《草地囝仔做牧师》

| | | 转寄

基督徒ê容貌

使徒行传六章8~15节

Tī教会历史上有一句名言「殉道者ê血是教会ê籽」(The blood of the martyrs is the seed of the church),的确tī历代教会中,确实有真chē圣徒(殉教者)ê血tī其中,尤其是初代教会史或者是一个地方初代宣教史,比如百年前台湾kap中国大陆ê宣教师lóng受tio̍h非常大ê迫害,甚至有真chē人殉教,但是耶稣基督ê教会soah无因为迫害受tio̍h影响,颠倒koh-khah忠诚事主,chit种事实,初代教会tàng看kah真清楚。初代教会hit种无组织,无规模ê团体,面对极强盛、有组织ê罗马帝国ê极力迫害,若照一般情形,必定是瓦解、消灭,但是事实并m̄是án-ne,这是teh说明教会本质ê问题,教会m̄-nā是人ê教会,伊是属于主ê团体,耶稣基督是伊ê头,是全能者所有ê教会。若无当时只有hiah-ê无学问ê普通人(大部分是讨海人)——耶稣ê十几名学生所组成ê团体,是beh án-na去面对犹太教kap罗马政府ê强压手段?

当然tùi使徒行传一~二章,咱ē-tàng了解,tī hit种软弱、惊惶kap无力感中,圣灵充满是教会成长kap有能力面对迫害ê主因。彼得ê一生,当耶稣hō͘掠ê时,tī人群中连续三次m̄认耶稣,但是当伊hō͘圣灵充满了后,伊soah勇敢khiā-tī官员面前见证耶稣是救主!

这to̍h是教会teh强调信徒必须受圣灵充满ê原因,因基督徒若受圣灵充满ê时,就会完全改变,以前mā可能是惊惶,但是圣灵充满了后,tī任何境况中lóng会有勇敢ê表现,以前是无力感,chit-má是勇敢勇壮,以前m̄认主,chit-má soah以基督徒为荣、做夸口,这to̍h是圣灵tī信徒身上ê能力,初代教会因为有圣灵充满,虽然处tī极端ê危难中,iáu坚立tī信仰。

今á日咱教会,mā需要圣灵临在每一个信徒身上,因为hō͘圣灵充满 ê人,必定ē-tàng结圣灵ê果子,伊to̍h是感动人接受主kap带动教会成长ê主因,因为圣灵会启示引chhōa人了解耶稣基督奥妙ê真理,一个人若完全了解主基督ê真理,tī伊ê人生生活中就会活出属于基督所有ê一切事实,chit种有属于基督ê生活ê见证to̍h是信仰ê结果,mā是历代教会siōng ē-tàng荣耀主ê基督徒ê生活。Tī圣经中,耶稣基督时常要求属于伊ê人ài kā伊结连来结果子,to̍h是指信徒chit种有见证ê信仰生活。Chit种有见证ê信仰生活,无论是活tī世上或者是因为基督ê缘故殉道,仝款lóng有积极作用,使徒行传六章记载,当时教会兴旺,信徒增加,koh再看使徒行传二章,当时教会ê发展,m̄是渐进ê,是成长真紧,因为bat有一次三千人受洗ê纪录(使徒行传二章41节),chit种增长是教会m̄ bat有ê现象,因为chit种急速成长,致使chiah-ê学生无法度处理教会事物,因此另外koh再选七名执事来协助分担使徒ê事奉,六章1~3节,记载执事ê形成掠准条件:好名声、hō͘圣灵充满而且智慧充足ê人,kap保罗tī提摩太前书kap提多书讲执事ê条件仝款。司提反是一位有完美人格kap热情ê信仰者,虽然是平信徒,soah有良好ê信仰表现。

一、 平信徒司提反
照圣经记载,司提反是头一个基督教ê殉教者,关于伊ê记载无chē,但是thang tùi chiah-ê经文中看tio̍h,伊实在是一位伟大ê信仰者,值得基督徒去学习。使徒行传六章中绍介伊是一位具备良好品德kap真诚ê信仰者,「伊有好名声」。Tī群体中,一个人beh得tio̍h其他人ê肯定m̄是一件简单ê tāi-chì,身为牧师,对chit方面感受特别深!

Tùi使徒行传二章尾段,咱thang了解初代教会兴旺ê情形,非常完美ê教会生活表现在in ê信心中,虽然án-ne,á是有一kóa不满kap怨言,tī六章,咱看tio̍h,教会增长真紧ê情形mā带来问题,这是地上ê教会ê正常情形,因此基督徒ài了解,咱ê教会生活难免会有一kóa缺失,因为教会to̍h是tùi一阵有罪ê人所集合成ê团体,自然会有问题。当时司提反tùi初代教会选出担任执事,ē-tàng分担教会事工,减少信徒之间ê不满kap怨言,tī当时教会中,伊是有好名声ê人,圣经二二八首「品行端庄模样正,会内会外好名声」,可见chit位平信徒ê司提反实在值得咱学习。「hō͘圣灵充满,智慧充足ê人」,是当时选执事ê标准之一,品德是tī行为部分,tī教会ê事奉中,只有品德是无够--ê,必须ài有属灵ê恩赐,mā to̍h是圣经所讲有圣灵充满,因为伊chiah ē-tàng辨别属灵ê范围,但是若只有圣灵充满,无充足ê智慧,tiāⁿ-tiāⁿ会变成有热心soah无智识ê人,chit种情形tī教会生活中,tiāⁿ-tiāⁿ会发生,确实有一kóa基督徒非常热心,但是无智识,信仰kap智识是现代基督徒必须ài加强ê信仰训练。

基督徒一定ài有phông-phài ê属灵内容,同时必须兼具良好ê品德kap敏锐ê判断力,mā就是beh成做有智慧ê人生,这to̍h是主耶稣要求信徒ài「灵巧ná蛇,驯良ná粉鸟」ê人生。

「了解圣经ê真理」mā是司提反ê特色,当伊hông掠去公会前,向当时ê宗教领袖见证福音,使徒行传七章,咱看出伊tī真理上非常熟手,tī短短一章内,司提反完整说明犹太人ê信仰史,指引hiah-ê人应该回归神ê真理,m̄是亲像in ê祖先,用无知kap罪恶来敌挡神所差遣ê使者,七章51~53节,司提反对in ê指责是非常严厉--ê。

「忠贞tī主」mā是司提反信仰生活美德之一,伊hông选做七位执事之一,即时投入teh事奉主ê事工,因为伊良好ê条件(Tī属灵kap品德方面lóng有美好ê见证),好亲像圣经所记「司提反满得恩惠能力,tī间行了大奇事kap神迹」(使徒行传六章8节),因此,伊ê khang-khè m̄-nā限tī一般教会事务,进一步koh直接投入第一线ê传道事工,tī犹太人中见证耶稣基督,伊ê作为刺激tio̍h当时传统犹太教领袖,掠伊到公会,tī án-ne景况中,司提反iáu坚守主道,忠贞tī主所托付ê使命。

二、 容貌ná亲像天使ê司提反
「Tī公会内底坐ê人,lóng真专心teh看伊,看伊ê面貌,kah-ná天使ê面貌」(六章15节)。

面貌是人一切感情统合ê外在表现。人ê一举一动,或者所有ê感情lóng会表现tī面部,心情愉快,一定面带喜乐笑容,伤心ê人就无法度表现喜乐ê笑容,人生社会ê实况,特别tī厝内,人所遭遇ê tāi-chì,tiāⁿ-tiāⁿ会完全表露tī每一个人ê面顶koân(Gín-á例外),鬼面kap天使面是两个极端ê对比,事实上,chit两种面咱lóng m̄-bat看见,但是soah ē-tàng了解chit两个ê意义kap无仝,当咱想像天使ê容貌,必定是非常美丽koh可爱,tī人间社会真无简单有án-ne完美ê肖像。有一个故事讲:一位满面春风,真gâu讲话koh诙谐ê seng-lí人,专门teh卖护面霜,因为伊ê外表、诙谐kap喙水水,四界受欢迎,seng-lí真好,但是无gōa久,伊ê bó͘过身,长子koh hō͘大水冲走来失踪,chhōe了一、二个月chhōe bōe-tio̍h,chit-ê seng-lí人变kah真消极,内心非常悲伤,但是为tio̍h生活,只好koh去卖面霜,但是因为伊面忧忧,soah致使seng-lí直直落,无人相借问。Ná会án-ne?当然是生活景况影响道内心kap容貌!

天使ê容貌如何?有笑容,美丽可爱,满面春风,光明灿烂,这是天使面容ê特色,tī天使容貌中,可见到其中集是上所有美德,比如加拉太书五章22~23节,圣灵ê果子:仁爱、喜乐、和平、忍耐、恩慈、善良、信实、温柔、节制,lóng ē-tàng tī天使ê容貌中见tio̍h。

讲到鬼面?横逆、残忍、惊人、黯淡,是伊ê特色,加拉太书五章19~21节,hiah-ê由人ê情欲所产生出来ê恶形,to̍h是鬼面ê特写。台湾民间宗教或者画册所描写ê鬼,伊ê角、目、鼻、嘴lóng是凶残ê模样,hō͘人ê印象是pháiⁿ冲冲、惊人,kap天使完全无仝,这是两个对立ê描写,用完全无仝ê容貌呈现tī人ê面前。天使ê容貌hō͘人ê印象是善良、温纯、和平、安详、光明kap快乐,鬼ê容貌hō͘人ê印象是恐怖、绝望、忧郁、不安、横逆、悲伤,咱ē-tàng下结论:人生所期待ê生活内容是ē-tàng展现kā天使ê面貌仝款ê人生内涵。

至少基督徒ài具备ná司提反ê面貌,这是替耶稣基督作见证siōng好ê工具,因为一般人对基督徒,siōng直接ê接触to̍h是信徒平时kā人往来ê态度,其中面貌tio̍h是siōng主要ê关键,一个ta̍k工目头结结ê信徒,人kám ē-tàng tùi伊身上发现耶稣基督?这是无可能--ê。

司提反ê面貌,无论tī任何时刻,lóng表现出天使ê面貌,着算tī极端危机中,圣经soah形容伊容貌像天使!这实在是难能可贵ê信仰表现,当时伊ê状况是tī悲惨ê危机中,但是使徒行传六章15节,伊khiā-tī公会受审ê时,七章54~56节,群众对伊咬牙切齿ê时,kap七章59~60节hō͘暴民用石头kā伊phah死chìn前,伊iáu大声求主mài将chit-ê罪归hō͘ in,kap主耶稣tī十架顶ê祈求仝款!Chiah-ê举动,to̍h是因为司提反平时有美好ê信仰kap亲像天使ê容貌ê累积ê结果。Tùi chia咱thang知影,一位真实ê基督徒,无论伊ê景况如何,lóng仝款绝对忠诚tī主基督,特别是处tī极端危难中,对主ê忠诚koh-khah难能可贵!

三、 基督徒ê容貌——你用啥物容貌hō͘人看?
或是讲,一般人看tio̍h你ê容貌是啥物?头前讲过,面貌是一个人kui-ê人格所表现出来ê事实,台湾ê相命仙,至少会观察tio̍h人部分ê生活内容,hit-kóa遭遇不幸ê人去chhōe相命仙,相命仙会tùi伊ê五官来断定伊心中ê烦恼,这to̍h是为啥物有人信相命仙ê原因。因为大多数ê人lóng会将心事表现tī面容顶koân,人有喜事精神爽,满面春风是伊ê特色。Tú-tio̍h不如意,表现tī容貌上to̍h是目头结结,因此咱大约thang tùi人ê表情来了解伊ê人生状况!

用chit-ê原理来思考今á日身为基督徒ê容貌,一个有基督ê圣灵所充满ê信徒,伊ê容貌特色就会表现有属于基督ê气质。Chit种hō͘人看出是属于基督ê信徒,to̍h是初代教会安提阿hiah-ê基督徒ê生活特质,hō͘人一看to̍h ē-tàng断定是属于基督ê人!

和尚kap修女因为伊ê特殊穿插,自然真简单tio̍h会hō͘人认出身分,基督徒虽然无特别ê识别证,但是至少咱ài tī现实生活中,hō͘人简单知影咱是属于基督ê人,chit种识别证,并无特别ê记号,挂十字架ê金练虽然真流行,但是无一定lóng是基督徒,siōng重要ê是基督所讲「结出属于主ê好果子」。好树结好果子,用che来证明咱是属于基督ê人。当然咱ê信仰是因信称义ê信仰,但是一位tī社会上hō͘人印象真bái ê基督徒,人会批评伊是信恶教ê人,若是一位tī社会上hō͘人良好、完美印象ê基督徒,相信hiah-ê未信者,必定对基督教有好感。

Tùi chiah-ê事实,咱thang了解,今á日ê基督徒背tio̍h对福音决定性ê影响,因为耶稣基督ê福音ài hō͘ in hiah-ê人好感或者恶感lóng tī in所看看tio̍h ê基督徒ê容貌所有ê。当然,容貌kap生活境况有关系,但是koh-khah重要ê是每一个人内心ê感受,mā to̍h是伊心中ê一切,人ê人格、人ê性格,人生ê人际关系,chiah-ê lóng会表现tī人ê面貌顶koân。若想tio̍h án-ne状况,基督徒ài提高警觉,充实咱ê人生kap属灵ê增长,chiah ē-tàng发挥有ná天使一般ê面容tī人生现实中!Ài二方面ê配合chiah ē-tàng hō͘ in基督徒koh-khah完美ê人生!

结论:耶稣基督交代所有ê信徒ài替福音作见证,所以:(A) 基督徒是福音ê籽。(B) 基督徒ê存在是成做荣神益人ê存在。(C) 保持美好ê面貌来见证信仰。