lóng有好处。只要是tāi-chì lóng thang做，但是无一定lóng ē-sái hō͘人成功。」「无论啥物人，m̄-thang要求家己ê好处，只要求别人ê好处。」（十章31节）「lín无论做啥，食啥、lim啥，lóng tio̍h ài为着荣耀神chiah做。」「若食物会hō͘我ê兄弟犯罪，我就永远bōe koh食bōe koh lim，以免hō͘我ê兄弟犯罪。」（哥林多前书八章13节）「mài因为食物来破坏上帝ê khang-khè，一切食物lóng ē-tàng食，但是你食ê若hō͘别人来犯罪，án-ne就m̄-tio̍h了，所用siōng好mài食肉、mài lim酒、mài做任何会hō͘你ê兄弟会犯罪ê tāi-chì。」（罗马人书十四章20～21节）

Tùi顶koân几tiâu圣经经文，咱略略仔［为］ē-sái了解，基督徒ê生活kap行为会影响别人对基督耶稣ê看法，bē-tàng 无谨慎。主耶稣讲chiah-ê话，一方面是ài咱用喜乐虔诚ê心去接受耶稣基督，另外一方面ài咱行为端正，mài hō͘人因为你ê 不良品行来跋倒。Chit两项lóng bē-tàng有têng-tâⁿ，若无tio̍h无法度hông叫做基督徒。有一kóa人信主真紧，但是日后ê言语行为soah时常违反主ê教示，伊败坏ê行为，时常hō͘信心软弱ê人跋倒。这kám是真实ê信徒？身为基督徒，生活上tio̍h ài 谨慎、自爱，mài做出危害教会kap hō͘人跋倒ê tāi-chì，阻碍了福音ê传播。马太福音十八章6～10节：「若有人beh hō͘ chhìn-chhái一个基督徒来离开我，不如用大磨石头缚tī伊ê颔颈á顶koân，kā伊淹死tī深海。……hit kóa跋倒ê人有灾厄阿，所以lín ài细腻，bē-tàng看轻这小子内底ê 一个。」Tùi chia咱知影，基督m̄-nā要求接纳他ê人生活上ài符合上帝ê心意，对真细ê人或者事koh-khah ài-beh看重，因为小所在往往是hō͘人失败ê主因。一个hông救赎ê基督徒ài重视主耶稣所讲ê chit句话「只要mài因为我跋倒--ê，就有福了。」ài如何chiah bōe跋倒？必须坚固信仰，hō͘信仰生活ê基石稳固。马太福音十三章20～21节，「当今欢喜领受，只因为心内无根，不过是暂时--ê，一直到因为道来tú-tio̍h困难，或者是迫害，随就跋倒（随放弃）。」chit段经文tú好teh说明信仰根基ê重要性。

总讲一句，持守真道，大声讲出tùi耶稣基督ê信仰，bē-tàng因为基督来跋倒，án-ne chiah ē-tàng创造幸福ê人生。