《草地囝仔做牧师》

 | | | 转寄

繁荣ê人生

作者 林宗要 2010.11.21

约翰福音十五章1～16节

基督tī-chia用葡萄树ê比喻来说明基督徒正确ê信仰生活。
旧约圣经中上帝kā以色列民族当做他ê葡萄园（以赛亚书五章1～7节），耶利米mā讲tio̍h变害ê葡萄树（耶利米册二章21节），以西结mā提起（以西结书十九章10节），何西亚书十章1节；诗篇八十篇8节，chiah--ê lóng teh说明以色列人是上帝ê葡萄园，事实上，葡萄园tī以色列人ê生活中占真重要ê份量，葡萄园有丰收boh，直接影响tio̍h以色列人ê生活水准，tī战争中敌人来攻phah以色列，通常lóng会先毁掉境内ê葡萄园，可见伊tī以色列人ê生活中所占ê地位是何等ê重要。

Tī圣经中葡萄树象徵tio̍h以色列民族，但是旧约讲tio̍h葡萄树ê时，tiāⁿ-tiāⁿ是负面ê野葡萄，这完全kap上帝ê心意无符合。耶稣tī-chia用真（纯粹、完全）来说明他是真正合神心意ê葡萄树，kap旧约时ê堕落、荒废ê野生葡萄有所差别，只有chit种真正葡萄树chiah ē-tàng真正结实累累，任何耶稣以外ê外在条件lóng 无可能引chhōa人亲近天父上帝，这是chit段比喻ê主题，只有真正kap他连结ê人chiah会结出完美ê果子，这to̍h是基督徒ê信仰生活，基督徒ê信仰生活to̍h是结果子ê生活，因为基督徒存在ê意义teh荣耀上帝，这是人生ê目的，耶稣讲：「Lín加结果子，我老父就因此得tio̍h荣耀，lín mā to̍h是我ê门徒啊」（十五章8节），这是一句基督徒ài tiāⁿ-tiāⁿ省思ê伟大真理，咱ê生活是beh结出真chē果子（人生ê成就），但是m̄是荣耀家己，是beh将一切ê荣耀归hō͘上帝！这是基督徒应该有ê信仰生活。

基督徒身上，ài结出真chē果子，施洗约翰向当时ê群众所讲--ê ài结出果子来kap悔改ê心相称（马太福音三章8节），因为这是beh kap主结连siōng基本ê要素，beh一生kap基督耶稣连结ê基督徒，必须ài有一个悔改ê心灵，然后chiah ē-tàng tī伊ê身上看tio̍h圣灵ê果子（加拉太书五章22～24节），基督徒ê信仰生活，m̄是kan-nā tī形式上，koh-khah重要ê是ài结符合圣灵ê果子，mā to̍h是追求基督徒品德ê完全，因为基督徒ê品德若kap一般人仝款，án-ne就表明基督耶稣ê灵无tī其中，伊mā是属于世ê人。Chit种基督徒tī信仰生活上当然无美好ê见证，咱bōe pháiⁿ tùi现实生活中体验tio̍h chit项tāi-chì。

信仰kap生活ê一致是耶稣基督一直teh要求咱--ê。有chit种信仰，基督徒自然会表现出事奉kap实践ê生活内涵，这to̍h是福音ê结果！mā是基督徒信仰正确ê过程。一个重生悔改ê基督徒，一定有圣灵ê同在，真自然ê结出圣灵ê果子，因为伊已经hō͘圣灵充满，tī任何方面lóng有无仝ê人生表现，尤其是tī品德方面koh-khah是án-ne，真自然就会运用伊信仰ê品德去实践主ê道理，这to̍h是主耶稣所讲：「Lín加结果子，我老父就因此得tio̍h荣耀」ê信仰表现，chit种伟大ê信仰ê关键tī信仰者必须掠准所信仰ê主有完全ê连结。只有tī chit种状况之下，基督徒chiah有可能结出信仰ê果子。

咱ē-tàng讲结果子ê人生是基督徒生活ê全部。因为基督徒ê存在to̍h是为tio̍h beh结果子，结果子是基督徒ê本分，koh-khah是应该有ê事工，若无结果子，就失--去价值，无尽本分，结果子mā是主ê心意，主耶稣讲「这to̍h是我ê命令」（十五章12节），是一定ài做ê tāi-chì，因为主耶稣ê命令是非常严肃--ê，若m̄去实行to̍h是抗命，这是非常严重ê违规。约翰福音十五章16节「我拣选了lín，koh分派lín去结果子，叫lín ê果子常存」，这to̍h是基督徒ê信仰生活ê真实内涵，因为基督徒是beh完成上帝所托付ê使命——加结果子ê人生。

今á日咱tùi chit段圣经来思考一个问题to̍h是繁荣ê人生，现代人所期待ê，无非to̍h是人生ê繁荣或者人生ê phông-phài，世间上ê人lóng为tio̍h这teh phah拚奋斗。过去日本kap德国恶质ê作为是hō͘人鄙视、呸喙澜--ê，但是chit两个国家tī今á日ê国际地位soah相当重要，甚至有巨大ê影响力，原因何在？Kám讲是hiah-ê人bē记in过去侵略ê作为？M̄是！是因为in ê国家繁荣，尤其是tī自由kap经济制度上，che二国ê经济状况当teh领导世界，有人形容日本，过去进行ê是军事侵略，现在是经济侵略，今á日ê日本产品全世界lóng有，chit种繁荣提koân了日本人ê世界地位，因此过去虽然有恶质、惊人ê侵略行动，但是lóng已经hō͘ chit-má繁荣ê事实掩khàm阿，因为ē-tàng用经济ê援助改变hiah-ê人ê观感，chit-ê事实teh kā咱讲繁荣对人类是何等ê重要。

一、 有属于耶稣基督ê性命
今á日咱tùi信心ê角度来思考繁荣ê人生，当然会kap世俗ê观点无仝，tī chit段圣经中，耶稣教学生ài如何建立繁荣人生ê秘诀。他用葡萄树ê比喻来说明，咱知影果子通常lóng结tī枝顶koân，所以繁荣ê条件，是连结tī基督耶稣ê chit-ê事实上，所有ê基督徒lóng是枝，siōng重要ê就是beh连结tī树枝chiah ē-tàng发挥枝应该有ê特质，因为基督徒beh kap有上帝祝福ê人生，伊必须先取tio̍h性命，因为若无性命，其他ê一切lóng是空壳。所以性命ê建立是基督徒灵命ê基本问题。同时chit-ê性命必须是属于耶稣基督ê性命，chiah ē-tàng有属于耶稣基督ê特质。人ê性命中，有真chē无仝ê领域，有人性命ê重心是tī事业，有人是tī酒色，有人是teh thit迌，有人是tī权力，有人是teh追求真理ê世界，有人soah是tī恶势力中，咱ē-tàng tùi现实ê状况去体会人生中各种无仝ê性命价值。

但是咱必须清楚一件tāi-chì，什么特质ê性命就会结啥物特质ê果子，建立tī酒色顶koân ê性命，所结ê to̍h是酒色ê果子，建立tī权力ê性命，所表现ê mā是chiah-ê腐化ê权力。基督徒ài认清咱性命是beh属于耶稣基督ê，咱是连结tī他ê枝，当然m̄是所有ê枝lóng会真繁荣茂盛ê结果子，tú亲像做田人所种ê果子树仝款，仝一欉果子树顶koân，有一kóa枝仔结实累累，有一kóa枝仔soah完全m̄结果子，只有好看ê外表，咱会记得主耶稣tī马太二十一章有一段咒忏只有茂盛ê外表soah m̄结果子ê无花果树，tī现实ê教会生活中，确实mā有chit种状况，受tio̍h仝款ê教示kap教会生活，有一kóa基督徒有理想ê信仰生活表现，有一kóa表现平平，有一kóa人颠倒成做福音ê阻碍，chia-ê种种lóng说明基督徒无仝ê性命层次。

咱ē-tàng koh-khah详细来思考chit种情形，来省思今á日咱ê属灵性命。是啥物原因造成你bōe-sái结果？是所khiā ê位无正确，或者是bōe-sái充分吸取teh灵命成长时所必须ài ê养分？是啥物原因，啥物环境，阻碍你灵命ê成长？基督徒必须认清咱ê性命确实是属于基督徒ê，若无会成做hông弃绝ê废料，上帝创造人是beh荣耀上帝chiah m̄是成做废料，咱若bōe-tàng完全了解chit-ê事实，咱ê人生就真有可能成做hông弃绝ê人生。

基督徒信仰生活ê特质是teh结连主，「因为离开我，lín就bōe-sái做啥物。」（十五章5节）虽然人费尽心机beh脱离上主，生活tī自我ê世界，但是用基督ê立场来讲，生活tī无上帝旨意ê人生中，chit种ê人生是了然--ê。咱ē-tàng tùi信仰ê角度来看chit-ê问题，约翰福音二十一章，彼得kap耶稣ê学生beh去掠鱼，圣经写讲in归工劳苦soah啥lóng无得tio̍h，chiah-ê人lóng是真有经验ê讨海人，而且鱼群真chē，为啥会啥物lóng无？主因是当时学生ê生活，无合主ê旨意，因为主基督要求学生ê m̄是去掠鱼，是去传福音hō͘世人。 Tī信仰ê世界，基督徒必须清楚chit-ê事实，基督徒若m̄是生活tī主ê旨意中，伊to̍h是teh浪费性命，若详细省思咱ê生活状况，咱bōe pháiⁿ体会出chit-ê真理。

问题ê重点tī：主真清楚kā咱讲「若我离开我lín就bōe-sái做啥物」这是gōa-nih á悲哀ê人生！人生存在ê目的，是teh用繁荣，丰盛当做人生phah拚ê方向，但是若人生状况ná亲像当时ê学生，归工劳苦soah啥物lóng无，这kám m̄是人生真大ê悲哀mah？「事实kap愿望相违背」是人生siōng大ê不幸，主因to̍h是人无kap主结连，自然就无属于基督ê性命。

二、 时常tī主内面
有属灵ê性命了后，基督徒必须谨慎经营这属灵性命ê成长，这to̍h是基督徒ê信仰生活，好亲像咱ê肉体仝款，一个性命到世间了后，chit-ê性命必须ài经过真chē成长ê过程chiah ē-tàng有正常ê发展，譬如自出世了后ê性命，必须ài吸收养分来得tio̍h滋润，hō͘性命正常成长，通常一个人beh达tio̍h结果子（人生生活ê成就或者khang-khè）必须ài经过二、三十年ê时间，自出世到受教育，koh经过专业ê训练，chiah ē-tàng负担人生ê重任。对chit项tāi-chì，耶稣教学生「Lín ài时常tī我里面，我mā时常tī lín里面，枝若无时常tī葡萄树顶koân，家己就bōe-sái结果子，lín若无时常tī我内面，mā仝款án-ne，我是葡萄树，lín是枝，时常tī我内面ê，我mā时常tī伊内面，chit种人就加结果子，因为离开了我，lín就bōe-sái做啥物」（十五章4～5节），tī-che二节经文中非常清楚kā咱讲，基督徒kap基督耶稣ê关系，是ài不时tī主内面「Lín若时常tī我内面，我mā一定时常tī lín内面」来说明chit种基督徒属灵性命ê互相来往，tùi chit种属灵性命ê结合，基督徒ài得tio̍h属灵ê滋润来吸收他ê话（养分），建立有耶稣基督气质人生内涵，chit种有耶稣香气ê信仰者真自然会实践有神ê疼ê人生出来，kā福音传扬到人间，这to̍h是主耶稣所讲，结实累累ê信仰生活，因为tī chiah-ê基督徒ê身上，hiah-ê人会发现「Lín若互相sio疼痛，众人就会知影lín是我ê门徒阿」。

这是基督徒信仰生活非常重要ê过程，因为每一个基督徒若ē-tàng真正用chit段经文来确立咱信仰生活，tiāⁿ-tiāⁿ用耶稣基督ê心做心，建立kap耶稣基督完全通顺ê来往，耶稣基督ê灵一定会降tī chiah-ê人身上，基督徒mā有充分ê属灵性命表现，表现出属于耶稣ê信仰ê生活内容，真自然就ē-tàng tī人间实践伟大ê基督教信仰，来彰显基督，这是咱教会存在ê使命，mā to̍h是基督徒存在ê siōng大价值，基督徒ài tiāⁿ-tiāⁿ有chit种信仰ê决志，了解基督徒ê人生目的teh彰显耶稣，当基督徒有chit种共识ê时，伊就会有chit种tī主内面ê人生内涵。

咱必须时常ùi耶稣tī马太福音二十一章ê教示得tio̍h启示，因为繁荣ê意义to̍h是结实累累，m̄是tī枝叶茂盛，这是咱信仰生活tiāⁿ-tiāⁿ有ê毛病。

三、 愿意接受主人ê修剪
若bat亲身实行chit方面ê khang-khè ê人，lóng有chit种经验：Ài有phông-phài ê果实，必须ài有相当程度ê修剪，这tī园艺kap果农中是一个重要ê学问。修剪ê时当然会有一kóa心疼，这是必然ê，但是为tio̍h beh hō͘伊有khah美好ê结果，主人必须ài án-ne做，mā是无经过修剪--ê通常lóng bōe有好ê结果。一个基督徒beh结实累累，的确ài经过chit-ê过程。园丁用大小无仝ê器具，用siōng适当ê方法来处理，有时是剪掉乱枝老枝，hō͘伊生koh-khah好，thang好结果子，有时会除去虫害，虽然虫害开始ê时真pháiⁿ发觉tio̍h，但是细腻ê园丁一定真清楚伊ê影响，有时用自然ê方法，有ê时用药仔去thau虫，以免虫害会影响tio̍h正常ê成长，妨碍tio̍h结果子。

基督徒ài了解取舍ê真理，当属灵世界有杂枝出现，主人一定会kā伊修剪，另外tī基督徒ê属灵性命中若有虫害ê时，主人mā必须除去这弊病，因为只有án-ne，chiah有可能结实累累chiah会完成受托ê使命。

基督徒ài了解伊存在ê价值是teh结实累累，hō͘天父上帝得tio̍h应该得tio̍h ê荣耀，这是基督徒人生siōng主要ê目的。

基督徒teh得tio̍h属于基督ê灵命了后必须ài时常tī主内面chiah ē-tàng彰显出耶稣基督ê特质。当然tī基督徒信仰ê成长过程中，mā有可能产生杂枝来影响tio̍h生活内容，有时mā会tio̍h虫，比如信仰生活ê缺失、迷失或者失败ê信仰生活等等，chiah-ê对基督徒ê存在lóng有负面ê影响，tú-tio̍h chit-ê情形，基督徒ài有谦卑接受修剪或者除掉虫害ê心态，因为chiah-ê 无正常ê杂枝kap虫害，对基督徒ê信仰lóng有负面作用，若无修剪消除，有时会影响tio̍h基督徒整体ê信仰。Tī教会性命中有时咱会看tio̍h tī基督徒身上发出ê杂枝，若无改善，tiāⁿ-tiāⁿ会成做基督徒败亡ê主因！教会生活中真che7chit种例。

基督徒ài用严谨ê心思不断来省思观察，咱ê信仰是m̄是有chit款杂枝kap虫害？这是信仰成败ê关键，bē-tàng 无谨慎！

结论：繁荣ê人生是人生存在ê方向kap目标，主耶稣真清楚kā咱讲繁荣人生ê真实ê内涵。期待tùi约翰福音十五章1～16节chit段圣经会有真正ê体会。