《草地囝仔做牧师》

 | | | 转寄

完全ê信仰

作者 林宗要 2010.12.05

使徒行传十八章24～28节

Tùi基督教史观来看保罗ê时，咱ē-tàng了解伊对基督教ê影响非常大。伊三次ê传道旅行kap伊ê书信，咱ē-tàng tùi使徒行传kap伊ê书信中了解，伊是非常热心ê犹太主义者，伊tī腓立比书三章强调伊án怎热衷tī摩西ê律法kap伊完全纯粹ê犹太化，是希伯来人所生ê希伯来人，照律法讲是法利赛人。伊tī当时是具备良好ê优越条件，若照当时犹太社会ê状况，ē-tàng担任siōng koân阶层ê领导人物，照伊犹太化ê观点，提撒勒人耶稣对扫罗来讲，是真pháiⁿ理解ê，是谤渎上帝--ê，为tio̍h beh维护上帝ê神圣律法，kap犹太教ê尊严，伊应该用伊所有ê影响力，采取激烈ê方法，来消灭chiah-ê hō͘伊看做异端份子ê基督徒。

当时伊迫害教会，是因为对当时犹太教ê热情，宗教意识所产生ê自然结果，扫罗迫害教会，若khiā-tī摩西ê律法，或者纯犹太人ê宗教观念ê时， 咱就ē-tàng理解伊ê作为，因为依照摩西ê法律，十字架是咒忏ê记号，基督徒kap教会，soah一直强调十字架，甚至有伊是荣耀kap胜利ê象徵，chit点是无法度hō͘犹太社会所接受--ê，而且当时ê教会一直强调，chit位hông钉死tī十字架ê耶稣，是真惊人ê谤渎，而且侮辱摩西神圣律法，是bē-tàng赦免ê恶徒。因为咱知影当时犹太人所想像ê弥赛亚的确m̄是像基督所讲ê提撒勒人耶稣，因为耶稣是hō͘人钉死tī屈辱ê十字架顶，in所期待ê弥赛亚是荣耀、理想、得胜，能力真大ê，ē-tàng克服真chē恶劣环境来建立理想王国ê伟大君王。

所以扫罗用基督ê事实kap犹太人ê弥赛亚做对比ê时，就会感觉chiah-ê传提撒勒人耶稣ê基督徒实在是真该死，是非常可恶ê人，所以伊用伊所具备ê才干，去策动迫害教会，伊告白讲：「论热心，我是迫害教会--ê」。但是伊ê计谋soah kap上帝ê旨意无符合，伊认为用伊ê phah拚来消灭chiah-ê基督徒是真简单ê tāi-chì，照当时伊ê现实环境（伊ê学识、地位kap热情），beh处理chiah-ê tāi-chì是真简单ê，咱看使徒行传九章1、2节「扫罗向主ê门徒，嘴吐威吓凶杀ê话，去见大祭司，求文书hō͘大马色ê各会室，恩准伊捆绑……」，tī-chia咱看出当时扫罗ê心态，是极力想beh消灭教会。

Tùi人ê观点来看ê时，扫罗认为一定成功，因为用伊当时所具备ê社会条件，有够额ê能力去消灭chiah-ê无学问、平凡ê基督徒，因此伊当时真乐畅，自认为in ê宗教做一件伟大ê贡献，护教有功是伊当时ê心意，但是soah hō͘伊所迫害ê耶稣讲：伊ê作为是「用脚踢刺」，伊自认为伊ê计画是真成功、真得意，但是tī耶稣ê眼中，伊是「用脚踢刺」ê行为，是无应该kap痛苦ê行为。佳哉！主耶稣beh用伊，因此，伊chit种无应该kap痛苦ê行为，soah成就日后为替基督教奉献心力、三次ê传道旅行、建立无数教会，对基督教发展史具有非常重要决定性ê关系。Tī基督教史上，保罗ê存在，差不多是无人ē-tàng取代ê。虽然天主教真重视彼得，甚至用彼得担任首任教皇，但是保罗tī基督教史上ê地位 无输首任教皇，尤其是伊ê书信，是基督教神学史上bē-tàng欠缺ê主要资源。今á日引用经节是保罗传道旅行中，发生tī以弗所ê一件tāi-chì，to̍h是一位博学而且有雄辩才能ê亚波罗，经过百基拉kap亚居拉尪仔bó͘ ê引chhōa，chiah完全体会tio̍h基督ê福音。

一、 亚波罗
关于伊ê事迹，tī圣经中记载无chē，但是thang略略仔知影伊ê生平，伊是亚历山大城ê人，亚历山大是埃及ê大都市，是当时教育、经济ê重心，对当时ê社会，有淡薄á有影响力，kap希腊ê雅典，并称tī当时ê世界，是主前三三二年亚历山大大帝所建chiah命名，是商业文化中心，tī罗马帝国时代，伊是世界第二大都市，学术风气发达是该城ê特色，因为tī-chia融合了罗马、埃及、希腊、犹太人文化，主前二～三世纪，旧约ê希腊语译本tī chit-ê所在出版，mā有真chē神学家，对基督教神学真有影响力，比如：克利免、奥利根等。

亚波罗to̍h是出生tī亚历山大ê犹太人，深受希腊哲学影响，因此造就伊在学问方面有良好ê条件，对旧约圣经真熟手，koh有好口才。Tī当时ê人，认为传道siōng好ê方法，to̍h是具备对圣经丰富ê知识，kap有好ê口才，亚波罗具备chit两项条件，所以hông称做有学问ê人，但是伊所接受ê福音，kan-nā限制tī施洗约翰ê福音，虽然伊bat热情提起弥赛亚ê事实，但是只是旧约中ê弥赛亚而已，bōe-tàng kap耶稣有直接关系，tī以弗所tú-tio̍h百基拉翁仔某，chiah引chhōa chit位有学问ê亚波罗体验到基督ê事实，hō͘ chit位本来iáu未体验到耶稣to̍h是基督ê人，变为耶稣基督福音ê使者，了后伊到希腊（亚该亚），圣经写「伊到那内底，加帮助那蒙恩信主ê人，tī众人面前真有能力，驳倒犹太人，引圣经证明耶稣是基督」（使徒行传十八章27～28节）可见chit时ê亚波罗已经是一位彻底了解耶稣基督to̍h是旧约所预言ê弥赛亚，哥林多前书三章保罗hō͘哥林多教会ê phoe中，to̍h知影亚波罗对哥林多教会ê影响力有gōa大，tī哥林多竟然有属于伊ê党；教会内有党派产生，是无好ê现象，相信chit种情形m̄是亚波罗所愿意ê，伊kap保罗tī福音事工上是一致ê。哥林多前书三章6节「我栽种，亚波罗灌ak，只有神叫伊大汉」。Tùi chit句经节，咱mā了解，亚波罗是hō͘保罗所看重--ê。Tī十六章12节保罗劝亚波罗去哥林加看哥林多教会，圣经有关亚波罗ê记事无chē，但是若tùi保罗向哥林多教会ê人提起亚波罗ê情形，咱thang知影至少保罗看伊是同工，而且肯定伊。（一章12节，三章4、5、22节，十六章12节）。

二、 信仰kap智识
Tùi顶面所讲，咱ē-tàng看tio̍h一个具体ê问题，to̍h是信仰kap智识ê问题。知识tī信仰生活中，有重要地位，虽然智识m̄是得救ê要件，但是tī信仰生活中，是有正面ê价值，tī宗教信仰生活中，有真chē走火入魔，极端迷信ê宗教信仰，tiāⁿ-tiāⁿ失去理性，因为理性至少会tī咱信仰生活中，hō͘ in适中ê行为模式，ē-sái讲是价值判断作用，因为咱知影，宗教信仰若hông认为迷信，伊ê信仰内容就无价值。

无价值ê信仰，是一点用途lóng无。Ná亲像主耶稣所讲：「盐若失味，怎样ē-tàng叫伊koh咸neh，了后无用，不过丢tī外面hō͘人踏而已」！ 迷信kap热心无仝，因为通常宗教信仰lóng要求信仰者有热心ê表现，伊m̄是迷信，（但是有时过分热心mā会hō͘人厌弃，比如以教会为家，将所有收入全部献hō͘教会，放bó͘-kiáⁿ ê生活m̄顾，chit种行为已经m̄是热心thang好解释）。迷信是tī信仰生活中失去理智（智识）ê评判，tī台湾，四界ē-tàng看tio̍h迷信ê情形，tī虎尾服事期间，bat有一次看tio̍h「神轿发撵」，一般人认为有神附身ē-tàng行入北港溪中bōe淹死，但是结果扛神轿ê二人lóng淹死，基督徒有时mā会看袂过民间宗教ê行为，看做迷信，但是有时基督徒mā会迷信，比如翻圣经经节卜问状况、曲解圣经原意，就认为这是上帝ê指示，这lóng是侮辱上帝ê行为，这m̄是信仰，校园书房有一本册《咱阻挡了gín-á》，讲柏克翁仔某信心偏差，hō͘伊十一岁ê gín-á伟思礼ê性命牺牲tī偏差ê信心之下。通常先天性小儿糖尿病者，只要照医师ê指示有规律ê生活kap按时食药仔，应该是bē有问题ê，但是柏克翁仔某ê信仰失去理智，走火入魔，kan-ta想beh追求圣灵医治soah放弃医师kap药物，坚称用信心祈祷，经过牧师、长老、执事苦劝lóng无效，不幸三工了后gín-á就过身去，柏克翁仔某hō͘法官以过失杀人kap虐待儿童罪名判刑，了后经律师极力辩护，改判缓刑koh罚社区义务劳动服务。相信咱ê信仰生活中，mā会tú-tio̍h过分迷信失去理性ê信仰，kan-nā求神迹kap信心祈祷，当然，咱bōe-tàng m̄认神迹kap信心祈祷医治，但是咱必须了解上帝hō͘咱ê信心是配合咱ê现实环境，这包括教育背景、文化、心理、智识、价值观等。譬如：一位医师信仰ê体验，可能bōe kap一位无学问ê平常人一样，但是信仰ê内在事实soah是一致ê，基督徒ài善用现实环境去帮助咱koh-khah体验tio̍h信仰ê价值。假使传教者，只求属灵生活，疏忽咱人生现实状况，就会掠准生存ê社会脱节。因此基督徒ê信仰必须ài有相当丰富ê智识，比如对圣经、神学、教会有相当ê认知，自然会帮助基督徒koh-khah了解伊ê信仰内容。 Tī智识中，mā须要有一kóa世俗智识，假使基督徒无良好智识，ná ē-tàng tī chit-ê时代中荣耀上帝、见证福音neh？Chit种道理相信咱ē-tàng了解，因为咱相信美好ê理性，实在对信仰有正面价值，但是基督徒ài时常谨慎一项事实，to̍h是bē-tàng只有重视理性（智识）soah将真诚ê信仰贬抑，这mā是tī现实教会生活中ê事实，真chē人有丰富智识，但是无一定有信仰！基督徒ài了解，人tī理智ê世界以外，mā有信仰ê世界，两者ê互相配合kap运用，对咱ê信仰kap知识，lóng是有帮助ê。

三、 完全ê信仰
Tī使徒行传十八章24～28节chit段圣经中，咱看tio̍h亚波罗ê背景，进一步koh学习信仰kap知识ê问题。

亚波罗虽然具备当时完备ê理性，但是只了解施洗约翰洗礼ê信仰，无耶稣基督ê真正信仰，施洗约翰当teh向伊ê学生绍介耶稣是上帝ê羔羊ê时，伊对家己kap对基督ê理解真清楚，伊讲家己「配bōe起基督ê鞋带」，mā强调「伊兴旺，我衰微」，因为伊知家己m̄是基督，伊只是tī基督chìn前ê一个声音，替基督预备道路ê角色而已。

假使亚波罗只停顿理解约翰ê洗礼，虽然伊具备博学kap对旧约深厚基础，但是iáu无法度传达拯救ê福音，佳哉伊虚心谦恭接受百基拉翁仔某ê引chhōa chiah深深领悟基督ê真道，伊无因为伊ê博学阻碍tio̍h福音ê吸收，这是亚波罗伟大ê原因，因为伊ē-tàng接触完全ê信仰。

一个具备世上良好学问ê人，若beh体会信仰世界ê奥妙，伊必须将所有博士学位囥 tī礼拜堂门外，án-ne chiah ē-tàng接受耶稣基督属灵ê真光。当时ê亚波罗体会tio̍h，伊所有ê学识kap辩才，若无耶稣基督灵光引chhōa，是无价值ê，当伊体验tio̍h耶稣基督完全绝对ê信仰ê时，伊良好ê学识kap辩才，tī仰生活上，就koh-khah ē-tàng发挥伊ê价值，因此，基督徒就必须ài完全了解上帝所赐hō͘你ê才能、学识，hō͘ in成做服事信仰ê仆婢，伊ê价值chiah ē-tàng存在，ná是一个基督徒看伊ê现实条件重过伊ê信仰生活ê时，chit种作风m̄是基督徒信仰生活ê表现，teh追求现实风气极盛ê现代基督徒，咱必须检讨，人ê财富、学问、地位，顺利ê情况展现tī咱面前ê时，你ê信仰位置tī toh位？

Chiah-ê问题tī现今基督徒ê人生生活中，是一件需要咱省思ê问题，当一个基督徒体验tio̍h完全ê信仰ê时，就会表现出像保罗ê人生观，用基督为第一，无论生或者是死，lóng会荣耀上帝ê生活。

结论：信仰hō͘人成做新造ê人，亚波罗ê状况，to̍h是基督徒信仰生活真实ê内容，用信仰为主体，其他ê，比如学识、才能只是事奉信仰ê仆婢（工具），这chiah是伊正确ê观念。