《草地囝仔做牧师》

 | | | 转寄

净化ê动力

作者 林宗要 2011.01.23

约翰一书四章7～21节

基督教ê三大真理，信、望、爱。有人用保罗、彼得kap约翰来做代表。保罗tī伊ê信仰中siōng强调ê to̍h是因信称义ê真理，罗马书kap加拉太书是siōng伟大ê作品。彼得tī伊ê phoe信中对当时hiah-ê受苦ê基督徒用希望ê信仰来安慰in，相信这是siōng切实ê真理。

Hông称做疼ê使徒约翰tī伊ê phoe信中充满ê是基督教siōng完全ê疼，咱看伊ê论调，完全流露出疼ê真谛。今á日咱所读ê chit段圣经，教示基督徒生活ê真实内容，是tī完全相爱ê生活，虽然保罗tī哥林多前书十三章mā讲tio̍h疼ê真理，但是约翰tī-chia kā基督徒讲一定ài有相爱ê生活，因为伊是基督徒性命ê根源。咱知影基督徒是hō͘上帝ê恩典所恩膏ê人，mā to̍h是受上帝疼痛ê人。因为他疼咱，所以他要求咱必须相爱，因为爱是上帝ê属性，tī创世记记载：上帝用他ê形像创造人。一般人认为to̍h是指人有上帝ê属性——爱，mā to̍h是讲，上帝创造ê人是爱ê形象。

有学者对约翰福音三章耶稣叫尼哥底母ài「重生」hit件tāi-chì，解释做tùi疼ê新生。确实约翰tī-chia kā咱讲神kap人之间ê连结点是tī疼。

上帝是疼，伊kap世人ê疼无仝，世人ê疼是现实--ê、有条件--ê、无单纯ê、片断ê，被爱ê条件若有变化，疼就会动摇。但是上帝ê爱是纯真正疼，特别是对tī无爱上帝ê世人，他iáu用纯真、绝对ê疼，施hō͘ tī咱chiah-ê配bōe起得tio̍h他疼ê人身上。这to̍h是上帝ê疼kap人ê疼无仝ê所在。

虽然咱是有罪、反背、kā他对敌，但是他iáu用他ê疼，将他ê孤kiáⁿ耶稣基督赐hō͘咱，赎咱ê罪，这to̍h是约翰福音tī-chia强调咱必须相疼ê原因。

因为若无相爱，就无属于上帝ê性命，mā就m̄是基督徒。所以相爱ê生活就等于基督徒ê人生。基督徒ê重要课题就是ài亲近上帝，持守上帝恩典ê信仰，chit种对上帝ê信仰m̄是tùi研究ê方法或者人生ê智慧chiah来ê，是teh有疼心kap实行疼ê生活。一个人若beh认bat上帝，伊必须先了解疼ê道理，因此咱ē-tàng讲认bat上帝ê资格tī疼ê人生。因为只要tī人间社会中，完全实行疼ê生活，个人ē-tàng用爱相待，就无人生ê问题、纠纷ê发生。近年来报纸差不多ta̍k工lóng有佛教界慈济集团证严法师ê文章，咱若详细kā看，就会了解，伊一直teh强调完全无私、付出ê疼，为何全台湾有120 gōa万ê人加入chit-ê团体，奉献出in ê心力，无为tio̍h私利，来替社会事工付出？

证严提出ài hō͘台湾社会有理想，需要tòa-tī台湾ê人多多付出无私、无求回报ê疼心。Ta̍k pái看tio̍h伊ê文章，心肝内lóng会想讲：当咱做一个深深体会上帝疼ê基督徒，kám会不如chiah-ê佛教徒？In肯牺牲、控制家己来响应证严法师ê呼召，基督徒实在ài多多反省，因为疼是基督徒ê特徵，基督教ê记号to̍h是疼，因为主耶稣ê生涯，thang用完全ê疼来说明，他ê降生是疼，他kui-ê生涯是疼，尤其tī传道生活中，他表现出完全ê疼，特别是他所行ê神迹，有人讲，基督ê神迹是他完全ê疼ê结果，因为疼ē-tàng解决任何tāi-chì，任何事物tī完全ê疼chìn前lóng会表现出驯良。听讲中世纪圣法兰西斯常向毒蛇、猛兽证道，以赛亚书十一章先知描写弥赛亚治理ê理想国是无纷争、攻击而且充满tio̍h疼kap和平，siōng pháiⁿ ê动物lóng温纯tòa tàu阵，儿童thang kap毒蛇猛兽做伙（十一章1～10节）。

Chit种理想ê统治（国度）是建立tī用疼为基础ê社会，今á日台湾ê社会景况混乱而且复杂，外人批评做无适合人tòa ê所在，为何án-ne？因为活tī台湾ê二千万人，ta̍k-ê人自私、心中无疼心（若有mā只是嘴讲--讲），争权夺利是台湾社会ê特色，一个欠缺疼ê社会，一定因为减少调和净化ê因素来混乱。

家庭、尪仔bó͘生活若无爱，chit-ê家庭一定成做问题家庭，因为tī「siōng需要疼ê所在欠爱」，这是今á日社会siōng严重ê问题。上帝创造人类，将in安tī伊甸乐园，mā to̍h是有完全ê疼充满ê所在，tī chia-ê人ē-tàng自由自在kap上帝沟通，chit种有完全ê疼充满，koh ē-tàng自由自在kap上帝来往ê所在to̍h是天国。传说彼得ê母亲，行为无jōa理想，死了后落地狱，彼tio̍h向上帝求，上帝虽然心内了解，iáu令天使落去救彼得ê母亲，其他ê人看见彼得ê母亲hông救起--来，纷纷走—去kā伊ê脚掠tiâu，总共有十二ê人，伊看tio̍h，就开始出力kā chiah-ê人踢掉，结果一个一个hō͘伊踢tńg去地狱，彼得tī天堂一直叫母亲bē-tàng án-ne做，最后天使看tio̍h彼得母亲chit款情形，心酸放手，彼得母亲koh落入去地狱，上帝行óa kā彼得讲：你了解bo̍h？自私ê人是无法度入天国--ê。因为天国是充满tio̍h完全ê疼ê所在！基督徒ê人生方向to̍h是面对天国--ê！

因此咱必须tī人生中有充分ê疼，chiah ē-tàng完成成做天国国民ê事实。主耶稣tī主祷文中有一句「愿你ê旨意行tī地上，ná亲像行tī天顶」，这是基督徒生活ê内容，咱一定ài ùi chit-ê目标phah拚，tī地上建立天国一般ê生活。

一、 基督徒生活ê现实场所：社会
基督徒ài了解一件事实，咱m̄是离开现实，是生活tī现实中，因此基督徒ê人生mā会受tio̍h真chē社会问题所影响。譬如家庭问题，kiáⁿ儿ê教育、khang-khè环境，人生ê遭遇，身躯ê病痛或者是人生真chē逆境，chiah-ê tī人间社会中所会发生ê状况，基督徒lóng可能体验tio̍h。因此tī咱ê信仰生活中，基督徒ài建立chit种共识，若无当你tú-tio̍h问题ê时，你ê信仰就会动摇或者产生危机。

主耶稣教示咱是世上ê kan-ta讲是地上ê盐，是说明基督徒ê现实信仰是tī社会。

所以一般ê人ê社会经验，基督徒mā是必经--ê，因为咱ê存在，是为tio̍h社会chiah存在，这是近代教会特别强调ê基督教真理。

基督教m̄是用基督耶稣ê真理做篱笆特别kā伊围起来ê一个团体，伊是设立tī社会生活中，因此必须kap社会有所接触，ài关心社会ê问题，譬如病院ê经营以及启智中心lóng是咱ê社会关怀之一。

因为咱是生活tī现实ê社会中，现实ê社会hō͘罪所控制，因此咱看见真chē乌暗kap纷乱，尤其是chit kui年来台湾政治ê争权夺利，比如第八任ê总统选举国民党就分主流kap非主流派，社会ê乌暗混乱，交通、建筑、空气、水质、食品、文化等等ê混乱现象lóng teh降低咱ê生活品质，因此台湾hō͘人评定是chiok无适合人khiā起ê环境。基督徒家己知影生活tī chit种环境中，咱ê使命就koh-khah重大，ài如何tī án-ne社会中发挥咱ê信仰，来见证基督耶稣ê福音，同时hō͘咱ê社会成做koh-khah理想、完美ê社会，这是基督徒ê使命。

因为咱ài将天国ê事实实现tī人间，因此咱必须播真chē ē-tàng实现天国ê疼ê籽tī人间。

假使基督徒ê是会生活kap一般人仝款，咱就无可能完成使命，因此家己保持基督徒ê特殊ê气质，hō͘人了解咱to̍h是基督徒，发出基督徒应该有ê清芳tī人间！

二、 净化ê动力（疼kap事奉生活ê见证）
咱已经了解，基督徒生活ê场所，to̍h是人生现实ê社会，咱mā知影，目前咱ê社会实在是非常混乱kap惊人，但是基督徒bōe-sái无管，咱tī生活中，必须ài成做光kap盐来净化社会，虽然咱ê力量无一定大，但是只要咱坚持咱ê信仰原则，就ē-tàng发挥效用。有人比喻臭腥ê社会是浊水，做净化ê基督徒是清水，清水chē浊水少，就真紧有净化ê作用，但是目前台湾ê状况soah是浊水chē，清水少，因此需要时间kap耐力，只要把握时间去做，有一日必定ē-tàng hō͘ chiah-ê浊水khah清净，至少ē-tàng渐渐变清。

Chit种信仰ê原则to̍h是基督耶稣所讲ê光ê光辉以及盐ê盐味，只要基督徒无变质，咱就会看见chit种净化作用ê显现。

基督徒若beh了解，咱ê使命to̍h是teh实行净化作用。Tī浊水中，m̄是增加浊水，是清水，至少伊ê浓度会改变！若是浊水加浊水ê时，就仝款是浊水啊。这to̍h是基督徒ê生存原则。Chit种属于清水ê信仰生活是啥物？或者是讲基督徒ê啥物行动ē-tàng净化人心？当然是只有基督耶稣ê福音，咱chiah-ê基督徒to̍h是有基督耶稣福音tī身上ê人，咱tio̍h用啥物来向人绍介基督耶稣ê福音？相信siōng有功效ê to̍h是基督徒相爱ê生活，因为伊是基督徒信仰ê根基，主耶稣向学生讲「Lín若有互相相爱ê心，众人因此就认出lín是我ê门徒了」。疼ê生活to̍h是基督徒ê标帜。

因为基督徒若无相爱就无属于基督耶稣ê灵命tī其中，所以相爱ê生活是基督徒信仰ê根本问题，伊mā是siōng ē-tàng证明基督徒ê信仰ê真理。

伊是基督教信仰所激出ê清芳，接受伊ê人或者社会lóng ē-tàng无限量ê开花结果，tī教会生活中，有一kóa hō͘人认为chiok恶质ê人，因为基督耶稣ê疼chiah完全改变！因为hō͘人完全ê疼所感化。

基督耶稣ê疼比任何物质lóng有力量，只要tī社会中传播chit种疼ê籽，伊就会净化人间社会，因为有疼ê所在就有上帝！有上帝同在to̍h是天国，tī天国ê生活无人间ê悲剧kap混乱、纷争，所充满ê是和平喜乐，平安kap疼ê付出！

同时tī chit种疼ê生活中，必定有无求代价ê付出，mā to̍h是无私ê事奉，chit种生活方式若tī咱ê社会中充分实行，这kám-m̄是天国ê生活mah？Tī-chia人kap人中所看见ê to̍h是对自然无假仙ê生活，是真纯真正ê人生。为何人间社会问题hiah-ni̍h chē？总讲一句是无爱心。

耶稣为何ài门徒学习孩童？他讲上帝国是属于有孩童心思ê人，无欺骗、无假仙、是绝对ê纯真！现代ê社会欠缺chit种心态，chiah致使病态ê社会。

三、 落实ê信仰生活（教会存在ê意义kap价值）
基督徒ê信仰生活，必须以疼做出发点来表现出信仰ê事奉，因为伊是信仰ê见证，基督徒若beh告白家己ê信仰ê时，伊必定tio̍h用心经营疼ê生活kap信仰ê事奉。

因为一个人若发出真诚ê心怀去为别人做一件tāi-chì，m̄管hit件tāi-chì ê内容如何，一定会收tio̍h好ê效果。

Tī教会ê传道史上，教会ê成长，是基督徒付出心力ê自然结果，天下无白食ê食物，存有佳哉ê心态，m̄是基督徒信仰生活ê正确态度。现代企业若略略仔有竞争性，负责ê人若无相当警觉，所有ê员工若无向心力，to̍h是hông筛掉。信仰生活ê原则kap che仝款，基督徒一定ài以战战兢兢ê心态来经营咱ê信仰，将咱ê信仰确立tī稳固ê磐石顶，然后chiah有能力去面对一切信仰ê挑战。

基督徒必须自省：你ê人生ē-tàng提供人啥物？Mā to̍h是因为你ê存在，人án怎kā你评定？上帝创造咱ná亲像天使，m̄是造成咱像恶魔，可惜人tiāⁿ-tiāⁿ用恶魔ê姿态经营伊ê人生，这to̍h是上帝痛心ê原因。基督徒ê人生，必须活出比如天使一般ê生活状况tī人间。

虽然基督徒mā是软弱无完全ê器具，但是一定ài ùi一个目标，比如基督所讲「Lín ài完全，像lín ê天父完全仝款」（马太福音五章48节）。为tio̍h beh达成chit-ê目标，基督徒一定ài用基督耶稣属灵ê力量，来建立属于咱ê信仰ê内容，hō͘咱ê信仰，实实在在kap咱ê人生发生密切ê关系，是经由咱ê完全了解清楚了后，所表现出来ê信仰内容，chit种有内容ê信仰，to̍h是所讲ê落实。生活无论任何境况lóng无法度左右、影响信仰者kap基督ê关系，自然会结出真chē信仰ê花果！

Chit种信仰ê花果是荣耀上帝ê材料，是建立教会ê根基，同时mā是净化社会ê动力！这to̍h是落实ê信仰生活ê伟大ê效力！

只要咱chiah-ê基督徒ta̍k-ê lóng ē-tàng建立án-ne ê信仰，tī任何方面lóng无koh惊惶。

结论：koh再认bat约翰所推介ê疼ê事实，用che来建立咱ê人生，来影响社会，这是教会存在ê价值。伊ê存在m̄是只为tio̍h基督徒，mā是为所有ê人！