《草地囝仔做牧师》

 | | | 转寄

教会Tī旷野

作者 林宗要 2011.01.30

启示录十二章1～17节

教会无论是tī新约或者旧约，古代或者现今ê时代，lóng是上帝所特别拣选、珍重ê一个团体，是上帝所圣别ê团体，是上帝ê选民、上帝所喜乐ê，mā是上帝特别保守照顾ê团体。

因此若照人ê观点来看教会，伊是光荣ê团体，有上帝特别ê安排kap祝福，充满tio̍h完美kap理想ê现象，因为伊hō͘全能ê天父上帝有特殊ê关系。但是咱看现实ê教会，自旧约时代开始到耶稣时代，中世纪教会，或者近代教会，咱所看tio̍h chiah-ê kap上帝有特别关系ê教会，ē-tàng用tī水深火热中来形容，咱若tùi旧约时代开始看以色列ê民族史，以及新约时代ê教会史，咱ē-tàng了解ê to̍h是一部受苦史。Tī旧约时代ê状况，自以色列人出埃及ê时tī迦南地ê生活，kap列王时代了后hō͘人掠走tio̍h亡国，到现今以色列kap中东ê问题，lóng是非常悲惨ê生活史。一直到新约时代了后ê教会，经过二千年来，虽然teh迫害了后得tio̍h保护，成做国教，但是无论任何时代一直处tī苦难中，tī近代ê宣教史上，真chē宣教师teh国外传道、建立教会，lóng忍受无数ê迫害kap攻击，甚至有教会受难ê事件发生，tī台湾或者中国大陆lóng有chit种现象。

虽然现代人对基督教无过去hit种ê敌视，但是教会到taⁿ iáu hō͘人批评、误会，hō͘人轻视、讨厌，这是咱所ē-tàng了解ê。当咱想tio̍h教会ê现象，以及上帝对教会ê应允ê时，咱会问：为何上帝ê教会会受tio̍h án-ne ê对待？伊kám-m̄是上帝所特别珍重，所赐福ê团体mah？咱mā会问，教会ê主kám是全能ê主？确实，tī咱ê信仰生活中，咱会体验tio̍h真chē tāi-chì是真pháiⁿ理解ê，ná亲像世界kap恶ê问题，信仰kap苦难ê问题，chiah-ê问题，有时用信仰去请问上帝，mā是无法度得tio̍h肯定ê答案。尤其tī教会生活中，时常体会tio̍h真chē热心事奉，有为可敬ê基督徒，伊ê一生，充满tio̍h坎坷不平、无限ê苦难，为啥物上帝会将chiah-ê苦难成做伊ê负担？通常咱khah ē-tàng了解ê是上帝ê恩典kap祝福，会tī他所疼ê基督徒身上，但是对上帝所疼ê教会或者基督徒，soah生活tī不幸、悲哀ê情景中，通常chiah-ê khah chiap hō͘人疏忽。

因此，基督徒必须ài建立正确信仰价值观。咱ē-tàng体会tio̍h上帝丰盛ê恩典，施tī他所疼ê人身上，以及引chhōa、保守他ê教会。但是同时咱mā必须了解，主所疼ê人mā会破病、受苦；mā会生活tī水深火热恶劣ê环境中。

Chiah-ê是咱信仰ê现实，tú亲像咱人生现况仝款。人生充满tio̍h各种无仝ê情感，起起落落tiāⁿ-tiāⁿ是人生ê真实景况，比如传道书所讲ê，事事有定tio̍h、生kap死、健康kap病痛、欢乐kap忧愁、幸福kap不幸。Chiah-ê现象一直是人生ê状况，基督徒或者教会mā是处tī人生或者社会中，因此难免mā会有chiah-ê感受，thang tùi下面三个问题来思考：

一、 上帝ê教会kap魔鬼
通常beh了解信仰kap苦难ê先决条件，必须ài先了解上帝kap恶ê问题；tī神学上ê教义学方面代先提出--ê，to̍h是神观问题。一般ê情形是tùi神存在ê证明开始，通常tī哲学立场上论证神ê时，thang tùi ○1宇宙论○2目的论○3本体论或者○4道德论等多多证明，chiah-ê是用人ê理智beh来证明上帝ê，当然kap基督徒信仰ê立场无仝。通常基督教信仰ê神观，m̄是tùi人ê研究chiah来--ê，是tī耶稣基督ê启示，因此基督教信仰ê神观，必须以耶稣基督ê 事实，主耶稣向学生讲：「看tio̍h我，to̍h是看见父神，若无经由我，就无人ē-tàng到上帝hia」lóng是说明耶稣基督ê启示，是人认bat上帝ê主因。Tùi chia讲tio̍h活ê人格神，创造者上帝，三位一体ê上帝，然后讲到上帝ê创造kap世界，tī-chia就会出现上帝ê摄理（预见或者预知）；照基督教信仰ê立场，上帝对世界ê摄理是咱所了解ê事实，上帝对世界ê统治、支配，对世界kap人类ê目的以及上帝国ê实现，上帝ê全能慈爱，保护kap关心，to̍h是上帝ê摄理。

Tùi以上所讲--ê，咱就ē-tàng体会tio̍h一个真确实ê问题，to̍h是恶ê问题，mā to̍h是创世记第三章，亚当kap禁果ê问题，是人tiāⁿ-tiāⁿ讨论ê主题，就是为何tī上帝所创造美好ê世界中，会有恶ê存在？Ài如何去了解上帝ê全能？这是基督教史上siōng chiap争论ê主题，mā to̍h是信仰kap苦难ê问题。

为啥物上帝允准撒但tī他所创造安置亚当ê乐园中？为啥物历代教会lóng会面对tio̍h chit种魔鬼势力不断ê破坏kap搅扰？为啥物上帝ê教会tī百般苦难中经营？Chiah-ê问题，是tī教会中时常提出来讨论ê严肃课题。

咱thang发现，上帝ê教会出现ê时，恶ê势力mā同时出现，进行破坏ê khang-khè，因此，自有教会史以来，教会就时常面对tio̍h恶魔ê挑战。Tī教会内to̍h是有不断ê困难kap迫害，但是chiah-ê是tī上帝ê应允之中，伊是有限，m̄是无限ê。Tī启示录十二章已经暗示chit-ê真理，若照正统ê解释，妇人iáu指上帝ê教会，身背日头、脚踏月娘，挂上十二粒星，日、月、星tī圣经中，tiāⁿ-tiāⁿ是表示荣耀ê记号，因此上帝ê教会伊ê本质是荣耀ê存在，「十二」tī启示录中tiāⁿ-tiāⁿ看做是旧约ê十二支派kap新约十二使徒，包括了旧约kap新约ê教会。

教会虽然是地上人所设立，但是伊ê起源或者本质ê意义是属于天。 Chit种属于上帝ê教会，tī地上历经真chē患难kap痛苦，而且是历经奋斗kap phah拚chiah产生人类ê救主耶稣基督，他是tùi教会出来--ê，他是亚伯拉罕ê后代，大卫ê kiáⁿ孙，马太福音第一章第一节耶稣ê家谱thang查出。但是咱若看启示录十二章2节「伊有身啊，teh生产ê艰难中痛kah大声叫」to̍h ē-tàng了解，妇人是指教会，上帝ê教会beh产生救赎ê主，chit-ê过程是相当艰苦，伊用疼kah真艰苦ê叫来形容伊ê过程。

Tùi chia thang知影kui-ê教会是一个战斗ê教会，是负担tio̍h真chē苦难ê教会，但是教会iáu tī苦难中，期待tio̍h拯救ê来临，另gōa一方面恶魔用各种方法beh消灭教会，虽然恶魔是专门teh破坏上帝ê khang-khè，自创世记到启示录kui本圣经中，咱ē-tàng看tio̍h ê to̍h是伊无时无刻teh kap上帝作对，用各种方法抵制上帝ê意旨。咱若看历代教会史上真chē可悲ê事实，通常lóng kap恶魔有关，虽然有时伊非常直接--ê，但是soah时常利用教会ê人物，尤其是有影响力ê人物，当做工具来进行破坏上帝ê计画。

主耶稣ê生涯中，mā tiāⁿ-tiāⁿ受tio̍h chit种引诱，siōng典型就有三pái，tī-chia咱ē-tàng了解，恶者连荣耀ê主lóng会想出所有ê办法beh引诱伊，何况咱chiah-ê无完全ê人？启示录十二章4节「龙khiā-tī beh生kiáⁿ ê妇人面前，等待伊出世，就beh kā伊拆食落腹」这是teh写恶魔对待上帝ê教会ê情形。伊ê本质是残忍、狼毒ê象徵，是pháiⁿ ê，虽然有文雅、美丽ê外貌，但是伊ê内心所充满ê是狼毒ê作为。伊所siàu想e5toh8是歹代，比如保罗tī罗马人书三章12节：「Lóng是偏离正路，做伙变做无路用，连一个mā无」所形容罪ê性质仝款。

二、 教会tī旷野
恶魔虽然用尽一切方法，beh破坏消灭上帝ê教会，但是上帝ê教会soah受tio̍h上帝ê保护，tùi十二章5节咱ē-tàng了解救主耶稣已经出世（tio̍h用铁拐á治万邦，然后ài hō͘人chhōa到神ê宝座），十二章6节妇人to̍h逃去旷野，tī-hia有上帝所预备ê所在，hō͘伊tī-hia得tio̍h 照顾1260工（1260相当三年半，是七ê半数代表无完全）。虽然咱lóng了解旷野kap城市ê生活是有真大ê差别--ê，tī旷野是无方便，而且有背后ê危险，khah无适合人生活，因此tī旷野ê生活to̍h是代表ài历尽真chē艰苦，因为无方便，就会带hō͘人真chē问题，ná亲像四十年代，台湾ê生活方式kap现今有真大ê差别，hit时tú tùi神学院毕业，用柴做燃料，需要特别买一支斧头，了后就用番仔油炉代替，到现今1997年使用瓦斯燃料。为啥物美国hiah-ni̍h仔关切科威特hō͘伊拉克侵占？伊主要ê原因，tī石油。全世界有五分之一ê油量tùi hia生产，美国又koh是siōng浪费石油ê国家，che对现代人来讲，石油实在是bē-tàng欠缺ê能源。咱ē记主耶稣讲tio̍h末日来临ê时bat讲，hiah-ê好额人必定khah无法度承担，咱自困苦ê人生，进入富裕ê生活khah简单，若是tùi富裕ê人生，beh进入困苦生活khah困难。因此人无欢喜生活tī旷野，伊ê人生必须ài增加付出，伊是无方便、辛苦kap有阻碍ê所在。M̄-koh，咱看圣经写上帝ê教会tī旷野：

（一） 是上帝ê安排，「妇人就逃去旷野，tī hia有上帝hō͘伊ê预备地」（十二章5～6节）教会tī旷野，这是事实，但是咱必须ē记这是tī上帝ê安排之下，有时咱体会tio̍h教会ê真chē问题kap困境，但是咱必须了解chit-ê 事实，是有上帝ê美意，既然是上帝ê安排，他一定bōe放弃咱来离开，「Bōe hō͘ lín做无老父ê kiáⁿ」是主耶稣向学生所讲--ê，一定有上帝ê同在，有上帝ê同在，to̍h是荣耀ê所在。

（二） hō͘伊tī-hia，得tio̍h照顾：人会惊tī旷野，是惊会影响tio̍h生存，既然tī旷野会得tio̍h适当ê照顾，án-ne就无需要惊惶旷野，咱若看以色列人tī旷野生活了四十年之久，就koh-khah ē-tàng了解四十年ê岁月，实在是上帝teh养育in，因为in无耕作或者饲动物，完全流浪tī旷野，但是soah得tio̍h上帝完全ê养育。教会ê事实mā是tī旷野，但是上帝teh养育伊，因此生存并bē有问题，虽然历代教会受tio̍h苦楚，但是soah有上帝完全ê养育。

（三） 受苦是有期限ê：tī旷野1260工（四十二个月、三年半、七ê半数），时间若到，问题就会解决；真chē困难中ê教会，有一日会变做荣耀ê教会，这是教会属天ê性格，因此现实ê教会，siōng迫切需要ê问题，to̍h是忍耐、等待、期望上帝荣耀ê来临，che mā是基督徒信仰生活真正ê内容。


三、 撒但ê破坏永远bōe停
虽然咱了解，教会tī旷野有时间性，但是咱必须ē记，恶者破坏ê khang-khè是永远bōe停--ê！Tùi启示录十二章6～8节大龙tī天顶无khiā起ê所在，就到地上来，tī十三节hit条龙就tī地上迫害教会，但是教会得tio̍h上帝ê照顾kap安排。虽然iáu tī旷野，但是一直得tio̍h照顾kap保守，恶势力，永远bōe停止迫害上帝ê教会，koh-khah去用各种ê方法beh破坏教会，但是教会有上帝ê照顾kap保守，thang用「有惊无险」来形容伊。

虽然教会因为蛇（龙）无放弃迫害，hō͘人迁到旷野甚至是无人所到ê所在，恶灵iáu无放弃迫害，koh tùi后面（15节）吐水像水灾，ài kā伊冲走，（m̄是正面，hō͘人料想bōe-tio̍h--ê，hō͘伊看bē-tio̍h）beh消灭这妇人，（这是真恶毒ê手段，tī圣经中，水灾有时hông形容是恶ê意思）但是tùi 16节thang知，上帝soah帮助妇人解决chit-ê问题，m̄-koh教会是tī上帝ê国之中，永远受tio̍h上帝ê照顾kap保护，这是教会ê事实。

虽然历代ê教会，lóng经过了相当大ê风险kap苦难，无论是tī任何地区、任何时代lóng án-ne；因为教会生存ê本质，是tī旷野，因此，教会必须ài有chit种认同，虽然tī苦难中，但是恶魔ê攻击kap破坏，永远bōe停。Tùi启示录十二章17节「龙向妇人发性地，去kap伊其他囝儿争战，to̍h是he守上帝诚命，替耶稣作见证e--5」，tsit-ê节圣经真清楚看出恶魔án怎对敌上帝ê教会，chit种实况，mā hō͘基督徒真大ê警告，只要你遵守上帝ê诚命，有基督ê见证，就会受伊ê攻击kap迫害，这点是基督徒必须觉悟，同时认清chit种迫害是永远bōe停ê。

咱若看圣经，tùi创世记到启示录，四界lóng有撒但破坏上帝ê旨意，而且永远bōe停ê，主耶稣hō͘人试探ê时，虽然三pái lóng得胜，但是路加福音四章13节soah记讲：「魔鬼用尽各样ê试探，就暂时离开耶稣」这暂时离开to̍h是表示有机会就会koh来。

所以咱ài认清恶魔ê真面目，同时ài了解咱教会或者个人信仰生活ê限时性，期待咱ê教会，虽然tī旷野，但是soah是荣耀ê教会，恶魔虽然横逆，但是上帝ê保守kap照顾koh-khah大，这是每一个基督徒siōng大ê安慰。