《草地囝仔做牧师》

 | | | 转寄

圣化ê印记

作者 林宗要 2010.12.12

罗马人书六章1～14节

基督徒ê信仰生活，若用心参加教会聚会、ē-tàng主动研读圣经、关心教会事工、对教会表现出关心kap奉献ê生活，通常lóng会hông认为是有teh实行信心生活ê基督徒。但是khah严肃来看信仰生活，应该m̄是只有建立tī基督徒ê严谨生活内容比如：无pok薰、bōe lim酒、生活端正以及ē-tàng读圣经或者参与教会各项事工。因为tī m̄是基督徒中，ē-tàng严谨自爱品德高上ê人mā真chē，若只用品德当做基准，基督徒ê品德无一定会比一般人完美！

基督徒信仰生活ê重点，是在tī kap上帝ê关系，是确立tī直ê关系，khah m̄是横ê关系，是tī一个信仰者，ài如何去回应上帝ê生活，这chiah是生活ê重点，有了chit种生活内容，chiah是基督徒信仰生活ê本质。当然，这是建立teh经tùi耶稣基督做中介chiah完成kap上帝直接关连ê心灵契合，tī人ê心灵上帝ê圣灵有接触ê时，就ē-tàng建立kap上帝之间ê人格结合。Chit种结合是基督徒信仰生活siōng根本--ê，siōng伟大ê生活，tī约翰福音一章18节「从来无人看见上帝，只有tī老父怀内底ê独生kiáⁿ将伊表明出来」因为这m̄-bat看过ê上帝，通过耶稣基督ê事实，将他显现hō͘世人，这to̍h是主耶稣向学生所讲：「看tio̍h我，to̍h是看见老父」（约翰福音十四章9节）。这to̍h是神学上所讲：「耶稣基督ê启示」ê真理。所以基督徒ê信仰生活，必须ài建立teh对基督决定ê信仰世界。所以通常tī教会内观察基督徒信仰生活ê时，lóng会将重点khǹg tī kap耶稣基督ê层次上，tī路加福音七章36～50节记载耶稣受一位法利赛人西门邀请食饭，有一位过tio̍h罪恶生活ê妇人，接近耶稣，流目屎kā耶稣ê脚滴tâm，用伊ê头毛kā伊擦，一直唚耶稣ê脚koh抹kài贵重ê香油tī耶稣ê脚顶。Chiah-ê动作本身是表明chit位cha-bó͘对耶稣ê敬仰。西门看tio̍h chit种情形，内心teh想chit-ê tāi-chì，耶稣主动向伊说明，举一个例来强调疼主ê热情ê事实：有二位负债者，一个欠五十两银，一个欠五两银，但是主人lóng完全取消in ê债。试想这二个toh一位爱主人khah深？

Tī爱chē ê所在，赦免就chē，爱少ê，赦免mā少，chit种情形，teh信仰生活中，tiāⁿ-tiāⁿ会出现，因为有一kóa基督徒，in体会tio̍h就会领受无限大ê恩典了后，tī in信仰ê过程中，会表现出相当大疼主ê热情，mā因为tī个人生活中，确实体验tio̍h主ê带领kap保守，chit种经过内心感恩所形成ê信仰生活，tiāⁿ-tiāⁿ有hō͘人想bē-tio̍h ê效果tī基督徒信仰现实中表现出来，chiah-ê信仰者，tī in信仰生活过程中，in bat充分体验过主耶稣ê恩疼，tī in现实境况中，chit种体验ná亲像保罗tī腓立比书三章强调为tio̍h耶稣基督伊看万事做粪土，包括金钱、学问、权势等，ná亲像主耶稣tī马太福音第十三章讲一个人chhōe-tio̍h绝世之宝，tùi án-ne卖掉伊所有ê财产去取得chit-ê珠宝。因为伊ê心，已经hō͘绝世之宝所占领，其他任何物件，tī he宝贝chìn前，lóng无重要啊。

路加福音十九章ê撒该ê体验，为什么一个kā钱财当做性命ê守财奴，当伊kap耶稣基督接触了后，伊竟然愿意将伊ê财富ê大部分，提出来当做救济之用，chit种价值观ê改变，m̄是平常ê事物thang改变--ê，只有耶稣基督ê福音，mā to̍h是上帝ê权能chiah ē-tàng改变人间所认为无可能ê tāi-chì，伊ē-tàng完全除去人心中所有因为罪恶chiah发生人生ê行为，当一个人有chit种真实体验了后，伊ê人生就会有完全ê变化，tú亲像保罗tī哥林多书五章17节所讲：「人若tī基督里，就成做新造ê人，旧事已经过，lóng变成新ê啊。」Chit种绝对ê改变，to̍h是teh信仰生活中，时常hō͘看做非常ê行为。比如：宋尚节博士留美tńg来到中国ê时，将全部ê学位文凭，lóng丢到海里，虽然伊ê作为hō͘人看做异常，甚至hông关tī精神科病房内，但是事实上伊是真实体验tio̍h耶稣基督救恩所带来人生完全ê改变，咱看路加福音七章36～50节所记hit位hō͘社会看做「Bái ê妇人」，伊用伊人生中siōng尊敬ê方式表现tī耶稣基督身上，用目屎水kā他ê脚浸tâm，用头毛擦，而且用嘴唚耶稣ê脚，chit种作为是比任何有价值ê物品，koh-khah充分表现出绝对ê诚恳kap疼慕。

Chit种信仰ê体验，to̍h是保罗tī罗马人书第六章所强调ê真理。保罗tī-chia强调一个受恩ê基督徒必须ài建立符合上帝ê旨意ê信仰生活，伊ê重点teh对耶稣基督救赎ê信仰体验，chit种对耶稣救赎恩典ê体验，是形成基督徒kap主耶稣之间信仰ê人格关系，tī-chia咱ē-tàng看见基督徒ê信仰，ē-tàng藉tio̍h上帝丰富恩典来表达tī伊个人生活，家庭状况，社会生活以及教会生活中，chit种经由信仰所发生有价值ê人生行为tī chiah-ê基督徒身上，因为in确实体会tio̍h上帝ê恩典tī软弱ê人身上。问题ê重点，m̄是人本身有什么价值，是tī chiah-ê无价值ê人身上有充分上帝ê恩典，chit种信仰ê体验是保罗tī哥林多后书第十二章ê信仰告白，「伊对我讲，我ê恩典有够你用啊，因为我ê能力是tī人ê软弱上显得完全，所以我koh-khah欢喜夸口家己ê软弱，好叫基督ê能力覆庇我」（十二章9节），chit种体验to̍h是信仰ê体验chiah有可能ê事实。

一、 kap耶稣基督同死同活：罗马人书六章3～4节
「Kám m̄知咱这受洗归入基督耶稣ê人，是受洗归入伊ê死mah，所以咱藉tio̍h洗礼归入死，kap伊埋做伙，是叫咱一举一动有新生ê样式，像基督藉tio̍h老父ê荣耀，tùi死内底复活仝款」信仰siōng基本问题，保罗用「Kám m̄知」to̍h是「一定ài知影」来说明一个受赎基督徒kap耶稣基督ê关系。 基督徒信仰生活ê重点，是teh经由耶稣基督chiah建立kap上帝灵ê关系，只有经由耶稣基督ê事实，基督徒chiah ē-tàng体验tio̍h上帝，因为他完全表现出上帝tī人ê中间，因为耶稣基督是上帝ê启示，所以kap上帝ê信仰关系，必是发tī出世基督对耶稣信仰决定而成，tú亲像主耶稣向学生所讲「看tio̍h我，to̍h是看见老父」（约翰福音十四章9节）因此咱就koh-khah清楚，teh信仰ê过程中，基督徒kap耶稣ê关系非常重要。同时对耶稣基督ê认bat kap体验是关系tio̍h基督徒信仰生活ê重点，teh信仰生活中，基督徒ài了解道成肉身ê耶稣是出生tī马槽内，但是基督徒ài koh-khah清楚耶稣基督tī十字架顶ê死kap复活，to̍h是形成基督徒信仰ê基本重点。做一个受赎ê上帝ê子民，若确信耶稣基督复活ê事实，to̍h是ē-tàng了解耶稣基督ê存在是道成肉身，讲tio̍h他十字架chiah死，是用无罪ê上帝ê kiáⁿ儿来负担世人ê罪ê救赎行为：然后经由他ê复活，hō͘只要信他ê人体会tio̍h tī人生生活中非常重要ê新生ê样式。Chit种信仰经验是基督徒ê真实体验，to̍h是经由赎罪所带hō͘信他ê人新性命，chit种新性命是上帝创造人ê要求，是符合上帝旨意ê生活ê人生，因为tī chiah-ê重生ê基督徒身上，已经kap耶稣基督做伙死做伙复活，保罗讲「Kám m̄知咱这受洗归入耶稣基督ê人，是受洗归入伊ê死么？所以咱这藉tio̍h洗礼归入死kap伊埋做伙，原是叫咱一举一动有新生ê样式，像基督藉tio̍h老父ê荣耀，tùi死内复活仝款，咱若tī/伊死ê形状上kap伊联合，mā ài tī伊复活ê形状上kap伊联合，因为知影咱ê旧人kap伊做伙钉tī十字架，hō͘罪身灭绝，叫咱无koh作罪ê奴仆，因为已经死ê人是脱离了罪」（罗马人书六章3～7节），因此一个体验tio̍h耶稣基督救赎ê基督徒伊ê人生，是永远活tī新ê样式中，这to̍h是保罗tī哥林多后书五章17节所强调新生ê人生，因为基督徒是kap耶稣基督同死同活ê人。

二、圣化ê印证
保罗tī罗马人书一章17节「因为神ê义当teh福音上显明出来，这义是信ê根本，chiah成做信。比如经上所记『义人必因信得生』」，chit种hō͘上帝称做义ê人，to̍h是体会tio̍h耶稣基督拯救ê福音，因为tùi上帝恩典ê事实ê拯救是发tī出世耶稣基督所赐ê福音内，「这福音本身是神ê大能，beh救一切相信ê人」（罗马人书一章16节），所以经由信仰决定去体会神ê恩典ê人，伊ê生存，to̍h是圣经所讲hō͘圣化ê人生，chit种受圣化ê人生，tī伊现实ê生存中，必须ài有印证圣化ê内涵。Mā to̍h是用伊生活ê完美kap理想来证明神ê恩典tī伊人生kui-ê领域中，chit种有新性命ê生活方式，to̍h是基督徒信仰生活中，一项重要ê内容——圣化ê印证。基督徒ê人生，必须ài不时有chit种印证圣化信仰ê存在，chit种灵命ê重生，m̄是基督徒本身ê决志，是因为持守上帝ê疼，这to̍h是咱信仰所强调ê圣化。所以圣化ê chit-ê事实通常mā是经由上帝ê恩典变成ê。因为咱知影，圣化主要重点，是经由耶稣基督拯救ê福音，这福音ê来源是tī上帝，所以受圣化ê基督徒，一直hông要求ài生活tī新ê状况中，「我是耶和华lín ê神，所以lín ài成做圣洁，因为我是圣洁--ê」（利未记十一章44节）彼得tī伊ê phoe中mā提起「He召lín ê既是圣洁，lín tī一切所行ê tāi-chì顶面也tio̍h圣洁」（彼得前书一章15节）。

这是受圣化人生ê根源，伊是由上帝开始，有罪ê人经过耶稣基督拯救ê福音，用信仰ê决定去接受、体会，用洗礼做开始，然后有信仰生活，持守到上帝ê审判，chit段期间to̍h是基督徒圣化ê事实，这to̍h是一个罪人成做圣徒ê过程，因此咱必须清楚基督徒圣化ê印证是确立teh接受基督救恩开始，然后to̍h是tī帝所交代你ê年日中，你必须用警醒戒慎ê心情去经营符合上帝旨意ê生活，一直到朝见救主耶稣，mā to̍h是khiā-tī上帝ê审判台前。Tī chit种信仰生活过程中，基督徒追求圣灵ê充满，亲像保罗tī罗马书五章讲tio̍h患难中ǹg望ê时所强调ê真理，基督徒现实ê生活确实会有真chē患难，但是chiah-ê hō͘人看做不幸ê患难，有时颠倒会造就基督徒信仰生活ê正面价值，因为teh患难中会hō͘人产生ǹg望，进一步koh行向光明磊落ê人生，「患难生忍耐，忍耐生老练，老练生ǹg望，ǹg望bē致使见笑」（罗马人书五章4～5节），这to̍h是圣灵充满ê事实，基督徒受圣灵充满，m̄是kan-nā teh讲方言或者行异能，khah重要ê to̍h是ná保罗tī加拉太书五章所讲ê结圣灵ê果子（五章22～25节），因为这是耶稣基督福音ê目的，所以咱ē-tàng讲福音ê效用tùi án-ne讲到人类ê圣化，咱chiah-ê受洗tī耶稣基督ê子民，是受圣化ê人生，咱有责任tī咱人生中印证出圣化ê真实性，这to̍h是咱ê教会生活一直teh强调追求圣灵充满ê生活，只有hō͘圣灵充满ê基督徒chiah会结出圣灵ê果子，所以基督徒ài了解结圣灵ê果子，to̍h是基督徒人生生活ê内容，保罗the hō͘提多ê册中，mā有提起「耶稣替咱舍了家己，beh赎咱脱离一切罪恶，koh洁净咱特作家己ê子民，热心向善。」（提多书二章14～15节），因为只有基督徒完美纯洁ê人生生活，chiah是圣灵ê果子，伊to̍h是基督徒圣化ê印证，保罗tī-chia用「你tio̍h讲明、劝戒人」来强调伊ê重要性。

三、 献上身躯做荣耀上帝ê器具
圣化ê印证是tī上帝ê恩典ê耶稣基督ê福音ê感动，chiah hō͘一个罪人经过洗礼来建立kap耶稣基督仝生死ê性命，chit种tùi圣化所带hō͘人类ê性命，to̍h是保罗所讲重生ê人生，因为伊已经脱离罪恶，hông要求ài像上帝ê圣洁ê真实性，来图谋符合神旨ê信仰生活，重点是teh追求圣灵充满，chiah ē-tàng结圣灵ê果子，tī-chia上帝ê名，就会得tio̍h荣耀，因此保罗tī最后强调hō͘圣化ê人生，必须ài有决心献家己ê身躯做义ê器具，这是上帝创造人ê目的，mā是人生存在ê基本内容。

因为只有圣化ê外表，若无圣化ê实质，是无功效--ê，chit款事实咱lóng ē-tàng了解，tī教会生活中，tiāⁿ-tiāⁿ有chit种异常ê状况，tī长老教会中有小儿洗礼，是小儿出世了后，tùi父母chhōa到教会受洗，到青年期，正常ê小儿洗礼者lóng会koh再家己参与成人信仰告白，成做正式会员，但是tī教会会员名簿中，tiāⁿ-tiāⁿ有一kóa三、四十岁ê小儿会员，chit种情形是无正常ê，只有圣化ê外表，无圣化ê实质内容，chit种只有枝叶soah无结果实ê现象，m̄是主耶稣所喜乐ê。

耶稣tī福音书中，一直责难chit种只有外表形式ê存在者。比如对当时宗教领袖ê指责（马太福音二十三章），kan-nā洗杯仔ê外面，内底soah lap-sap，hō͘主耶稣指责为粉饰墓外表，内面藏tio̍h枯骨。马太福音二十一章，耶稣咒忏hit欉只有满满ê枝叶soah无果实ê无花果树，咱就会了解，tī耶稣心中他所喜爱ê人生是teh将本身献hō͘上帝做义ê器具，mā to̍h是荣耀上帝ê人生，因为这是上帝创造人ê目的，mā是人存在ê价值，但是人因为犯罪chiah亏欠了上帝ê荣耀（罗马人书三章23节），因此活tī罪恶中ê人生是无可能有荣耀上帝ê事实，今á日基督徒已经hō͘耶稣救赎，是属于基督ê人生，所以咱ê生存， bōe-sái亏欠上帝ê荣耀，咱ài生活teh像保罗所讲：「所以lin2m7管是食或者是lim，无论做啥物，lóng tio̍h为tio̍h荣耀神来行。」（哥林多前书十章31节），这是基督徒生存ê内容，必须ài用生活ê见证，来印证耶稣基督福音tī咱身上，这to̍h是基督徒圣化ê实质内容，基督徒m̄-nā经过洗礼chiah圣化，koh-khah ài tī人生生活上成做义ê器具，当然siōng切实ê问题，to̍h是咱ài成做圣洁。

「所以mài容罪tī lín必死ê身上作王，hō͘ lín顺从身子ê私欲，mā mài将lín ê肢体献hō͘罪做不义ê器具」（罗马人书六章12～13b节）只有无罪成圣ê基督徒ê人生chiah ē-tàng成做上帝ê灵居ê圣殿。

只要上帝ê灵临在咱中间，基督徒自然会生活teh荣耀上帝ê世界，这to̍h是保罗所要求「将肢体作为义ê器具献hō͘神」（六章13节b）。基督徒必须ài认清信仰生活ê重点，是tī有神ê恩典ê圣化ê事实，经过基督徒ê人生kā伊印证出来。马太福音五章16节「Lín ê光mā当án-ne照tī人前，叫in看见lín ê好行为，便将荣耀归hō͘ lín tī天顶ê老父。」

总讲一句：以前咱是罪ê奴仆，chit-má是上帝ê子民。「现今lín既然tùi罪得tio̍h释放，作了神ê奴仆，就有成圣ê果子，he结局to̍h是永生。因为罪ê工价是死，惟有神ê恩赐，tī咱主基督耶稣内面，是永生。」（罗马人书六章22～23节）。