《草地囝仔做牧师》

 | | | 转寄

去芜存菁

作者 林宗要 2011.01.02

以弗所书四章25～32节

伟大ê历史学家汤恩比ê着作《文明ê试炼》中bat提出一句真有警示性ê话，对现代人ê警告：「历史证明，过去人类所phah拚ê，只是hō͘人类进入一个koh-khah chē战争、koh-khah chē纠纷，koh-khah chē灾祸ê时期」，咱看近代世界史就ē-tàng体会出chit位伟大ê历史学家所讲ê话是非常切实提出人类ê问题。

若用khah浅白ê讲法：是人类用心phah拚追求ê事物tī人类中间带来koh-khah chē ê问题。因为咱四界ē-tàng看tio̍h人类iáu是活tī战争不断ê纠纷，以及真chē灾祸中。贫苦ê非洲人因为饥荒chiah生活kah非常痛苦，饿死ê人chē kah-ná亲像山、传染病ê发生、tiāⁿ-tiāⁿ因为真少部分自私ê人所引起ê战争soah thâi死无数ê人。进步中ê国家ê天灾地变（1995年1月ê日本阪神大地动，死亡五千gōa个人，无厝thang tòa ê人二、三十万人，损失近千亿万美金。）或者是飞机失事，或者是科技所发生ê失败，化工厂ê问题，工业生产ê灾祸等等，lóng说明人类所面对ê灾难ê普遍性，无分贫富、民族、阶级。虽然人类有心想beh改变，文明ē-tàng帮助人类ê生活ùi khah理想、完美ê方向去，人类付出一切ê期待hō͘生活环境koh-khah完美充实，人所得tio̍h ê soah是片面ê充实，（比如物质生活面ê丰富而已，用台湾做例，空前ê物质富裕，但是mā是m̄-bat有ê政治、乌道、宗教等社会现象ê恶质化），tùi人类整体ê实况来看ê时，确实tú亲像汤恩比所讲，人类一切ê phah拚只制造出koh-khah chē ê混乱kap问题，咱用咱切实ê生活环境（污染kap癌症）来看人类ê生存ê时就ē-tàng koh-khah了解。1995年2月德国ê镜报批评，台湾人ê生活环境ná亲像猪tiâu，虽然有一kóa人会提出反驳，但是tùi整体ê状况去了解咱ê生存环境ê时，台湾ê环境确实无jōa适合人khiā起，这是不争ê事实。为何会造成如此现象？照理社会ê进步，经济ê大改善，对人民生活品质应该是有正面ê作用，为何台湾近年来人民ê经济生活方面比过去khah富裕，但是为何整体生活hō͘人批评？Chit种原因可能关系tio̍h咱ê民族性以及心态，咱虽然聪明，但是soah是用真自私ê态度待人接物，tī社会性ê表现上，咱所表现ê tiāⁿ-tiāⁿ是负面khah chē过正面，因为自私ê人tiāⁿ-tiāⁿ bōe顾虑tio̍h整体ê存在。一位学者bat讲「中国人是世上siōng巧ê人，仝款ê tāi-chì，ài一个中国人或者外国人去做ê时，中国人做了khah紧koh好，若是beh二个人以上ê中国人去做仝款ê tāi-chì ê时，水准tio̍h bōe到外国人」，chit句话充分说明了中国人自私心态，咱知影一个自私ê人，就无可能有公德心，因为自私ê人kan-ta顾家己无顾别人。Tùi咱ê日常生活中ê细节thang知影，是啥物原因hō͘时常夸口有五千年文化历史ê中国人输hō͘外国人？问题就是tī自私贪心ê价值观。

饲狗ê人，ta̍k早lóng会带狗去公园运动kap放屎尿：一位妇人ta̍k早摒扫家己厝前ê环境，soah将垃圾塞入去水沟内底，类似chit种情形，咱四界thang看tio̍h，这是造成咱社会ê混乱kap问题，咱知影人是群居ê社会生活者，chit种自私利己ê心态，确实造成社会上真chē负面ê结果！

而且近几年来社会上大多数ê人重名重利，koh-khah hō͘咱ê社会增加负担，这to̍h是国际间对台湾ê现况siōng确切ê批评。通常kan-ta知影报喜m̄报忧ê官府，lóng bōe去检讨反省，颠倒是用别人太主观、偏见来做反驳ê讲辞，因此koh-khah形成了咱恶质ê社会。

生存tī án-ne社会生态中ê咱，如何做一个世上ê光、地上ê盐ê基督徒角色，是咱现实ê信仰使命，chit种心态是每一个基督徒必须树立真正信仰生活ê路径！

一、 人性ê弱点
咱tùi以弗所书四章25～32节保罗劝免以弗所教会ê基督徒ài除去（汉文译做「弃绝」）真chē不良操行或者行径，来建立符合上帝所要求ê信仰生活ê真实内容。Tī保罗ê书信中，伊时常要求基督徒ê生活ài kap受召ê身分相称，mā to̍h是信心kap生活有一致ê内容。基督徒必须用真实ê生活证明咱是基督耶稣ê子民，所以必须弃绝真chē危害基督徒信仰生活ê不良行径。基督徒必须kap hiah-ê无受召ê外邦人有所区别，因为咱既然是上帝用重价值赎回ê，就必须ài活出上帝ê款，ài有上帝ê样式ê先决条件，to̍h是有上帝ê属性，咱深深了解上帝ê疼kap公义，tī圣经中时常提起「当用圣洁ê装饰（作为），敬拜耶和华」（诗篇九十六篇9节，二十九篇2节；历代志上十六章29节），因为上帝是圣洁公义ê主。彼得tī批中mā要求基督徒ê生活ài有上帝ê圣洁，「Ná亲像呼召lín ê是圣洁ê，lín tī一切所行ê tāi-chì也tio̍h圣洁」（彼得前书一章15节）「耶和华讲：lín ài圣洁，因为我是圣洁ê」（彼得前书一章16节）（哥林多后书十一章44～45节）。

Chit种上帝神圣ê性格所要求ê，to̍h是要求属他ê人tī/teh他面前有圣洁ê作为。

这to̍h是tī咱ê教会生活中。一直强调基督徒必须有圣洁ê行为ê主因。咱ài成做新ê人，ài有新人ê生活内容，（罗马人书十二章1~2节）；哥林多后书五章17节）保罗tī以弗所书四～五章to̍h是强调chit方面ê信仰生活，「Lín应该效法上帝kah-ná蒙慈疼ê囝儿仝款」（以弗所书五章1节），续落来无论是teh消极或者积极方面lóng详细说明了一个上帝ê子民应该有ê生活方式，人性ê弱点to̍h是生活方式ê阻碍，咱ē-tàng tùi咱ê信仰生活中体验chiah-ê状况。

1） 自私ê个性是咱所ē-tàng体会人性中siōng普遍ê缺陷！Chit种弱点自亚当开始就tī人间，咱看亚当如何形容上帝hō͘伊匹配ê夏娃，伊ê形容词是「骨中骨，肉中肉」，但是当犯罪了后彼此hō͘推责任，亚当向上帝辩讲：「是你所hō͘我作伴ê妇人害我犯罪ê」（创世记三章12节）。一直到今á日，咱siōng chiap看tio̍h ê人性缺陷，to̍h是chit种利己自私ê个性表现。（譬如翁仔bó͘当利害tī目chiu前ê时，先顾家己）。咱知影人ê存在是建立tī社会性ê互动关系上，m̄-nā tī siōng亲密ê家庭环境中，甚至tī一般ê社会生活中，lóng需要chit种群性ê关系。Ài hō͘人生ê内容koh-khah充实kap完美，关键是tī人彼此之间发挥相当程度ê社会性，mā to̍h是克服自私利己ê个性，用互相ê关心去分担人生ê责任，án-ne一定有美好ê结果，家庭ê美满或者社会ê秩序，通常lóng是因为人有chit种共识来形成ê。

咱thang tùi几句台湾谚语看出人性ê自私，○1别人ê kiáⁿ儿死bōe了。○2日头赤映映，随人顾性命。○3自扫门前雪，mài管别人瓦上霜。这lóng反映出人ê自私心态。

2）无互相敬重ê人性。自私ê必然结果，to̍h是无尊重别人，因为伊ê人生kan-nā顾家己，无顾别人，chit种心态造成社会生活中所看tio̍h ê人kap人之间ê状况——冷淡、无情。主因是自私所形成ê结果，tī人之间无互相敬重ê诚意，tio̍h会轻视别人，bōe将别人看在眼里，结果tio̍h造成咱社会混乱ê现象，欠缺尊重ê所在，永无法度建立秩序。孟子「君子用仁存心，用礼存心，仁者疼人，有礼者敬人，疼人者人lóng疼伊，敬人者人lóng歌之」，chit种伟大ê教示tī极端自私ê中国人身上kah-ná无发挥啥物作用。

Chit种人性ê自然结果to̍h是造成人kap人之间ê隔阂（无信任ê存在）、疏远、轻视、对立，产生问题（冲突）。

咱若详细思考、观察咱ê生存环境，就会了解chit种人性ê弱点所造成ê伤害，失去互相信任ê社会中ê现实状况！实例○1亲人拜访，大人无tī，只chhun gín-á，虽然表明身分，但是m̄ hō͘伊ê入去，因为父母交代过，生分人bē-tàng开门。○2船客互相m̄信任，二等舱二人仝房间，互相ioh对方心术不正，拜托船长保管珠宝kap值钱ê物件，看对方可能是无正经ê人，脚手无清气，另一人mā仝款，船长讲：如何辨别lín二人？自认好人，别人soah是歹人。

Chit种m̄信任别人，koh ioh别人ê情形一直lóng有，无法度发挥正面ê社会性，这to̍h是今á日ê社会混乱ê原因！

二、 人为ê克服法
对人性ê弱点，人一直有心想beh用人ê方法来解决，自古以来人就一直teh运用人ê智慧想beh改进人性ê弱点，ná亲像：

1）教育to̍h是siōng基本ê方法，因为人一直想用教育来感化人性，tī-chia所讲ê教育是指广义ê教育来讲，有家庭教育、学校教育、社会教育等等，尤其处tī升学主义ê时代，父母虽然关心kiáⁿ儿ê学校教育，但是对做人应尽ê本分，soah无kā伊关心，因此造成受过大专教育ê kiáⁿ儿，soah表现出真无人性ê行为，虽然teh教育ê内容里mā强调真chē冠冕堂皇ê人生道理，但是soah lóng像马耳东风，骚bē-tio̍h真正痒ê所在，所以tī咱ê社会，tiāⁿ-tiāⁿ有高度智慧ê犯罪案发生，中国人ê伦理道德、四维八德ê道理实在是非常伟大，只可惜欠缺行动化，chiah变kah空疏远阔、无实际。

2）法律mā是人所采用ê另一种方法，咱知影新加坡ê民主制度to̍h是采用重罚政策，譬如有一kóa小têng-tâⁿ mā用重刑，因此为tio̍h in美化环境ê实施，人民chhìn-chhái掷sak垃圾，to̍h ài穿特制服装tī路上捡垃圾，而且另gōa有重罚。Bat有一位十八岁ê美籍少年，Michae Fay（费麦thang），因为伤tio̍h别人ê车，损毁公物，hông判2300美金罚款，强制出境，koh鞭phahkha-chhng六下，引起美国大震撼，但是新国并无kā伊chhap，mā是照常执行。重罚到某种程度可能有作用，但是mā m̄是绝对。

3）道德，人ê修为是另一种hiah-ê人时常用ê方法，这是礼治ê问题，to̍h是用固有ê道德当做礼治之本，来克服人性ê弱点，chit种重视道德礼治方法ê成果，tiāⁿ-tiāⁿ关于个人ê修为，因此持有chit种主张ê人，特别强调个人ê修为，并用建立人格生活做基础，chit种重看自身ê人格，用人ê修为当做克服人性弱点ê人，tiāⁿ-tiāⁿ有自恃为义ê心态，tī信仰ê世界并m̄是真实ê，因为一个罪人ê道德，是thang用道德ê破产者来形容伊，这to̍h是为何tī人间有真完美高尚ê伦理道德ê论讲，soah看无到/未到/bē-tio̍h有实行ê结果。

这to̍h是造成人生社会ê真chē问题ê主因，tī-chia咱ē-tàng看tio̍h问题ê重点，是tī siōng基本ê人心ê问题，mā to̍h是咱ê信仰所强调ê罪性ê问题，咱若看保罗ê告白就会了解，伊tī罗马书第七章ê告白，当teh说明人性中ê惊人ê罪，照世人ê观点，保罗有完美ê人格，伊ê修为mā是无人ē-tàng比--ê，伊家己承认照律法是无thang指摘--ê，但是伊mā讲，tī罪人中伊是罪魁。

三、 去芜存菁
（芜：杂草昌盛、杂乱。菁：茂盛，物件ê菁粹。）基督徒ê人生内容，必须ài去芜存菁，因为tī基督耶稣ê救赎之下，hō͘咱ê人生koh-khah充实、完美，这是基督徒ê人生内容，所以基督徒必须ài tùi真chē人生ê杂乱中，求取菁华，这to̍h是保罗讲--ê去芜存菁ê意义，mā to̍h是讲，基督徒ê人生是去芜存菁ê人生，bē-tàng hō͘人发现咱ê人生中有真chē杂乱ê状况，基督徒ê生活不时ài注意ê一件tāi-chì，to̍h是tùi咱ê人生中去除真chē恶劣、负面ê人生状况kap品性，用积极ê心态去追求有正面价值ê人生内容，所以时常ài有「离弃恶、追求善」ê人生表现，因为只有确立去芜存菁ê人生内容ê时，chiah ē-tàng见证基督ê福音，chiah ē-tàng hō͘社会认定，这是咱ê信仰生活ê根本目标，因为每一个基督徒ê存在，lóng tio̍h成做基督耶稣ê香味，tī-chia所需要ê，是基督徒完美纯洁ê品德，tī以弗所书四章25节以下，保罗讲tio̍h真chē pháiⁿ ê品性to̍h是：白贼、受气、窃盗、污秽ê言语，「一切苦毒、脑恨、忿气、嚷闹、毁谤并一切ê恶毒，lóng ài tùi lín中间除掉」（以弗所书四章31节）。

因为chiah-ê恶劣ê行为是未蒙基督救赎ê旧人所有ê，tī基督徒ê新人生中无应该出现chiah-ê状况。

因为tī一个蒙召ê基督徒身上，若hō͘人发现tio̍h有chiah-ê恶劣（杂乱）ê品德ê时，自然无法度tī人间社会发出耶稣ê香味，án-ne to̍h失去基督徒存在ê价值。

因为chiah-ê人性ê弱点，是罪ê因由，基督徒是已经hō͘基督救赎ê人，照理无应该有chiah-ê弱点ê存在（哥林多后书五章17节）tī基督徒ê生存环境中，必须ài有chit种去芜存菁ê决心，保罗tī-chia特别提醒咱二件重大ê tāi-chì：○1bē-tàng hō͘魔鬼留地步。○2Mài叫圣灵担忧。假使每一个基督徒ê生活内容，ē-tàng一直注意这两件事实，必定有完美理想ê基督徒ê人生。

因为tī咱ê信仰生活中，不断有魔鬼ê挑战，mā to̍h是讲tī咱ê人生中，一直有诱惑存在tī基督徒ê生活境况中，基督徒必须觉悟，基督徒ê人生是不断面对引诱ê生活，chit种面对引诱ê状况是基督徒信仰生活中siōng需要ê儆醒，伊to̍h是信仰所表现出来ê性格，所以一个基督徒若tī生活中失去儆醒ê心态ê时，那基督徒to̍h是已经活tī堕落ê边缘，咱看teh教会生活中，有一kóa可敬ê基督徒ê失败kap堕落，主因tī信仰生活中失去警醒ê心灵所造成！

「一定ài谨守、警醒，因为lín ê仇敌魔鬼ná亲像teh叫ê狮，四界teh行，chhōe thang吞食ê人。」（彼得前书五章8节）面对án-ne强大ê魔鬼，基督徒ê信仰生活的确bōe-sái马虎放轻松。另外保罗mā强调mài叫圣灵担忧，因为tī被救赎ê基督徒身上，lóng有圣灵ê印证（tǹg印），因此基督徒ê一举一动lóng kap圣灵有深刻ê关系。

Tī-chia叫醒基督徒，咱有可能生活tī hō͘圣灵担忧ê境况中，有时虽然伊是无tú好或者真细ê tāi-chì，基督徒mā的确ài有chit种心态，因为去芜存菁ê信仰生活，一方面是bē-tàng hō͘魔鬼有机会khiā空ê，另外一项to̍h是mài hō͘圣灵担忧ê生活，tī今á日ê圣经节中，所列举ê chiah-ê恶劣ê品性，确实是圣灵担忧ê主因，圣灵是基督徒ê导师。

最后保罗用积极ê心态，「Ài用恩慈相待，存怜悯ê心，互相饶恕，tú亲像上帝tī基督里饶恕了lín仝款」，（以弗所书四章32节），是建立tī仁慈ê基础上，是用家己ê感觉去考虑别人ê感情，用对待家己ê心思去对待别人，这to̍h是圣经讲ê仁慈，是主基督所讲--ê，「无论何事，你愿意人án怎待lín，lín mā ài怎样待人」（马太福音七章12节）ê真理。

结论：中国古早楚国有一个人和氏，发现一块石头，伊认定是一块玉石，提去献hō͘王，但是王看轻这块石，而且叫人惩罚和氏，kā伊ê倒脚斩断，几年了后，和氏koh献玉石，另一ê王kā伊ê正脚斩断，和氏iáu坚信这是宝贝，最后这块石hō͘刻成玉玺，做成玉玺了后，秦王愿意用十五个城市来换取伊。米开朗基罗tùi粪埽堆内ê一块大理石刻出有名ê大卫像。基督徒是hō͘基督tùi死来救活ê存在！