《草地囝仔做牧师》

 | | | 转寄

教会ê使命

作者 林宗要 2010.11.14

路加福音二十四章44～49节

近年来台湾教会时行福音二千年运动，koh有相当koân ê目标，大家对chit-ê问题各人有无仝ê意见，比如taⁿ只chhun二、三年时间，教会是m̄是ē-tàng达成伊ê目标，这是一个值得思考ê问题。

长老会ê倍加运动（十年久）配合当时ê教会环境，淡薄á有收成，m̄-koh自1967年了后，虽然有各阶段ê宣教运动，比如新世纪宣教运动、忠仆运动kap十一增长运动，lóng研拟了相当程度ê内容kap目标，但是soah无法度照安 排来完成宣教ê果实。

这实在是教会ê重大课题，mā是牧师kap长执tiāⁿ-tiāⁿ思考ê问题，尤其是身为牧师ê人，伊ê生活中所关心ê to̍h是kui-ê教会ê成长，过去台湾教会tiāⁿ-tiāⁿ用chē当做评鉴传教者ê指标。

聘请牧师ê条件之一，tiāⁿ-tiāⁿ是看伊过去所牧会ê教会是m̄是理想，但是有ê时chiah-ê mā m̄是绝对--ê。

因为传教者kap教会ê关系，有真chē因素形成，尤其是教会ê环境，往往是形成教会成长ê主要原因，教会若有适当ê传教师去牧会，可能对教会ê成长有正面ê作用，但是若无全体会友ê配合，自然mā bōe成功，这是事实。大部分ê传教师lóng期待教会ê运作，正常chiah有生机、有理想ê表现，但是教会所存在ê社会境况kap教会本身ê作为，mā是一件重大ê事实。尤其是teh剧变ê现实社会中，教会ê存在的确ài面对真chē问题kap挑战。当环境发生变化ê时，自然界ê生物就会自动调整家己来适应新环境，求得生存，chē mā是今á日ê教会必须认真思考ê事实。过去台湾教会流行一句话：福音无变，社会teh变，传道应变，soah-koh有人讲：世界上siōng oh改变ê有二项，to̍h是宗教kap传统，所以宗教tiāⁿ-tiāⁿ kap现实社会脱节。Teh牧会上tiāⁿ-tiāⁿ tú-tio̍h chit类ê问题，譬如：Tī拜堂内受争议ê活动，乒乓比赛、跳土风舞，讲台顶koân kám ē-tàng hō͘ gín-á khiā teh司会等等问题。

巴特（Barth）强调时代中ê传教者应该一手提圣经，一手提报纸，chiah bōe hō͘时代筛掉。

Teh剧变ê社会中，教会当然bē-tàng kap社会妥协tháu脱，bē-tàng违背圣经真理原则，但是教会mā bōe-sái kap社会脱节，因为教会是tī现实ê环境中，chit种教会无脱离现实ê情形，是教会事工复杂ê所在，tī chit种情形中，教会ê营运，传教者ê心态，必须ài有ná主耶稣所讲：「灵巧kap智慧」，chiah ē-tàng完成教会ê使命。因为教会生活ê环境siuⁿ复杂，若无chit种智慧kap灵巧，实在真pháiⁿ应付。

Tī chit种社会变迁中ê教会，beh如何适应，chiah ē-tàng传福音，这是教会ê使命。当然tī异教社会中，beh广传福音确实真艰苦，而且处处面对挑战ê事实。教会beh完成受托ê使命chìn前，教会必须成做一个受祝福ê教会，到底受祝福ê教会有什么特色？是人数？财力？气质？或者信仰ê内容？

Tī现代教会中，通常提起成功ê教会，tiāⁿ-tiāⁿ会想tio̍h韩国教会，确实，tī chit-má ê基督教国家，基督徒渐渐衰弱，khah受肯定ê教会是韩国教会、阿根廷ê五旬节教会、洛杉矶水晶教会等等，lóng有khah优秀ê表现，主要teh人ê增长（自然财力mā会增加）。

有一ê学者研究韩国教会增长ê几项要件：
1) 教会充满异象，差不多所有ê韩国基督徒lóng期待in会成做二十一世纪世界ê宣教中心，in有一个异象，因此共同向chit-ê目标迈进。
2) Tī圣灵ê真正合一，本来人tio̍h是自私--ê，基督徒mā仝款，除非充满圣灵，若无真pháiⁿ克服人性ê弱点（比如本位主义），m̄-koh in真正克服私己，用真实共同体ê性命去经营in ê信仰生活。
3) 是祈祷ê教会koh肯背十架tòe tio̍h基督，祈祷山tùi韩国传入，kui暝祈祷真普遍，为福音贡献家己kap一切，为真理kap公义敢争取kap愿意受苦ê心志……。比如真久chìn前国会通过使用有象徵佛教记号ê银钱，教会起来反对，三百万基督徒决心m̄使用，最后政府收tńg去重新发行。
4) 基督徒有爱心kap事奉主ê心，真正ê实践道理ê人，实实在在将福音印证tī生活，chit种信仰ê解释是siōng ē-tàng感动人，基督徒有活ê见证，chiah ē-tàng发挥基督ê香味。
5) 勇敢传福音ê热情，所有ê基督徒对真理（圣经）真清楚了解，会记得ê基督所托负教会ê使命。

相信教会有chiah-ê表现，应该是真理想ê存在，的确会建立teh成功ê境界，发挥教会应该有ê使命。

一、 宣教ê异象
受祝福ê教会，是完成主所托付ê使命，主基督托付教会ê使命，记tī马太福音二十八章19～20节「天顶地下所有ê权柄lóng赐hō͘我啊，所以lín ài去hō͘万民作我ê门徒，奉父仔kiáⁿ圣灵ê名，hō͘ in施洗，只要我所吩咐lín ê，lóng教示in遵守，我就时常kap lín同在，一直到世界ê最后。」所以一个成功ê教会，必须ài有chit种完成大使命ê异象。咱若看使徒行传十六章6～10节保罗一行tī亚西亚加拉太hit位，bat得tio̍h基督圣灵ê指示，保罗tī特罗亚ê时，看见一个异象，to̍h是有一位马其顿人向保罗讲，请过来马其顿帮助咱。Chit-ê异象对当时保罗一行是非常重大ê影响，in认为这是上帝ài in去马其顿传福音。这是保罗tī亚西亚ê第二次传道，in ê目的地是隔壁ê庇推尼，是tī亚西亚ê东北，但是tī-cha保罗看见一个异象，基督ê灵不准in去庇推尼，同时mā听见有人讲：「请过来马其顿帮助阮」，chit-ê异象，to̍h是保罗将福音传入马其顿ê腓立比城ê关键，tī-chia虽然因为基督ê福音受尽苦楚，但是mā建立一间理想ê腓立比教会，虽然保罗tī-chia ê表现ê是一小步，但是tī基督教历史上soah是一大步。因为tùi保罗chit-ê行为soah形成了基督教出入欧洲社会，chit-ê举动是起因tī异象，mā to̍h是上帝ê灵ê指示，主ê圣灵引chhōa保罗in到马其顿。本来in是beh去庇推尼，m̄-koh上帝之灵soah指引in去马其顿传主ê福音ê明确指示，虽然了后in到马其顿ê传道无一定是顺境，但是信仰者只有一项事实to̍h是顺服上帝ê指示，因为这是教会ê使命。

现代教会ê重大使命，就是ài有像保罗chit种信仰ê心态，放弃主观自我ê主张或者选择，真诚听从上帝ê指示，当然chit种信仰ê境界是需要不断克服自身ê软弱，一直仰望主基督ê生活，chiah ē-tàng真正听tio̍h圣灵ê声音。Tī台湾教会中，四界lóng有灵恩运动，教会若无警醒，无细腻to̍h会造成负面ê结果，教会需要追求圣灵ê充满，但是必须是teh正常生活中，有上帝ê灵ê生活发挥。同时koh-khah需要有宣教ê异象tī每一个基督徒心中，因为伊是教会ê大使命，这是指基督徒心中ê意念kap实际生活上有chit种福音ê见证。Mā to̍h是tī基督徒身上chhōe出--来（看会tio̍h）福音ê气质，对教会ê成长自然有正面ê作用。

也to̍h是，基督徒ê生活对教会有正面积极ê意义，to̍h是完成chit种大使命（圣诗三○八首第三节），因为咱所ē-tàng做ê就是án-ne！譬如咱ê心态，对别人ê感情，日常生活中ê积极态度，教会生活ê和谐，家庭生活ê圆满，人际关系ê良好等等，虽然kan-nā tī咱ê生活上ê细项tāi-chì，但是伊lóng是传福音siōng好ê工具，通常引人入信ê lóng是chit-kóa细项ê基督徒生活ê结果。

二、 完成异象ê必具条件——信心
当基督徒体验tio̍h异象ê时，伊ê生活中必须有推动伊ê动力——信仰ê存在。

Tī基督教史上有真chē伟大ê传道人，tī in ê传教生涯中，咱看出一ê共同特色，to̍h是chiah-ê名牧身上有非常强大ê信心。比如日本ê田崎健作牧师募捐建堂ê tāi-chì，少年ê时tī西阵教会，会友lóng是工人kap学生，教会经济能力真bái，bat一次聘请名牧木村牧师来培灵会，结束ê时hông指名问道：「Beh tòa-tī chit种破糊糊ê教会到tang时？Kám无勇气建堂？」只来二年，koh无经费，木村牧师命伊提出认捐册，ài伊先写落来beh捐jōa-chē，经木村牧师ê huah-hiu鼓吹，认捐bē少，但是mā是不够经费ê十分之一，田崎咬指头tī白手巾上画十架表示决心，禁食祈祷三工了后正式出去募捐，先去chhōe一位心中ê理想者，hông拒绝，灰心失志ê时，医生派三轮车来载伊，讲—着昨晚ê tāi-chì，受tio̍h真深ê感动（平常田崎对这医生印象真bái）替伊治病，然后自动捐献koh写三封绍介批，但是募捐iáu无理想。后来hông绍介去chhōe三井ê大cha-bó͘-kiáⁿ——广冈浅子，嫁广冈家，翁婿是beh食m̄讨趁，家运败害，浅子向细姨讲，翁婿hō͘你，我boeh去挽回家运，重建家庭，但是精神郁卒悲哀，困为tī人生问题，就进入大阪教会入洗归主。两人相见ê时，浅子一看又koh是捐献？看tio̍h我就捐献！田崎回答讲：m̄情愿ê钱无稀罕，若是真诚ê心，一kho͘ mā真感激，浅子讲你是真趣味ê青年，好！明仔载早起九点来三井tau见面，因为hit日天气无好，田崎穿插koh无啥好，hō͘管理员认为是m̄是chhōe m̄-tio̍h人，通报了后，浅子出来，先整理穿插kap洗脚，问伊是m̄是决志做牧师？当然！若惊三井ê大门就免想beh做牧师。贵族、好额人、苦恼chē，用伊做例，难得你有牧师ê使命，我ē-tàng答应负担一半ê金额，但是对你无好处，尽力去做，若有问题koh来。田崎终其尾用信心克服万难，chiah完成事工，当然必须ài自觉chit条路是艰苦ê路，但是只要有信心，就ē-tàng完成使命。

会记得tī读者文摘看tio̍h美国大学校长ê条件：
1) 会晓募捐。2）有政治手腕。3）优秀ê学者。 真chē伟大ê名牧kap教会ê成功，lóng是建立tī无比ê信心顶koân。台湾ê华神teh经营上khah有chit种信心ê表现。二十年前只有四、五十人ê师生，敢起五千万ê神学院，若无相当ê信心是做bē到ê！但是in kan-nā推动二、三年就kā伊完成。

旧约时代先知以赛亚、耶利米受召ê时，in lóng有听见一个声音，我boeh差siáng neh？若m̄是信心ê回应是无法度完成上帝所托付ê使命。

问题ê重点teh召命献身，是回应上帝ê呼唤siōng好ê事实，伊是确立tī一个基督徒ê救恩ê体验chiah形成基督徒ê信仰ê价值观，chit种信仰ê价值观建立，to̍h是基督徒信仰ê内容，mā to̍h是完成教会使命ê siōng好工具。

这to̍h是咱教会一直teh强调ê——基督徒信仰生活ê强化，透过教会各方面无仝ê事奉kap聚会，加强基督徒信仰生活ê内容，用hō͘基督徒ē-tàng成做一个名符其实ê基督徒，chiah ē-tàng完成受托ê使命。

三、 行动
基督徒（教会）有了异象，必定ài用信心做根基，而且koh付出积极ê信仰行动，chiah-ê lóng是互相关连，lóng是beh完成教会ê使命所bē-tàng或欠缺--ê。

主基督teh行神迹ê时，tiāⁿ-tiāⁿ要求当事人有chit种信心行动ê配合，相信主ê话，然后to̍h是家己ê行动，提起家己ê褥子行（约翰福音五章9节），完成信仰是信仰ê行动。基督徒ài如何才能有真诚ê行动，siōng主要ê to̍h是体验信仰（Ài有真诚ê悔改，chiah ē-tàng迎接圣灵来充实家己），然后去实行疼上帝kap疼人ê信仰生活，真正ê信仰kap生活，记会ê 以前有一部电视影片，叫浩劫余生：德国军官负责虐待犹太人，用尽方法杀害in，一旦执行害死六千名犹太人，tī圣诞暝soah kap kui家伙坐tī圣诞节树脚，唱诗庆祝主ê降生。看tio̍h chit-ê场面内心感受有淡薄á深，tī-che状况中ài如何去看信仰ê问题？Tī基督徒ê信仰现实中，无一定是一帆风顺ê信仰路径，不断有真chē人生ê问题kap阻碍，因此基督徒必须ài学习phah拼kap灵巧，mā to̍h是像头前所讲ê主基督吩咐学生必须ài有智慧像蛇，纯洁像粉鸟，确实用chit种灵巧kap智慧ê信仰生活，会帮助基督徒完成信仰ê使命。Tī咱ê社会生活中，咱tiāⁿ-tiāⁿ会听tio̍h一句话，hit-ê人ê头亲像khōng-ku-lí，tēng-khok-khok m̄知变通，无可能接纳别人ê意见（明知影têng-tâⁿ iáu-koh坚持！），chit种心态对基督徒ê信仰生活有负面ê效果，的确tī基督徒ê人生生活中会有真chē问题，基督徒ài有智慧kap纯洁ê心，机智koh灵巧ê面对问题，chiah ē-tàng建立信仰美好ê结果，koh有一机智ê例：古早时代殿试ê时主考官出题目：三寸格仔内写三千字：所有ê人lóng拼性命写，只有一ê人无写，teh交卷chìn前写了「化三千」！结果伊录取啊，基督徒ài了解信仰生活是主所交托ê使命，beh将基督ê福音绍介hō͘ hiah-ê人，mā to̍h是咱beh将什么款ê基督徒绍介hō͘别人？To̍h是讲hō͘人啥物？Siōng好ê事实to̍h是你必须ài成做基督福音ê见证！Mā to̍h是别人tī你ê身上看tio̍h基督ê事实，这to̍h是保罗所讲--ê成做基督ê香气，以利teh信仰ê传播，chiah-ê lóng是基督徒信仰生活ê内容，虽然是真细ê tāi-chì，但是伊lóng是成全教会大使命ê工具（圣诗三○八首）。

结论：有一个日本学者访问德国，看见西柏林ê朝气，soah下结论讲：市民ê气魄kap phah拼，人民ê支持kap合作，环境ê配合。M̄管任何人才或者理想ê事业，若失去周围ê同情或者合作，to̍h无简单有成就，基督徒ê信仰生活koh-khah需要整体ê结合，建立共同心态，做伙向仝一目标去完成使命。