《草地囝仔做牧师》

 | | | 转寄

幸福ê人生（四）

作者 林宗要 2010.09.12

使徒行传二十章35节：罗马人书十四章22节

「Tiàm世间各项大欠，koh-khah好ê tāi-chì mā有乌点」（圣诗三二二首第五节），此句圣诗指出现实ê人生内容，的确是án-ne，每一个人tī人生无仝ê阶段，lóng有无仝ê欠缺，通常咱认为chiah-ê欠缺若得tio̍h解决，tio̍h是无所欠缺ê人生，mā就是幸福ê人生。若是一个人tiāⁿ-tiāⁿ三顿食bōe饱，狠狠得tio̍h改善，伊会感觉家己真幸福；一个人若不时lóng会破病，伊认为ê幸福有可能就是有一个健康ê身躯！一个细汉gín-á心中ǹg望得tio̍h某一项mīn-kiāⁿ，比如脚踏车、新衫新裤或者一粒球，当伊得tio̍h chit-ê mīn-kiāⁿ ê时，伊会感觉真欢喜，真幸福；男女谈恋爱，当二ê人爱情有好ê结果，二人一定会认为家己是siōng幸福ê人，tùi chiah-ê例，咱ē-tàng知影人生ê幸福并无一定ê标准kap答案。有一个艰苦散赤ê庄脚gín-á，生活各项欠缺，伊梦想着有一日ē-tàng食到油食粿，一定是非常满足、幸福ê tāi-chì，但是当这gín-á最后ē-tàng ta̍k工自由ê食油食粿ê时，伊ê心tio̍h可能koh有koh-khah大ê梦想了，这就是人ê心态，相信咱thang tùi本身kap社会中得tio̍h chiah-ê体会。

幸福确实建立tī具体ê物质条件，当然chiah-ê条件，比如权力、财富、有价值ê物质，tī某一种程度顶koân对人生有帮助，mā会满足人心（人心ê满足往往hông认为是幸福ê实在），但是这只是人生一段时间ē-tàng掌握伊ê所有权而已，因为无任何人有办法控制伊所有ê一切物质条件，虽然人thang藉着法律将chiah-ê物件传hō͘ in-ê kiáⁿ孙，但是he mā是一段时间ê使用主控权而已，这就是社会权力kap财富无停ê转手ê实况，譬如咱社会中有一kóa大财主ê事业会换手，权力mā会换手，蒋介石为tio̍h满足做总统ê欲望来修改宪法，自做5届ê总统，并将主控权传hō͘伊ê后生蒋经国，但是结局neh？

Chit种社会ê现况，说明人生不过是主权暂时ê所有者，这mā是咱教会一直teh强调ê受托ê人生，用chit-ê心态去思考人生幸福ê问题，chiah ē-tàng用积极kap开朗ê态度去面对，mā chiah会有khah正面ê人生状况。今á日台湾真chē人已经受tio̍h利益思想影响，伊幸福ê价值观只看重tī具体美好ê物质条件，比如金钱、权力、珠宝、土地房产、车、名利等，chit种奇怪ê人生价值观已经kā人性ê良知kap上帝所要求ê人生内容吞去--a，chit种看荣华富贵等于幸福人生ê价值观造成现代人ê虚华，追求财富权力ê社会状况。因为心态无健全，造成tiāⁿ-tiāⁿ有人为tio̍h beh hō͘欲望得着满足，用尽一切恶毒ê心机kap手路比如谋财害命、抢劫、绑票、诈欺等，目的就是beh得tio̍h in心目中ê幸福人生，但是咱知影chit种表面ê幸福是无法度替人生带来真正有内容ê幸福价值！

现代学者用「草phō族」形容chit种无健全ê新人类（取伊ê外表好看，但是无法度用水来洗，若teh着to̍h会烂去），是指出现代人无实在ê人生内容，kan-ta有外表，无法度承受人生ê历练，tú-tio̍h困难to̍h是无法度面对，这是现代人一项真严重ê人生状况，tī chit种现实ê人生中，基督徒ài如何去建立真正有价值而且幸福ê生活？这是现代基督徒ê课题。基督徒ê人生幸福观是m̄是kap一般人仝款？只建立tī hiah-ê看会见ê现实kap财富，soah失—去了koh-khah重要，真正会带hō͘人生幸福ê内容？

每一位信徒lóng真清楚基督向撒但所讲ê：「人活teh，m̄是kan-ta靠食物，mā是靠上帝嘴内底所出ê一切话。」（马太福音四章3节），当撒但koh一pái用世上荣华富贵显示tī主耶稣面前，主讲：「撒但退去罢！当拜主你ê上帝，单ài事奉伊。」（马太福音四章10节），确实chiah-ê人所认为ê幸福ê人生条件，对人生生活有时有帮助，但是会记leh，伊m̄是绝对--ê，基督徒必须ài认清，tī人心中所有ê上帝形象ê人性价值，伊ê形成无 tī外在ê物质条件，是tī心灵kap肉体有相仝ê生活内容，tī生活中充分表现出phông-phài ê性命力，koh显现出圣灵所结ê果子，用诚心去对待人，用爱ê基础去关怀别人，kap人之间有美好ê情谊等，有一kóa人ê物质生活条件无一定丰富，但是心中充满美好活泼ê性命力，用诚心去对待人，用爱心去关怀人，kap人建立良好ê友善关系，因此生活非常充实，但是有一kóa人虽然有phông-phài ê物质条件，但是做人刻薄无情、自私自利，kap人关系真bái，这是不幸ê人生。真chē年前报纸bat报导过tī下港盐水hit-ê所在有一位真好额ê妇人人，死ê时无人共伊送，只有几名契cha-bó͘-kán the相争财产，记者用「好额soah不仁」来形容伊，这就是不幸、悲哀ê人生。

（一） 问心无愧ê人生：罗马人册十四章22节
「人teh家己认为thang行ê tāi-chì顶面，ē-tàng 无自责，就有福了。」Chit句经文teh强调问心无愧ê人生。的确tī无完美ê人生现象中，人ê生活ài表现出问心无愧ê生活内容并m̄是简单ê tāi-chì，所以一个人若确实ē-tàng建立chit种完美ê人生内容，伊就ē-tàng体会人生幸福ê实在。

圣经中上帝所要求人ê是尽本分，人ê本分是什么？就是对上帝kap对人ê态度，传道书十二章13节「总义就是敬畏上帝、谨守他ê诫命，这是人所应该尽ê本分。」他ê诫命tī旧约圣经中记载真清楚，上帝要求伊ê子民「Ài尽心、尽性、尽意疼主你ê上帝，koh ài疼人如己。」主耶稣讲这是律法kap一切道理ê总纲，mā就是旧约圣经ê全部精神，当一个人ē-tàng tī生活中án-ne表现，确实尽到人一切ê本分。

所以尽本分ē-sái讲是人生全部生活ê内容，mā是人问心无愧ê基本条件，因为若无尽本分，是beh如何讲无愧？事实上人生有真chē应尽ê本分，若bōe-tàng逐项完成，tio̍h无资格叫做无愧ê人生，譬如tī厝内ê角色，学生或者khang-khè者，社会生活中ê人kap教会中ê基督徒等，对受托ê人生内容，你若bōe-tàng好好á去完成受托ê使命，如何叫做无愧ê人生？一位老父无尽本分，乌白乱来、拍bó͘拍kiáⁿ、无顾家庭，chit种老父thang叫做无愧ê老父mah？学生m̄认真用功读册，kan-ta知影交pháiⁿ朋友，出入无正当ê场所，chit种学生kám是无愧ê学生mah？耶稣基督救赎咱，是beh hō͘咱成做圣洁，无缺点、无thang责备ê khiā tī主ê面前（欧罗西书一章22节），chit种讲法tī新约中时常可见，保罗teh写hō͘提摩太ê kap提多书册信中，讲做监督ê资格「必须无thang指责」（提摩太前书三章2节；提多书一章6～7节、二章8节），chit种无thang指责ê生活是基督要求属于伊ê子民应该有--ê，mā就是bōe见笑ê人生，先知以赛亚书四十九章23节「……等候我ê一定到见笑。」，保罗mā讲：「信靠伊ê人一定bē致使见笑」（罗马人书九章33节、十章11节），这就是我所讲无愧ê人生，bōe见笑ê人生，伊确立teh人完全谨守上帝ê诫命，因为这是人ài有ê本分，chit种人ê生活内容永远是尽本分，而且无论tī人前或者人后，in lóng是仝款，chit种态度会hō͘人感觉伊有无愧ê人生，这是siōng大ê幸福，期待咱lóng ē-tàng问心无愧，án-ne自然ē-tàng tī生活上大大ê荣耀上帝，上帝tī咱身上得tio̍h荣耀，这是人生siōng大ê福气！

（二） 欢喜付出ê人生（使徒行传二十章35节）
「纪念主耶稣ê话讲，hō͘人比接受koh-khah有福。」 通常人ê心理lóng是尽力mài得着对家己有利ê条件，因此有人讲，人ùi出生ê时，双手就掠东掠西掠无停，无gōa久就开始嘴peh开开等人饲，所有物件就塞入嘴，但是当人生行到最后ê时，soah是双手伸直直，bōe掠mā bōe食，chit种现状tī现实ê生活中mā时常看tio̍h，kan-ta会掠会抢，kan-ta知影入m̄知影出，这是ko͘-tak ê人生，用过去ê人生体验，过去自利，m̄知影付出ê人生，伊ê人际关系一定bōe欢乐，真chē人生ê悲哀，大部分lóng是chit种心态所造成。有ê时咱teh探听某人或者绍介亲事ê时会强调「过分接受钱财无好」，过分就变成冻霜，表现出「无度量」，台语讲「有量chiah有福」，的确幸福ê人生是建立tī「有度量」ê过程中，所以主耶稣讲「hō͘人比接受koh-khah有福」，箴言中亦时常有欢喜hō͘ ê人一定蒙受祝福ê教育，「有ta̍k工m̄知影满足ê，义人施舍才bōe冻霜」（箴言二十一章26节），「有施舍--ê，会加koh-khah chē，siuⁿ过冻霜--ê，颠倒散赤，爱施舍--ê，一定富裕，hō͘人快乐幸福--ê，家己mā一定会快乐」（箴言十一章24、25节）。保罗mā kā提摩太讲ài「吩咐hiah-ê今世好额ê人，mài看家己siuⁿ重，mā mài倚靠无固定ê钱财。只要倚靠he厚赐hō͘百物hō͘咱享受ê上帝。Koh ài吩咐in行善，tī好事顶面富足，甘愿施舍，欢喜提供hō͘人」（提摩太前书六章17、18节），这是基督教ê真理，因为主耶稣就是表现chit种付出ê典范，伊讲「人子来，m̄是beh受人奉待，是beh奉待人」而且献出性命来赎回人类，chit种完全ê付出to̍h是基督教ê真理，今á日ê教会kap所有ê基督徒必须ài有chit种甘愿付出ê心态，同时伊mā是无负担ê人生行为，因为这是信仰ê价值，tī基督徒ê行为顶koân若有成做负担ê表现ê时，就失去了信仰ê价值，有负担ê事奉是表示伊ê心中无真诚ê疼。信仰生活中ê 一件真理是「因为爱心所付出ê事奉是完全、理想ê信仰事实」，伊会结出真chē有意义、有价值ê信仰果子。Tī教会生活中有真chē美好ê见证定定是tùi chit种ê基督徒完全、真诚ê疼所付出ê结果，伊会帮助人，mā会成就家己，是人生幸福ê来源，义大利俗语讲：「若你beh chhōe一工--ê幸福快乐就去洗身躯、掠龙或者铰头毛，ài chhōe 一礼拜ê幸福快乐就去kap 一位少女结婚，一个月ê幸福快乐就去买一只新马，一年ê幸福快乐去起一间符合心意ê新厝，ná是ài一生幸福快乐，tio̍h ài成做一个老实有爱ê人」，tī-che咱thang知影老实--ê有爱心ê人生是kui世人lóng ē-tàng得--tio̍h人生ê幸福kap快乐，相信tī咱信仰生活中thang证实chit-ê真理，to̍h是主耶稣所讲--ê hō͘人比接受koh-khah有福ê人生内容。

（三） ē-tàng tī上帝国内底食饭ê人有福气（路加福音十四章15节）
Chit句话是每一个基督徒ài反省思考--ê，因为基督信仰生活ê终点是上帝国ê实在，你tī世间上所有ê生活总有一工ài结束，hit时你是m̄是有把握ē-tàng tī上帝国kap主坐做伙食饭kap lim？基督徒ê人生若无chit种ǹg望，he真正是siōng可怜ê，上帝国ê信仰是基督徒信仰ê全部事实，当然咱每一个人lóng期待hit日ē-tàng kap主坐做伙斗阵食kap lim，因为这是咱信仰生活ê内容。

主耶稣来世间ê主要目的就是teh传扬上帝国ê真理hō͘人，mā就是将上帝国ê事实绍介hō͘世间人，到底上帝国是什么？Siáng ē-tàng进入上帝国？上帝国是上帝主权运行ê所在，tī hia所有情况lóng符合上帝ê旨意，因此上帝国m̄是kan-ta指未来ê天国，tī现在，基督徒就会体会tio̍h上帝国ê生活内容，主耶稣bat讲「上帝国就tī lín心内」。只要人ê生活ē-tàng表现出上帝ê主权kap符合上帝旨意ê生活内容，he就是生活tī上帝国，基督徒ài重视信仰ê现实环境，ài定定替家己营造有上帝同在ê生活内涵，hō͘上帝ê主权kap伊ê旨意时常tī咱ê生活中，这是beh进入上帝国ê根本真理。Siáng有资格进入上帝国？主耶稣tī马太福音十六章19节向彼得讲beh将天国ê锁匙交hō͘伊，主要是因为彼得真清楚ê信仰告白，chit种对耶稣基督绝对ê信仰告白就是ē-tàng进入上帝国siōng基本ê要素，另外有一件咱lóng熟悉ê记事，就是有人chhōa gín-á来见耶稣，门徒阻止in，但是耶稣讲：「Hō͘ gín-á到我chia来，mài禁止in，因为tī天国to̍h是chit种人。」（马太福音十九章14节），ná亲像gín-á 单纯，全然ê相信是人进入上帝国ê基本条件，因为gín-á ê心性siōng ē-tàng表达出信仰ê实在，所以耶稣讲：「Ná是beh承受上帝国--ê，若无像gín-á，一定bōe-sái入去。」（路加福音十八章17节）。

耶稣责备当时法利赛人kap文士，因为in伪善无老实ê生活kā天国ê门关起--来，hō͘人无法度进入上帝国，当耶稣结束山顶宝训ê时，伊提出「只要听见我chiah-ê话就去做ê人chiah ē-tàng进入上帝国」，tī马太福音二十五章，主耶稣讲beh继续不断来预备家己kap尽忠职守ê人生chiah ē-tàng进入上帝国，tùi chiah-ê圣经，咱thang了解，上帝国ê把握是确立tī人对耶稣基督ê信仰告白开始，了后tio̍h是照上帝ê大宪章去实行符合上帝旨意ê生活，chit种信仰ê内容就是上帝国ê实在，chit种生活，一定tī伊ê生活中表现出符合上帝所要求ê生活状况，chit种生活就是人生幸福ê根本原因。耶稣死了后，有一位亚利马太城ê约瑟，清理耶稣ê身躯kā伊埋好，圣经讲伊是一个护士，做人善良公义，时常ǹg望上帝国ê人。（路加福音二十三章50～51节）。

咱已经讲过四讲ê幸福ê人生，幸福ê人生就是：1）（a）倚靠上上帝ê人（b）敬畏他，行他ê路（c）欢喜tī上帝ê圣殿。2）（a）过失得tio̍h赦免（b）有上帝恩疼（c）听上帝、肯受管教。3）（a）掠tiâu主（b）告白信仰（c）bōe因主来跋倒。4）（a）问心无愧（b）欢喜付出（c）ē-tàng tī上帝国食饭。

「lín既然知影chit项tāi-chì，若是去行就有福了。」（约翰福音十三章17节）