《草地囝仔做牧师》

 | | | 转寄

励进ê意志

作者 林宗要 2011.01.09

腓立比书三章1～14节

人类jú文明，jú ē-tàng用家己ê能力去推动、开发生存ê世界，hō͘人类ē-tàng tī文明中生活，人ê问题就jú复杂。就ná现代ê原子能去发展帮助人类ê生活，无论tī科技或者医学上lóng有良好ê结果，但是mā是危害人类生存ê惊人武器。有人认为推动人类生存关键是经济。近来世界ê经济竞争真激烈，用第二次大战了后ê德国kap日本做例，这两国理当hông phùi嘴澜，但是事实上，这两国tī现代ê国际舞台顶占真重要ê位，主因是tī in ê经济力量非常厚。Tú亲像台语俗语讲：「有钱使鬼会e磨」，tī真chē方面只要有经济能力，对tāi-chì ê帮助真大，近年来台湾tī国际政治上是劣势，中国大陆ê打压，一直想beh消灭台湾ê政治空间，佳哉台湾近年ê经济建设相当出色，若无台湾ê处境一定会koh-khah艰难。Tī现实ê环境中mā是án-ne，有经济能力ê人beh做任何tāi-chì lóng ē-tàng放手去做，成功机率大，事实上chiah-ê好额人ê子弟ê才智kap能力无一定比一般人状况khah好，只是in有一个真有利ê条件，to̍h是有上世人ê经济做后盾，tùi此咱ē-tàng体会tio̍h经济环境是推动世界ê一种力量，但是iáu有真chē ê问题并m̄是经济ê力量ē-tàng去化解ê，咱ē-tàng tùi好额ê国家ê社会问题去了解chit种事实。爱情ê力量mā是hō͘人认为siōng有影响力之一，俗语讲：世界ê运命是掌握teh推动摇篮ê手，所强调ê是母爱，确实是án-ne，一位对世界运命有影响力ê人物，通常是因为背后ê母亲ê教养kap培育所产生，以上ê影响力lóng存在，但是并m̄是绝对--ê，tī人ê一生中有一件非常重要ê，是人ê心，mā to̍h是人ê感情kap意志，是人生生活ê关键。近代学说对人ê心理相当重视，确实人ê情意是推动人类生存ê主要关键，同时伊mā是形成人类比其他动物khah优秀ê重要因素，这to̍h是人所以成做万物之灵ê主因，一方面是人有上帝ê形象kap灵性ê存在，另gōa一方面因为人ê心志成做人真大ê生活动力，人ê心志通常用teh思考、选择、实行ê过程，chit-ê过程to̍h是所谓ê人格行为，虽然其他被造物中mā有chiah--ê，但是soah无比人类有志气、有作为ê决心kap毅力。Tùi人对世界ê真假善恶，是非判断，thang看出人ê人格运作。仝款是人，但是gín-á kap成人tī人格表现上就有差别。Gín-á因为iáu未成熟，因此对选择kap思考判断ê问题无一定准，譬如一个iáu未tàng辨别是非ê gín-á，有时会做出真危险ê动作来，比如刀伤、烫伤、火伤等等。In ê人格iáu未成熟，所以父母ê教养koh-khah重要。现代生活追求自由，父母若bōe-sái完全了解自由ê真意，soah用kù-chāi伊去ê方式教养kiáⁿ儿ê时，往往会发生一kóa不幸ê后果。今á日青少年犯罪增加，主因就tī父母对kiáⁿ儿ê教养，平时父母无论tio̍h或者m̄-tio̍h lóng尽力满足kiáⁿ儿ê需求，无hō͘ in对「是kap非」ê问题纠正ê机会。日后chit-ê青少年若有需求不满ê时，就有可能用异常ê手段设法得tio̍h所ài ê物件，chiah来犯法。可见人格ê健全是一件重要ê事实，这kap kui-ê人生有决定性ê关系，通常是包括tio̍h思考、选择、决定kap实践ê意志。

单一意志——gín-á时有冲动ê动作kap幼稚ê行为！复杂意志——成人ê人格、欲望、想像，经过判断chiah去实行。譬如：对食物，无成熟ê人或者异常人格者会无选择去食物件，但是成熟人格者会kā伊辨别、判断了后chiah去食，teh生活中咱mā时常看tio̍h gín-á或者异常人格者m̄管啥物物件lóng塞入去嘴内！成功ê动力是由成熟ê人格，ē-tàng思考、选择、实行、发挥意志力。基督徒励进ê意志mā kap chit-ê原理仝款，相信每一个信徒lóng想beh成做理想可敬ê基督徒，chit-ê目标ê完成是建立tī基督徒对信仰ê意志力。可惜ê是现代基督徒tī信仰生活上往往欠缺chit种力量，致使表现出来ê信仰生活是有名无实ê，行为无检点、性格奇怪，chit种情形当然bōe结信仰ê果实，颠倒成做异端ê信仰。Tī腓立比书三章1～14节，咱ē-tàng看出保罗ê人格所表现出来ê信仰意志，1）伊思考基督ê救恩了后，2）伊选择伊当teh行ê人生方向，伊用认bat基督为至宝，3）然后伊将chit-ê理念付诸实行；这to̍h是保罗ê传道生涯，伊用「我活teh是为基督」，chit-ê事实来表明伊ê人格kap全人生涯。Chit种信仰是值得基督徒去效法ê伟大信仰内容。

一、 Kap上帝建立良好ê关系
基督徒ê信仰意志，伊ê对象siōng主要是以基督为主，因为他是信仰ê开始kap终点。所以基督徒ài确立家己kap上帝ê关系，若无清楚ê时，其他ê状况就真pháiⁿ讲啊。基督徒对上帝ê意志必须ài相当ê谨慎警醒。因此kap上帝ê关系，是信仰生活ê基准，kap上帝ê关系良好ê时，信仰生活自然通顺，伊ê结果是有正面ê价值。若是án-ne，信徒对上帝ê意志siōng需要ê是啥物neh？Tī信仰ê世界中或者是项目siuⁿ-chē，但是其中一项非常重要ê to̍h是听从上帝ê话，遵行上帝ê旨意。彼得tī使徒行传五章29节「顺从上帝无顺从人是应该--ê」，相信tī上帝ê眼光中，他要求属于他ê子民siōng迫切ê to̍h是听从上帝ê命令，这to̍h是信仰，因为信仰to̍h是顺服ê意思。Tī撒母耳记上卷，上帝通过撒母耳向扫罗王所讲ê to̍h是chit种顺服ê信仰，因为耶和华所喜乐ê祭拜to̍h是人ê顺从「听命胜过献计祭，顺从胜过公羊ê油」（撒母耳上十五章22节），基督徒必须用听上帝ê命令作为phah拚ê目标。保罗ê信仰表现是尊主为大。表现出主基督ê荣耀tī伊身上是伊生活ê全部内容，对信仰ê主有所交待，mā to̍h是生活tī主ê旨意之下，这是伊面对上帝ê基本条件。Chit种信仰ê建立自然tī生活上就ē-tàng表现出对上帝ê服从，kap发自内心ê尊敬。因为若无尊敬ê心，tī伊ê人生中就无可能表现出顺服ê信仰，敬重主是基督徒信仰ê重要因素，因为这关系tio̍h基督徒对主耶稣信仰ê态度。你看主是án怎ê人物？是一般人，是伟人，是先知，或者是为你舍命救赎你ê救主！由你对主耶稣ê看法来决定一个基督徒对主耶稣ê感情，因为尊敬ê内容是tùi价值来评判。对上帝价值ê认定形成基督徒对上帝ê心态来成做信仰内容，tī现实教会中，基督徒所表现出ê信仰内涵lóng对上帝ê价值评判ê根基。Tī一般未信者中，对上帝ê看法kap tī基督徒问对主耶稣ê观点lóng无仝，同时tī信徒中mā有所分别，主因tī伊对上帝ê理解kap体验无相仝。因此基督徒ài tī信仰生活中建立信仰ê意志，siōng重要ê是beh确立kap上帝之间ê人格关系，to̍h是对上帝ài顺服，对基督ài存敬重ê心去经营信仰生活，因为一个信徒ài尊敬基督，chiah ē-tàng活出以主为首ê生活。自然所表现出来ê生活ē-tàng符合主ê要求，tùi此to̍h ē-tàng看出人ê理想kap正确ê人生价值。

二、 对你本身——肯定家己疼家己
励进意志ê重点，一方面是面对上帝，已经如头前所讲ê。对家己mā是件重要ê现实。

Tī信仰ê世界，大多数ê人tiāⁿ-tiāⁿ重视心灵ê追求强化，soah疏忽了现实ê人生部分，信仰ê对象虽然是看bē-tio̍h ê上帝，但是soah实际发生tī人ê生活中，所以对信仰ê观点，tú亲像约翰所言，必须tùi看会tio̍h ê人类去见证看bē-tio̍h ê上帝。约翰一书四章20节「无爱看会tio̍h ê兄弟，就bōe-sái疼看bē-tio̍h ê上帝」。约翰tī-chia已经完全解释了咱ê信仰。一个对上帝热心ê基督徒，若tī现实生活内底对人对家己lóng无尽本分，试想这kám ē-tàng算是可取ê基督徒？相信咱lóng ē-tàng了解，一位hō͘上帝所肯定ê基督徒，伊m̄-nā tī信仰上有优秀ê表现，to̍h是tī现实生活中mā有正面价值ê人生表现，án-ne chiah ē-tàng算是一位理想ê信仰者。

为何主耶稣一直批评法利赛人ê信仰（马太福音二十三章），主因tī chiah-ê法利赛人只偏重tī对上帝方面ê表现，soah疏忽了人际关系ê现实面。Chit种信仰是失败伪善ê，当然mā bōe结出圣灵ê果子，是无价值ê信仰。所以基督徒ê信仰应该重视心灵，同时mā重视看会tio̍h ê自己，hō͘家己ê存在ē-tàng真正替主耶稣作见证，mā to̍h是ē-tàng有主ê清芳之气，达成上帝对他子民ê所要求ê——ē-tàng实实在在ê成做上帝所喜乐ê殿。这是基督徒phah拚ê方向。保罗tī罗马书教咱ài疼惜家己，善用上帝所赐各种无仝ê恩赐，去尽各人ê本分，phah拚建立chit种信仰生活，bē-tàng行入极端ê信仰，只看重属灵ê事实，看现实生活是垃圾，自视清高，tī现代ê基督徒中mā有chit种信仰态度ê人，当然chit种极端ê信仰表现tī现实ê人生是bē有美好ê信仰见证。因此一位有理想ê基督徒必须tiāⁿ-tiāⁿ策励家己，ē-tàng完全遵行上帝ê旨意来生活，一方面保守家己ê信仰，另gōa一方面phah拚发挥信仰ê内容，彰显主耶稣ê荣耀，chit种决心，是基督徒对家己ê励进意志ê siōng好表现，tùi此thang看出信仰ê果实经由基督徒chit种意志表现出完全ê人生内容。

三、 对人——疼邻比如己
Tī现实ê信仰世界中，基督徒所接触ê m̄-nā是家己，iáu有家己以外ê人，这是基督徒信仰生活发挥ê对象，经过kap人ê接触，基督徒ê信仰内容tiāⁿ-tiāⁿ会得tio̍h无仝程度ê评估，因为现实ê人类所看重ê，khah m̄是玄奥ê信仰真理，却是基督徒平日生活ê表现，这to̍h是圣经强调ê信仰ê生活。Mā to̍h是信仰kap生活ài相仝，因为任何伟大ê信仰教义或者真理，对未信者来讲是无兴趣ê，mā无心去理解，但是当in tī世俗ê世界中发现一位有主耶稣气质ê基督徒ê时，in会去注意，甚至会表现出好感。Tùi chia看出一个好ê基督徒是hō͘人kap福音有一个接触ê点。这to̍h是传福音siōng有利ê器具，mā是每一个基督徒必须细腻去思考ê问题。咱必须善用上帝所赐各样恩赐，去发挥上帝tī咱身上ê信仰价值，存在社会中，这to̍h是基督徒活tī现实生活中ê价值。过去基督徒时常用圣徒自居，chiah称未信ê人是世俗人，tī过去ê教会生活中时常有chit种圣俗之分，特别强调基督徒ài分别为圣，或者者是受保罗tī哥林多后书六章所影响，「Lín一定ài tùi in中间出来，kap in分别」（哥林多后书六章17节），确实基督徒ê生活ài有所分别，但是tī-chia所指，khah m̄是隔离ê意思，是表现上ê无仝，tú亲像顶面所讲ê用基督徒美好ê气质ê人生内容去感化hiah-ê世俗人。这是基督徒良好信仰ê生活态度，是一切信仰ê根本，mā lóng tī「尽心尽力疼主你ê上帝，koh ài疼人如己」。Chit种圣经ê中心思想，是基督徒信仰意志bē-tàng欠缺ê生活重心。因为对人ê态度是印证基督徒ê信仰中心问题，to̍h是kap上帝ê关系，mā to̍h是约翰所讲ê tùi疼看会tio̍h ê兄弟（人类）chiah证明咱疼上帝ê信仰。所以一个真正ê基督徒必定会用疼别人如己ê信仰去见证上帝ê疼ê生活者，chiah thang完成主基督ê理想「愿你ê国降临，愿你ê旨意行tī地上ná亲像行tī天顶」，这to̍h是主耶稣向世人绍介ê天国真理。Tī上帝ê真理中，天国m̄是只限定tī来世而已，tī现实中人就有可能实现活tī天国ê事实，那mā to̍h是tī人生中去成全上帝ê旨意。只要属于他ê人有chit种心态kap chit种生活内容to̍h是活tī天国啊。有尽心尽力疼上帝koh有疼邻如己ê理想生活内容，这是基督徒励进意志所必须具备ê根本信仰。

当然人ê意志力是软弱无完全ê，基督徒ài tī伊ê人格中追求那完全ê，ài把握上帝！M̄是已经得tio̍h，是向chit-ê标竿一直走，chit种期待，是基督徒励进ê意志动力。