《草地囝仔做牧师》

 | | | 转寄

灵命ê继续kap成长

作者 林宗要 2011.01.16

约翰一书一章5～10节

咱bat讲过beh保tiâu「永生之道」，需要kap性命源头ê主不断来接触，mā只有建立tī án-ne ê关系ê时，灵命chiah会发挥伊ê无限ê价值。

主耶稣不断要求属他ê基督徒必须ài kap他有人格ê结合，siōng具代表--ê thang tùi约翰福音十五章主是真葡萄树ê比喻了解。因为离弃了性命根源——主耶稣，会成做干枯ê性命，成做hō͘人弃嫌、放sak ê kap hō͘人踏ê废物。

咱kap主耶稣ê交往，to̍h是基督徒信仰生活中bē-tàng欠缺ê属灵过程，必须经由基督徒kap人ê关系来见证基督徒kap主耶稣ê实际关系。

基督徒属灵性命重要ê存在，to̍h是见证主耶稣，tī人ê社会中，将「永生之道」绍介tī现实ê社会中。当然现实ê人，in看bē-tio̍h性命之道ê主耶稣，in所ē-tàng看tio̍h--ê，只是基督徒而已。而且人ê性格是偏重tī现实ê状况，一般人ê兴趣，tī in所看会tio̍h ê世界，这to̍h是咱时常teh强调ê，基督徒是主耶稣ê见证人，咱ài hông看出主耶稣ê存在，就是ài hō͘主耶稣成做基督徒身上ê生活者。若想tio̍h che，咱就必须用siōng谨慎ê心情来经营咱ê信仰生活。既然咱teh代表主耶稣，咱ê一举一动lóng tio̍h活出有主耶稣价值ê内容。

虽然咱ê信仰是因信称义，但是咱必须了解，咱ê生活是信仰ê siōng好解释，这to̍h是约翰所讲：「Bōe-sái疼ē-tàng看见ê兄弟，若ē-tàng疼看bōe-tio̍h ê上帝」。所以自称是基督徒ê人，teh生活上ê表现，若是不法、恶质，kap人ê关系真恶劣ê时，相信伊ê基督教信仰，就bōe受肯定kap认同，tī chit种基督徒ê现实中，福音ê宣扬必定真困难。因为基督徒bōe-sái得tio̍h人缘，就bōe-sái吸引人，mā会hō͘人看轻，基督徒tī现实ê生活环境中，若无法度受人肯定，伊ê信仰生活就bōe真理想，原因tī伊bōe-tàng用生活来解释信仰。咱tùi人类siōng早ê献祭，「亚伯kap该隐」chit-ê事实来说明人类ê悲哀以及信仰kap生活ê问题。

为何上帝只接纳亚伯soah无接纳该隐所献ê祭物？因此来致使兄弟之间ê不幸。Mā可能有赎罪ê问题，但是siōng主要ê，to̍h是上帝向该隐所讲e5hit句话：「你若行了好，kiám bōe蒙悦纳？你若行了无好，罪就phah tī门前」（创世记四章7节）。Tùi上帝所讲ê咱thang了解一件事实，to̍h是献祭kap生活是一致ê关系，无好生活配合ê献祭，m̄是上帝所欢喜，他所欢喜ê祭，是信仰者ê信仰kap生活一致，主耶稣tī马太福音五章23、24节所讲：「你tī祭坛上献礼物ê时chūn，若想起兄弟向你怀怨，就kā礼物留tī坛前，先去kap兄弟和好」。Mā to̍h是kap人ê关系iáu未解决好势ê时，必须先kā祭物khǹg好，先去处理好kap人ê问题了后，你ê祭礼chiah会hông悦纳，mā to̍h是讲，你必须先处理好人ê关系，然后chiah去献祭hō͘上帝，这是基督教信仰ê内容。

Tī-chia主耶稣向咱提起礼拜ê先决条件，to̍h是先调整kap人有良好ê内容，koh再进一步入来kap上帝ê关系。因为上帝所欢喜ê礼拜，是建立teh用人间ê和乐做基础。假使chiah-ê向他敬拜ê人kap别人ê关系真惨，试想上帝kám会欢喜？

用父母kap kiáⁿ儿ê关系来讲，父母心目中可取ê kiáⁿ儿，必定是tī社会上、khang-khè上kap别人有良好ê表现，主耶稣tī马太福音六章14～15节：「Lín饶赦人ê错误，lín ê天父mā一定会饶赦lín ê错误，lín bōe-tàng饶赦别人ê错误，lín ê天父mā一定bōe饶赦lín ê错误。」tùi chia ē-tàng完全了解，主耶稣所教示ê信仰kap礼拜，以及信仰kap疼，chit种伦理ê原则，是基督徒tī上帝面前「因信称义」ê真理，是bōe-sái分割--ê。因为基督徒白白领受上帝所赐丰盛恩典，同时必须ē记，上帝要求伊ê子民有纯洁、善良ê心态，去对待伊生活kho͘-á中ê同胞，tī chit-ê情形中，基督徒chiah会真正发挥上帝ê恩典tī伊ê身上ê伟大ê效用。

教会ê存在mā是为tio̍h che，伊ê关键tī信徒ê灵命，tī chit-ê情况之下，基督徒属灵ê性命，chiah ē-tàng维持，chiah ē-tàng成长，自然就有结实ê内容，但是ài如何达成？

一、 体验赦罪ê事实
上帝赐hō͘人ê性命，是他亲身赐予是有属上帝ê完全性，tī创世记讲：「人被造有上帝ê形像」，chit-ê形像，是形成人ê价值kap伟大内容ê事实，人ê所以tī被造物中占有真宝贵位ê主因，to̍h是tī人有上帝ê形像，mā to̍h是中国人所讲「万物之灵长」ê事实，因此tī被造物ê过程中，人是宝贵、有价值ê存在者，上帝koh将管理ê责任，交托hō͘人类，当然上帝mā要求人kap他有灵ê交往，这是人ê权利kap义务，但是chit种伟大ê价值，soah因为人ê自私kap叛逆犯罪hō͘上帝所弃绝！人类ê性命mā失落，灵性性命，虽然有上帝ê形像，soah hō͘罪恶所掩盖，是无法度发挥灵性性命有价值ê内容。基督徒必定ē-tàng了解，一个iáu未受赎ê性命是何等ê悲哀，保罗tī罗马书第三章to̍h是以弗所书第二章11节以下to̍h讲tio̍h iáu未接受福音ê人性悲惨ê情形，或者咱mā ē-tàng tùi旧约中诗人讲tio̍h hō͘上帝弃绝ê心灵，是何等空虚来了解，因此chit种本来有上帝形像ê性命，因为罪来完全堕落，chit种堕落ê性命，必须ài经由上帝完全ê赦免，chiah ē-tàng回复上帝本来ê形像kap尊贵ê性命。因此，每一个人若beh把握chit种属灵ê性命（mā to̍h是上帝hō͘人类真正有上帝形像ê性命），伊必须ài经由耶稣基督ê救赎，chit种恩典ê事实chiah ē-tàng得tio̍h属灵ê新性命。除了che以外，无别条路。约翰福音第三章，耶稣kap尼哥底母讲重生，尼哥底母是一位伟大人格者，无论tùi人格或者信仰方面，lóng是siōng完美ê人物，但是主耶稣soah慎重kā伊讲，必须ài悔改重生，chiah ē-tàng进入上帝ê国。咱若koh看保罗ê信仰告白，伊bat讲：照律法ê义是无thang指责ê，是一位标准ê人格者，但是伊soah讲：tī众人中，伊是罪魁（siōng pháiⁿ ê人），chiah-ê事实lóng teh kā咱讲一件事实，to̍h是亏欠上帝荣耀ê人类，无法度自救！任何伟大ê道德kap修为，lóng无法弥补人tī上帝ê恩典来成做新ê存在者。

因此灵命继续ê先决条件，是tī人必须ài体验tio̍h上帝丰盛赦罪ê恩典，信仰ê生活就是ài无时无刻过认罪生活。

二、 行tī光明中（灵命ê根据）
一个犯罪ê性命必须经由上帝ê恩典，藉主耶稣救赎ê行为，来重新得tio̍h上帝所赐ê灵命，但是chit-ê灵命必须ài有继续ê成长，chiah ē-tàng发挥灵命内在ê价值。

Tī-chia，咱必须注意一件事实，to̍h是灵命ê继续kap成长，因为伊是性命ê本质！这是咱所深知--ê。一个性命ê诞生，是一件喜乐ê tāi-chì，tī台湾社会，过去有真chē人，因为新性命来临chiah用演戏、请人客ê一kóa方式来庆祝。M̄-koh chit-ê性命若bōe成长，就会成做众人ê一种负担，会hō͘众人tùi喜乐变做忧愁kap悲哀！相信tī咱日常生活现实中，lóng thang体验tio̍h chia种情形。一个bōe-sái成长ê性命，以及有生长soah无内容ê人，伊ê存在对人类社会将无正面作用，颠倒危害人类！Hiah-ê歹徒，虽然mā一表人才，但是伊ê行为soah是不法kap恶毒，chit种性命就是无价值ê性命。

基督徒属灵性命ê原理mā是án-ne，灵命beh继续，同时mā tio̍h成长。Tī咱现今ê教会生活中，有真chē基督徒ê灵命，无法度继续，甚至tī半途就失落了属灵ê活命。Chiah-ê基督徒to̍h是tī平常ê属灵生活中，无吸取灵命所需要ê养分，tùi此thang知，灵命确实需要灵粮来维持。基督徒灵性若营养不良，是一件惊人ê tāi-chì，伊无抵抗力来对付外来入侵ê攻击者，真chē人ê所以丧失性命，to̍h是tī in ê性命中，欠缺chit种抵抗力所组成。因此咱知影，脆弱ê灵命，是基督徒ê致命伤，破病kap衰弱，对性命是一种威胁，是真惊人ê事实。但是约翰tī-chia kā咱讲，beh克服灵命脆弱siōng基本ê办法，to̍h是行tī光明中，因为性命ê源头ê上帝是光，因此一个属上帝ê人，若行tī乌暗中，就无符合伊ê身分，约翰一书第一章5～6节「上帝是光，他完全无乌暗，所以若咱讲咱kap他有团契，soah iáu生活tī乌暗中，咱to̍h是讲白贼，无行真理。」kap上帝交往ê先决条件，to̍h是行tī光明中。

因为kan-ta讲是真实，真实是上帝，chit种行tī光明中ê情形，to̍h是分别基督徒ê真伪性格。基督徒是属上帝ê人，因此伊ê行为，必须ài有属上帝ê真实性，亦to̍h是光明ê实在。一个人若肯行tī光明中，表示伊确实需要光明，mā深知人间ê乌暗面，mā只有主耶稣ê光，chiah ē-tàng带hō͘生活tī乌暗中ê人，有光明ê生活。这to̍h是属灵眼光ê phah开，ē-tàng看出家己真正ê需要，koh靠上帝ê恩典kap能力，去实行光明中ê生活，mā to̍h是咱时常提起，「了解家己ê罪状」。

Tī路加福音十八章法利赛人kap税吏祈祷ê比喻，咱thang完全了解，一个罪人tī上帝面前ê情况！

罪人需要真光hō͘ in照射，chiah ē-tàng辨别符合上帝旨意ê人间ê行为，伊ê主因tī上帝ê kan-ta讲是辨别人间所有事物ê基准。人若有chit种辨别事物ê准绳，生活就会符合主ê要求。这mā to̍h是约翰极力ài咱行tī光明中ê原由。行tī光明中，一方面是人kap上帝之间ê交往，另gōa一方面是人kap人生活内底有光明ê表现。当一个人，ē-tàng行tī光明中kap上帝交往，koh ē-tàng tī人间建立光明ê状况ê时，chit种人生应该是上帝所要求ê人生。

三、 生存tī疼中：（灵命ê现实）
咱讲tio̍h灵命ê根据，是人必须行tī光明中，mā知影「上帝是光，tī他完全无乌暗」。因此，他无愿意属他ê人，行tī乌暗中，这是m̄免怀疑ê，mā是基督徒所应该ài有ê天性。但是基督徒（灵命ê持有人）ài确实了解，伊ê属灵生活ê场所是人ê社会，虽然chit-ê社会充满tio̍h不幸、悲哀kap恶毒，但是基督徒bōe-sái脱离chit种现实。咱做光做盐ê所在，是chit-ê现实ê社会。但是社会环境是án怎？咱大家lóng真清楚。Tī-chia现实中，基督徒beh如何发挥伊ê灵命ê内涵tī人间社会中，这是一个严肃ê课题。当然to̍h是hiah-ê人siōng ē-tàng接受ê疼ê行为。因为疼是上帝ê本质，伊mā是形成基督徒ê要件，基督徒是hông认为是siōng认bat上帝ê人，事实mā是án-ne，但是咱必须记tiâu约翰所讲ê一句话，认bat上帝ê认定标准安在？受洗、读经、祈祷、参加礼拜、事奉教会？Chiah-ê约翰lóng无认定，伊所认定ê，to̍h是「疼」。因为伊讲「无疼，就m̄-bat上帝」。所以认bat上帝确实ê根据，是tī hia-ê人身上是m̄是chhōe ē tio̍h疼，同时chit种疼，ài生活化，实践tī行为上，m̄是只有嘴讲--讲或者观念；是实实在在将疼ê行为表现tī生活中，选美活动主题曲「美是心中有疼」实在无够，圣经中所强调基督徒ê疼，应该是有行动ê疼，亦to̍h是tùi疼ê实际行动（比如疼所ē-tàng看tio̍h ê兄弟姊妹）来证明咱疼上帝ê生活（chiah ē-tàng疼所bōe-sái看tio̍h ê上帝），这是基督教信仰ê内容，上帝ài咱chiah-ê体验tio̍h他ê疼ê人，ē-tàng将chit-ê疼反应tī人间。

英国诗人但尼生（1809～1892）讲：「拒绝爱ê人，会hō͘爱所拒绝」kap圣经真理相符合。接受上帝ê疼ê人，必须将tsit-ê爱kap人分享。德国学者歌德（1749～1832，世界三大诗人之一）讲：「天有星，地有花，人有爱」基督徒必须了解，咱ê灵命ê继续kap成长，是确立tī信徒疼ê生活中。因为上帝是疼，所以属他ê信徒，必须ài生存tī疼中。Mā因为上帝ê国伊ê本质to̍h是疼，伊是tùi疼来成立ê。

上帝国ê信仰是基督徒siōng大ê希望kap安慰，伊是建立tī人类ê被疼ê基础上。

综观前述，基督徒灵命ê继续kap成长，是基督徒生活中所bōe-sái疏忽ê事实，咱必须用严谨ê心态，去体验赦罪ê恩典；然后行tī光明中，活tī疼ê世界。因为in kap灵命有深切ê关系。